Ifyakutaŋga 24
24
1Lomba Ablaamu walikulile, nekucekula ukwakuti: kaŵili ŵaYawe kale ŵamusyucisye Ablaamu mufintu fyonse. 2Popele Ablaamu walilaŵile kumuntu wakwe, kuli woyo umukulu uwamuŋanda yakwe uwafiikalicile fyonse'fyo ifi ali nafyo, ati: Ndukukukombetela ati uŵike ukuŵoko muma tampa anji: 3eli nakukulapisya kuli ŵaYawe, Lesa wakwiulu eLesa wapansi, ati tesi ukamupokele umwana wanji umukasi ukumusalulula paŵana ŵaŵaKanani aŵanakasi aŵa njikele naŵo: 4sombi ukaye kwesu nakuŵakwaŵesu, nekumusalulwila Isaci umwana wanji umukasi.
5Popele umuntu uyo walilaŵile kuli ye ati: Sombi kani umwanakasi tesi akasumine ukundonda muno mucalo: niŋgelelwa neŵo ukumubwelesyo'mwana wenu kucalo uko mwatulile?
6Popele Ablaamu walilaŵile kuli ye ati: Cenjela, wikesa kumubwelesyo'ko umwana wanji. 7ŴaYawe ŵakwiulu, aŵamfumisye kunanda yaŵatata nakucalo ico nafyalilwe-mo, aŵalaŵile kuli neŵo, ati: Kuŵana ŵoŵe ŋkapele'calo ici; ŵo ewakatume'ŋkalamba yaŵo mukukutanjilila; popele ukamusalulwile uko umwana wanji umukasi. 8Sombi kani umwanakasi tesi akasumine ukukulonda, eli ukakakululwa kukulapa kwanji uku; sombi tesi ukamubwelesye uko umwana wanji. 9Popele apo umuntu uyo waliŵicile ukuŵoko kwakwe muma tampa akwe Ablaamu wisikulu nekulapa kuli ye ifyaceŵo ico.
10Popele umuntu uyo walipokele iŋgamela ikumi, paŋgamela syaŵawisikulu; pakuti wali nemaŵoni aŵawisikulu onse muminwe yakwe: lomba aliimine nekulukuya kucalo caMesopotamya kumusi waNako. 11Lomba alifukamicile iŋgamela kumbali yamusi pamukalo wamenda pampindi yaciŋgulo, pampindi iyo ŵatapa amenda aŵanakasi. 12Popele alilaŵile ati: MweŵaYawe, MweŵaLesa ŵaŵasikulu ŵanji ŵaAblaamu, ndukumukombeteleni ati munsyucisye lelo, muŵacitile uluse ŵasikulu ŵanji ŵaAblaamu. 13Ŵoneni, ndiimakene pakantupuntupu kamenda; lomba palukufuma aŵana aŵanakasi ŵaŵantu aŵamumusi mukutapa amenda: 14popele musumine ati moye uyo, uŋkalawila ati: Ndukukukombetela ati selusya umutondo woŵe, nwe; lomba naye nekweŵa ati: Nweni, lomba nakusinwinsye'ŋgamela syenu kaŵili: musumine ati uyo wopele akulukuli niwoyo umwamusalulwilile akale umuntu wenu Isaci; popele kuli fyefyo eko nakwisiŵa ati mwaŵacitilo'luse ŵasikulu ŵanji.
15Popele apo, lomba taaŋgasilo'kulaŵila, kuŵona Libeka, uwafyelwe kuli Betweli, umwana umwalalume wakwe Milika, umukasi wakwe Nako, umukwaŵo Ablaamu, walifumine nemutondo wakwe pacifusi. 16Lombo'yo-moye waliweme ukwakuti ukumutamba, musice, utaaŋgesibwa kuŵalalume nekale konse: popele waliselucile mukantupuntupu, nekwisusyo'mutondo wakwe, lomba nekunina. 17Popele umuntu uyo waliŵutucile mukumucinsya, nekulaŵila ati: Ndukukukombetela ati umpele-po amenda anini amumutondo woŵe, nwe. 18Naye ati: Nweni, sikulu wanji. Naye kaaŋgufya, kaaselusyo'mutondo wakwe paminwe yakwe, kaamupelo'kunwa. 19Popele, ili asilile ukumupelo'kunwa, walilaŵile ati: Nakusitapila neŋgamela syenu nasyo, ili tasiŋgasilo'kunwa, 20Popele kaaŋgufya, kaetulula amenda mumutondo wakwe ili etila muliŋkuŵala, kaaŵutuka liŵili kumukalo mukutapa, kaasitapile'ŋgamela syakwe syonse. 21Lombo'muntu uyo nekumutontomekesya twii, ili ekele celele, kuleŋga ŵaYawe ŵasyucisyo'lwendo lwanji, kani koku.
