Mak 15

Jesus Pailat noobppa dayom

1Aria, wagɗe buttuanab amu, mana mettak danab okkai, Juda dilag ikki danab, ɗo mehuqak danab amu Juda dilag hettoɗiak okkai onig Sanhidren, amunu danab ele ag oh qagmena, Jesus mauhkkunu nai qakkona, Jesus eppeg muɗippa qakkana, aon gona, Pailat eppegppa meppig. 2Jesus Nug anam dayeye amu Pailat nug oɗ mettom. “Na Juda dilag kingte?” awa aum. Awa a amu Jesus Nug aum. “Na aakku attem,” awa aum. 3Jesus Nug anam a amu, mana mettak danab okkai ag nuhignu nai yaan henan, Jesus eheɗ kuɗum heumnu Pailat amegppa appig 4amunu, Pailat nug Jesus oɗ mettom. “Ag na eheɗ kuɗum hemenu atteb amu, na nai amunu eɗuna, nob iitai amana?” awa aum. 5Pailat anam aum, amge Jesus Nug nai laippunu laa Pailat oɗeppa ii awom amunu, Pailat nug dabmak kuɗum awom.

6Aria, maɗ ohppa Pasowa Hobulnu deɗppa gawana nug danab ah ag maniguittak danab atten uhuqa madakkunu appig amu, nug maniguittakppanu od matule dottom. 7Amu danab laa ag gabman ele ban henana, ag danab aqaeg mauhppig amunu ag maniguittakppa daappig amu, ag oolagppanu danab laa onig Barabas, nug ag ele oh haen amuppa maniguittakppa daappig. 8Nug maniguittakppa dayeye, Jesus Nug Pailat eppegppa dayeye amu, Juda danab kuɗum ag ahan, Pailat toppa gona, ag nug hanhan maniguittak danab laa uhuqttom bia hekkunu oɗ medappig. 9Ag anam aeg amu Pailat nug aum. “Da Jesus, Nug Juda dilag king, da Nug uhuqen madakkulnu oolag daattete?” awa aum. 10Pailat nug mana mettak danab okkai ag Jesusnu amelag qe oolag elele ii daye, Jesus hettoɗiakppa meppig doyom amunu, nug anam oɗ mattom. 11Pailat nug anam oɗ mattom, amge mana mettak danab okkai ag ahan, wagai mena, danab ah kuɗum daappig ele gaɗa gaɗa mattaeg, ag Jesus ii uhuqma, nug Barabas uhuqkkunu appig. 12Ag Barabasnu appig amunu Pailat nug aum. “Amge ag danab imu, ag nuhignu, ‘Nug am Juda dilag king,’ atteb amu, da nuhignu aɗi hekkulnu oolag daatte?” awa aum. 13Nug anam a amu ag eppig. “Ad emaitakppa atule!” aon eppig. 14Ag anam eppig, amge Pailat nug oɗ mattom. “Aɗinu? Nug aɗi eheɗ heum?” awa aum. Nug anam aum, amge ag huanak ena appig. “Ad emaitakppa atule!” eppig. 15Ag anam eeg amu Pailat nug danab kuɗum ag oolag ena daakkunu Barabas uhuqom. Barabas uhuqa amu, nug nuhikkud daup ag Jesus bu qaun eleppa eheɗ mataɗkkulagnu ana, ag ad emaitakppa atulkkulagnu ag eppelagppa meum.

Ban danab ag Jesus aon aon qedappig

16Pailat anam mattiom amunu nuhikkud daup ag Jesus aon gona, gabman okkai laug enanagnab, amu onig am Pretorium, ag amu ooppa nona, ag daup laa oh onilagppa eeg, uɗieg, 17Jesus ag eppelagppa dayeye, ag lamen elab perpel aɗuitteg no, ag haɗ muɗi qaun eleppa hewona, Jesus igippa aɗaeg noum. 18Aɗaeg no amu ag aon aon qettan, Jesus hambuppun humidna appig. “Na am Juda dilag king! Na binan ele!” aon appig. 19Ag anam henana amu ag gumu laa, qaittobttob gumu bia, amu aona, Jesus ikki eɗunna onana, hunu qenana, Nug noobppa hambuppuak dup noa binag mak heppig. 20Haen ag aon aon qettan malan amu, ag lamen elab perpel uɗittona, ag lamen nuhig eɗun aɗuitteg no, ag ad emaitakppa atulkkulagnu aon goppig.

Ag Jesus ad emaitakppa atulppig

21Ag ibppa gonana amu ag Sairini ted, Rupus, Aleksander ele mamelah, onig Saimon, nug aab okkai dimittimnu uɗia, aab okkai ooppa nokkunu doodo, ag nug anidna, ag duttunna heeg, nug Jesusnu ad emaitak mawom. 22Nug anam mawewe, ag Jesus aon gona, aben laa onig Golgata, appa teppig. Golgata meu am Ikki Ebehinu Aben. 23Tena, appa amu ag Jesus wain marasin laa onig mir kaboliak, Nug amu lakkunu medappig, amge Nug ii laum. 24Jesus Nug anam he, ag Nug ad emaitakppa atulona, ag nuhig lamen aoglagnu otina, ameg waɗele mewona, aun nug ameg atten aokku amu ag om yaakppa hena aoppig.

