Matyu 16

Esis sa'i siti ikwaf la'ifinai si'i God atona

(Mk 8:11-13; Lu 12:54-56)

1Ea' anom Farisi maloma anom Sadyusi mafi'mai Jisas ma'i mogwambana ma anan ata' nonda' anona ikwaf la'ifinai si'i God nape heven ilifi nanda'anai ma ata' motolona. 2Ea' anan nagwamam anom basef womun etin na'i, “Ipe' pati otaga wambomota felefele'ma owamb ea' pa'i, ‘Otaga nasa'of akwahina. Na'ama atuwasi nogota bo'otama owaf nilowata.’ 3Ea' kuhimbita pa'i, ‘Otaga ilagw ea' alialim. Manda'am na'ama ma atuwasi uf nuluwi asaf nolai.’ A'e, ipe' pati ikwaf hianai ilifanai etapanai andeande' ea' dei' ipe' owa' pegawa ikwaf nogota anae' andeande'. 4Ipe' epes hiesi amam nematawa dei' pape etap anae' panda' waf aonai pewa' alafugaha God. Dei' pa'i piti anona ikwaf la'ifinai. Ea' ae' owa'etina enda'ana potolona, owa'. Ikwaf anama la'ifinai fowa' God nihi'amba profet Jona atona nambimb ihi'ambepana ipe'.”

Jisas na'ipam ea', nakwahom nafe'.

Basef womun etina yis amam Farisi maloma amam Sadyusi

(Mk 8:14-21)

5Ea' Jisas nao'wa alupumi ananimi mofa' bot mowala mambo walemb batupa'manai anama mataga fisana, ea' amam ukup mase'ama mofa' anona bret nolomam. 6Ea' Jisas na'ipam na'i, “Ipe' pindumafuma andeande' ma yis amama amam Farisi maloma amam Sadyusi!”

7Ea' amam mame' anan na'iam na'ama, amam manda'ipama ma'i, “Afa' ukup mase'afa bret na'ihi, dei' na'ipafa.”

8Ea' Jisas nogawa ukup amamumi na'ipam na'i, “Bale'ef ipe'inai ina la'ifina. Dei' maina ipe' panda'ipama pa'i, ‘Afa' bret a'afa?’ 9Ipe' ukup ma'i ma bret anama wanifina biefina esis hiesi 5,000-peleis sa'ana ma tu'wanina na'ihi, o owa'? Pakolasom paolo'wam holalef ma'um si'im? Ipe' ata' owa' pegawa? 10Ipe' owa' ukup mi'i bret amama 7-peleim nemaf anama hiesi 4,000-peleis sagwa'anai tu'wanina na'ihi pakolasom paolo'wam holalef ma'um si'im? 11Dei' maina ipe' owa' peagawa? Ae' ina a'ipipa bret endilisinai, owa'. Ae' a'i ipe' pindumafuma yis amama amam Farisi maloma amam Sadyusi.”

12Ea' dei' amam mogawa, anan ina na'ipama yis amama endilisimi, owa'. Anan na'i amam mundumafuma basef amam Farisi maloma amam Sadyusi mawalipasami.

Pita nawalapa basef na'i Jisas anan Krais God nandandepana nasapa'ana nafi'i

(Mk 8:27-30; Lu 9:18-21)

13Ea' Jisas nafe' naloma alupumi ananimi mataga felefele'ma wambel hiagoma Sisaria Filipai. Ea' nahali'am na'i, “Amam nematawa esis sogawa ae' ataga epen endilisiwei sogawa maina agel sanda'meana?”

14Ea' ma'ipana ma'i, “Enis sa'i ine' Jon aman napisi'as embeli. Enis sa'i ine' Elaija. Ea' enis sa'i ine' Jeremaia o enina profet.”

15Ea' nahali'am na'i, “Ipe' pa'i ae' emi?”

16Ea' Saimon Pita nagwamana basef na'i, “Ine' Krais, aman anama God nandandepena nasapa'ena nafi'i. Ine' nogalomana God ambal namunai napeinai.”

