Ifyakutaŋga 13
13
1Popele Ablama walifumine kwIjipiti, umwine nemukasi wakwe nafyo fyonse ifi ali nafyo, pamo nakwe Loti, nekuya kuNegebi. 2Lomba Ablama waliŵilile iŋombe nesilifa negolide. 3Popele aliendele ukufuma kuNegebi ukufika nakuBeteli, uko-kuntu ukwali isema lyakwe pakutaŋga, pakati paBeteli naAi; 4kumupunda waconto, ico aiŵeke uko pakutaŋga; popele kopele uko Ablama waliitile isina lyaŵaYawe.
5Kaŵili Loti, uwaile nakwe Ablama, naye wali nemataŋga ambelele neaŋombe nemasema. 6Sombi icalo tacaŵakumanine, ati ŵekalile pamo: pakuti amaŵoni aŵo ali akulu, fyopeie'fyo taŵaisiŵile ukwikalila pamo. 7Popele pali uluŵo paŵembesi ŵaŋombe syakwe Ablama neŵembesi ŵaŋombe syakwe Loti: kaŵili aŵaKanani neŵaPelisi ŵalijikele mucalo iyo-mpindi.
8Popele Ablama walilaŵile kuli Loti ati: Ndukukukombetela ati uluŵo talulukwikala pali weŵo naneŵo, napaŵembesi wanji neŵembesi ŵoŵe; pakuti tuli wana-ŵaŋkasi. 9Kansi icalo conse tacili pamenso oŵe? Ndukukukombetela ati ulilekanye kuli neŵo; kani watinamina kucipiko, neŵo nakuya kulwine; sombi, kani watinamina kulwine, nakuya kucipiko neŵo.
10Popele Loti waliceŵucile, nekuŵona peŵesa lyonse ilyakujodeni, ati pali utunika utuweme ponse ponse, ili tawaŋgonala Sodoma naGomola ŵaYawe, pali koti liŵala lyaŵaYawe, koti calo caIjipiti pakuyo'muntu kuSoa. 11Popele apo Loti walisalulwile iŵesa lyonse ilyakuJodeni; naye Loti waliendele kumutulesuŵa; naŵo ŵoŵilo ŵalilekene. 12Ablama waliikele mucalo caKanani, naLoti naye waliikele mumisi iyapeŵesa, nekutesye'sema lyakwe ukufika nakuSodoma. 13Sombi aŵakuSodoma ŵali nimbifi isyalukuŵifyo'kwakuti kuli ŵaYawe.
14Popele, ili alekene Loti nakwe, ŵaYawe ŵalilaŵile kuli Ablama ati: Inuna amenso oŵe ŵukumo, ucencente ukufumina apo uli, kunofu nakusaufu nakumutulesuŵa nakumbonsi; 15pakuti icalo conse'ci ubwene ŋkakupela weŵo newana ŵoŵe cenu insiku syonse. 16Kaŵili ŋkaalula aŵana ŵoŵe koti lifukutu lyapansi: ifyo kani umuntu aliisi ukupenda ifukutu lyapansi, eli ŵaŋgapendeka neŵana ŵoŵe. 17Ima, uye ili wenenda pacalo muŵutali bwacico namubwipi bwacico; pakuti niweŵo ŋkakupela.
18Popele apo Ablama walikusisye isema lyakwe, nekufika nekwikala pamyeloni yakwe Mamile, iyili kuEbiloni, nekuŵeŵacilo'ko ŵaYawe iconto.
Currently Selected:
Ifyakutaŋga 13: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