25Ag buttua aam ameg eblaih waɗeleppa ad emaitakppa atulppig. 26Rom danab ag danab ad emaitakppa atuladttappig ele amu, ag aɗi nai ag beɗulagppa yaappig ele, danab ag amu anidkkulagnu, ag ad mahappa yaana, ad emaitakppa atulppig. Aria, Jesusnu amu, ag Nug igippa ad emaitakppa, ag nai imu ad mahappa yaan atulppig. “Imu am Juda dilag king.” 27Ag danab aɗit laa, aa am yab danab naunab amu, ag aa Jesus ele oh atuladppig. Ag danab laa ag Jesus eppeg naɗiap-ppa ad emaitakppa atulona, laa am eppeg nanehppa ad emaitakppa atulppig. 28((Ag Jesus danab aɗit ele atuladppig amunu, Kayak nai laa, nai amu meu oom. Nai am inam. “Ag nuhignu, ‘Nug am hipunin danab lailag,’ akkulag.”)) 29Aria, danab ah ag nug noobppa dona wanana, ag ikkilag matuɗna, aon aon qettanna inam appig. “O na, na am Kayaknu mettid lag loppaɗna, eɗun deɗ ewamppaib hekkutnu ame amu, 30⌊na anam hekkutnu elele dayeb,⌋ na nakka na ehanidna, na beɗun uhuqna, na ad emaitakppanu nee!” aon appig.

31Ag anam aegeg amu mana mettak danab okkai, ɗo mehuqak danab ele ag akka akka Nug aon aon qettan appig. “Nug danab laa ehanattom, amge Nug nugakka ehanidkkunu elele iitta. 32Nug am Kristus, Israel dilag kingde! Nug ad emaitak uua, honap neeb, ig anitta, ig nuhignu oonigppa genab doognig,” aon appig. Ag anam aegeg amu danab aɗit ag aa Jesus ele atuladppig amu, aa ele Jesus amegppa awa awa qettak nai madipiɗ.

Jesus mauhom

33Anam heegeg ukke, aam ameg 12ppa gatatu na, wan amu oh tone ukke, aam ameg ewamppa batom. 34Aria, aam ameg ewamppa Jesus Nug baag okkaippa, “Eloi, Eloi lama sabaktani,” ewa aum. Nai amu eɗuak am, “O dahil Kayak, O dahil Kayak, na aɗinu da uuiɗmenu diig appe dookkulnu oɗ medattem.” 35Jesus Nug anam e, danab laala appa Nug guguittak daappig ele ag amu doon appig. “Doyeg! Nug Elaiya onigppa ette,” aon appig. 36Ag anam ana amu, ag oolagppanu danab laa nug aha, qaiqaɗ ukka, yuppanu keeke laa, nug le huanak eeɗtte ele onig span, nug amu awa, wain ena iittappa mewowa awa, gumu laa, qaittobttob gumu bia, amuppa ita, medakkunu haaha, nug aum. “Daappeg, Elaiya nug na ehanitteb, nug ad emaitakppanu nekku o iitta amu, ig anidkkunig,” awa aum. 37Danab nug anam a amu Jesus Nug baag okkaippa ewowa, Nug mauhom. 38Jesus mauhom, haen amuppa Kayaknu mettid lag ooppa, lamen naɗi aiheg dayom attannu kattiɗa ukka, honap noa, aɗit meum. 39Jesus mauhe, ban daup 100 dilag ikki nug Jesus noobppa dayom, nug Jesus attem mauhom antta, nug aum. “Genab, danab imu Nug Kayak Bekka!” awa aum.

40Amu Jesus Nug ad emaitakppa dayeye, ah laala ag piɗe daanna, neegna daappig. Ag oolagppan laa am Maria, Makdala ted, laa amu Jems gehanu Josep ele anilah Maria, laa am Salome. 41Ah ewam amu ag Jesus Nug Galili oiyeye ehanittegeg, Nug Jerusalem teete amu, ag ele tena ehanidppig. Ah laala ele appa daappig amu, ag ele Jesus dim lamidna, Jerusalem teppig.

Josep amu Nikodemus ele aa Jesus boumpiɗ

42Aria, Jesus Nug mauhe, tueb meeme, deɗ amuam Sabatnu keeke babaittaknu deɗ, deɗ amu dimugppa am Sabat deɗ 43amunu, Arimatea ted Josep nug ii baɗa, Pailat toppa ukka, Jesus gaɗa aokkunu oɗ mettom. Josep nug Juda dilag hettoɗiak okkai onig Sanhidren, amunu nug laa aakku. Amu laa ag amunu danab daappig amu nug ag oolagppanu am onig ele. Laa ele nug Kayaknu ɗo maɗoɗ ameg meum. 44Josep nug Pailat oɗ mette, Pailat nug Jesus paha mauhom, amunu nug dabmak kuɗum awom. Awa amu nug ban daup 100 dilag ikki onigppa e uɗie, “Jesus Nug matu mauhomte o iittate?” awa oɗ mettom. 45Anam oɗ mettowa, nug ban daup 100 dilag ikki oɗeppa Jesus matu mauhomnu doya, nug Arimatea ted Josep nug Jesus gaɗa aokkunu elele aum. 46Pailat nug a amu, Josep nug linen lamen daden ma, Jesus gaɗa ad emaitakppanu awowa, gaɗa lamen amuppa ita, men moɗ bappaidppig ele, amuppa mewowa, nug men laa buɗibɗib mette ukka, men moɗ oɗe qehakkom. 47Nug Jesus gaɗa men moɗppa meeme amu, Maria, Makdala ted, amu Josep anig Maria ele aa aben amu anidpiɗ.

Currently Selected:

Mak 15: NB

Highlight

Copy