Mak 7

Basef mi'uli Godi mikila' basef bafasas ehasas sawalipasami

(Mt 15:1-9)

1Amam Farisi maloma anom mawalipasa mi'uli Godi, makwaha Jerusalem mafi'mai Jisas malipana. 2#Lu 11:38Ea' mati anom alupumi Jisasi ma' gwa'aimi owa' mosa'opa lagof mea' gwa'aimi si'i amam Farisi ma'iam, owa'. Ea' amam Farisi ma'i alupumi Jisasi lagof amamumi alogw mailam.#Niti futnot Matyu 15:2. 3Dei' main, amam Farisi maloma esis Juda hiesi hi'alas saila mi'uli anama esis akupasi. I'i esis sesa'opa lagof andeande', sea' gwa'aimi. I'i owa', owa'. 4#Mt 23:25Esis safe' maket setanima sifi'i, ma owa' sesa'opa lagof, ina sea' gwa'aimi, owa'. Esis saila mi'uli hianai naninani si'i mi'uli anama sofa'ana akupas asasisi. Sasa'opa kahi sospas, dis saloma belegw atom ama saila mi'uli akupasi.

5Na'ama amam Farisi maloma amam mawalipasa mi'uli Godi mahali' Jisas ma'i, “Dei maina alupumi ine'imi owa' mila mi'uli amam akupami? Lagof amamugumi alogw mailam magwa' gwa'aimi.”

6 # Ais 29:13 Ea' Jisas na'ipam na'i, “Fowa' gani profet Aisaia nendela'wifa ipe' endilisi, ipe' pa'i basefa malogof biamipei. Anan nanda'am andeande' dende'ma ipe' na'iam na'ama na'i,

God na'i,

‘Amam nematawa isima safela agel ae'anai lu'una malogof asasimi atom, ea' opalef asasimi mape laogona ae'. Ukup asasimi ina sembale'efa Ae', owa'.

7Esis ina sawalipasa basef ae'ami, owa'. Esis sawalapa mi'uli epes sape etapi, sambaso'mas sa'i, “Mi'uli anama basef Godi.” Ea' sanda' lotu safela agel ae'anai etin.’ ”

8Ea' Jisas na'ipam wapoti' na'i, “Ipe' pakwaha mi'uli Godi ea', dei' paila waf epes sape etapi atona la'ifipa.”

9Ea' na'ipam na'i, “Ipe' pegawa andeande' pa'i penda' waf bu'unai atona, owa'etin. Dei' pesambala mi'uli Godi ma paila waf ipe'inai atona. 10#Eks 20:12; Eks 21:17; Diu 5:16Fowa' gani Moses nawalipasa mi'uli anama na'ipas na'i,

‘Ipe' pinifela mamasepa ipe'isi pembale'efas pigiambamas.’ Anom wapoti' na'iam na'i, ‘Emi egafis si'i basef awamima ahapas mamasas asasisi, isima enis epes sohas soga'.’

11Ea' ipe' pambaso'am pa'i anom basef na'ama pa'i, Emi nindaiwa'ma nigiambama mamasan ni'ipas ni'i, ‘Otamba maim ae'ami andaiwa'ma ease'epam, ae' andandepama ease'anam God.’#Amamaga amama esis Juda sandandepama sease'anam Godi, esis sa'i isima Korban. Waf asasinai na'ama. Esis ina sose'anam enin epen, owa'. Sese'anam God atona. 12Ea' ipe' Farisi paloma ipe' pawalipasa mi'uli Godi, ipe' pa'i a'e ma epen inima nembaso'ma mamasan, ea' ina nagiambamas, owa'. 13Na'ama ipe' paila mi'uli fowa' gani pefa'ana akupipa ipe'imi, panda' waf anama pesambala basef amama Godi na'i ape' migiambama mamasapa. Ea' panda' waf ipe'inai atona panda' waf aonai la'ela'ef na'ama ina andeande', owa'.”

Amamaga awami mape opalef ape' epesi mawisi ande' manda'apa aopa

(Mt 15:10-20)

14Ea' Jisas nofalai amam nematawa hiesi wapoti' safi'mai anan ea' na'ipas anom basef womun etin na'i, “Ipe' hipei peme' basef ae'ami okokomam pegawam andeande'. 15#Ap 10:14-15Amamaga gwa'aimi maim ande'ami ipe' pegwa'am mowala mape nomon, amama ina monda'epa awepa, owa'. Ea' amamaga mape ukup ipe'imi nomon mawisi ande', amama atom manda'epa awepa. [ 16Ipe' aligah magalipei, ipe' peme' basef amama.]”

