KAOBAK 8

Dei Hapjung Ngaibü

1Mühghaüei Noa hoba hao yoa longchema kibü lang kibü meisiau pendou hoba samkeisamuk pendou damenkei; hoba Mühghaüei kaodaka yei che dantikei hoba dei kho hapjung ngaikei. 2Yungnyu deikük hoba mühkou khinkei hoba müh ka lang loubü thakan apbei. 3Hobaje kho kaodak ka athakko hapjung ngaikei, hoba chalou saongao to anjinsem penan phaia dei kho shijung ngaikei. 4Hobaje lit nyetboubü, hoba chalou anthüknyetboubüa longchem kho Ararat shongha otkei. 5Hobaje lit anboubü sühko dei kho athakko hapjung ngaikei; lit anboubü chalou shaangbounyet shonghkhu shuong hapbei.

6Hobaje chalou saonyi kian, Noaei haoei dangbü longchem kou ipbei, 7hoba haoei aukhomakmak che hautikei; hoba kaodak ka dei kho aushongko hau longei dogo seengeikei. 8Kheijinei kaodaka dei hapbeilaoje dogo ngela haoei hao jungka dukutuk che hautikei; 9lausikei dukutuk khoei pakshang ühüpsije hao jungto longchem to nyibou sepeijung longeikei; aieilausi kaodak pendoua dei kikei. Hobaje haoei jembü ik shingan leian sungan hao jungto longchemmaang to leiyetkei. 10Haoei tokei chalou nyet haiyeikei hoba nyibou haoei dukutuk kho longchem ka litikei; 11hoba dukutuk kho hao jungto chasem longeikei, hoba chühsi haoeibü sembunga oliv buyik sangtüngbü anan kikei; hibü Noaei kaodaka dei hapa dogo ngekei. 12Hobaje toukei haoei chalou nyetnyet haiteian dukutuk kho hautikei; lausikei kho hao jungto sepeijung aloungai.

13Noa po 601 shaangbou lit khangnyet dei kho kaodaka ulangtham apbei. Kheijinei Noaei longchemdak yukbü kho sungan apan chühsi kaodak ulangtham kiteikei. 14Nyiboubü lit chalou saoto nyetboua kaodak kho lepde ulangtham apbei.

15Kheijinei Mühghaüei Noa to laukei, 16“No hoba kayak, ka shousi shuong hoba haoeneibü yaksi shuong yoan longchem ka longashi. 17Phea nyenbü meisiau, ausiyuk, kaoa shanbü yangsikok pendou longchem ka sungenashi, khoei ong haoen bukko shatko sitko juong haakoyaangko haulabü.” 18Hibü Noa, hao shousi shuong, hao yak, hoba shousieibü yaksi shuong longchem ka longkei. 19Meisiau, ausiyuk, shanbü yangsikok phang penko longchemmaang ka longkei.

Noaei lembüsabü

20Kho jiha Noaei Bunyubou shanga laangshongei lemshon che yaükei; hoba saopobü meisiau hoba au weko ka sungenan haoei laangshongei yaübü lemshona khümbo juokbü lembü kukei. 21#2 Kor 2.15 Hobaje Bunyubouei ponlem maibü jemoukei; hoba Bunyubouei jembü maangpona laukei, “Ngei müt laüa kaonyudak la nyibou shedsikhau akulabü, aieilausi müteibü maangpona nashoudangka thama dambü amaibü ki. Khei yingsikei ngei lang kibü pendou nyibouje ashiakoelabü.

22‘Kaonyu ki shongko

Langjinbü jih si youlatbü jih

Khamsilüh jih si sanglem jih

Sulang si poang

Chalou si nangnak

ladangkei ananglabü.’ ”

Currently Selected:

KAOBAK 8: CHANGBSI

Highlight

Copy