22Popele apo, ili syasilile ukunwa iŋgamela, lomba umuntu uyo waliŵulile icipini cegolide icakwesya pesikelo yafu wesyekeli, nemakosa aŵili apamaŵoko akwe akwesya amasyekeli egolide ikumi; 23lomba nekulaŵila ati: Weŵo niwemwana wakwe nani? Ndukukukombetela ati umbule. Munanda mwaŵawiso kani muli umwakwikala fweŵo? 24Naye walilaŵile kuli ye ati: Neŵo enemwana waŵaBetweli, aŵana ŵaŵaMilika, aŵo eŵaŵafyalile ŵaNako. 25Kaŵili walilaŵile kuli ye ati: Tuli necani icumine nefyakulya ifyakukumana, nemwakwikalila kaŵili. 26Popele umuntu uyo waliinamisye, nekulukuŵalambila ŵaYawe. 27Naye ati: Ŵalicindeme ŵaYawe, Lesa waŵasikulu ŵanji ŵaAblaamu, aŵataŵalekele uluse lwaŵo naŵucine bwaŵo ubwakuli ŵasikulu ŵanji: naneŵo ŵaYawe ŵantanjilila munsila ukumfisya kunanda kwaŵakwaŵo ŵasikulu ŵanji.
28Popele moye waliŵutucile nekuŵaŵula awamuŋanda yaŵanyina koti masiwi ayo. 29Lomba Libeka wali nendume, isina lyaiyo niLabani: popele Labani walifumine uluŵilo ukuya kumuntu uyo kukantupuntupu. 30Popele lomba, ili abwene icipini nemakosa pamaŵoko paŋkasi yakwe, nekumfwa amasiwi akwe Libeka iŋkasi yakwe ati fyopele'fyo efyalaŵile kuli neŵo umuntu; eli aficile kumuntu uyo; lomba kaemakene paŋgamela kukantupuntupu. 31Popele alilaŵile ati: Injila, weusyucile kuli ŵaYawe; mbanindo uliimakanine posonde? pakuti ndiansicile iŋanda nemwakulale'ŋgamela. 32Popele umuntu uyo waliinjile muŋanda, nekukakulule'ŋgamela; lomba ŵalimupele icani icumine nefyakulya ifyakuŋgamela, nemenda akusamba kumakasa neaŵantu aŵo aŵo ali naŵo. 33Lomba ŵalimutekele ukulya: sombi naye ati: Tesi ndye-po, ili nsiŋgalawilo'mulandu wanji. Kumfwa ati: Kolaŵila.
34Naye ati: Neŵo enemuntu waŵaAblaamu. 35Kaŵili ŵaYawe ŵasyucisyo'kwakuti ŵasikulu ŵanji; naŵo ŵaliŵele nempupo isikulu: kaŵili ŵaliŵapele amataŋga ambelele neaŋombe, nesilifa negolide, neŵamilimo aŵalalume neŵanakasi, neŋgamela nemboŋgolo. 36Nakaŵili ŵaSala, aŵakasi ŵaŵasikulu ŵanji, ŵaliŵafyalile ŵasikulu ŵanji umwana, lomba kale ŵacekwile: lomba ŵalimupele umwano'yo fyonse'fyo ifi ŵali nafyo. 37Popele ŵasikulu ŵanji ŵalindapisye nekulaŵila ati: Tesi ukamupokele umwana wanji umukasi ukumusalulula paŵana ŵaŵaKanani aŵanakasi, aŵa njikele mucalo caŵo: 38sombi ukave kwaŵo ŵatata nakuŵakwaŵesu, nekumusalulwilo'mwana wanji umukasi. 39Popele nalilaŵile kuli ŵasikulu ŵanji ati: Sombi cipale umwanakasi tesi akandonde neŵo. 40Naŵo eli waŋgalawila kuli neŵo ati: ŵaYawe, aŵo nyenda pamenso aŵo, ŵakatume'ŋkalamba yaŵo naŵeŵo pamo, nekusyucisye'nsila yoŵe, lomba ukamupokele umwana wanji umukasi kuŵakwaŵesu, 41nakunanda kwaŵatata, eli ukakakululwa kukulapa kwanji uku, ili ukafika kuŵakwaŵesu; kaŵili kani tesi ŵakakupele umwanakasi, eli ukakakululwa kukulapa kwanji. 42Lomba kano-kasuŵa nali naisa kumukalo, nekulaŵila ati: MweŵaYawe, MweŵaLesa ŵaŵasikulu ŵanji ŵaAblaamu, kani ŵukumo mulukusyucisye'nsila yanji iyi nyendela-mo: 43ŵoneni ndiimakene pakantupuntupu kamenda; lomba musumine ati moye uyo, uwakwisa mukutapa, uyu nakulaŵila ati: Ndukukukombetela ati umpele-po utwenda utwamumutondo woŵe, nwe; 44naye nekulaŵila kuli neŵo ati: Konwa weŵo, lomba nakusitapila neŋgamela syoŵe nasyo: musumine ati uyo wopele akulukuli mwanakasi uŵasalulwilile ŵaYawe akale umwana waŵasikulu ŵanji. 45Popele, lomba nsiŋgasilo'kulawila mumutima wanji, kuŵona Libeka afuma nemutondo wakwe pacifusi; naye nekuselucila mukantupuntupu, nekutapa: eli niŋgalawila kuli ye ati: Ndukukukombetela ati ŋganwe. 46Naye kaaŋgufya, kaaselusya umutondo wakwe ukuufumya pacifusi, kaalaŵila ati: Kamunwa, eli nakusipele'ŋgamela syenu nasyo ukunwa: eli niŋganwa, naye eli aŋganwinsya neŋgamela. 47Popele apo nali namwipusya ati: Weŵo niwemwana wakwe nani? Kumfwa naye ati: Ninemwana waŵaBetweli, aŵana ŵaŵaNako, aŵo ŵaMilika eŵaŵafyalile. Popele kambike'cipini pamona wakwe, nemakosa kambika pamaŵoko akwe. 48Eli niŋgenamisya, nekuŵalambila ŵaYawe, nekuŵacindika ŵaYawe, Lesa waŵasikulu ŵanji ŵaAblaamu, aŵantanjilile munsile'luŋgeme ati mupokele umwana waŵo, umwana umwanakasi waŵakwaŵo ŵasikulu ŵanji. 49Lomba ŵukumo kani mwakuŵacitilo'luse nefyacine ŵasikulu ŵanji, mbuleni: kaŵili kani ifyo tefyo, mbuleni; ati njisiŵe ukusyoloka kani nikulwine kani nikucipiko.
