Mak 6

Esis Nasaretisi sowa' alafugaha Jisas

(Mt 13:53-58; Lu 4:16-30)

1Jisas nohafel nakwaha wambel anama nafe' wambel ananinai ofagama Nasaret naloma alupumi ananimi. 2Nemaf anama sapoma noma'wanai sa'i Sabat nataga, nafe' nawis ipat esis Juda sa'i basef sapeinai na'ipasa basef Godi amam nematawa, same'ana sohafel gegelalasis sa'i, “Aman anama nofa' basef amama eti? Emi nase'ana gawa anama? Emi nagiambamana ma dei' nanda' pepel anama si'i God nanda'anai? 3Ape' magawa aman anama fowa' nanda' kamda nala' ifagw. Anan Maria nogaloma'w atona, nape wambeli. Anan sahalomam Jems naloma Josep, Judas naloma Saimon. Henitiamana ananiwai wape walomapa na'ae.”

Esis sa'iam na'ama opalef aoma anan, ea' sowa' alafugahana.

4Ea' Jisas na'ipas na'i, “Anona profet nofa' agel lu'unai anona wambel, sa'i anan dembinai safela agel ananinai sombale'efana. Ea' ina nofa' agel lu'unai wambel ananinai ofagama, wambota ananinai sapoma, owa'.”

5Na'ama Anan ina nanda' anom amamaga la'ifimi wambel anama, owa'. Anan nasa lagofa enis awes nanda'asi atona etin nanda'as bo'wes. 6Amam nematawa wambel Nasaretisi owa' sembale'efa Anan. Na'ama Anan nomonas matamea mafe'.

Jisas nase'ama maol alupumi ananimi 12-peleim

(Mt 10:5-15; Lu 9:1-6)

Ea' Jisas nakwaha wambel ananinai Nasaret nafe' na'ipasa basef Godi amam nematawa wambel hiagoma nape felefele'i. 7Ea' nofala alupumi ananimi 12-peleim mafi'mai Anan ea' nase'am agof lu'wami nanda'am la'ifima meatofa ambagof awami, ea' nasapa'am mafe' biam atom. 8-9Na'ipam na'i, “Ipe' ina pefa' gwa'aimi isalef moni molomepa, owa'. Ipe' pela su pehapila bandefah pendahe'amon pefe'. Ina pefa' siogw biam atom, owa'. Pefa' atona etin mondondaepa.”

10Ea' na'ipam wapoti' na'i, “Ipe' pefe' petaga anona wambel, i'i enis si'i a'e ma pefe' piowis ipat asasinai, ipe' pepe ipat anama atona palomas. Ea' pekwahona pehafel pefe'. 11I'i anona wambel owa' sofa'epa pefe' ifagw asasimi some' basef ipe'imi, ipe' penda'am na'ama. Pekwaha wambel anama pindilama nombol mail bo'wagah ipe'imi ma sitilipa sogawa waf aonai ofagena asasinai atona.”

12Ea' nasapa'am mafe' biam atom makwaha basef ma'i, “Ipe' pewa' alafugaha waf aonai, pemboma opalef pefe'ma God.”

13Ea' matofa ambagof awami mape epesi. Ea' mofa' wel bu'wami makolo'ma esis awes nanda'asi hiesi sataga bo'wes.

Aman anama Jon napisi'as embeli fowa' Herot nahana naga'

(Mt 14:1-12; Lu 3:19-20; 9:7-9)

14Dei' anona gavman king Herot name' basefa maol anama Jisas nali' nanda'anai. Dei' main, agel Jisasi nataga lu'una nafe'agon hi'alagon. Ea' enis amam nematawa sa'i, “Jon napisi'as embeli dei' nohafel wapoti' nape la'ifina nanda' maol si'i God nanda'anai.”

15Ea' enis epes sa'i, “Anan profet Elaija fowa'inai.”

Ea' enis sa'i, “Anan anona profet si'i profet amama fowa' ganimi.”

16Gavman anama king Herot name' na'ama ea' na'i, “Jon fowa' ae' atopa' bagato'wana, ea' dei' notanima nohafel wapoti' nanda' maol Jisasi.”

17-18Fowa' Herot nali' naso' nemata'w owalomana Filipi agili'wa Herodias. Ea' sahalomana Herot nandalombana'w. Ea' Jon nati waf anama na'ipana na'i, “Ine' naso' nemata'w sahalomenai, ea' nawala mi'uli Godi. Na'ama ina andeande', owa'.”

