Luk 20

Ag Jesus aun ɠagattag mettomnu oɗ medappig

1Am deɗ laa Jesus Nug Kayaknu mettid lag ooppa danab ah nai ippuanattatta, Nug Nai Ena amelagppa mehuqeqe, mana mettak danab okkai amu ɗo mehuqak danab am Juda dilag ikki danab ele ag Jesus gumidna gona, 2Nug amegppa inam appig. “Na appe ig dootu! Na ɠagattag aɗippa uɗat imu hettem? Aun nug ɠagattag amu mettom?” aon appig. 3Amu Nug ag appig amu nob ma amelagppa inam aum. “Amu da ele keeke laippunu ag oɗ madappi, appeg dookkul. 4Oɗmak dahil am inam. Jonnu layattak, keeke amuam hab aabppanu keeke, o iitta amuam danabnu keekeib?” awa aum. 5Jesus anam a amu, ag akka akka mattin appig. “Ig, ‘Habnu keeke,’ apput amu Nug, ‘Anam dayom dayeb amu, ag aɗinu oolagppa genab ii dooppig?’ awa akku. 6Amge ig, ‘Danabnu keeke,’ apput am, geha danab oh ag Layattak Jonnu, nug am propet oolagppa genab dootteb amunu, ag menppa iqaglag,” aon appig. 7Ag akka anam ana, ag Jesus aum amu nob mena appig. “Ig ii doottem,” aon appig. 8Aeg am Jesus Nug amelagppa aum. “Aakku amunu, da ele ɠagattag aɗippa uɗat hettem amu appi ii doomna,” awa aum.

Danab nau grep dad gumappignu nai

9Jesus Nug anam awowa, Nug digma keeke danab ag dootteb, ii dootteb ele ouaqata ippuanatta, danab ah amelagppa mattia inam aum. “Danab laa nug grep dad eppom. Nug grep dad eppowa amu awa, nug dad uɗat danab eppelagppa mewowa, nug aha laih umanab ukka haen elab dayom. 10Am nug appa dayeye, grep meu awak haen be, nug maɗi nid nuhig me, grep meu laih nuhig aokkunu dad uɗat danab gumatta ukkom, amge dad uɗat danab ag maɗi nid amu makkuɗna meeg, eɗua hamu ukkom. 11Am dad mameg nug maɗi nid laa he, dad uɗat danab gumatta ukkom, amge ag nug ele makkuɗna, kobol eheɗ laala nuhigppa hena meeg, eɗua hamu ukkom. 12Aria, nug maɗi nid laa me ukkom. Amu ag ahan qena, guittak okkai mettona, aon dad dimittim buɗieg ukkom.

13Ag anam heeg, dad mameg nug aum. ‘Geha da aɗitai hekkul?’ awa aum. Nug anam ana amu, nug aum. ‘Nid danab dahil, da nuhignu ool mauhtte ele amu, da nug meppi gokku. Ukkeb geha ag nuhignu ena elele dooglagtai,’ awa aum. 14Amge haen dad uɗat danab ag nug bekka amu uɗieye anidna, ag akka akka nai mattina appig. ‘Nid umu nug geha dimppa mamegnu keeke oh aokku amunu ahappeg, ig nug qepput mauheb, dad imuam ihinig daakku,’ aon appig. 15Ag anam awona, ag ahan, bekka amu aɗan buɗieg, grep dad dimittim ukke, ag qeeg mauhom,” awa aum. Jesus Nug anam awowa, Nug nai tuɗitta aum. “Aria, ag anam heppig amunu, grep dad mameg nug ahilagnu aɗi hekku? 16Nug inam hekku. Nug aha ukka, dad uɗat danab amu oh aqeb mauhppeg, nug grep dad amu eɗua awa, danab laala eppelagppa mekku,” awa aum. Am Jesus Nug nai amu mattie, danab ah ag doyona, ag appig. “Keeke anam amu aib beum!” aon appig.

17Ag anam appig amge Jesus Nug ag neekkattatta aum. “Anam amunu, Kayak naippa yaak daatte am aɗi ippunigtte? Nai amuam inam. ‘Men laa, lag hak danab ag men amu uuppig, amge lag mameg nug men amu awa me, lagnu men anuqak daatte.’ 18Am laa nug men amu attan na qekku amu, nug nakok nauhkku, amge men amu nug laa qaɗeppa na qekku amu, nug nauha auta aokku,” awa aum.

19Amu mana mettak danab okkai amu ɗo mehuqak danab ele ag Jesus Nug keeke danab ag dootteb ii dootteb ele ouaqata, ippuanattak nai amu ag eheɗ hak ahilag anidkkulagnu mattiom doona, ag haen amuppanab ahan aɗaglagnu ib madippig, amge ag danab ah dilag baɗappig.

