Jon 13

Jesus ippunittak awak danab baelag ihom

1Pasowa Hobulnu deɗ ii neum, amu haen miag dayomppa, Jesus Nug doyom, Nug wan imu uua, Mameg toppa gokkunu haen aakku malom. Nug anam doya, Nug nuhikkud, ag wan imuppa daappig amu, Nug ahilagnu oo mauhe, Nug genab anam huanak doyom amu gemu ippuanattom. 2Nug nuhikkud ippunittak awak danab ele ee lanan daanna, Satan nug matu Judas Iskariot, Saimon bekka, nug Jesus kekeɗ eppelagppa mekkunu dabmak metta malom amu, 3Jesus Nug Mameg keeke oh Nug eppegppa meum doya, Nug Kayak toppanu uɗiom, Nug eɗua Kayak toppa gokkunu ele doyom 4amunu, Nug ee uua aha, ulahnu lamen nuhig uɗa maama, beɗu oppiaknu lamen laa awa, imuagppa takkom. 5Nug anam hewowa, le tappiɗppa qe noum. Qe no, aakku Nug digma, nuhikkud ippunittak awak danab baelag ihaaha, amu beɗu oppiaknu lamen imuagppa takkom ele, amuppa baelag leppu oppiom. 6Am Nug baelag leppa ihaaha ukka ukka, Saimon Pita gumitta wa, Pita nug Jesus oɗ mettom. “Naɗi, na da bael ihakkutnute hettem?” awa aum. 7Anam a amu Jesus amegppa aum, “Keeke da hettem imu na geha imu ii doottem, amge dimppa dookkut,” awa aum. 8Awa a amu Pita aum. “Naɗi, na da bael iinab ihamna; gemu butti aɗi ele iinab ihamna,” awa aum. A am Jesus Nug aum. “Da na baen ii ihakkul dayeb amu, na dahil iitta,” awa aum. 9Anam a amu Saimon Pita aum. “Naɗi, anam dayeb amu, na da baelib aib ihame. Na eppel, ikkil ele oh ihe!” awa aum. 10Pita anam a amu Jesus Nug amegppa aum. “Laa nug le layom ele, nug beɗu dubuttid iitta amunu, nug baegib iheb, nug beɗu oh oppiaawak daakku. Ag am oppiaawak daatteb, amge ag ohnab oppiaawak iitta,” awa aum. 11Jesus Nug laa Nug kekeɗ eppelagppa mekkunu am aun doyom amunu Nug, “Ag oh oppiaawak iitta,” awa aum.

12Aria, Jesus ag baelag iha malowa, nug nuhig ulah lamen eɗua awa, aɗe no eɗua balalppa dayomppa dayom. Dayaya Nug ippunittak awak danab amelagppa aum. “Da keeke ahilagppa hemi imu ag oolag maidttete? 13Ag dahilnu, ‘Ihinig ippunittak danab amu ihinig Naɗi ele,’ aon atteb. Da genab da anam aakku daattem amunu, ag ena anam atteb. 14Da ahilag Naɗi, ahilag ippunittak danab ele amu, da ag baelag ihaladmi amunu, ag ele nug baeg ihak hekkulagoitte. 15Da antte oo maittak kobol imu ag ippunadmi; ag ele kobol da gemu ahilagppa hemi amubia heig! 16Da genabnab genab ag amelagppa attem. Maɗi nid nug okkai nuhig ii eɗidtte. Nai awa ukkak danab nug danab nug me gotte ele, nug nug ii eɗidtte. 17Ag keeke imu aakku dooppig amunu, ag anam hekkulag dayeb, ag itittak ena aoglag.

18Da madittem imu amu da ag oh ahilagnu ii attem. Da danab dahilad, da tituanadmi ele amu, da ag diilag doottem. Amge Kayak nai niitte amu genab meu bekku. Nai amu inam atte. ‘Am da layalnab, i oh ee lamuɗ ele, nug da kekeɗ meɗom.’ 19Da imu ii beumppa iikku ag amelagppa attem amunu dimppa beeb amu, ag oolagppa genab dooglag, da am Kayak Bekka. 20Da genabnab genab ag amelagppa attem. Laa nug maɗi nid, da nug mei gotte ele, nug nug oo metta humidtte amu, nug da aakku oo meɗa humiɗtte. Laa nug da oo meɗa humiɗtte, nug laa, da meiɗe uɗimi ele amu, Nug oo metta humidtte,” awa aum.

