JOHAN 8

1(lausikei Jisuje Oliv Shongh to haukei. 2Ngeyang enyu hao lembüchem to nyibou ngaikei. Müt pendou hao jungto loukei; hoba hao setkei hoba haoen la lenla khangkei. 3Ngühkhüm lenbou shuong si Farisi shuongei asangalanbüa lapbü yaksa che leibakei. Haoenei sao kho haoen si Jisu kanglanga lotikei, 4#NA 22.22-24 hoba hao to laukei, “Lenbou, ho yaksa ho asangalanbüa ikshat lapbei. 5Ngühkhüma Mosaei kheibü yaksa kho laangei tetettijan dogo doakei. Nyi ai laula?” 6Hao attilabü shanga, hao takteiko haoenei kho ngüh laukei. Lausikei Jisuei ngomjung atkei hoba ikjishouei kaoa dokei. 7Ladang haoenei hao to phedang lekei, hao pienan haoen to laukei, “Kan yoa ao to shabü aki haoei shaang sao to laangei tetashi.” 8Nyiboula hao ngomjung atkei hoba kaoa dokei. 9Ladang haoenei kho ditkei haoen jaishoubou ka khangan che chea satkhümbei, hoba lotian phobü yaksa yoa Jisu mütpem joutikei. 10Jisuei pienan sao to laukei, “Yaksa, haoen lan ki? Aoeikei no ayukti lo?” 11Saoei laukei, “Yaangbou, aoeikei ayukti.” Hobaje Jisuei laukei, “Ngeikei no ayuktida. Ngaiashi; ladangkei nyibou shabü teshon.”)

Jisu Kaodak Ngesakbü

12Nyiboula Jisuei haoen to joyoko laukei, “Ngo kaodak ngesakbü. Aoei küphai semda hao ladangkei nakthüha apailabü, lausikei langkeibü ngesakbü kilabü.” 13Farisi shuongei hao to laukei, “Nyi ka shangabü aukabü künda; kaibü aukabü kho ngühmai aying.” 14Jisuei haoen to jongaikei, “Ngei kü shangabü aukabü kuasikei, ngeibü aukabü kho ngühmai ki, aieilausi ngo laka loukei, ayingsi ngo lato haudaje ngei ngeakei; lausikei ngo laka loukei hoba lato hauda kanei angekei. 15Kanei phe aedang ka matjemda; ngeije aomat ajemda. 16Ngei mat jemasikei ngeibü matjembü kho ngühmai ki, aishanga ngo müt- pem aying. Ngo hautibou Bou kü yoa kia. 17#NA 19.16 Müt nyieibü aukabü kho ngühmai ki dogo kaneibü Ngühkhüma doakei. 18Kü shangabü aukabü kubou kho ngo ki, hoba ngo hautibou Bouei kü shangabü aukabü kuda.” 19Haoenei hao to laukei, “Kabou lanei ki?” Jisuei jongaikei, “Kanei ngokei Boukei angekei. Kanei ngo ngekei tegüje, kanei Küboukei ngelabü.” 20Haoei habü ngüh ho lembüchema lenjinei nam thanshanga laukei. Aoeikei hao alap, aieilausi haoeibü jih mosüh.

Ngo Haushang to Kan Ohaulabü

21Haoei haoen to laukei, “Ngo satda hoba kanei ngo lamlabü, lausikei kan kaneibü shabüa hailabü. Ngo lato haudaje kan khüto alouenlabü.” 22Jihudabü shuongei laukei, “‘Ngo laeto haudaje kan loula athük’, dogo haoei laudabü haoei hao lolo haitilep sai?” 23Haoei haoen to laukei, “Kan phang ka; ngoje thük ka. Kan ho kaodakeibü; ngoje ho kaodakeibü aying. 24Khoei ong ngei kan kaneibü shabüa hailabü dogo laukei; aishanga kanei ‘Ngo Kho Hao Ki’ dogo maialem longa kan kaneibü shabüa hailabü.”

25Hibü haoenei hao to laukei, “No ao?” Jisuei haoen to laukei, “Khangla thama ngei kan la kho ong lendanai. 26Ngei kan shangabü lenla hoba matjemlabü juong kia; lausikei aoei ngo hautikei hao ngühmai ki, hoba ngei hao ka ai ditkei ngei kaodak la lenda.” 27Haoei haoen to Bou shangabü lauda dogo haoenei ange. 28Jisuei laukei, “Ladang kanei Müteibü Shou tonenlaje kheijinei ‘Ngo Kho Hao Ki’, hoba ngei jembü hauei ai akümda lausikei ngei habü ho Bouei küla lenbü tegü lauda dogo kanei ngelabü. 29Hobaje aoei ngo hautikei hao kü yoa ki. Haoei kü mütpem üpyokei, aishanga ngei ponpendou hao maanghaibü kümda.” 30Haoei habü laujinei juongnyuei hao to mailembei.

