Luk 21

Ah daɗek men doɗo kolekta kunup-ppa meum

1Jesus Nug Kayaknu mettid lakka daya, Nug anam awowa, Nug neekka dayeye amu, Nug danab enulag kuɗum ele men doɗo kolekta kunup-ppa meegeg anattom. 2Am nug ah qab daɗek nug appa ukka, men doɗo aɗit, wan toea bia, kunup-ppa meum. 3Nug me, Jesus Nug aum. “Da genab ag amelagppa attem, ah qab daɗek imu nuhig men doɗo meum amu, amuam danab laala meppig ele oh eɗadtte. 4Aɗinu? Laa oh ag men doɗo kuɗum amu, ag laih nakok amuppan aon meppig, amge ah imu nug men doɗo nakoknab nuhig, nug ehanidkkunu dayom, nug amu oh meum,” awa aum.

Jesus Nug keeke dimppa bekkunu aum

5Amu dimppa ippunittak awak danab laala ag Kayaknu mettid lagnu nai inam madippig. “Ag Kayaknu mettid lag imu heppig ele, ag men enappa heegeg, danab ah ag keeke ena Kayak medappig ele, keeke amuppa bala enanag medappig,” aon appig. Ag anam aeg, Jesus Nug aum. 6“Gemu keeke imu oh ag anidtteb amu, haen laa ana beeb, men imu laa ag loppaɗppeg, nena qena, laa nug laa qaɗeppa iinab daama. Ohnab loppaɗppeg, honap nena qekkulag,” awa aum. 7Nug anam a, ag Nug oɗ medappig. “Ippunittak danab, na ig amenigppa ame amu, kobol amu haen ganeb bekku? Ele amu, epponak keeke aɗi tatam beeb, ig keeke amu oh bekkunu miag daatte doognig?” aon appig. 8Ag anam aeg, Jesus Nug aum. “Laa ag hambuppualadmanu, ag dabmeig! Aɗinu? Danab kuɗum ag da onilppa uɗin, ‘Da am Kristus,’ ana, ‘Haen miag aakku doum,’ ele aon akkulag, amge ag ahan, ag aib dim lamadna goppig. 9Ag bannu doonna, amu ag aab ikki ikki ag ahan ban hettebnu nai ele dooglag. Keeke amu genab bekkulagnab, amge doyeg! Ag aib ottaippig. Wan haen malak iitta,” awa aum.

10Anam ana, Nug amelagppa ele aum. “Wan laa ag wan laa ele nug qekkulag. Ɗo maɗoɗ laa ag ɗo maɗoɗ laa ele nug qekkulag. 11Aben laalappa amu mim okkai nebeppeg, enug haen okkai amu oɗe haen naɗi ele bekkulag. Habppa amu epponak keeke okkai okkai, amu baɗaknu keeke digdig ena iitta ele bekkulag. 12Amge haen keeke amu oh ii bebeppeg, geha danab laa ag ahan, ag dahilad amu, ag eppelagppa ag aɗualadna, ag eheɗ hattana, nai doyak lakka appa dimulag mena, diin maniguittakppa maadkkulag. Da onil ahilagppa daatte amunu, ag diin king, gawana ele noolagppa maadppeg, hettoɗiadkkulag. Da onil ahilagppa daatte amunu, ag kobol amu ahilagppa hekkulag. 13Ag hettoɗiadppeg, haen amuppa ag dahilnu ag amelagppa mehuqkkulagnu elele daanna hekkulagnu ib daakku,” awa aum. 14Nug anam ana, Nug nai tuɗitta aum. “Ag nai amu nob attem ag ena daaglagnu akkulagnu dabmak huan aib aoppig. 15Aɗinu? Da geha da dakka ag nai akkulagnu oɗelagppa mein, dabmak ena ele madakkul. Geha kekeɗ ahilkad ag da nai madakkul amu otaɗna tabappeg nokkunu ele iitta. 16Haen amuppa ag mamelkad, anilkad, awalkad, amalkad, lailkad, buɗulkad ele amu, ag geha ag diin, kekeɗ eppelagppa maadkkulag. Amu geha ag oolagppanu laala aqappeg mauhkkulag. 17Am geha danab ah oh ag ahilagnu nau ninig ele dooglag. Aɗinu? Da onil ahilagppa daatte. 18Ag anam hekkulag, amge ag dahilad amu ag ikkilag uɗug laippu laa ii qettoɗma. 19Ag ɠagattag daaglagppa, ag bauklel hanhannu aoglag!

