Genesis 40

Paronu maɗi nid aɗit tul niieh, Josep diig mehuqom

1Aria, haen ukke dimppa, Isip dilag king, nuhikuɗ ehanittak anuqak danab aɗit, laa nug wain babaitta Paro mettak anuqak danab dayeye, laa nug bret haattak anuqak danab dayom amu, aa heeh, Paro nug ahilahnu eheɗ doyom 2amunu, Paro nug ahilahnu oo nauhe, 3nug maniguittak Josep dayomppa maatom. Maniguittak amuam Potipar, nug danab laa Paro gumappig dilag okkai amu, am nug laugppa dayom. 4Paro danab aɗit appa maate, Paronu gumak danab dilag okkai nug Josep danab aɗit amu atognoatkkunu amegppa a, nug anam heum.

Aria, danab aɗit aa haen nakok elab maniguittakppa daapiɗ. 5Maniguittakppa daayya, Isip dilag kingnu wain babaitta nug mettak anuqak danab, amu bret haattak anuqak danab ele, aa oh deɗ laa tuqan tul niipiɗ. Ahilah tul niiak aɗit amu oh diig ele. 6Tuqan niioya, buttua ahaya daaeheh, haen Josep nug ukka, gumata ta amu, aa oolah uug ele, iɗulah tiguguɗak ele anatom. 7Anam maniguittakppa daaeheh, anatom amunu, nug Paronu ehanittak anuqak danab aɗit amu oɗ matom. “Aɗinu aa oolah uug ele, iɗulah tiguguɗe daattep?” awa aum. 8Nug anam a amu, aa apiɗ. “I oh tuqan tul niimuɗ, amge danab laa ihinih tul niiaknu diig ab doognihnu ippa iitta,” aoya apiɗ. Anam aeh amu, Josep nug aum. “Tul niiaknu diig amu Kayak, Nugib ippunigtte. Tul niiak ahilah apeɗ dookkul,” awa aum.

9Josep anam a amu, wain babaitta Paro mettak anuqak danab nug nuhig tul niiak Josep amegppa mattia, inam aum. “Dahil tul niiakppa da muɗi grep anidmi. 10Muɗi grep amuam eppeg ewam. Aria, uɗug be, pahanab haɗag beeg, meu ele bena, paha lep meppig. 11Da Paronu kap eppelppa aɗena amu, da grep meu titii, leppu kap-ppa no, Paro mettami,” awa aum. 12Nug anam a amu, Josep nug aum. “Tul niiak amunu diig am inam. Muɗi grep eppeg ewam am deɗ ewam ippunidtte. 13Deɗ aɗit uueb, deɗ ewamppa, Paro na maniguittakppanu uhuqitta ab, na eɗun, uɗat na heme amu, na baula hekkut. Haen amuppa na baula Paro wain anukka mettame bia medakkut. Na anukka nuhig wain babaitta, nug mettak danab anuqak daanna heme bia hekkut. 14Amge haen na gona ena daanna amu, na dahilnu daut aib atiom. Na gona daanna, na dahilnu oo mauhaknab doon ehaniɗkkutnu, na Paro dahilnu amegppa appe, nug doya, da maniguittak imuppanu uhuqiɗkkunu oɗ medattem. 15Aɗinu? Anukka laa ag Hibru wanppanu aɗailna awiɗna uɗieg, iikku daattem. Amu ippa ele da maniguittak nau gatatu ele imuppa daakkulnu kobol eheɗ laa ii hemi,” awa aum.

16Josep anam a amu, haen bret haattak anuqak danab nug wain babaitta Paro mettak danabnu tul niiaknu diig am ena antta, nug ele Josep amegppa aum. “Da ele tuqan tulppa keeke laa anidmi. Dahil tul niiakppa amu, da kaleg ewam bret inak ele ikkilppa daappig ele anadmi. 17Kaleg ewam da ikkilppa daanna, kaleg attan ooppa amu, bret manak digdig, Paro lakkunu daappig, amge ai ag nena, aon lappig,” awa aum. 18Nug anam a amu, Josep nug aum. “Tul niime amu, amunu diig am inam. Kaleg ewam anadme am deɗ ewam ippunidtte. 19Deɗ aɗit uueb, deɗ ewamppa Paro ab, ag na baat otaɗna, na gaɗan adppa aihppeg dayebeb, ai ag nena, teppun lakkulag,” awa aum.

20Aria, deɗ aɗit uue, deɗ ewamppa, Paronu menuak deɗ amu, Paro nug nuhikkud ehanittak anuqak danab oh dilag hobul okkai heum. Deɗ amuppa nug a, wain babaittak Paro mettak anuqak danab, amu bret haattak anuqak danab ele aa danab appa daappig ele, aa ag noolagppa daaeheh, 21Paro nug wain babaitta, nug mettak anuqak danab nug eɗua uɗat nuhig anukka heum ele baula hekkunu aum. Nug anam aum amunu, danab amu Paro wain tatam mettom bia, nug uɗat nuhig amu baula heum, 22amge bret haattak anuqak danab amu, Josep nug aum bia, Paro nug a, ag nug beɗu adppa aihppig.

23Anam beum, amge wain babaitta Paro mettak anuqak danab nug Josep dab-ii-mettom; nug nuhignu daug atiom.

Currently Selected:

Genesis 40: NB

Highlight

Copy