Ea' Herot nasapa' anom amam mafe' mombalo' Jon mofa'ana mafe' manda'ana nanda' kalabus. 19-20Ea' Herodias kwame' basef amama, okom aona endilisi ma Jon, kwa'i kohana afuna, ea' owa'etin. Herot anan umbamahanama Jon ea' numafiana andeande'. Amama atom akwa'w ina la'ifikwa kohana neaga', owa'. Herot nogawa Jon aman bu'unai Godi. Nemaf anama anan name' basef Jon na'ipanami, anan nomonas matamea, ea' umbamahana. Anan okom na'ina'i endilisi ma neame' basef ananimi.

21Ea' dei' Herodias kwagolopa anona eaf ma kohana neaga'. Herot nanda' anom gwa'aimi lu'wami ma okom nopoma nemaf anama mama'wana kolana. Anan nanda' gwa'aimi lu'wami ma anom dambami magiambamana ma maol gavmani maloma anom dambami mumafi amam soldia maloma anom dambami mape etap hiagoma Galili. 22Ea' amam dambami maloma Herot mape ma' gwa'aimi, ano'w nemata'w sa'ukwi awiawai'wi kwawisi nomon kwaitu kwalemb. Akwa'w Herodias nogama'w. Ea' Herot naloma amam dambami ukup maimaila akwa'w endilisi. Ea' na'ipakw na'i, “Ine' na'i ae' ese'ena maim amamaga? Ine' ni'ipiam ae' ma ese'enam.”

23Ea' Herot na'iam endilisi gani ilif na'i, “I'i ine' nihali' ae' ma ease'ena anom amamaga ine', ae' ese'enam. Ea' ine' ni'i ae' eawala amamaga ae'ami hiami ma'oh anama iliakwagoma ese'ena tu'wanim, ae' a'i a'e ma ese'enam. Ine' tu'wanim, ae' tu'wanim, dende'am etin.”

24Ea' akwa'w kwawisi ande' kwafe' kwahali' mama'wakw akwa'ukwi kwa'i, “Ae' atuwasi i'ipa Herot efa' maim amamaga?”

Ea' mama'wakw kwa'ipakw kwa'i, “Ine' ni'ipana ni'i nefa'ai balaga Jon napisi'as embeli.”

25Ea' kwandamboma kwawis nomon mehip kwahali' Herot kwa'i, “Dei' atef ae' a'i ine' neha Jon napisi'as embeli noga' netopa' balaga nola anona plet nefa'anai nese'eana.”

26Akwa'w kwa'iam na'ama, opaf Heroti nimanina endilisi. Ea' anan okom na'i basef endilisi gani ilif na'iam la'ifimi ea' amam nematawa hiesi sape salomana sa' gwa'aimi same'ana. Ea' ina ata' nosambala basef akwa'umi, owa'. 27Mehip Herot nasapa' anona soldia nafe'ma noha Jon noga' nofa' balaga nafi'i. Soldia anama nafe' ipat sanda' kalabusanai natopa' bagato'w Joni nofa' balaga 28nala anona plet nofa'ana nafi'i naso' Herodias nogama'w kofa'ana kwafe' kwase' mama'wakw. 29Ea' alupumi Joni mame' basef amama, mafi'i mofa' alop si'ina mafe' mawana hi'agif.

Jisas nase'as gwa'aimi epes hiesi 5,000-peleis

(Mt 14:13-21; Lu 9:10-17; Jo 6:1-13)

30Amam Aposel Jisasi dei' motanima mafi'i mandakolas malomana. Ea' mape manifa maol mafe' manda'anai ma'ipana basef hiami amam ma'ipasami. 31Enis amam nematawa hiesi safi'i safe' ea' Jisas naloma alupumi ananimi ina ata' anona nogotama meagwa' gwa'aimi, owa'.

Na'ama Jisas na'ipam na'i, “Wale, afa' atofa ofe' anagon wafiguma ma ata' tol opoma noma'w.”

32Ea' mofa' bot mafe' anama wafiguma epes a'agoma, amam atom mafe'. 33Owa'etin. Esis amam nematawa hiesi sogawa amam mafe'ma. Ea' esis hiesi sakwaha wambel hiagoma asasima sasagih safe' anama ea' sali' sataga anama amam ma'i meafe'ma. 34Ea' Jisas nafe'ma nisila' akata, nati esis hiesi. Natilis ina anona aman nape numafias, owa'. Esis sape si'i sipsip owa' enin epen nimafiase, ea' nati esis uwahipis nawalipasa basef bu'wami hiami. 35Wambomota felefele'ma owamb alupumi ananimi mafi'i ma'ipana ma'i, “Afa' wape na'ae wafiguma ea' wambomota felefele'ma owamb. 36Ine' nesapa'as sofo'o wambel aof asasinai deindei sape felefele' setala gwa'aimi maim sea'am.”