Ea' Jisas na'ipas na'ama, 17nakwaha amam nematawa isima hiesi nafe' nawis ipat. Ea' alupumi ananimi atom mape mahali'ana ma basef amama ofagema womun etin do'ok na'ipasami. 18-19Ea' na'ipam na'i, “Ipe' ina ata' pegawa! Amamaga gwa'aimi maim mape ande'i ina monda'epa awepa, owa'. Gwa'aimi amama sa'am mowala opalef nomon ea' mafe' sakam mafe' mowala dowah. Ea' ukup ipe'imi ina aom, owa'.”

Jisas na'ipasa basef amama na'i, “Gwa'aimi mamumami hiami hi'alam bu'wami atom mogwam.”

20Ea' na'ipam wapoti' na'i, “Amamaga mape epes opalef nomoni, ukup awami maim mataga ande', amama atom manda'epa awepa. 21Amamaga awami mape ukup nomon epesi mawisi ande' na'ama. Waf naninani aonai, ukup awami, waf sanda' so'a waulanai, wal, soha enis seaga'i, 22sohambombaga waf dase'amainai, waf kowalasanai, waf sa'i sofa' amamaga hiami ma esis etis, baso'amunai naninani aonai, sesambala basef, simbisambas, sa'i basef awami, ukup aoma enis epes, findiwa, safela agof asasimi atom lu'um, waf gawa a'anai. 23Waf anama naninani aonai, anama nape nomon ukup epesi nawisi ande' nanda'epa awepa.”

Nemata'w Finisiai'wi kombale'efa Jisas

(Mt 15:21-28)

24Ea' Jisas nohafel nakwaha wambel anama, nafe' Tair nafe' nawis anona ipat. Anan nandaiwa'ma enin epen negawa anan nape na'ama. Owa'. Anan ina nandambaho'. 25Ea' ano'w nemata'w kwame' basefa anan nape na'ama. Nemata'w akwama nogama'w akwa'ukwi sa'ukwi ambal aonai napai'w. Ea' mama'wakw mehip kwafi'mai Jisas kwindiwa nembawa kotowa felefele'ma bo'wagah ananimi. 26Akwa'w Finisiai'wi anona etap hiagoma Siria. Akwa'w ina Judai'wi, owa'. Kwa'i diga Griki. Ea' kwahali' Jisas mehipa netofama'wa ambal aonai nape nogama'w akwa'ukwi.

27Ea' na'ipakw anom basef womun etin na'i, “Ape' ata' mose'asa gwa'aimi awasi ape'isi sili'. Ape' ina mofa' gwa'aimi awasi ape'isi makwahom mafe'ma nombagw,#7:27 Niti futnot Matyu 15:26. owa'.”

28Ea' akwa'w kwagwamana basef Anan kwa'i, “Dembinai, ine' na'i endilisi. Ea' nombagw mafe' owina tebol matatama gwa'aimi mowa etapi magwa'am.”

29Ea' Jisas na'ipakw na'i, “Ine' na'iam na'ama andeande'. Ea' tanima fo'o. Ambal aonai nakwaha nogamena ine'ikwi nawisi nafe' ea'.”

30Ea' akwa'w kotanima kwafe' ipat akwa'unai, kwati nogama'w akwo'ukwi tol kwa'oh lahis, ambal aonai nakwaho'w nawisi nafe'.

Anona aman aligah maloma malogel mase'anai, Jisas nanda'ana bo'ona

31Dei' Jisas nohafel nakwaha wambel Tair, ea' nafe' nawis la'afena wambel Saidon. Ea' nakwaha Saidon nafe' etin nataga walemb batupa'manai lu'unai Galili ea' nafe' la'afena wambel 10-peleina Dekapolis. 32Ea' esis sao'wai anona aman nafi'mai Jisas, aligah mase'ana afega ananinai dindigina. Ea' ina na'i andeande', owa'. Na'ama esis sofala Jisas ma nesa lagela anan nonda'ana bo'ona. 33Ea' Jisas nao'wana amam biam mafe' makwaha esis amam nematawa hiesi amam atom mape. Ea' nasapa' faguf biam ananimi mawis aligah aman anama, wa'owa'ol. Ea' nisi'waf nasa faf afega aman anama, 34ea' Jisas naniga nati heven ilif, okom Ananinai nataga mehip, na'iam na'ama diga Hibrui na'i, “Efata.” Basef ofagema amama ma'i, “Ine' aligah mogal neme' basef ni'iam andeande'.”

35Ea' aligah magal, afega anainai nataga bo'ona ea'. Dei' na'i andeande'. 36Ea' Jisas na'ipas na'ama esis ina si'ipasa amamaga amama ma enin epen. Nape na'ipasa basef la'ifimi timbitambel. Owa'etin. Esis sawalapam sa'ipasam timbitambel seme'am.

37Ea' esis gegelalasis endilisi sa'i, “Amamaga hiami Anan nanda'ami nanda'am bo'om etin. Anan nanda' esis aligah mase'asi same' andeande', esis malagof mase'asi sega sa'i andeande'.”

Currently Selected:

Mak 7: aojF

Highlight

Copy