Ifyakutaŋga 25

1Popele apo Ablaamu waliupile umukasi umbi, isina lyakwe niKetula. 2Naye alimufyalile Similani naYocisyani naMedani naMidyani naIsibaci naSyuka. 3Kaŵili Yocisyani walifyele Syeba naNdedani. Kaŵili aŵana ŵakwe Ndedani aŵalalume ŵali ŵena-Asyuli neŵena-Letusi neŵena-Leyumi. 4Nakaŵili aŵana ŵakwe Midyani ŵali niYefa naEfeli naKanoci naAbida naElidaya. Ŵonse aŵo ŵali ŵana ŵakwe Ketula.

5Popele Ablaamu walimupele Isaci fyonse'fyo ifi ali nafyo. 6Sombi aŵana ŵaŵanakasi, aŵo ali naŵo Ablaamu, Ablaamu aliŵapele impese; kaŵili aliŵafumisye kuli lsaci umwana wakwe, ili acili nemweo, nekuŵatuma kumutulesuŵa, kucalo icakumutulesuŵa.

7Lombe'nsiku syamyaka yamweo wakwe Ablaamu uyo aikele nisisi, myaka umwando'mo nemakumi asanu naaŵili nemyaka isanu peulu. 8Popele Ablaamu waliulekele umupasi wakwe, nekufwa, lombe'myaka yakwe yalikumene bwino iyinji, wali mucekulu uwakumene imyaka iyinji; nekuwuŋganisiwa kuŵantu ŵakwe. 9Popele apo Isaci nalsimeli, aŵana ŵakwe, ŵalimusicile mwiceŋgo lyaMacipela, mwiŵala lyakwe Efilono umwana wakwe Soyali umuYeti, apasiŋkamene napaMamile; 10mwiŵale'lyo ili aulile Ablaamu kuŵana ŵakwe Yeti; mopele umo emwasicilwe Ablaamu naSala umukasi wakwe. 11Popele apo, ili afwile Ablaamu, ŵaLesa ŵalimusyucisye lsaci umwana wakwe; naye lsaci waliikele kumukalo waLayaloyi.

12Lombe'fi efitentekwa fyakwe Isimeli, umwana wakwe Ablaamu, uwamufyalile Ablaamu Aga umwIjipiti, umusyakasi wakwe Sala: 13kaŵili aya emasina aŵana ŵakwe Isimeli, koti masina aŵo, koti fitentekwa fyaŵo: umwana wakwe lsimeli uwatanjile ukufyalwa niNebayoti; 14naKeda naAdibeyeli naMibisami, naMisima naNduma naMasa, 15naKadala naTema naYetuli naNafisi naKedema: 16aŵo eŵana ŵakwe lsimeli, kaŵili ayo emasina aŵo, koti misi yaŵo, nakoti fisasa fyaŵo; imfumu ikumi nasiŵili koti mikoka yasiko. 17Lombe'myaka yamweo wakwe Isimeli niyiyi, myaka umwando'mo nemakumi atatu nemyaka isanu naiŵili; eli aŋgaleko'mupasi wakwe, nekufwa; nekuwuŋganisiwa kuŵantu ŵakwe. 18Naŵo ŵaliikele kuAfaila ukufika nakuSyuli konse ukusiŋkamene nakwIjipiti, pakulukuyo'muntu kucalo caAsiliya: naye aliikele pamenso aŵakwaŵo ŵonse.

19Lombe'fitentekwa fyakwe Isaci, umwana wakwe Ablaamu, nififi: Ablaamu walifyele lsaci: 20popele lsaci imyaka yakwe yalikumene amakumi ane ili amupokele Libeka, umwana wakwe Betweli umuSilya uwakuPadanalama, iŋkasi yakwe Labani umuSilya, ati iikale mukasi wakwe.

21Popele apo lsaci waliŵakombetele ŵaYawe pakuti pamukasi wakwe, pakuti wali ninumba: popele ŵaYawe ŵalisumine ukukombetelwa kuli ye, lomba Libeka, umukasi wakwe, waliimitile. 22Lomba aŵana ŵalilwile munda mwakwe; naye ati: Kani nifyefyo, mbanindo numfwile'fi? Naye waliile mukuŵepusya ŵaYawe. 23Popele ŵaYawe ŵalilaŵile kuli ye ati:

Imikoka yaŵantu iŵili ili munda moŵe,

Kaŵili aŵantu aŵamikoka iŵili ŵakalekanisiwa namumala oŵe:

Lomba aŵantu aŵamukoka umo ŵakaŵacila'makosa napaŵantu aŵamukoka uyo umbi;

Kaŵili umukulu-ŵantu eukapyunjilo'mwanice-ŵantu.

24Popele ili syakumene insiku syakwe ati afyale, kuŵona munda mwa kwe muli ŵampundu. 25Lombo'wakutaŋga walifumine ukasicile, koti cakufwala icamasako ponse ponse; popele ŵalimwilicile isina lyakwe ati niEso. 26Popele panuma pali fyefyo palifumine umukwaŵo, lombo'kuŵoko kwakwe kwalituwikete Eso kukasisilo; nesina lyakwe kaŵili lyaliilicilwe ati niYakobi: lomba lsaci imyaka yakwe yalikumene amakumi asanu nalimo ili aŵafyele Libeka.

27Popele aŵanice ŵalikulile: lomba Eso wali mupalu ucenjele, umuntu uwamumpaŋga: sombi Yakobi wali muntu umwinenene, uwalukwikala mumasema. 28Lomba lsaci walimutemenwe Eso, pakuti alukulya kufinani fyakwe ifyamumpaŋga: kaŵili Libeka walimutemenwe Yakobi.

29Kambi kasuŵa Yakobi waliipicile umuto, eli aŋgenjila Eso, ukufuma mumpaŋga, lomba alitembucile: 30popele Eso walilaŵile kuli Yakobi ati: Ndukukukombetela ati unteŵete umuto uyu ukasicile wopele; pakuti natembuka: pakuti pali fyefyo isina lyakwe lyaliilicilwe ati niEdomi. 31Popele Yakobi ati: Ŋgule lelo uŵupyani ŵoŵe. 32Naye Eso ati: Ŵona, ndi apepi ukufwa, lombo'ŵupyani wuŋgansyucisya syani? 33Popele Yakobi ati: Kolapa kuli neŵo lelo! Naye alilapile kuli ye, nekuula kuli Yakobi uŵupyani bwakwe. 34Popele Yakobi walimupele Eso siŋkwa nemuto wamalentile; naye alilile nekunwa, nekwima, lomba alukuya: fyopele'fyo Eso walipufisye uŵupyani bwakwe.

Currently Selected:

Ifyakutaŋga 25: AAL59

Highlight

Copy