Matyu 15

Mi'uli Godi nikila' basef bafas akwis

(Mk 7:1-13)

1Nemaf anama anom Farisi esis Judai maloma anom amam mawalipasa mi'uli Godi makwaha Jerusalem mafi'mai Jisas. Ea' mahali'ana ma'i, 2#Lu 11:38“Dei' maina alupumi ine'imi mumbisila' waf ape'inai akupapa mase'apenai? Ama amam owa' measa'opa lagofa#15:2 Amam Farisi ma'i esis owa' Judaisi waf asasinai aona. Ea' ma'i emi egafis safe' anagon eaf o maket, ma sitanima siefi'i ifagw, ata' sili' sosa'opa lagof ea' sea' gwa'aimi. Owa' seasa'opa lagof, amam ma'i lagof asasimi alugum. mea' gwa'aimi.”

3Ea' Jisas nagwamama basef na'i, “Dei' maina ipe' pawala mi'uli Godi ma paila waf ipe'inai atona? 4#Eks 20:12; Eks 21:17; Diu 5:16Ipe' pawala basef God na'iam na'i, ‘Ipe' pinifela mamasepa ipe'isi pembale'efas pigiambamas. Emi egafis si'i basef awami ma ahapas mamasas asasisi, isima enis epes sohas soga'.’ 5Ea' ipe' pambaso'am pa'i anom basef na'ama pa'i, Emi epen nindaiwa'ma nigiambama mamasan ni'ipas ni'i, ‘Otamba maim ae'ami andaiwa'ma ese'epam. Ae' andandepama ese'anam God.’ 6Ea' ipe' Farisi paloma ipe' enipa pawalipasa mi'uli Godi, ipe' pa'i a'e ma epen inima nembaso'ma mamasan, ea' ina nagiambamas.

Ipe' panda' waf anama pesambala basef amama Godi na'i migiambama mamasapa. Ea' panda' waf ipe'inai atona lu'una. 7#Ais 29:13Fowa' profet Aisaia nendela'wifa ipe' endilisi, ipe' pa'i basefa malogof biam. Anan nanda'am andeande' dende'ma ipe' na'iam na'ama na'i,

8‘Amam nematawa isima safela agel ae'anai lu'una malogof asasimi atom ande', ea' opalef asasimi mape laogona ae'. Ukup asasimi ina sembale'efa ae', owa'.

9Esis ina sawalipasa basef ae'ami. Esis sawalapa mi'uli epes sape etapi sambaso'mas sa'i, “Mi'uli anama basef Godi.” Ea' sanda' lotu safela agel ae'anai atona.’ ”

Amamaga awami manda' epes sanda' waf aonai

(Mk 7:14-23)

10Ea' Jisas nofala esis amam nematawa hiesi safi'mai anan na'ipas na'i, “Ipe' hipei peme' basef Ae'ami okokomam pegawam andeande'. 11#Mt 12:34Amamaga gwa'aimi maim ande'ami ipe' pegwa'am mowala nomon, amama ina manda'epa awepa, owa'. Ea' amamaga mape ukup ipe'imi nomon mawisi ande', amama atom manda'epa awepa.”

12Ea' alupumi ananimi 12-peleim mafi'mai anan ma'ipana ma'i, “Ine' negawa amam Farisi mame' basef amama ine'imi mandaiwa'mam opalef aoma ine'?”

13Ea' nagwa basef womun etina amam na'ipam na'i, “Ahalome ae'anai nape heveni nawa amamaga anona aof. Ea' amamaga hiami anan owa' neawami, amama anona nemaf nigiam moloma nombalef masilimb. 14Ipe' kwahowa amam Farisi ata' mopan. Amam si'i amam naep mase'ami ma'i mihi'amba eafa enis epes. I'i esis naep mase'asi si'i sihi'amba eaf enis epes isima naep mase'asi, atuwasi esis hiesi sondakolas dogwas sefe' sowala etin kwambiwag.”

15Ea' Pita nagwamana basef na'ipa Jisas na'i, “Ine' ni'i basef amama ofagema womun etina amamaga awami ma afa' ata' weame'am.”

16Ea' Jisas na'ipam na'i, “Ipe' wapoti' nomonas ata' a'epa? 17Ipe' owa' ata' pegawa! Amamaga ande'ami mawis malogofa mowala opalef, amama motanima mawisi ande' mafe' mowala dowah. 18Ea' amamaga mape ipe' nomon, ukup awami maim mataga ande', amama atom manda'epa awepa. 19Amamaga awami mape ukup nomon mawisi ande' amama. Ukup awami, waf soha enis seaga', waf sanda' so'a waulanai, ea' sonda' anona waf aonai si'i waf anama so'a waulanai, wal, baso'am, findiwa. 20Waf anama atona nawisi ande' nanda' epes awes. Ea' epes owa' seasa'opa lagof andeande'ma sea' gwa'aimi si'i amam Farisi ma'iam, amama ina manda'as awes, owa'.”

