KAOBAK 9
9
Noa To Mühghaüeibü Thesilan
1Hobaje Mühghaüei Noa hoba haoeibü shousi shuong haükuko laukei, “Lang hekko haashi hoba kaonyu shentiashi. 2Hobaje kaodak meisiau pendou hoba mühkabü au shuong pendou hoba kaoa paibü yangsikok pendou hoba yungnyua kibü ngau pendouei ka to hattilabü; khübü pendou ka ik to jinkuda. 3Ngei kan la pikshik shaula kubü tegü lang kibü topeibü meisiau shuong pendou shaula shanga kuda. 4Lausikei kanei kho yoa langkei thonbü sii ashaujan. 5Hobaje maimaitham kaneibü sii, kho kaneibü langkei sii, ngei hilabü; meisiau pendou ik ka hilabü; hoba jaisina ik ka ngei müteibü langkei hilabü. 6#Mt 26.52 Aoyouei ong müteibü sii angtilaje mütei haoeibü sii angtilabü; aieilausi Mühghaü phatbüa müt kümbei.
7“Hobaje kan lang hekko juong haashi; kaonyudaka bukko juongko khonei juongnyu haashi.”
8Kheijinei Mühghaüei Noa hoba haoeibü shousi shuong yoa hao to joyoko laukei, 9“Chühashi, ngei tou kan yoa hoba kan phainei kaneibü thensilen to ngeibü thebülanbü kaangkhühtham khangdayaüda, 10hoba kan yoa kibü langkeibü meisiau pendou yoa, au si samkeisamuk yoa hoba kaodak yangsikok pendou yoa longchem ka longbü meisiau pendou yoa ngei ho khanglabü. 11Hobaje ngei kan yoa ngeibü thebülanbü kaangkhühtham khangko, khei lang kibü pendou ladangkei yungsenei ashemtilabü; hoba kaodak maulabü lele ladangkei yungsen aikei akilabü.” 12Hobaje Mühghaüei laukei, “Ngo hoba kan yoa langkei kümbü pendou kanglanga loulabü meten sühko ngei thebülanbü tetsida ho kümda. 13Ngei sangmeia yepukshangjep phokuda, hoba ho ngo hoba kaodakbü kanglanga thebülanbü tetsida kilabü. 14Hobaje hai longlabü, ladang ngei kaonyu thüka sangmei nyengan yepukshangjep kho sangmeia haplaje, 15ngeibü theyolanyobü ngüh, laobou ngo hoba kan hoba phe thonan lang kibü meisiau pendou ham kanglanga kia, kho ngei damenlabü hoba deiei phe pendou mautilabü lele touje yungsen ladangkei aloulabü. 16Hobaje yepukshangjep kho sangmeia kilabü, hoba Mühghaü si kaodaka kibü phe yoka langkei kibü meisiau pendou ham kanglanga kibü thon akibü thesilan damenla shanga ngei hato chühlabü.” 17Hobaje Mühghaüei Noa to laukei, “Ho thebülanbü tetsida, laobou ngo hoba kaodaka kibü langkei pendou kanglanga ngei kaangkhühtham khangayaüa.”
Noa hoba Haoeibü Shousishuong
18Noaeibü shousi shuong aoyou longchem ka longkei khübü kho Shem, Ham, Jafet kikei; hoba Ham Kananeibü bou kikei. 19Haoen sem kho Noaeibü shousi kikei, hoba haoen ka kaonyu pendou shenko haakei.
20Hobaje Noa sekmoubü la yeian semlühlaak lekei. 21Hobaje haoei ih yungan jaketkei hoba hao mütkong neichema kiteikei. 22Hobaje Kananeibü bou Hamei bou mütkong hapan haoeibü jaisina müt nyi to tangto angan lenkei. 23Hobaje Shem si Jafetei nei che sungan kho haosieibü phaka peian phaito hauan haoeneibü bou mütkong kibü küplepbukei hoba haosieibü thenyek phaiae sepeian haubü ka haosiei haoeneibü bou mütkong kibü kho ühüp. 24Hobaje Noa hao ihei jakbü ka pienan hao shou napeibouei ai kümbei kho ngean apbei
25Hobaje haoei laukei,
“Kanan shedsikhau yingshi!
Hao haoeibü jaisinasi shuongeibü phangkabü aaola lelabü.
26Tokei haoei laukei,
Shemeibü Mühghaü Bunyubou haübou yingshi;
hoba Kanan Shemeibü aao yingshi.
27Mühghaüei Jafet#JAFET: tetlabü Haabüyaangbü yaangentishi,
hoba hao Shemeibü neichema kitishi;
hoba Kanan haoeibü aaola yingtishi.”
28Yungsen louan phaia Noa po 350 kikei. 29Hobaje Noa salangbü po 950 kikei, hoba hao haikei.
Currently Selected:
KAOBAK 9: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
