Mak 14

Betani aabppa ah laa goɗen awa ukka Jesus laaittom

1Jesus Nug nai amu oh mattia male amu dimppa Pasowa Hobulnu deɗ ii nak, nekkunu deɗ aɗit dayeye, hobul amunu ag Bret Yis Iitta Lanaknu Hobul Nakok ele adappig amu, mana mettak danab okkai, ɗo mehuqak danab ele amu ag lokkumakppa Jesus aɗan, qeppeg mauhkkunu ib madippig. 2Amu ag keeke amu hekkulagnu inam appig. “Danab ah nug qemana, muttub ele qemananu amu, ig Pasowanu Hobul haenppa Jesus ii aɗamta,” aon appig.

3Aria, Jesus Nug Betani appa danab onig Saimon, nug ⌊matu⌋ gaɗa oɗe nau ele ⌊gemu iitta meum⌋ amu, nug laugppa balalppa ee lanan dayeye, ah laa nug men id enanag, leppu muttuɗig enanag, nob okkainab ele inak, amu awa, Jesus gumitta uɗiom. Ag leppu amu bala laa onig nad, amuppaib heppig. Aria, ah amu nug id amu awa uɗia baag qe aoɗe, leppu amu Jesus igippa gokkaɗom. 4Nug anam he amu danab laala appa daappig ele ag oolag nauhe, akka akka kobol amunu mattin appig. “Aɗinu nug leppu muttuɗig enanag amu hamu kakittom? 5Nug leppu amu meeb, danab laa nug maɗ laippunu uɗat nob eɗittak daden meeb, men doɗo amu daɗek danab mattalo am ena,” aon appig. Ag anam anana amu, ag ah amu eheɗ aidppig. 6Ag anam aitteg amu Jesus Nug ag amelagppa aum. “Ag uueg! Ag aɗinu ah imu oo uug medatteb? Nug dahilppa kobol enanag heum. 7Daɗek danab ag oolagppa hanhan daaglag amunu, ag ehanadkkulagnu oolag dayeb, ag ehanadkkulag. Amge da ag ele haen oh ii daamta. 8Ah imu nug dahilppa kobol ena hekkunu elele antta, nug heum. Nug da beɗulppa leppu muttuɗig enanag imu gokkaɗom amu, nug da ii mauhmi haenppa, da mauhe moɗppa niikkulnu beɗul babaittom. 9Da genab ag amelagppa attem. Dimppa danab ag wan atu ohppa dahilnu Nai Ena adeppa adeppa mehuqnana, ag ah imu keeke heum amu, ag amunu madippeg doon, ag nuhignu dabmekkulag,” awa aum.

10Aria, haen amuppa ippunittak awak danab 12, ag oolagppan laa, nug onig Judas Iskariot, nug mana mettak danab okkai gumatta ukka, Jesus ag eppelagppa mekkunu aum. 11Nug anam a amu ag enanagnab doon, nug anam heeb, ag men doɗo mettaglagnu nai qakkan appig. Ag anam aeg amunu, Judas nug haen ena adekku Jesus aɗa, ag eppelagppa mekkunu ib mattiom.

Jesus Pasowa heum

12Aria, Bret Yis Iitta Lanaknu Hobul Nakok deɗ tatamnu ne, deɗ amu Juda danab ag Pasowa Hobulnu sipsip nakkud aqadttappig ele, deɗ amuppa Jesusnu ippunittak awak danab ag dona, Jesus oɗ medappig. “Na Pasowanu ee lakkutnu amu, ig amunu adeppa bappaidkkunignu oot daatte,” aon appig. 13Ag anam aeg amu Jesus Nug ippunittak awak danab aɗit amelahppa aum. “Aa ahaya goya, aab okkaippa noya, appa amu aa danab nug nippud le ambak ele mawa doa, aa uɗalah teeb amu, aa nug dim lamidya ukkeɗ! 14Dim lamidya gopeɗ, nug lag attenppa teeb, aa lag amu mameg amegppa inam aiɗ! ‘Ippunittak danab ihinih Nug inam aum. “Da dahilad ippunittak awak danab ele ig na lautppa oo attenppa Pasowanu ee lakkunignu elele?” ’ aoya akkulah. 15Aa anam apeɗ, geha nug lag oo okkai attan, balal, dayak aben ele oh babaittak ele ippuanateb, aa lag oo amuppa Pasowa ee babaitteɗ!” awa aum. 16Jesus Nug anam a amu aa goya, aab okkaippa noya, Jesus Nug aum amubiaib anidpiɗ. Anidya amu, aa Pasowa ee bappaidpiɗ.