37Ea' Jisas nagwamam na'ipam na'i, “Ipe' etipa pese'as gwa'aimi.”

Ea' ma'ipana ma'i, “Ine' na'i afa' ofe' utalai bret ama 200 kina ose'esam? 200 kina otamba amama dondo' ma epen nenda' maol aomb 8-peleim nofa'am.”

38Ea' Jisas nahali'am na'i, “Ipe' bret ma'ufina na'oh? Ata' fo'o petolona.”

Ea' mafe' matolona ma'i, “Bret lagel wa'ana atona naloma agof biam hi'imi ma'oh.”

39Ea' na'ipam na'i, “Ipe' pi'ipa esis amam nematawa sope sefe' oto otowa otalef bu'wami.”

40Ea' sape safe' si'i amam ma'ipas, enis sataga 100-peleis, enis 50-peleis, na'ama etin. 41Ea' Jisas nafela bret anama wa'ana atona naloma agof biam naniga nati heven ilif nanifela God. Ea' nawalana naso' alupumi ananimi mafe' maso' esis amam nematawa hiesi hi'alas. Ea' nafela agof wapoti' nawalom nase'am mase'asam. 42Esis sa'am elihis hi'alas. 43Ea' alupumi ananimi matatama tukwakwanimi ma'ihi maolo'wam holalef lu'wami 12-peleim bret anama. 44Esis amam nematawa sa' gwa'aimi amama epes hiesi. Seamba amam atom mataga 5,000-peleim.

Jisas natoma nafe' embel ilif

(Mt 14:22-33; Jo 6:15-21)

45Dei' atef Jisas nasapa' alupumi ananimi mofa' bot mali' mafe' walemb batupa'manai lu'unai anama mambo fisana mafe' Betsaida. Ea' nasapa' amam nematawa hiesi safe' deindei. 46Nasapa'as safe', anan nandowasa' halaf nape na'i nonda' beten. 47Wambomota alupumi ananimi mape bot ata' mala walemb batupa'manai lu'unai la'afen. Ea' Jisas atona naitu akata. 48Ea' nati uf lu'unai nalo nafi'i anama amam ma'i meafe'ma, ea' nakoto'ma amam manda' pul masasapa' bot ekep paham endilisi. Owamb ata' nail etin felefele'ma leala, Jisas nailam natoma embel ilif nafe'ma amam. Ea' na'i nikila'am nefe'. 49Ea' mati anan naitu nafi'i embel ilif ea' ma'i anona gamba nailam nafe', ea' manda'am wi ge' ma'oh kwapete'am. 50Dei' main, amam hiami matolona ea' gegelalasom. Ea' mehip Jisas nalomam na'i, “Ipe' la'ifipa, umbamehepa owa'. Ae' atowe ma'uwi ailipa afi'i.”

51Ea' nalata bot nape nalomam, dei' atef uf faso'mana opalef amamumi gegelalasom kwapete'am endilisi, ea' mape ukup matamea mafe'. 52Dei' main, amam ina ata' ukup mape andeande'ma mogawa basef ofagema ma bret anama Jisas nase'asama esis hiesi sa'am, owa'. Ukup amamumi mase'am.

Jisas nanda' awes nanda'asi hiesi ambo'wes hi'alas anona etap lu'wagoma Genesaret

(Mt 14:34-36)

53Jisas naloma alupumi ananimi mowala mambo walemb batupa'manai anama mafe' mataga anona etap lu'wagoma Genesaret. Ea' mowa' bot nail, 54misila'i mafe' ea', esis mehip sati Jisas ea' sagawana. 55Ea' sasagih safe' anama hiagoma ganigani. Esis same' basefa Jisas napoma, ea' sefa' awes nanda'asi balatagw sofa'as safi'mai anan. 56Wambel hiagoma lu'wagon sa'ogon, naloma anama hiagoma Jisas nafe'ma, esis sambe' isima awes nanda'asi sa'oh la'afen. Ea' sofala Jisas mehip ni'i a'e ma isima sohapila lowaf ananinai da'malifinama atona. Ea' emi egafis sahapilanai sataga bo'wes wapoti' hi'alas.

Currently Selected:

Mak 6: aojF

Highlight

Copy