17 # Mt 17:5; Ga 1:15-16 Ea' Jisas nagwamana basef Pita na'i, “Saimon, ine' nogalomana Jonai, ine' nendanifel endilisi. Dei' main, ina anona aman etapanai nihi'ambena basef amae' na'iam, owa'. Ahalome atona nape heveni nihi'ambenam na'iam. 18#Jo 1:42; Ef 2:20Dei' a'ipina endilisi, agel ine'inai Pita, agel anama na'i owap.#16:18 Agel anama Pita diga Griki sa'i owap. Niti Jon 1:42. Nambimb ae' enda' maol la'ifinai ma sios ae'ami motoma owap anama ilif. Ama pepel anama ga'inai ina la'ifina nikila'a amam, owa'etin. 19#Mt 18:18; Jo 20:23Ae' nambimb ese'ena ki utainai ine' ma kingdom heveni. Amamaga ine' nehapilam nape na'ae etapi, amama anona nemaf God nohapilam gani heven ilif wapoti'. Ea' maim amamaga ine' nekwahom na'ae etapi, amama anona nemaf God nokwahom gani heven ilif wapoti'.”

20 # Mt 17:9; Mk 9:9 Ea' Jisas na'ipam basef la'ifimi na'i amam ina mi'ipasa basef amama enis epes mi'i Anan Krais, God nandandepana nasapa'ana nafi'i, owa'. Mombaho'ana.

Jisas na'i anan nambimb noga' notanima nohafel wapoti'

(Mk 8:31–9:1; Lu 9:22-27)

21Nogota anama Jisas nali' nahafel nihi'amba alupumi ananimi ma nambimb nofe' niwis Jerusalem ama agufumi Judai mease'ana nimanimi lu'wami. Amam dambami mawalipasa mi'uli Godi moloma amam pris dambami nambimb mose'ana nimanimi lu'wami anona mohana noga'. Ama nimeguf biam hi'ilama anona neafe'ma wanomi ea' notanima nohafel wapoti'.

22Ea' Pita nofa' Jisas nelefata nasa gemba ea' na'ipana na'i, “Dembinai, owa'etin. Ae' andaiwa' endilisi ma amamaga amama mogatagama ine', owa', hapaimi!”

23Ea' Jisas nandamboma na'ipa Pita na'i, “Ine' si'i Satan. Dei' main, ine' owa' okom ni'i okom Godi, owa'. Okom na'i nomonas epes sape etapi etis. Ine' nehopa eaf ae'anai, Si'amae nefe' alafuga ae'anai.”

24 # Mt 10:38; Lu 14:27 Dei' Jisas na'ipa alupumi ananimi na'i, “Ae' efa' nimanimi anda' maol Godi sehe ega' lawag usi'inai tu'wanainai. I'i emi egafis si'i sila ae', esis senda'am na'ama etin si'i ae' ma sieili. Ea' sehagofa ukup asasimi ma maina maol esis sa'i senda'anai. 25#Mt 10:39; Lu 17:33; Jo 12:25Emi egafis ukup mopoma ambagof asasimi atom si'i sihapilam tatala'im, anona nemaf ambagof asasimi higililam. Ea' emi egafis ukup mopoma ae' ma sesambala ambagof asasimi etap anae', anona nemaf God nofa'as sotanimani sopan andeande' la'ela'ef. 26I'i emi egafis seanda' maol naninani ma sofa' gwa'aimi wiga amamaga hiami etapami atom hegilialami, esis wapoti' hegililas solomam. Dei' amamaga amama anona nemaf migiambamas mi'imama? Owa'etin. Amama nambimb sefa' amamaga maima seatal ambagof asasimi ma setanima seawambilai ambagof asasimi wapoti'? Owa'etin. 27Ae' ataga epen endilisiwei, anona nemaf ae' ifi'i elomai amamaga bu'wami pepel nafifili noloma amam ensel ae'ami. Ama nemaf anama, ae' egwamasa amamaga hiami esis amam nematawa hiesi mondahama waf esis sanda'anai hianai. 28Ae' a'ipipa endilisi! Enis epes dei' saitu na'ae, esis ina nambimb soga' ulal, ata' owa', siti ae' ataga epen endilisiwei eape si'i dembiwai king iefi'i.”

Currently Selected:

Matyu 16: aojF

Highlight

Copy