Jon 14

Mame toppa ukkaknu ib amu Jesusib

1Amu Jesus nai tuɗitta aum. “Ag oolag uug aib dayom. Ag Kayaknu oolagppa genab doona, ag dahilnu ele oolagppa genab doyeg! 2Da Mamel laug am oo kuɗum ele, amu da laa ahilagnu bappaidkkulnu gottem. Anam laa ii daalo amu, da ag amelagppa alom. 3Da ukken, ahilag aben babaittoya, ag da daakkulppa da ele daagnignu da eɗuen uɗien, omalatte gokkul. 4Amu aben da gokkulnu hettem amu, ag ib amu dootteb,” awa aum. 5Jesus Nug anam a amu, Tomas oɗ mettom. “Naɗi, na adeppa gokkut amu, ig ii doottem amunu, ig attem heta, ib na gokkut ele doognig?” awa aum. 6A amu, Jesus Nug nob ma aum. “Da am ⌊Kayak gumitta ukkaknu⌋ ib. Laa ele amu, da am doyak diig genabibnu diig, amu da bau dayaknu diig ele. Danab nug Kayak gumitta gokkunu amu, daib nug ehanidppi gokkunu elele daattem. 7Ag da dooiɗppig amunu, ag da Mamel ele dooglag. Ge, gemu ag da aniɗppig amunu, ag Nug dootteb; ag ele anidtteb,” awa aum. 8Anam a amu, Pilip nug aum. “Naɗi, na Mama ippunigppe, amuppa ig elele doognig,” awa aum. 9Pilip anam a amu, Jesus aum. “Pilip, haen elabnab da ag ele daamut, am na iite dooiɗttem? Danab nug da aniɗtte amu, nug Mama anidtte. Am aɗinu na Mama anidkkutnu oɗ meɗattem? 10Da Mame nuhigppa daattem, Mame Nug dahilppa daatte. Pilip na amu ootppa genab iite doottem?” awa aum. Jesus Nug anam mattiowa, Nug nai tuɗitta ag oh amelagppa aum. “Nai da ag amelagppa madittem ele imu, amuam da dakka, dahil dabmakppanu iitta. Mame Nug dahilppa daatte, Nug nuhig uɗat dahilppa hette. 11Da Mama nuhigppa daattem, Mame Nug dahilppa daatte amu, nai amu ag oolagppa genab doyeg! Iitta dayeb amu, da kobol danab hekkunu elele iitta kuɗum hettem, ag amu anidna, ag oolagppa genab doyeg! 12Da genabnab genab ag amelagppa attem. Laa nug dahilnu ooppa genab dootte ele, nug uɗat da hettem imu, nug ele hekku. Nug uɗat da hettem ele amu, nug uɗat dahil amu eɗittak, okkainab ele hekku. Aɗinu? Da geha Mame toppa gokkul. 13Amu Mama Nug binag amahlak oppiaawak dahilppa aokkunu amu, ag aɗi keekenu da onilppa da oɗ meɗaglag amu, da hekkul. 14Ao, ag aɗi keekenu da onilppa da oɗ meɗaglag amu, da hekkul.

Jesus Kayak Ouɗi meeb uɗikkunu aum

15Am ag dahilnu oolag mauhtte dayeb, ag dahil haknunab anak dim lamadkkulag. 16Amu da Mamel oɗ medappi, Nug Ehanittak laa madakku. Nug ag ele hanhan daaglag. 17Nug am Kayak Ouɗi; doyak diig genabib diig. Wanppan danab ah wannu kobol dim lamidtteb ele, ag Nug aoglagnu am elele iitta. Aɗinu? Ag Nug ii anidtteb, amu ag ele Nug ii dootteb. Amge ag da ele geha iikku daatteb, ag am Nug dootteb, Nug ag ele daatteb, dimppa Nug ag oolagppa ele daakku. 18Da ag nid laa, nug anig mameg ele mauhpiɗ, nukkanab daatte, da amubia ii uuadpa. Iitta. Da gumatte uɗikkul. 19Nakok laa ele wan imuppan danab ah wannu kobol dim lamadtteb ele, ag da ii aniɗmana, amge ag dahilad daatteb amu, ag am da aniɗkkulag. Da haen amuppa bau daakkul amunu, ag ele bau daaglag. 20Haen amuppa amu, da Mame nuhigppa daattem, ag am dahilppa daatteb, da ahilagppa ele daattem amu, ag amu dooglag. 21Am aun laa nug dahil haknunab anak awa dim lamadtte ele, nug aakkuib am dahilnu oo mauhtte. Am aun nug dahilnu oo mauhtte amu, Mame Nug ele nuhignu oo mauhkku. Da ele nuhignu ool mauhebeb, da nug da diil miag atiak nug ippunidkkul,” awa aum.

22Jesus anam awa a amu, Judas laa, Judas Iskariot iitta, nug aum. “Naɗi, diig aɗinu igib nahip diig ippunigkkut, amge wanppan danab ah wannu kobol dim lamadtteb ele dilagppa, amuam iitta?” awa aum. 23Judas laa amu nug anam a, Jesus Nug aum. “Danab laa nug dahilnu oo mauhak dootte dayeb, nug dahil nai ele dim lamidkku. Aria, danab amunu amu da Mamel Nug nuhignu oo mauhkku. Amu da Nug ele, i nuhigppa nepuɗ, ig oh laippu, danab ewam lag laippuppa daatteb, amubia haen oh daagnig. 24Laa nug dahilnu oo ii mauhtte ele, nug nai dahil ele dim ii lamidtte. Am ag dootteb, nai amuam dahil iitta. Nai amuam Mame, Nug da meiɗe uɗimi ele, am nuhig nai.

25Da nai imu oh haen da ag ii uuadmippa, amuam gemu haen imu da ag ele daattem, da gemu haen imuppa nai imu ag amelagppa madittem. 26Amge ahilag Ehanittak, Kayak Ouɗi, da Mamel Nug da onilppa meeb uɗikku amu, Nug uɗia, keeke oh ippuanatta, da ag amelagppa aɗi ami amu Nug heeb, ag daulagppa dokku. 27Da maɗoɗ awe ii gopa. Iitta! Da maɗoɗ ag madattem. Ge, da dahil maɗoɗ ag madattem. Wan imuppan maɗoɗ am laa, da amubia ii madattem amunu, ag oolag uug aib qeum. Ag aib baɗappig.

28‘Da ag uuatte ukkoya, da eɗuen ag gumatte uɗikkul,’ ai dooppig. Ag genab dahilnu oolag mauhlolob, ag da Mame toppa gokkulnu amu, ag amunu oolag gamag ahalo. Aɗinu? Mame Nug am Naɗi, Nug da eɗilak. 29Keeke imu neeb, ag oolagppa genab dooglagnu amu, da keeke imu ii neumppa iikku da ag amelagppa ami. 30Wan imuppan okkai nug amu, nug uɗat nuhig hekkunu haen miag beum daatte amunu, da ag ele nai kuɗum baula ii mattimta. Nug dahilppa keeke laa hekkunu ɠagattag iitta, 31amge wanppan danab ah ag da Mamenu ool mauhtte anidkkulagnu, ag da Mame Nug aɗi hekkulnunab da amelppa mattiom amuib hettem ele dooglagnu amu, da iikku hettem. Ahappeg ig gotu.

Currently Selected:

Jon 14: NB

Highlight

Copy