Matyu 18

Emi epen nepe dembeni ma kingdom heveni?

(Mk 9:33-37; Lu 9:46-48)

1Nemaf anama amam alupumi Jisasi mafi'mai anan mahali'ana ma'i, “Emi nikila' enis nataga dembeni endilisi ma kingdom heveni?”

2Ea' Jisas nofalai enin so'uso'win nafi'mai anan nahaponan naitu la'afena amam. 3Ea' na'ipam, “Ae' a'ipipa endilisi. Emi egafis si'i siowis kingdom heveni, ama sase'ana opalef God si'i awasi isima sa'i sase'ana opalef God, isima sanda'am na'ama anona nemaf siowis kingdom heveni. I'i owa', owa'etin. 4Emi egafis seape sa'umbili owa' seafela agof asasimi lu'um setaga si'i awani inima, epes isima ea' sikila' enis epes seape dembesi ma kingdom heveni. 5Emi egafis sese' opalefa sigiambama enin so'uso'win si'i ini' ma ukup asasimi mopoma ae', esis sase'e opalef ae' wapoti' sagiambame.

Waf aonai nahambombaga bale'ef amam nematawai

(Mk 9:42-48; Lu 17:1-2)

6I'i emi egafis seanda' enin epen so'uso'win nembale'efa ae'i nefe' nenda' waf aonai, epes isima sepe na'ama. I'i enis epes sofa' epes isima sepa' owap lu'unai nil bagafowa asasimi sofa'as sefe' sokwahis sowala naoh mami lu'wami, esis sope andeande' kwaukwawie'. I'i epes isima senda' enin so'uso'win nekwaha nembale'efa ae', epes isima anona nemaf sope awes endilisi sikila' sowala naoh afisi. 7Ipe' epes etapipei, ae' ati ipe' uwahipipa ma amamaga amama meagwambipei monda'epa penda' waf aonai. Endilisi amamaga amama anona nemaf meatagai, ea' emi egafis sonda'am meatagai, ae' ati esis uwahipis endilisi. Dei' main, anona nemaf sefa' nimanimi.

8I'i lagof o bo'wagah ipe'imi monda'epa pewa ma waf aonai, petopa'am pekwahom mefe'. Andeande' ma lagof bo'wagah atom mope ma ambal nopeipa pepan andeande' la'ela'ef. Ea' sefa'epa sokwahipa pefe' wambel aonai nif fandumi la'ela'efi. Anama ina nambimb pepe andeande', owa'. Pepe aopa endilisi. 9Ea' i'i naep ipe'imi monda'epa pewa ma waf aonai, pigiam pekwahom. Atom etin mope ma pefa' ambal namunai napeipa peapan andeande' la'ela'ef hihif. Na'ama naep biam mapomepa mofa'epa mokwahepa pefe' wambel aonai hel nif fandumi mape la'la'efi. Na'ama ina nambimb pepe andeande', owa'. Pepe aopa endilisi.

Basef womun etina enin mafin sipsip higilalanai

10Ipe' pindumafuma! Na'ama pi'i enin epen atitin sa'wini pi'i inima enin falafini, owa'. Dei' main, amam ensel asasimi mape heveni mumafi awasi isima andeande'. Ensel amama la'ela'ef mape felefele'ma Ahalome God nape heveni. [ 11Ae' ataga epen endiliswei, ae' afi'i ma eagolopa epes higilalasi efa'as setanimani.]

12Ipe' ukup ma'imama? I'i anona aman numafi anom sipsip 100-peleim ama anona atotona hegililana, aman amama ata' nokwaha sipsip amama 99-peleim mitu mea' otalef anagon dohotagw, anan ata' nefe' nogolopa anona hegilalanai. 13I'i nefa'anai, a'ipipa endilisi, atuwasi nondanifamana. Danifel ananinai nikila' nandanifel ma sipsip amama 99-peleim maituwi. 14Ea' na'ama etin Ahalomepa ipe'inai nape ilif heveni nandaiwa' ma enin epen so'uso'unai higililana, owa'.

Waf anama ipe' pinindinas enis sahin owan sanda' waf aonai

15I'i sahin owan sonda' waf aonai ma ine', ine' nefe' nitilin ipe' etipa pepe ea' nihi'amban waf aonai ananinai. I'i enin neme'ena, andeande', si'i ine' nofa'ai enin netanimani wapoti'. 16Ea' i'i enin owa' neme' basef ine'ifi, ni'ipa enis epes bies wapoti' ea' pefe' etin. Ama ipe' bipa o wanipa pefe'ma peame' basef epen inima ma peawaloga basef amama pi'i endilisimi atom. 17Ama i'i enin nindaiwa'ma neame' basef ipe'ifi, ine' ni'ipa esis Kristen hiesi sondatama etifigin ni'ipasan. Ama enin ni'i nindaiwa'ma neame' basefa esis Kristen hiesi wapoti', ine' nekwahin nepe si'i isima owa' seagawa Godi, o si'i amam amama awami mofa' takisi.