17Bappaidya malapiɗ amu, tueb meeme, Jesus Nug nuhikkud ippunittak awak danab 12 ele, ag oh appa goppig. 18Aria, ag gona tena, balalppa ee lanana, Jesus Nug aum. “Da genab ag amelagppa attem. Ag oolagppanu laippu laa, nug da ele geha iikku ee lattep amu, nug da kekeɗ eppelagppa meiɗkku,” awa aum. 19Nug anam a amu ippunittak awak danab ag oolagppa uugnab doonna, ag anen anen Jesus oɗ medappig, “Na ame am date?” 20Ag anam oɗ mettaeg amu, Jesus Nug nai nob meum. “Ag danab 12 amu, ag oolagppanu laa nug da ele geha iikku tappiɗ imuppanu ee lattep amu, nug ana hekku. 21Danab Bekkalag da, Kayak nai atte amubianab, da mauhkkul, amge danab nug da kekeɗ eppelagppa meiɗkku amu, nuhignu gadonnab gadon. Nug anig nug ii menulo am ena,” awa aum.

22Jesus Nug anam a, ag ee lanana daanna, Jesus Nug bret awa, Mameg amegppa, “Ena heme” awowa, pane ne, pania nuhikkud ippunittak awak danab madatta, Nug aum. “Ag imu aweg! Imuam da beɗul,” awa aum 23Nug anam awowa amu, Nug kap wain awa, unuqittowa matte, ag oh lappig. 24Ag laegeg amu Jesus Nug ag amelagppa aum. “Imu da tiil, amuppa da nug tituana nai qakkak bau hettem. Da danab ah kuɗum dilag hipunin uhuqen madakkulnu gokkaɗttem. 25Da genab ag amelagppa attem. Da wain geha iikku lattem imubia baula paha ii lapa. Iitta. Dimppa da Kayaknu ɗo maɗoɗ ooppa dayeye da baula lakkul,” awa aum.

26Nug anam a amu ag ahi laa ettona, ag ahan, dimittim wana, Olipnu Qaukoppa goppig.

Jesus Nug Pita, “Da nug ii doottem,” haen ewam akkunu aum

27Ag gona tena, Jesus Nug aum. “Kayak naippa yaak laa niitte am inam. ‘Da sipsip gumak danab qeppi mauheb, sipsip ag oh oolna matatun gokkulag,’ amunu, yaak amubia, gemu tuqan imu ag oh uuiɗna oolna gokkulag. 28Amge dimppa da eɗuen hibaitten, da anuqen Galili goppi, ag da dim lamiɗna gokkulag,” awa aum. 29Nug anam a amu Pita nug Jesus amegppa aum. “Danab laa oh ag nahipnu uug doon, uuidna oolna gokkulagtai, amge da am anam ii hepa!” awa aum. 30Pita nug anam a amu Jesus Nug oɗeppa awa aum. “Da genab na amenppa attem. Gemu tuqan imuppanab, matuk dawai haen ebqak aɗit ii gayeb, na dahilnu, ‘Da Nug ii doottem,’ aon, haen ewam batak akkut,” awa aum. 31Awa a amu Pita nug ɠagattag aum. “Iitta! Da na ele mauhkkunih dayeb amu, da amunu uug ii doottem, amge da nahipnu, ‘Da Nug ii doottem,’ ii apa! Iittanab iitta,” awa aum. Awa a amu ippunittak awak danab laa oh ag anamib appig.

Jesus Getsemani unuqittom

32Ag gona, aben laa onig Getsemani tena, Jesus Nug ippunittak awak danab amelagppa aum. “Ag ippa daappeg, da ukken unuqidkkul,” awa aum. 33Nug anam ana amu Nug Pita, Jems, Jon ele aakkuib diiatte, Nug ele goppig. Gona amu Nug ooppa uugnab doyom. 34Nug anam doya, Nug ag amelagppa aum. “Da oolppa kahipan toɗe mauhak bianab doottem amunu ag iguppa daanna, dabmenan dayeg!” awa aum.