50Popele Labani naBetweli ŵaliasucile ati: Iceŵo ici cilitulile kuli ŵaYawe: fweŵo tesi tulaŵile kuli weŵo neli fiŵipile neli fiweme. 51Ŵona, Libeka ali pamenso poŵe, mupoke, mulukuya, akaŵe mulokasi wakwe sikulu woŵe, koti nifyopele'fyo ifi ŵalaŵile ŵa Yawe. 52Popele apo, ili aumfwile amasiwi aŵo, umuntu wakwe Ablaamu waliinamisye pansi kuli ŵaYawe. 53Popele umuntu uyo walifisulwile ifyamataŋgalo ifvesilifa nefyegolide nefyakufwala, nekumupela Libeka: nakaŵili alipele indume yakwe naŵanyina ifintu ifyamakweŵo apatali.
54Popele kaŵalukulya nekunwa, ye neŵantu aŵo ali naŵo, nekulinsyo'ŵusiku ŵonse; popele ŵaliimine ulucelo, naye kaalaŵila ati: Ntumineni kuli ŵasikulu ŵanji. 55Popele indume yakwe moye naŵanyina ŵalilaŵile ati: Moye ŋgaaciikele nafweŵo insiku isice, neli likumi; popele pakupite'syo eli akaya. 56Naye alilaŵile kuli ŵo ati: Mwiŋkokwesya, mulibwene ŵaYawe ŵasyucisye'nsila yanji. Ntumineni, ŋganje-ko kuli ŵasikulu ŵanji. 57Popele naŵo ati: Twakwita moye, twakumwipusya, tumfwe kukanwa kakwe. 58Popele ŵalimwitile Libeka, nekulaŵila kuli ye ati: Ulukufwayo' kuya nemuntu uyu? Naye ati: Ndukuya. 59Popele ŵalimutumine Libeka, iŋkasi yaŵo, pamo nemwanakasi uwakumulama, nemuntu wakwe Ablaamu, neŵantu ŵakwe. 60Popele ŵalimusyucisye Libeka, nekulaŵila kuli ye ati: Weŋkasi yesu, uŵe ninyinaŵo aŵantu mpaŋgana mpaŋgana: aŵana ŵenu ŋgaŵekale nemulyaŋgo uwakuli ŵaŵo aŵakuŵafitilwa.
61Popele apo Libeka waliimine neŵantu ŵakwe aŵanakasi, nekwenda paŋgamela, nekulukulondo'muntu uyo: popele umuntu uyo walimupintile Libeka, nekulukuya palwendo lwakwe. 62Lomba Isaci walitulile kumukalo waLayaloyi; pakuti aliikele kucalo icakusaufu. 63Popele lsaci walifumine mukulukwalakanya mumpaŋga leiŋgulo; popele aliceŵucile, nekuŵona, lomba palukwisa iŋgamela. 64Lomba Libeka aliceŵucile, popele ili amubwene Isaci, aliselucile paŋgamela, 65Popele alilaŵile kumuntu wakwe Ablaamu ati: Mbaninani uyo-muntu ulukwenda mumpaŋga mukutucinsya? Popele umuntu ati: Nisikulu wanji. Lomba Libeka eli aŋgawule'citambala cakwe, nekulifimba. 66Popele umuntu uyo walimuŵulile lsaci fyonse'fyo ifi acitile. 67Popele apo lsaci alimwinjisye Libeka mwisema lyaŵanyina, nekumupoka Libeka, naye nekuŵa mukasi wakwe; naye Isaci alimutemenwe: lomba lsaci walisaŋgalele ili ŵafwile ŵanyina.
Currently Selected:
Ifyakutaŋga 24: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
