Genesis 37

Jakop, onig laa Israel, nug bekka Josep tul niiom

1Amu Jakop nug wan nug mameg anukka daattom ele, nug amuppa dayom. Wan amu onig Kanan.

2Jakop, nug bekkod ele oippignu nai am inam.

Josep, Jakop bekka, nug nid bau maɗ 17 ele dayeye, nug, amu nug awakkud, ag am Jakop wau Bilha, Silpa ele bekkalti, ag oh ag mamelagnu doɗ gumadppig. Anam oinna amu, Josep nug awakkud ag aɗi aɗi eheɗ heppig amu, nug amunu mameg amegppa mattiom.

3Laa ele amu, Israel nug Josep awakkudnu oo mauhom, amge nug kaino me, nug Rahel ele Josep menupiɗ amunu, nug Josepnu oo huanak mauhom. Nug Josepnu oo huanak mauhom amunu, nug lamen elab enanagnab ha, Josep mettom. 4Josep awakkud ag mamelag nug Josepnu oo mauhak okkainab dootte, ahilagnu doyom eɗittak doyegeg, ag Josepnu nau ninig ele doon, nug ele nai ena ii madittappig.

5Aria, haen laa Josep nug tulppa keeke laa anttom. Anttowa amu, nug awakkud amelagppa a, ag nuhignu nau ninig ele doon tuɗitteg, okkainab meum. 6Nug inam aum. “Da tulppa keeke anidmi, da amu appi doyeg! 7Ig dad okkaippa ee aeg ikki, gumu ele ehakkadta, ehag dahil nug hibaitta dayeye, ahilag ehag amu dahil talilidna gomelppig,” awa aum. 8Nug anam a, nug awakkud ag appig. “Nahip dabmakppa na ig gumigkkutte? Genab, na ihinig okkai daakkutte?” aon appig. Ag anam anana amu, ag tul niiak nuhignu, nug nai mattiomnu ele, ag nuhignu nau ninig ele huanak dooppig.

9Amu Josep Nug baula tulppa keeke antta, nug awakkud amelagppa aum. “Doyeg! Da tulppa keeke laa anidmi. Haen imu amu, aam, kalam amu hoɗoppai 11 ele ag dahilppa gomelegeg anidmi,” awa aum. 10Nug mameg ele amegppa anam a, amu nug mameg daug bata aum. “Tul niiak amu attemun? Da, na anin, amu na awanad ele ig genabte na noomppa gatenig qaun ota, gomelta, iɗunig wanppa mekkunig?” awa aum. 11Anam amunu, nug awakkud ag nuhignu, ihinigppa anam doolon dabmak aɗan daappig, amge nug mameg nug Josepnu tul niiak amu dabmakppa me dayom.

Josep awakkud ag nug meeg, Midian danab ag nug daden meppig

12Aria, dimppa Josep awakkud ag Sekem gona, appa ag Israelnu doɗ gikkiɗah lakkulagnu gumattegeg, 13Israel nug Josep amegppa aum. “Na awanad ag doɗ Sekem guguittak gumadtteb amunu, na anadkkutnu meidppi gokkutnu hettem,” awa aum. Nug anam a amu, Josep nug, “Ena, da anam hekkul,” awa aum. 14Josep anam a amu, Jakop nug amegppa aum. “Na gona, awanad anatte! Ag ena daattebtai, amu doɗ ag ele ena daattebtai, na amu anatte! Anattona amu, na eɗun uɗin, appe dookkul,” awa aum. Anam awowa nug he, Josep nug Hebronnu oolnu noak uua, Sekem gokkunu ukkom. 15Nug Sekem ukka, nug appa dad okkaippa taliliatta oiyeye, danab laa nug antta oɗ mettom. “Na aɗi madittem?” awa oɗ mettom. 16Awa oɗ mettom amu, Josep nug aum. “Da awalad doɗ gumattegeg anadkkulnu oittem. Ag adeppa daatteb amu, na appe dookkulnu eleletai?” awa aum. 17Josep anam a, danab nug oɗeppa awa aum. “Na awanad ag, ‘Ig Dotan gokkunig,’ aegeg doomi,” awa aum. Danab amu nug anam a, Josep nug awakkud dim lamatta ukka, Dotan guguittak anattom.

