JOHAN 7
7
Jisu hoba Haonasi shuong
1 #
Lev 23.34-44 Kho phaia Jisu Galila paikei. Haoei Jihuda koletkei aishanga Jihudabü shuongei hao haitila lameikei. 2Tou Jihudabü Dip lem nyangko kikei. 3Hibü haonasi shuongei hao to laukei, “Ka eikshuongeikei nyi kümbü kümsilei yaangbü haplabü lele ho kaoen apyoashi hoba Jihuda to hauashi. 4Aishanga aoei hao pühdaka shentimang sühda, haoei huphanga ai akümda. Nyi khübü kümda longaje no lolo kaodak la haptiashi.” 5Aishanga haonasi shuongei ongkei hao to maialem. 6Jisuei haoen to laukei, “Kü shanga tükdebü jih molousüh; lausikei kan shanga jihsi- phai kho ponpen lamleakei. 7Kaodakei kan mangsenla athük, lausikei hoei ngo mangsenda aieilausi haoeibü kümsilei shuong amai dogo ngei kho shanga aukabü kuda. 8Lem khüto kan angashi. Ngo kho lem to üangda aishanga ngeibü jih molousüh.” 9Haoei kho lauan phaia hao Galila thüngkei.
Jisu Dip Lema Yobü
10Lausikei ladang haonasi shuong lem khüto angkei, kheijinei haokei, pühthea ayingko, huphanga angkei. 11Jihudabü shuongei hao Lem khünei lambo laukei, “Hao lan ki?” 12Noknyüha hao shangabü aeibou nyamnyam- yokei, atei laukei, “Hao müt maibü yingkei”, lubüei laukei, “Aying, haoei noknyüh ayinglamto leida.” 13Lausikei Jihudabü to hatla, aoeikei hao shangabü pühthea alau.
14Ladang Lemjibou sühkei, Jisu Lembüchem to angkei hoba lenla khangkei. 15Jihudabü shuong maangpangkei hoba laukei, “Ho mütei ditletbü akiko lai küman webü songsido khütetche hapbei?” 16Jisuei haoen to jongaikei, “Ngei lenbü kho kü ngüh ji, lausikei ngo hautiboueibü ki. 17Müt atei hao maangangbü kümla maangangsije, ngei laubü kho Mühghaü ngüh si, ayingsi ngei jembü hauei laudaje kho haoei ngelabü. 18Aoei haoeibü jembü haua laudaje haoei jembü soneikangbü lamda; lausikei aoei hao hautiboueibü soneikangbü lamda, hao ngühmai; hao to asaopobü aki. 19Mosaei kan la Ngühkhüm aku lo? Khei yingasikei aoeikei Ngühkhüm ajungeida. Kanei aila ngo haitila komeida?” 20Noknyühei jongaikei, “Kato shabü mühghaü kia. Aoei no haitila komeida?” 21Jisuei haoen to jongaikei, “Ngei kümsilei che kümbei hoba kan tou sühko khoei maangpangda. 22#Kao 17.10 Mosaei kan la kiplabü phejan kukei kho Mosa ka aying, lausikei pisibousi ka laobou kanei Nounyet mangkei kipda. 23Mosa Ngühkhüm alulimla shanga müt cheei Nounyet mangkei kipda longaje, Nounyet ngei müt che maisho maitikua dogo kan kü to maangpokda lo? 24#Lev 19.15 Tang ka chühbüei mat tejem lausikei kaneibü matjembü kho tangbü yingshi.”
Hao Messia kho Sai?