35Nug anam awona amu Nug nakok laa ele wana ukka, appa Nug laippun gateg qaun o, gomela, iɗu wanppa ma, haen nau amu ii anidkkunu inam unuqittom. 36“O Mame, Mame, aɗi keeke haknu daatte amu, na hekkutnu elele. Amu uug oh da maokkul ele, amuam leppu mua eheɗ nau kap-ppa daatte bia, amu na ib laa anidna appe, da le kap amuppanu amu da ii lapa, amge na dahil dabmaknab aottem ii dim lamidmana, na nahip dabmaknab aottem, amuib dim lamidkkutnu ool daatte!” awa aum.

37Nug anam awona amu Nug eɗua, ippunittak awak danab ewam niiegeg anatta, Nug Pita amegppa aum. “Saimon, na niittemte? Na aua laippuib dabmenan daakkutnu elele iittate? 38Satan ag eeɗatteb eheɗppa gomananu ag dabmenan daanna, unuqitteg! Ag tutukku hekkulagnu dabmetteb, amge ag beɗulag am ɠagattag iitta,” awa aum.

39Nug anam ana, nug eɗua ukka tatam unuqittom anamib baula unuqittom. 40Unuqittowa amu Nug eɗua ukka, ippunittak awak danab ag amelag eheɗ neum amunu ag niiegeg anatte, ag Nug amegppa nai laa akkulagnu ii dooppig.

41Aria, haen ewam batak nug eɗua ukka, ag niiegeg anatta amu Nug ag amelagppa aum. “Ag iite ahappig? Ag tuɗidna niin, hik ele aottebte? Aakku elele! Haen aakku doum. Danab nug Danab Bekkalag da, hipunin danab eppelagppa meiɗkkunu haen aakku doum. 42Ahappeg gotu! Ag aakkud antteg! Danab nug da kekeɗ eppelagppa meiɗkku ele amu, nug aakku uɗitte,” awa aum.

43Jesus Nug nai amu mattieye amu, ippunittak awak danab 12 oolagppanu laa onig Judas, amu danab kuɗum ele, danab amu ag qep elab, daɗib ele aɗappig amu, ag uɗippig. Mana mettak danab okkai, ɗo mehuqak danab, amu Juda dilag ikki danab ele ag heeg, danab amu, Judas ele uɗippig. 44Amu Judas, nug Jesus dimug meum amu, nug tatam ag Jesus aɗaglagnu epponak keeke laa hekkunu amelagppa inam aum. “Da geha laa ootuqidkkul amu, danab amu aakkuib. Ag Nug aakkude aɗan, atognona, aon ukkeg!” awa aum. 45Aria, ag uɗina, Judas nug pahanab Jesus gumitta ukka, “Ippunittak Danab,” awowa, nug ootuqittom. 46Ootuqitte amu, danab ag Jesus aɗappig. 47Aɗaegeg amu laa appa dayom ele amu nug qep elab nuhig eeɗa awa, mana mettak ikki danabnu maɗi nid laa daug hoiyom. 48Anam he amu Jesus Nug amelagppa aum. “Da nai tappe nak danab naute daattem amunu ag qep elab, daɗib ele aon aɗailkkulagnu uɗippig? 49Haen da deɗ oh Kayaknu mettid lagnu haɗap-ppa danab ah ippunittak madattami, amge ag da ii aɗailppig. Amge Kayak nai daatte amuib bekkuoitte,” awa aum. 50Nug anam a amu nuhikkud ippunittak awak danab oh ag Nug uuidna oolna goppig.

51Amu nid bau laippu laa nug Jesus Getsemani ugekke, haen amu nug ele Jesus dim lamittom. Nug linen lamen laa aakkuib takka ukkom. Ukka dayeye amu, ⌊ag Jesus aɗana,⌋ ag nug ele aɗaglagnu heegeg, 52nug lamen uua, lamen iitta hamu oola ukkom.

Jesus Nug Juda dilag hettoɗiak okkai onig Sanhidren, ag noolagppa dayom

53Ag Jesus aɗana, ag Nug aon gona, mana mettak ikki danab toppa goppig. Mana mettak danab okkai, Juda dilag ikki danab, amu ɗo mehuqak danab ele ag oh appa qagmeppig. 54Ag Jesus aɗan omalna teegeg amu, Pita nug dim lamattom, amge nakok piɗe dim lamattom. Dim lamattatta, nug mana mettak ikki danab laugnu haɗap-ppa noum. Nug appa no, lag mamegnu daup ele daanna, nug aab uɗikka dayom.

