Ifyakutaŋga 14
14
1Popele apo lomba pansiku syakwe Amilafeli, imfumu yaSina, naAlyoci imfumu yaElasa, naCedalaoma imfumu yaElami, naTidali imfumu yaGoyimi, 2aŵo ŵaliŵusisye iŋkondo pali Ŵela imfumu yaSodoma, naBilisya imfumu yaGomola, naSinabi imfumu yaAdima, naSyemebeli imfumu yaSeboyimi, nemfumu yaBela (wopele eSoa). 3Ŵonse aŵo ŵalikumaŋkene mumukolo waSidimi (wopele eSiŵa Ilikumine). 4Ŵalimupyunjile Cedalaoma imyaka ikumi naiŵili, popele pamwaka wekumi naitatu ŵalialucile. 5Popele pamwaka wekumi naine kwaliisile Cedalaoma, nemfumu isyo isi ali nasyo, nekuŵapama aŵaLefa kuAsitaloti-kanayimi, neŵaSyusi kuAmu, neŵaEmi kuSyafe-cilyatayimi, 6neŵaKoli kulupili lwaŵo lwa Seyili, ukufika nakuElipalani, upelele kumpanta. 7Naŵo ŵalibwelele nekufika kuEnimisipati (wopele eKadesi), nekupame'calo conse icaŵaAmaleci neŵaAmoli naŵo, aŵaikele ku Yasasoni-tamali.
8Popele apo kwalifumine imfumu yaSodoma nemfumu yaGomola nemfumu yaAdima nemfumu yaSeboyimi nemfumu yaBela (wopele eSoa); nasyo syaliŵambile ifita ukuŵemina mumukolo waSidimi; 9ukumwimina Cedalaoma imfumu yaElami, naTidali imfumu yaGoyimi, naAmilafeli imfumu yaSina, naAlyoci imfumu yaElasa; imfumu sine ukulwa nasisanu. 10Lomba umukolo waSidimi walikumene amakanda amatipa amafuta; popele imfumu syaSodoma naGomola syaliŵutucile, nasyo syalifwilile apo, neŵasyele-po kaŵili ŵaliŵutucile kulupili. 11Popele aŵo aŵaŵatamfisye ŵalitapile amaŵoni onse amuSodoma neamuGomola, nefyakulya fyaŵo fyonse, lomba nekukumbuluka. 12Kaŵili ŵalimutapile Loti umwana wamukwaŵo Ablama, uwalukwikala muSodoma, pamo nemaŵoni akwe, nekukumbuluka.
13Popele kwaliisile umuntu uwa pulucile, nekumuŵula Ablama umuEbeya. Lomba aciikele kumyeloni yakwe Mamile umuAmoli, umukwaŵo Esikoli, nemukwaŵo Aneli; naŵo ŵalialicile mumo naAblama. 14Popele apo Ablama, pakumfwa ati umukwasu watapwa, aliŵatanjilile aŵantu ŵakwe aŵaŵambilwe, aŵafyelwe muŋanda yakwe, imyanda itatu neŵantu ikumi naŵasanu muli ŵasanu naŵatatu, nekulondaisya ukufika nakuDani. 15Naye aliŵemine uŵusiku, umwine neŵantu ŵakwe, nekuŵapama, nekuŵalondaisya ukufika nakuYoba, uli kucipiko kuDamasiko. 16Popele alibwesesye amaŵoni onse, nekumubwesya naLoti umukwaŵo, nemaŵoni akwe, pamo neŵanakasi neŵantu.
17Popele imfumu yaSodoma yalifumine mukumucinsya, pakubwela mukwipaya Cedalaoma nemfumu isyo isi ali nasyo, kumukolo waSyafe (wopele eMukolo waMfumu). 18Popele apo Melecisedeci, imfumu yaSalemi, walifumisye ifyakulya nemfaina: naye lomba wali mupapatilisi waŵaLesa Aŵo Aŵacilile. 19Naye alimucindicile, nekulaŵila ati: Ucindeme Ablama waŵaLesa Aŵo Aŵacilile, Aŵene ŵeulu neŵacalo capansi; 20kaŵili ŵacindeme ŵaLesa Aŵo Aŵacilile, aŵapele utupondo twenu muminwe yenu. Naye Ablama alimupele ifyakufuma pekumi pafintu fyonse.
21Popele imfumu yaSodoma yalilaŵile kuli Ablama ati: Umpele-po aŵantu, sombi ulipokele amaŵoni. 22Sombi Ablama walilaŵile kumfumu yaSodoma ati: Nasuntwilo' kuŵoko kwanji kuli ŵaYawe Lesa Aŵo Aŵacilile, Aŵene ŵeulu neŵacalo capansi, 23ati tesi ŋkapoke neli ŵusalu neli Jusiŋga ulwakuŋkwawilo neli kantu kenu, mwikesa kulaŵila ati: 24Nineŵo namuŵisya Ablama! sombi fveŋke'fyo ifi ŵalile awasaŋkwa, necakwaŵana icaŵantu aŵo aŵo naile naŵo, Aneli naEsikoli naMamile; ŋgawapoke icakwaŵana caŵo.
Currently Selected:
Ifyakutaŋga 14: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