25Jerusalem kabü mütshuong atei laukei, “Ho haoenei haitila komeibü müt kho aying lo? 26Lausikei chühashi, haoei pühthea lauda hoba haoenei hao to ai alauda. Ho Messia yingkei dogo seneibü khuleibü danei tükde ngebü yinglaoma? 27Senei ho müt ho lakabüje ngeakei; lausikei ladang Khrista loulaje, aoeikei hao lakabüje angelabü.” 28Jisuei lembü chema ngekko laukei, “Kanei ngo ngekei hoba ngo lakabüje kanei ngekei. Lausikei ngo jembü hauei loukei aying, lausikei ngo hautibou kho ngühmai ki, hoba hao kanei angekei. 29Ngei hao ngekei, aishanga ngo hao ka ki, hoba haoei ngo hautikei.” 30Haoenei hao lapla haujembei, lausikei aoeikei hao to ik ashat, aieilausi haoeibü jihsiphai mosüh. 31Noknyüh juongei hao to mailembei hoba laukei, “Ladang Khrista kho loulaje, ho mütei kümbü amaa- philabü to aei haoei kümlep lo?”
Lombü shuong JisuLapla Hautibü
32Noknyühei hao shangabü nyamnyamyobü Farisi shuongei ditkei, hoba ungshedbü shuong si Farisibü shuongei hao lapla khusabü shuong hautikei. 33Jisuei laukei, “Ngo kan yoa longche kilabü hoba ngo hautibou jungto haulabü. 34Kanei ngo lamlabü, lausikei kanei ngo ühüplabü hoba ngo lan ki kan loula athük.” 35Jihudabü shuongei haoen lolo lauyokei, “Senei hao ühüplabü lele hao lato haula kümeida? Hao Jihudabü linan Grikbü yoa kibü yoto hauan Grikbü la lenla kümeida sai? 36‘Kanei ngo lamlabü, lausikei kanei ngo ühüplabü, hoba ngo lan ki kan loula athük’, dogo laubü haoeibü ngüh kho ai tetlabü?”
Langkei Dei Shumang
37Lem thonla, youjemnyet, Jisuei loenan ngekko laukei, “At dei lasije kü jungto kaiya hoba yungashi. 38Laishibaei laubü tegü, ‘Aoei kü to mailemda hao ka langkei dei shumang koulabü.’ ”
39Aoyouei hao to mailembei haoenei ai Soushou sungletla kiteikei kho shangabü haoei laukei, aieilausi Soushou kho mokuko kikei, aishanga Jisu mo sonei akangkei.
Mütshuong yoa Janyinbü
40Ladang noknyüh yoa atei khübü ditkei haoenei laukei, “Maimaitham ho Thuseibou kho ki.” 41Lubü shuongei laukei, “Ho Khrista kho ki;” lausikei atei laukei, “Galil ka Khrista longlep lo? 42Dawid lilabü ka, hoba Dawid kibü Bethlehem sang ka Khrista kho longlabü dogo Laishibaei alenkei lo?” 43Hibü noknyüha hao hangshong janyinbü longkei. 44Haoen ateije hao lapmang sühkei, lausikei aoeikei hao to ik ashat.
Jihudabü Khuleibü shuongei Maialembü
45Kheijinei khusabü shuong ungshedbü shuong si Farisi shuong jungto loukei hoba haoenei haoen to laukei, “Aila kanei hao aleiba?” 46Khusabü shuongei jongaikei, “Aoeikei ho mütei laubü tegüje alaukei.” 47Farisi shuongei haoen to jongaikei, “Kankei ayinglamto leilangtia sai? 48Seneibü khuleibü ayingsi Farisibü atei ongkei hao to mailema si? 49Lausikei ho noknyüh, aoyouei Ngühkhüm kho angekei haoenje shedsikhau baua.” 50Lausikei haoen yoa che, Nikodema, ao Jisu jungto shangied loukei, haoei haoen to laukei, 51#Leiy 23.1 “Shaangla müt khoeibü ngüh ditan achühko, hoba haoei kümbü alamenko, seneibü Ngühkhümei hao mat jemda sai?” 52Haoenei hao to jongaikei, “Nokei Galil ka sai? Laishiba phanashi hoba Galil ka thuseibü ao alongda dogo nyi ngelabü.”
Asangalanbüa Lapbü Sao Che
53(Hobaje haoen mütpem weko lulu chem to ngaikei;)
Currently Selected:
JOHAN 7: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