Ag Jesus Sisar takis mettaknu oɗ medappig

20Aria mana mettak danab okkai amu ɗo mehuqak danab ele ag Jesus meidnana daanna heeg, ameg qakkak danab laala ag ahan Jesus gumidna goppig. Ag gona, Nug noobppa danab tutukku bia henan daappig, amge ag nuhig nai mattiak amuppa, ag ib laa anidna, aon gabmannu hettoɗiak eppegppa mekkulagnu heppig. 21Ag inam oɗ medappig. “Ippunittak danab, ig doottem, nahip nai mattiak, nahip ippunittak ele am tutukkuib. Na danab okkai onig ele o danab onig iitta, na amu dabmenan ii madittem. Iitta. Na doyak diig genabib, na nai amuppanuib mattin, danab ah Kayaknu kobol ippunadttem 22amunu, na keeke imu appe doognig. Na attem doottem? Ig takis Sisar mettagnig am kobol tutukku o kobol tutukku iitta?” aon oɗ medappig. 23Amge Jesus Nug ahilag ameg qakkak oɗmak amu matu doyom amunu, nug amelagppa aum. 24“Ag men doɗo laa onig danarius ippuniɗppeg anttei!” awa aum. A amu ag men doɗo ippunitteg antta, Nug oɗ mattom. “Men doɗo amuppa amu, aun onig dottog ele daatte?” oɗ mattom. Nug anam awa oɗ matte ag appig. “Amu Sisarnu,” aon appig. 25Anam aeg, Nug ag amelagppa aum. “Aria, ag Sisarnu keeke Sisar mettaglag, amge Kayaknu keeke ag Kayak metteg!” awa aum. 26Ag heppeg, ɗo danab ag aɗaglagnu heppig, amge elele iitta. Nug danab ah noolagppa amu, Nug nai laa ii ettom. Nuhig nai amu ahilag ameg qakkak nai eɗittom amunu, ag ottaina dabmak kuɗum aona, nai laa ii madippig.

Ag Jesus eɗua hibaittaknu oɗ medappig

27Amu dimppa, ɗo gumak danab-Sadyusi ag Jesus toppa uɗippig. Danab amu ag, “Danab mauhtteb ag eɗun ii hippaidmana,” aon adappig amunu, 28ag Jesus inam oɗ mettan appig. “Ippunittak danab, Moses nug ihinignu nai laa inam yom. ‘Danab laa nug nid iitta ele mauheb amu, nug amag nug awag wau aweb, nid menuglah, amge aa nid menuglah amu, nid amuam danab amunu iitta, awagnu daakku.’ Moses nug anam yom. 29Aria, haen laa eamakkud eblaih aɗit ele ag daappig. Ag anam daanna, awalag tatamnu nug ah awa, nug nid iitta mauhom. 30Mauhe nug amag nug dimugppanu nug aha, ah amu awom amu nug ele nid iitta mauhom. 31Dimppa aa amalah aa dimulahppanu aha, nug ah amuib awom, amge nug ele nid iitta mauhom. Anamib eamakkud eblaih aɗit ele ag oh ah laippu amuib aoppig. Ag oh ah laippu amuib aoppig, amge ag nid laa ii aoppig, hamu mauhadppig. 32Ag mauheg, dimppa ah amu ele nug mauhom. 33Aria, eamakkud amu oh ag ah amu aakkuib aoeg, nug ag waalag dayom amunu, eɗua hibaittak haenppa ah amu nug eamakkud eblaih aɗit amu ag oolagppa aunnab wau daakku?” aon appig.

34Ag anam aeg amu Jesus ag amelagppa aum. “Danab ah wannu haen imunu amu, ag ewau daaglagnu ewau matulak aotteb, 35amge butti aɗi haen amu, Kayak Nug danab ah haen amu daaglagnu elele anatteb, ag eɗun hippaidna amu, danab ag ah ii diimna, ah ele ag danab ii diimna. Iitta. 36Ag engel bia daaglag amunu, ag mauhkkulagnu elele iitta. Ag eɗun hippaidna daaglag amunu, ag am Kayak bekkod. 37Amu Moses nug ele danab mauhppig eɗun hippaidkkulagnu ad nakok aab ewewe, ii iitta meum, kaya amuppa nug amu ippunigtte. Moses nug haen amuppa Naɗinu amu, ‘Nug am Abrahamnu Kayak, Aisaknu Kayak, Jakopnu Kayak ele,’ awa aum. 38Kayak Nug danab mauhppig dilag Kayak ii daatte; Nug danab bau daatteb dilag Kayak daatte. Aɗinu? Kayak Nug nuhig dabmakppa danab oh bau daatteb,” awa aum. 39Am Jesus Nug anam a amu, ɗo mehuqak danab laala ag, “Ippunittak danab na ena ame,” appig. 40Amu ag Nug baula keeke laanu oɗ mettaglagnu baɗana, oɗ ii medattappig.

Jesus Nug ikki danab Kristusnu oɗ mattom

41Anam dayeye amu Nug ag amelagppa aum. “Laa ag, ‘Kayak Nug laa tituanom, amuam Kristus, Nug am Dawit bekka,’ aon atteb, amge ag attem doona, anam atteb? 42Dawit nug nukka buk Samppa amu inam yom. ‘Yawe Nug dahil Naɗi amegppa inam aum. “Na da eppel naɗiap-ppa daappe ukkeb, 43da nahip kekeɗ na waatppa maadkkul.” ’ 44Ag iikkud antteg! Danab nug, nug bekkanu, ‘Naɗi’ ii atte, amge Dawit nug Kristusnu, ‘Naɗi,’ aum amunu, ig attem heta, ig Kristusnu, ‘Nug am Dawit bekka,’ akkunig?” awa aum.

45Amu danab ah oh ag daanna, Jesusnu nai doyegeg, Nug nuhikkud ippunittak awak danab amelagppa aum. 46“Ɗo mehuqak danab ag lamen elab enanag ele takkan, danab ah noolagppa oiglagnu oolag he, ee oɗiak abenppa danab ah ag humadkkulagnu, ag nai doyak lakka, hobul haenppa ele ag aben anuqakppa daaglagnu oolag mauhtte, amge ag dahilad amu, ag ahilag kobol amubia hemananu dabmeig! 47Ɗo mehuqak danab ag anam henana, ag ah qab hambuppualadna, ag laulkad yab aotteb. Ag yab awona, ahilag hipunin amu danab ah amelagppa lokkumkkulagnu ag unuqittak elab hetteb amunu, epeɗiak haenppa geha ag uug okkainab aoglag,” awa aum.

Currently Selected:

Luk 20: NB

Highlight

Copy