Matyu 17

Alop Jisasi nataga wanafigeina

(Mk 9:2-13; Lu 9:28-36)

1Nimeguf wanom mafe'ma hi'alam, Jisas nao'wa Pita naloma Jems naloma owalomana Jon nao'wam mondowasa' anona halaf launai. Nao'wa amam atom mape. 2Ea' mati alop ananinai wanifigeina endilisi. Ea' naep ananimi wanefigeim endilisi si'i owaf nowala naso' ea' luwaguf ananimi mataga afitim si'i lamifah mafifil. 3Ea' amam wanom mape dei' atef mati amam biam fowa'imi Moses naloma Elaija mataga maitu ma'i maloma Jisas.

4Amam mati amam wanom, Pita na'ipa Jisas na'i, “Dembinai, afa' wape na'ae andeande'. Ine' ni'i awi, afa' ola' aolah wanom na'ae, anona ine'inai anona Mosesi, anona Elaijai.”

5Anan ata' na'i etin, anom elagw afitimi mafifil endilisi mafi'i mili'akwa amam. Ea' anona malogel na'i natagai elagw amama na'i basef na'i, “Anan nogalome ae'anai, ae' okom nainailana endilisi ea' ae' okom nohafel naila waf ananinai. Ipe' peme' basef ananimi.”

6Amam alupumi ananimi mame' basef amama, umbamaham endilisi ea' mande' nembawa motawa mande' amagah etap. 7Ea' Jisas nafi'i felefele'ma amam nasa lagela amam na'ipam na'i, “Ipe' hafel. Ipe' ina umbamehepa, owa'.”

8Ea' amam masa'ma naep matologon ea', ina ata' mati enin epen, owa'. Mati Jisas atona naitu nalomam.

9Ea' amam ata' makwaha halaf makini' etin, ea' Jisas na'ipam mehip na'i, “Ipe' ina pewalapa amamaga amama dei' patulumi, pi'ipa enin epen, owa'. Pefe' dahama dahama nemaf anama ae' ataga epen endilisiwei ma sehe ega' etanima ehafel hi'agif wapoti', pi'ipas.”

10Ea' alupumi ananimi mahali'ana ma'i, “Dei' maina amam mawalipasa mi'uli Godi ma'i Elaija fowa'inai ata' nili' nifi'i?”

11Ea' Jisas nagwa basef na'i, “A'e endilisi, Elaija nifi'i nondondomba amamaga hiami motaga bo'om andeande'. 12Ea' dei' ae' a'ipipa, anona Elaija nafi'i ea'. Ea' esis amam nematawa ina sogawa anan, owa'. Sa'i anona epen. Esis saila ukup asasimi atom sanda'mana waf aonai endilisi. Ea' anona nemaf sonda'am na'ama etina sease'e nimanimi ae' ataga epen endilisiwei.”

13Jisas na'iam na'ama, ea' alupumi ananimi mogawa anan na'ipama Elaija anan womun etina Jon napisi'as embeli.

Jisas nanda' anona aman sa'unai ambal aonai napainai ambo'ona

(Mk 9:14-29; Lu 9:37-42)

14Amam mafe' mataga ma esis amam nematawa hiesi, anona aman nafi'i natagama Jisas nindiwa nembawa notaoma Anan 15na'ipana na'i, “Dembinai, ine' ni'i uwahipina so'uso'win aman ae'anai. Enin ambal aonai nanda'ana name' nimanimi lu'wami endilisi ma alop ananinai. La'ela'ef ambal anama nanda'ana newala nasef nif fandumi nafe' nowala embel la'ela'ef. 16Ae' ao'wana wafe'ma alupumi ine'imi ea' amam ina la'ifima monda'ana bo'ona, owa'.”

17Ea' Jisas nagwamama basef na'ama na'i, “Ipe' amam nematawa owa' pembale'efa ae'. Ea' opalef ipe'imi owa' mope andeande'. Nimeguf ma'um ata' epe elomepa? Nimeguf ma'um wapoti' ma efa' nimanimi ipe'imi? Ipe' fa'an pifi'mai ae'.”

18Ea' Jisas nagaola ambal anama aonai ea' nakwaha aman inima so'uso'win ea' dei' etef nataga bo'ona.

19Alupumi Jisasi atom malomana mape, mahali'ana na'ama ma'i, “Dei' maina afa' owa' la'ififa ma weatofa ambal anama aonai?”

20Ea' na'ipam na'i, “Bale'ef ipe'inai ata' sa'ona, Amama atom dei' ipe' ina la'ifipa, ata' owa'. A'e, ae' a'ipipa endilisi, i'i bale'ef ipe'inai so'ona, nendahama si'i nalelef sa'umi mastetimi lawag, nambimb ipe' pi'ipa halaf nani pi'i, ine' degia nefe' newala gani wa'ol, nendegia nefe'. Ipe' pembale'efa ae' la'ifipa, na'ama dei' la'ifipei ma penda' maolan hianai naninani. [ 21Owa' anona eaf peatofa ambagof amama awami, owa'etin. Pekwaha gwa'aimi ma penda' beten, ea' amama atom.”]

Jisas dei' na'ipas ea' bifa neaga' ma neahafel wapoti'

(Mk 9:30-32; Lu 9:43-45)

22Nemaf anama Jisas nao'wa alupumi ananimi mafi'i etin anama etap hiagoma Galili, ea' na'ipam na'i, “Ae' ataga epen endilisiwei, nambimb felefele' anona aman nose'asa ae' efe'ma lagof amam naumbih ae'ami. 23Ea' amam amama mohe ega'. Ama nimeguf biam hi'ilam ea', anona neafe'ma wanomi, etanima ehafel wapoti'.”

Ea' opalef amam alupumi ananimi nimanim endilisi.

Jisas natala takis ipat lu'unai Godi esis Juda sanda' lotuwanai

24Ea' Jisas naloma alupumi ananimi mataga anona wambel Kaperneam. Ea' amam mofa' takisa ipat lu'unai Godi mafi'mai Pita mahali'ana ma'i, “Dembinai tisa ipe'inai anan natala takisa ipat anama?”

25Ea' Pita na'i “A'e.”

Pita notanima nafe' nawis anona ipat nomon, ea' Jisas nali' nahali'ana na'i, “Ine' okom na'imama? Amam king dambami etapami mofa' otamba ma takisa wiga maima emi? Amam mofa'asa epes hiesi esis amam nematawa amamisi etis a'a enis epes anona wambota?”

26Ea' Pita na'i, “Ama enis amam nematawa anona wambota.”

Ea' Jisas na'ipana na'i, “Na'ama esis epes hiesi kingi ina satala takis, owa'. Sape etin. 27Ea' afa' undumafuma. Na'ama amam miti afa' owa' onda' takis, amam ukup numbutima afa' mi'i afa' epes aofai. Ea' dei' ine' fo'o la huk walemb batupa'manai anama ma niegiai aol anama nali'i ine' newala malogel aoli niti anona moni atona, moni anama dende' ma takisa afa' biafa. Ea' ine' nefa' moni anama nese'amana amam ama neatala takis isima afa' biafa.”

Currently Selected:

Matyu 17: aojF

Highlight

Copy