Judas Jesus kekeɗ eppelagppa mekku

21Jesus nai anam mattiowa, Nug ooppa uugnab doyom. Ooppa uug doya amu, Nug nai mattia aum. “Da genabnab genab ag amelagppa attem. Ag oolagppanu laippu laa nug da kekeɗ eppelagppa meiɗkku,” awa aum. 22Nug anam a amu ippunittak awak danab ag akka akka amelag behabe, nug neekkidppig. Nug aunnutai aum amu ag ii dooppig. 23Ippunittak awak danab laa, Jesus nuhignu oo huanak mauhttom ele, nug Jesus guguittak dayom. 24Dayeye amu Saimon Pita nug eppegppaib amegppa aum. “Na oɗ mette, Nug aunnu atte,” awa aum. 25Anam a amu ippunittak awak danab Jesus guguittak dayom ele nug Jesus oguitta wana oɗ mettom. “Naɗi, na aunnu attem?” awa aum. 26Nug anam a amu Jesus amegppa aum. “Da geha bret tappiɗ lewa eleppa meppi nob taulen medakkul amu, danab nug aakkuib,” awa aum. Aria, Jesus Nug bret lewappa ma awa, Saimon bekka Judas Iskariot mettom. 27Judas ee amu awe amu, Satan nug ooppa noum. No amu Jesus Nug Judas amegppa aum. “Keeke na hekkutnu hettem am paha he!” awa aum. 28Anam aum, amge balalppa daappig ele, amunu laippu laa Jesus Judas amegppa aum ele, nai amu diig ii doyom. 29Laala ag Judas men doɗo kunup gumttom amunu, “Jesus Nug Pasowa Hobulnu keeke awaknutai atte” o iitta, “Daɗek danab dilag keeke daden ma mattaknutai atte” aon appig. 30Aria, Judas nug bret maha amu awowa, pahanab dimittim ukkom. Dimittim amu gatatu aakku neum.

Ɗo bau

31Judas dimittim ukke amu Jesus Nug aum. “Danab Bekkalag da, da aakku gemu binal amahlak oppiaawak ele aokkulnu haen beum, dahilppa Kayak ele binag amahlak oppiaawak aokkunu haen beum. 32((Kayak Nug dahilppa binag amahlak oppiaawak aweb,)) da nuhigppa binal amahlak oppiaawak aokkul. Yo, Nug pahanab da binal amahlak oppiaawak meɗakku. 33O nid naunau dahilad, haen nakoknab da ag ele daagnig, amu dimppa ag da mattiɗkkulag. Da tatam Juda okkai amelagppa ami amu, gemu da ag amelagppa ele iikku attem. Ag aben da gottem ele, amuppa ag gokkulagnu elele iitta. 34Amu gemu da haknunab bau ag madattem. Ag akka akka nug oo mauhak doyeg! Amu da ahilagnu ool mauhom daatte, amubia ag ele ag lailkad dilag oolag mauhaɗ! 35Ag akka akka nug oo mauhak dooglag dayeb, danab laa ag miagib dooglag, ag amu ippunittak awak danab dahilad,” awa aum.

36Jesus anam a amu Saimon Pita oɗ mettom. “Naɗi, na adeppa gokkut?” Pita anam a amu Jesus Nug amegppa aum. “Aben da gottem ele, amuppa amu gemu na da dim lamiɗna gokkutnu elele iitta, amge dimppa amu, na dim lamiɗkkut,” awa aum. 37Anam a amu Pita nug aum. “Naɗi attemun? Da geha imu na dim lamidkkulnu elele iittate? Da geha na ehanitten, da nahip aben awen mauhkkul amunu amu, da uugnab laa ii doottem,” awa aum. 38A amu Jesus oɗeppa awa aum. “Na genab dahil aben aona mauhkkutte? Da genabnab genab na amenppa attem. Na tuqan imuppa, na dahilnu, ‘Da Nug ii doottem,’ aon, haen ewam batak akkut. Na haen ewam anam appe, geha matuk dawai nug gaakku,” awa aum.

Currently Selected:

Jon 13: NB

Highlight

Copy