18Ae' a'ipipa endilisi! Amamaga ipe' pahapilam etap anae', amama anona nemaf God nohapilam mape gani ilif heven wapoti'. Ea' amamaga amama ipe' pekwahom etap anae, amama anona nemaf God nokwahom gani heven ilif wapoti'.

19Ea' ae' a'iam endilisi ma ipe' wapoti'. I'i ipe' bipa pape etapi ukup mefe' atifigina anom amamaga, pi'i penda' beten pehali' Goda nease'epa amamaga amama, ea' andeande' Ahalome ae'anai napani ilif heveni nambimb nese'epam ipe'. 20Dei' main, i'i epes bias o wenis ukup mapoma agel ae'anai ma sunduwa'anima sope etifigin, ae' ape alomas.”

Basef womun etina nanda' maoli owa' okom nease'ana wiaf anona nanda'manai

21Nemaf anama Pita nafi'i nahali'ana na'i, “Dembinai, nimeguf ma'uma'um sahin owan ae'asi sonda'me waf aonai ae', ma eakwahamasana? Nimeguf 7-peleim o ma'um?”

22Ea' Jisas na'ipana na'ama na'i, “Ae' ina a'ipina nimeguf amama atom 7-peleim, owa'. Ae' a'i ine' nekwaha waf aonai esis sanda'minanai nimeguf hiami 490-peleim.

23Dei' main, esis siowis kingdom heveni si'i anona dembinai king na'i nogawa wialef mapoma amam manda' maol ananinai mapoma ma'um. 24Ea' anan nanda'am nogawam andeande'ma nonda' amam meagwamana wiaf, ea' sofa' anona aman safe'ma anan. Ea' aman anama nowaola wiafa moni lu'unai 10 milian kina. 25Ea' anan moni a'ana ma neagwan dende'ma niembi wiaf anama anan nowaolamasana. Ea' dembinai king na'ipas na'i esis setala aman anama noloma waulu'mana awasi ananisi ma sonda' maol akupi ea' setala amamaga asasimi wapoti' sofa' moni ma seagwa wiaf anama.

26Ea' aman anama nowafa notawa etapa naep king anama dembinai na'ipana na'ama na'i, ‘Ine' niti ae' uwahipiwi nepe nehafa ae'. Anona nemaf ae' egwamena wiaf anama hi'ilana ma ine'.’ 27Ea' dembinai anama nati owahipina nakwahomana wiaf ananinai nafe' wafifina.

28Ea' aman anama nawisi ande' nati anona amam atom manda' maol etini, anan nowaola wiafa moni kwawie'in si'i 10 kina. Ea' nombalo' aman anama nowa'ana sisihina bini'w anani'wi na'ipana na'i, ‘Ine' negwame wiaf ine'inai hi'ilana!’

29Ea' aman anama nowafa notawa etap ea' na'ipana basef la'ifimi na'i ‘Ine' niti ae' owahipiwi ea' nepe nehafa ae'! Nambimb egwamena wiaf ine'inai hi'ilana.’

30Ea' anan nandaiwa'. Ea' nofa'ana nafe' nanda'ana nanda' kalabus, ama nepe neagwa wiaf anama. 31Amam mandao'oma manda' maoli mati amama, opalef amamumi nimanim endilisi mafe' mawalapa amama ma dembinai amamunai.

32Ea' dembinai nofalai aman anama nanda' maoli ea' na'ipana na'i, Ine' aman nanda' maol aonai. Do'ok ine' naloma ae' nalef, ea' akwaha wiaf anama lu'unai ine'inai hi'alana. 33Ae' ati ine' owahipina, ea' dei' maina ine' owa' nie'i owahipina alupunai ine'inai panda' maol etini? 34Ea' dembinai okom numbutina nase'amana amam amama mumafi kalabusi ma mease'ana nimanimi lu'wami nope nope neagwa wiaf ananinai hi'ialana.

35I'i ukup ipe' hipei owa' peakwaha waf aonai endilisima sahin owan sanda'mipanai, anona nemaf Ahalome ae'anai nape ilif heveni wapoti' nonda'mepam ipe' na'ama etin si'i dembinai nanda'ama aman anama.”

Currently Selected:

Matyu 18: aojF

Highlight

Copy