Dongebü hoba Aao

31Jisuei hao to mailembü Jihudabü shuong to laukei, “Kanei kü ngüha lealonga, kan maimaitham ngeibü eikshuong; 32hoba kanei ngühmai kho ngelabü hoba ngühmai khoei kan dongebü yeitilabü.” 33Haoenei hao to jongaikei, “Kün Abraham thensilen, hoba ladangkei aoeibü aaolakei alekei. ‘Kan dongebü yeilabü’, dogo nyi lai küman lauda?” 34Jisuei haoen to jongaikei, “Ngühmaia ngei kan to lenda, aoei ong shabü shonda, hao shabü aao. 35Aao kho chema ponpen akida; shoumaije ponpendou kida. 36Yingsije Shouei kan do ngetia longa, kan maimaitham dongebü yinglabü. 37Kan Abraham thensilen dogo ngei ngeakei; lausikei kanei ngo haitila komeida, aieilausi kan to kü ngüh athüngda. 38Kübou yoa ngei ai hapbei kho ngei kan to lenda; lausikei kanei kaneibü bou ka ai ditkei kho kümda.”

39Haoenei hao to jongaikei, “Küneibü bou Abraham ki.” Jisuei haoen to laukei, “Kan Abraham shousi yinga tegüje kanei Abraham kümsilei kümbhoulabü. 40Lausikei Mühghaü ka ngühmai ngüh ditan kan to lenbou kho ngo, hoba tou kanei ngo haitila komeida. Abrahamei ho aküm. 41Kanei kaneibü boueibü kümsilei kümda.” Haoenei hao to laukei, “Kün khongshou aying; Mühghaü kho ong küneibü Bou ki.” 42Jisuei haoen to laukei, “Mühghaü kaneibü Bou tegüje kanei kü to sanoulabü, aishanga ngo Mühghaü ka loukei, hoba tou hanei kia. Aishanga ngo ngeibü jembü hauei alou, lausikei haoei ngo hautikei. 43Aila kanei ngei lenbü ashuokenda? Aieilausi kanei ngeibü ngühlang ditla asomda. 44Kan kaneibü bou shabü mühghaü ka ki, hoba kaneibü bouei maangtakbü kümla kanei maangangda. Hao khangbü ka thama müt haitibou kikei. Hao ngühmaia alo, aishanga hao to ngühmai aki. Ladang haoei amlangbü laulaje haoei jembü maangpon ka lauda, aishanga hao kho yepeibou hoba yepeibü bou ki. 45Lausikei ngei ngühmai lauda, khoei kanei kü to maialemda. 46Kan yoa aoei ngeibü shabü lenenla? Ngei ngühmai lausi kanei aila kü to maialemda? 47Ao Mühghaü ka ki, haoei Mühghaü ngüh ditda. Kanei aditbü tetlabü kho kan Mühghaü ka aying.”

Jisu hoba Abraham

48Jihudabü shuongei hao to jongaikei, “No Samariabü hoba kato shabü sou kia dogo künei kato tükde alen si?” 49Jisuei jongaikei, “Kü to shabü sou aki, lausikei ngei Kübou la soumo kuda hoba kanei kü la soumo akuda. 50Ngei jembü soneikangbü alamda; kho lambou hoba matjembou che kia. 51Ngühmaia ngei kan to lenda, atei kü ngüh jungeia longa haoei ladangkei haibü ühüplabü.” 52Jihudabü shuongei hao to laukei, “Tou künei kato shabü sou kia dogo ngekei. Abraham hoba thuseibü shuong haikhüma hoba nyi, ‘Atei kü ngüh jungeia longa haoei ladangkei haibü ühüplabü’, dogo lauda. 53Küneibü bou Abraham, ao haia, hao to no yaangbou sai? Thuseibü shuongkei haia. Nyi jembü lolo ao dogo lauda?” 54Jisuei jongaikei, “Ngei ngo lolo soneikanga longa, ngeibü soneikangbü ai aying. Ho Kübou, kanei ao to, ‘Hao küneibü Mühghaü’, dogo lauda, haoei ngo soneikangtida. 55Kanei hao angekei, lausikei ngei hao ngeakei; hoba ngei hao angekei laua longa ngokei kan tegü yepeibü yinglabü; lausikei ngei hao ngekei hoba hao ngüh jungeida. 56Kaneibü bou Abrahamei kü chalou hapla olinko chüheikei; haoei kho hapbei hoba olinkei.”

57Jihudabü shuongei hao to laukei, “No po anjinsem aonkei, hoba nyi Abraham hapbei si?” 58Jisuei haoen to laukei, “Ngühmaia ngei kan to lenda, Abraham abukjinei ‘Ngo’ kho kiteikei, hoba hao kho ngo ki.” 59Haoenei hao to tetla laang hekei, lausikei Jisuei jembü lolo hukei, hoba lembüchem ka satkei.

Currently Selected:

JOHAN 8: CHANGBSI

Highlight

Copy