55Pita nug appa dayeye amu, lag ooppa mana mettak danab okkai, amu Juda dilag hettoɗiak okkai onig Sanhidren, amunu danab ele, ag oh Jesus qeppeg mauhkkunu nai laa nuhigppa yaaglagnu madippig, amge ag laa ii anidppig. 56Anam mattiegeg amu danab laala ag ahan, hambuppuna, Jesus Nug aɗi eheɗ heum appig, amge ahilag nai am iɗu laippu iitta, piɗe piɗe. 57Anam heegeg amu, laa aa ahaya hambuppuya, Jesus geɗidya, inam apiɗ. 58“Danab imu Nug inam a doomuɗ. ‘Da Kayaknu mettid lag imu, danab eppelagppa heppig ele amu, da heppi nauheb, da deɗ ewam ooppa, da bau hekkul, amge da eppelppa ii hepa.’ Nug anam aum,” aoya apiɗ. 59Aa anam apiɗ, amge ahilah nai amu ele iɗu laippu iitta, piɗe piɗe.

60Anam amu, mana mettak ikki danab nug ag noolagppa hibaitta, Jesus oɗ mettom. “Nai amunu amu, na nob iite memana? Nai anak amuam genab o genab iitta?” awa aum. 61Nug anam aum, amge Jesus Nug nai nakok laa ii mattiom. Aria, mana mettak ikki danab nug eɗua, bau oɗ mettom. “Na am Kristus, Kayak Bekkate o iitta?” awa aum. 62Nug anam oɗ mette amu Jesus Nug aum. “Yo, da iikku, amu dimppa ag Danab Bekkalag da, da Kayak Ɠagattag Oh Ele eppeg naɗiap-ppa daabppi aniɗna, amu ele ag lombig hab waappa daatteb, da lombig amuppa dayeye uɗippippi aniɗkkulag,” awa aum. 63Jesus Nug anam a amu mana mettak ikki danab nug lamen nuhig aɗa pattiɗa, nug aum. “Ig aɗi heehe anttomnu mattiak danab laala danab imu eheɗ heumnu mattiglagnu ii mattimta. Iikku elele! 64Nug nukka nuhignu, ‘Da am Kayak,’ aum amunu, Nug Kayaknu dabittak nai aakku aum. Ag nai amu dooppig amu ag nuhignu aɗi atteb?” awa aum. Nug anam a amu ag oh, “Nug eheɗ heum, Nug mauhkkun daatte,” appig. 65Ag anam ana amu laa ag digmen hunu qena, lamenppa ameg qakkona, eppelag bitakkan makkuɗnana appig. “Kayak ehanitteb, na aun na oittom appe dootu!” aon appig. Aria, mana mettak ikki danab, nuhikkud daup, ag ele nug makkuɗppig.

Pita Jesusnu, “Da nug ii doottem,” aum

66Amu Pita nug lagnu haɗap-ppa dayeye, mana mettak ikki danab, nuhig maɗi nid ahin laa nug doa, 67Pita nug aab uɗikka dayeye antta, nug pehettak neekkittatta nug aum. “Na ele Nasaret ted Jesus, Nug ele oipiɗ!” awa aum. 68Nug anam a amu Pita nug aum. “Iitta! Nai na madittem amu, da ootot iutte!” awa aum. Anam ana amu nug aha, lagnu haɗap odppa ukka dayom. 69Dayeye, dimppa maɗi nid ahin amu nug Pita baula antta, nug laala appa hippaidna daappig ele amelagppa aum. “Danab imu nug Jesus aɗi lailag!” awa aum. 70Nug anam a amu Pita nug baula, “Iitta!” awa aum. Nug a amu nakok dimppa danab appa hippaidna daappig ele ag Pita amegppa appig. “Na am genab danab umu layag laa aakku. Aɗinu? Na Galili danab laa,” aon appig. 71Ag anam aeg amu Pita nug nai ɠagattag qeta, inam aum. “Da nai genab ii appi amu, Kayak Nug da nob nau meɗaɗ! Da genab iikku attem! Danab amu ag nuhignu atteb ele amu, da Nug iinab doottem!” awa aum. 72Pita nug anam a amu, matuk dawai nug paha haen ebqak aɗit gayom. Gaye amu Jesusnu nai, “Tuqan imuppa matuk dawai haen ebqak aɗit ii gayeb, na dahilnu, ‘Da Nug ii doottem,’ haen ewam batak akkut,” nai amu Pita daugppa doum. Nai amu Pita daugppa do, nug dabmaama gayom.

Currently Selected:

Mak 14: NB

Highlight

Copy