Genesis 39

Josep Isip wanppa danab okkai laugppa uɗat heum

1Aria, Ismael danab ag Josep aon, Isip gona meeg, Potipar nug daden meum. Potipar, nug Isip danab, nug Paronu ehanittak anuqak danab laa, nug daup ag Paro gumappig dilag okkai ele.

2Josep nug appa uɗat heehe, Yawe Nug Josep aɗi heum amu ehanitte, keeke oh ena be, nug Isip ted Potipar laugppa dayom. 3Potipar nug Yawe Josep ele daapiɗ, nug amu anttowa, nug Josep aɗi heum am enaib beeg ele anttowa amu, 4nug nuhignu ena doya, nug he, Josep nug nuhig maɗi nidnab dayom. Josep anam dayeye, Potipar nug nug laug, nuhikkud keeke laa oh ele Josep gumakkunu eppegppa meum. 5Potipar nug nug laug, nuhikkud keeke laa oh Josep eppegppa me, haen amu dimppa Yawe Nug Josep beɗuppa Potipar itittom. Nug Potiparnu keeke oh, laugppanu, dad okkaippanu ele ititte, ena beppig. 6Anam beppig amunu, Josep nug Potiparnu keeke oh gumom. Potipar nug nuhig keeke laanu dab-ii-mettom. Iitta. Nug lanakib laum.

Aria, Josep nug nid gaiɗ enanag, iɗu tuqak ele 7amunu, Potipar wau nug nakok dimppa amu antta, ameg qe, Josep amegppa aum. “Doppe, da ele niiɗu!” awa aum. 8Nug anam aum, amge Josep nug uua, eɗua amegppa aum. “Dahil danab okkai nug laugnu keeke laa ii dabmette; nuhig keeke oh nug da eppelppa da gumakkulnu meum. 9Nug laugppa amu, danab laa da ii eɗiltte. Dahil okkai nug nuhig keeke oh da eppelppa meum. Keeke laippuib nug da eppelppa ii meum amu, am naib. Aɗinu? Na am nug wau amunu, attemun da hipunin imu Kayak nuhigppa hekkul?” awa aum. Josep nug anam aum, amge ah nug hanhan Josep amegppa niiglahnu attom. 10Nug attom, amge Josep nug nai nuhig ii dim lamitta, nug piɗe daattom.

11Josep hanhan anam hettom, amge deɗ laa nug uɗat nuhig hekkunu lag ooppa no, maɗi nid laa lakka uɗat heppig ele amu, laa appa ii dayom 12amunu, ah amu nug Josepnu lamen aɗa, amegppa aum. “Doppe, da ele niiɗu!” awa aum. Nug anam he, Josep nug lamen ah eppegppa uua, oola dimittim ukkom.

13Aria, haen ah amu nug Josep nug lamen uua ukke antta amu, 14nug nuhikkud maɗi nid lakka uɗat heppig ele onilagppa e uɗieg, amelagppa aum. “Imu antteg! Danab dahil nug Hibru ted amu ihinigppa kobol eheɗ hekkunu awa uɗiom. Hibru danab nug da aɗailkkunu heum, amge da emi. 15Nug da ei doya, nug lamen nuhig iikku dahil niiak abenppa da heqolppa uua, oola noa, dimittim ukkom,” awa aum.

16Anam ana amu, nug Josepnu lamen aɗa dayeye, Josepnu danab okkai nug lakka uɗiom. 17Nug gamu uɗie, amegppa nai imu mattiom. “Hibru begbeg maɗi nid na aon uɗime ele amu, nug gemu dagattolppa da aɗailkkunu uɗiom. 18Uɗiom, amge da ei, nug paha lamen nuhig da heqolppa uua, oola dimittim ukkom,” awa aum.

Danab okkai wau hambuppua heum, diig amunu Josep maniguittakppa dayom

19Potipar wau nug, “Hibru begbeg maɗi nid nahip nug anam heum,” a amu, Potipar doya, nug oo huan nauhom. 20Oo huan nauhe, nug Josep awa, maniguittakppa meum. Paro nug ele hanhan nuhikkud danab ag eheɗ heppig ele amu diia, maniguittak amuppa meum. Potipar nug Josep maniguittakppa anam me dayom, amge 21haen amu ele Yawe nug Josep ele daapiɗ. Nug nug ele daayya, Yawe Nug Josepnu oo bodoettak kobol nuhig dim lamitta he, maniguittak gumak ikki danab nug Josepnu ena doya, dabmettom. 22Dabmetta amu, nug a, Josep nug maniguittak danab laa oh appa daappig ele, nug ag gumattom. Gumadttatta, ag appan danab dilag aɗi hekkulagnu heegeg amu, Josepib anadttom. 23Yawe Nug Josep aɗi keeke anen anen heum ele amu ehanittette, keeke anen anen elelenab beum amunu, maniguittak gumak ikki danab nug uɗat laala Josep eppegppa meum ele, nug amunu dab-ii-mettom.

Currently Selected:

Genesis 39: NB

Highlight

Copy