Nemata'w Kenani'wi kombale'efa Jisas endilisi

(Mk 7:24-30)

21Ea' Jisas nakwaha wambel anama nafe' gani wa'ol etap felefele'ma wambel anama biefina Tair Saidon. 22Ea' ano'w nemata'w Kenani'wi kwafi'i kofalana na'ama kwa'i, “O, Dembinai, ine' akunamana Deviti, ine' niti ae' uwahipiwi. Ambal aonai nahambombaga nogame ae'akwi endilisi ea' kofa' nimanimi endilisi.”

23Ea' Jisas ina nagwama'wa anom basef akwa'w, owa'. Ea' amam alupumi ananimi mafi'mai anan ma'ipana mehip ma'i, “Nemata'w akwama kwanda'am falafala kwagi'mafa. Ine' sapa'akw kotanima kofo'o!”

24 # Mt 10:6 Ea' Jisas nagwa basef na'ipa'w na'i, “God nasapa' ae' afi'i ma epes sape si'i sipsip higilalapi isima esis Israeli etis.”

25Ea' akwa'w kwafi'i kwindiwa nembawa kotawa felefele'ma anan kwa'i, “Dembinai, ine' nigiambama ae'.”

26Ea' nagwama'wa basef na'i, “Ape' ina mofa' gwa'aimi awasi ape'isi makwahom mafe'ma nombagw,#15:26 Akwa'w ina Judai'wi. Esis Juda sa'i epes owa' Judaisi sanda' waf aonai sofalas sa'i nombagw. Ea' dei' Jisas na'ipakw basef amama ma nombagw. owa'.”

27Ea' akwa'w kwagwamana basef anan kwa'i, “Dembinai, ine' na'i endilisi. Ea' nombagw mafe' owina tebol matatama gwa'aimi mowa etapi magwa'am.”

28 # Mt 8:10,13 Akwa'w kwa'iam na'ama, Jisas nagwama'wa basef na'i, “O, nemata'w, bale'ef ine'inai lu'unai. Dei' amamaga ina okom na'iami atuwasi meatagamena si'i ine' na'iam.”

Ea' nogota anama atona nogama'w akwa'ukwi ambo'okw wapoti'.

Jisas nanda' hiesi awes nanda'asi sataga bo'wes

29 # Mk 7:31 Jisas nakwaha wambel anama nafe' felefele'ma walemb batupa'manai Galili. Ea' nondowasa' anona halaf tol nape. 30Ea' esis amam nematawa hiesi safi'i satagamana sofa'ai esis awes naninani nanda'asi safi'mai anan. Enis bo'wagah awamisi, enis naep mase'asi, bihiguf mondola'asi, enis malogof mase'asi, awes naninani nanda'asi. Esis sofa'as safi'i sambe'as sa'oh felefele'ma bo'wagah Jisasi ea' nanda'as bo'wes. 31Ea' esis gegelalasisa sati epes isima naep mase'asi satologon, malogof mase'as sa'i, bihiguf mondola'asi ea' usi'im, bo'wagah awamisi ea' bo'om safe'. Ea' dei' esis hiesi safela agel God Israeli lu'una.

Jisas nase'asa gwa'aimi epes hiesi 4,000-peleis

(Mk 8:1-10)

32 # Mt 14:14 Ea' Jisas nofalai alupumi ananimi mafi'i na'ipam na'ama na'i, “Ae' ati esis amam nematawa isima uwahipis. Esis sape salome nimeguf wanom gwa'aimi a'as nolomahas endilisi. I'i ae' esapa'as sefe' etin utagw wambel asasima, siti noga atona sowa so'oh sefe' eaf.”

33Ea' alupumi ananimi ma'ipana na'ama ma'i, “Anae' wafiguma epes a'agoma. Atuwasi afa' ofa'ai bret eti ma weaso' amam nematawa isima hiesi?”

34Ea' Jisas nahali'am na'i, “Dei' ipe' bret ma'um ma'oh?”

Ea' amam ma'i, “Afa' bret 7-peleim ma'omafa maloma agof sa'umi kwasala'um.”

35Ea' Jisas na'ipa esis amam nematawa sope etap, 36nafela bret 7-peleim maloma agof amama nanifela God nawalom naso' alupumi ananimi ma mease'asam esis amam nematawa hiesi. Amam mase'as hi'alas dende'. 37Ea' sa'am dende' elihis andeande'. Ea' alupumi ananimi matatama tukwakwanimi ma'ihi makolasom maolo'wam holalef lu'wami 7-peleim si'im endilisi. 38Esis amam nematawa sa' gwa'aimi amama, seamba amam atom mataga 4,000-peleim. Ea' esis ina seamba awasi nematawa wapoti', owa'. 39Jisas nasapa'as safe' ea', anan nalata bot nafe' gani wa'ol walemb batupa'manai lu'unai anona etap lu'unai Magadan.

Currently Selected:

Matyu 15: aojF

Highlight

Copy