20Amge dimppa haen ag laa dilag daup ag uɗin, Jerusalem talilidppeppeg anidna, ag amuppa dooglag, aab okkai imu he nauhaknu haen aakku miag daatte. 21Am haen amuppa laa ag Juda wanppa daatteb, ag oolna qaukoppa ukkeg! Danab Jerusalem ooppa daatteb, ag aab uun laih ukkeg! Danab aab dimittim daatteb, ag eɗun aab ooppa aib noppig. 22Aɗinu? Haen amu Kayak Nug ahilag eheɗ hak nob eɗua madakku. Kayak naippa nai amunu daatte amu, nai amunu meu bekku. 23Amu haen amuppa ah oolkad ele, ah ag nid yuɗ huh madatteb ele amu, ahilagnu gadonnab gadon. Aɗinu? Haen amu uug okkainab wan imuppa bekku amu, Juda danab ah haen amuppa Kayaknu oppoɗi bak ag aqadkku. 24Geha laala ag qep elabppa mauhkkulag, am laala, ahilkad kekeɗ ag ag diin gona, wan laa ohnu oolagppa maadppeg daaglag. Amu iitta aɗi ag uɗin, Jerusalem aon daana, uug medappeg ukkeb ukkeb, ahilag haen Kayak tituanom ele maleb malakku.

25Dimppa epponak keeke iɗu iɗu aam, kalam, hoɗoppai eleppa bekkulag. Wanppa amu danab ah wan anen anenppa ag yuppa duban okkai koɗkoɗ qeebeb amunu baɗan, dabmak kuɗum aoglag. 26Geha danab ah kuɗum ag keeke wanppa bekku amunu dabmenana, ag oolag huan baɗeb, amelag uu edakku. Aɗinu? Habppan hoɗoppai ag uɗalnana, ag ippulag tutukku ii dim lamidmana. 27Ag anam hebeppeg, Danab Bekkalag da, da lombig laa ooppa ɠagattag, binag amahlak oppiaawak okkai ele uɗippippi aniɗkkulag. 28Dimppa keeke amu bekkunu digma heebeb, haen amuppa ag ahan ɠagattag dayeg! Kayak Nug ag qagaiettakppanu eɗua uhuqak ha madakkunu haen aakku miag daatte,” awa aum.

29Jesus Nug nai amu amelagppa mattiowa amu Nug keeke danab ag dootteb ii dootteb ele ouaqata ippuanatta, mattia aum. “Ag ad fig, ad laala ele dabmenan antteg! 30Haen ag uɗulkad bau haulegeg anadna amu, ag ‘Aam haen aakku digmette,’ aon atteb. 31Anam amu, amubia ag kobol digdig, da amunu ami ele amu bebeppeg anidna, ag Kayaknu ɗo maɗoɗ aakku miag doum daatte dooglag. 32Da genab ag amelagppa attem, danab ah haen imunu oh ii mauhadppeg, geha keeke amu oh bekku. 33Hab wan ele am iitta mekkulah, amge nai dahil am iitta iinab mema,” awa aum.

34Jesus Nug anam ana, Nug nai tuɗitta aum. “Keeke amu bekkun daatte amunu, ag daulag atieb, ag hanhan ee lanaknuib hik aqeb, le ɠagattag labeppeg, kaaka aqebeb, beɗu ena dayak amunu guattebeb hebeppeg, kobol amuib aha ag tonadmanu tutukku dabmeig! Kobol amu ag tonatteb, Naɗinu deɗ amu ag dab-ii-menana, pahaettak, doɗ pelemppa notte bia ag anadkku. 35Aɗinu? Deɗ amu danab ah oh wan ohppa daatteb ag beeb anidkkulag. 36Amunu ag hanhan tutukku dabmena daanna, keeke amu oh anidmananu amu, ag Danab Bekkalag da, da noolppa hippaidkkulagnu elele daaglagnu ele unuqitteg!” awa aum.

37Deɗ oh Jesus Nug Kayaknu mettid lag ooppa ag nai ippuanattatta, tuqan amu Nug ukka, Olipnu qaukoppa dayom. 38Nug anam heehe, danab ah oh ag buttuanab ahan, ag nai dooglagnu Kayaknu mettid lakka uɗittappig.

Currently Selected:

Luk 21: NB

Highlight

Copy