18Amu Josep anam ugekke, nug awakkud ag neekkeg ukke, Josep nug uma uɗieye anidna, ag qekkulagnu nai inam akka akka madippig. 19“Ahappeg, tul niiak danab uɗitte 20amunu, ig qepput mauheb, moɗ gamag naɗippa buɗipput ukkaɗ! Anam hewota, ig, ‘Doɗ dakkuɗ qe mauhom,’ aot mattignig. Ig anam hepput, tul niiak nuhignu meu am ii bema,” aon appig. 21Ag anam aeg amu, Ruben nug Josep ehanitta, nau amuppa ii daamanu oo dayom amunu, nug aum. “Ig Josep aib qepput mauhom. 22Ig nug tiig ii gokkaɗmata. Buɗippeg, atu taɗak imuppa moɗppaib nokku, amge guittak aib medappig,” awa aum. Ruben nug Josep ehanitta, nau amuppa ii daamanu, mameg toppa omala gokkunu oo dayom amunu, nug anam aum. 23Nug anam a daaegeg, Josep ukka gumatta wa, ag nug aɗan, lamen elab enanagnab uɗidna, 24Josep aon gona, moɗ le iitta, amuppa buɗieg noum.

25Moɗppa dayeye, nug awakkud ag daanna, ee laegeg, Ismael buɗub Midian wanppanu laa ag Gileatnu uɗin, Isip gokkulagnu doeg, kamel ahilag ag spais digdig, marasin, amu mir ele maon ukkaegeg, Josep awakkud ag danab amu anadna, 26Juda nug aum. “Ig amanig qepput mauheb lokkumkkunig amu, ig keeke ena aɗi aognig? 27Ahappeg! Ig amanig mepput, Ismael buɗub imu ag daden meppeg, men doɗo aognig. Kobol amuam ena. Anam heta, ig amanig qepput ii mauhma. Aɗinu? Nug ig ele am tiinig laippu,” awa aum. Nug anam a amu, nug awakuɗ amakkud ele ag, “Ig anam hekkunig,” aon appig.

28Ag nai anam qakkaeg, Ismael buɗub ag keeke laihnu awa dadennu mak danab amu, ag uɗieg, Josep awakkud ag Josep humaeg be, Ismael buɗub mattaeg, ag 200 gram silwa madappig. Anam daden mewona, ag aon Isip goppig.

29Ag anam heegeg, Ruben nug appa ii dayom. Amge dimppa, haen nug eɗua uɗia, le moɗppa ukka neekka, Josep ii antta, nug oo uugnab doya, nuhig lamen pattiɗom. 30Pattiɗa, nug eɗua amakkud gumatta ukka, amelagppa aum. “Nid uppa ii daatte. Da attem hekkul?” awa aum.

31Nug anam a amu, dimppa ag meeme laa baag otaɗna, ag Josepnu lamen elab aon, tiigppa aɗaeg noum. 32Aɗaeg no, ag lamen elab enanagnab amu aon gona, mamelag ippunidna appig. “Ig lamen elab imu anidta aot uɗimut. Na antte, imu na bekkat Josepnute?” aon oɗ medappig. 33Nug antta amu, nug Josepnu doyom. Doya amu, nug aum. “Am genab, Josepnu. Doɗ dakkuɗ laa nug Josep qa la, iitta meum,” awa aum.

34Anam ana amu, nug nuhig lamen pattiɗa, lamen heɗiag ele awa ma, bekka haen elab mahittom. 35Nug bekkod, aɗekkud ele ag nug noobppa gona qagmena, oo maknu nai madippig, amge Jakop nug ahilag oo maknu hak dab-ii-mettom. Nug dab-ii-maama, nug aum. “Iitta! Da ukken, Josep moɗppa daatte, amubia da moɗppa daakkul,” awa aum. Nug Josepnu huan gayom.

36Ag anam heegeg amu, Ismael buɗub Midian wanppa daappig ag Josep aon gona meeg, Isip danab onig Potipar, Paronu ehanittak anuqak danab, nug danab laa Paro gumappig dilag okkai amu, nug Josep daden ma awom.

Currently Selected:

Genesis 37: NB

Highlight

Copy