Genesis 18

Abraham Sarah ele Aisak menuglahnu nai baula aopiɗ

1Amu Abraham nug Mamrenu ad ok gukkuattak dayeye, Yawe Nug gumitta neum. Haen amuppa Abraham nug aam anig nug peh lag nuhig odppa dayaya, 2nug neekke ukke, danab ewam ag nakok piɗe bia hippaidna daaegeg anattom. Anatta amu, nug uɗalag tekkunu nug aha, qaiqaɗ gukkuatta ukka, ag noolagppa gateg qaun o, gomela auta awa, iɗu wanppa meum. 3Anam ha amu, nug ⌊amu oolagppa laa amegppa⌋ aum. “O danab naɗi, na oot dahilnu ena daatte dayeb amu, na da, maɗi nid nahip, na da eɗilna aib gome. 4Tatam laa le nakokib awa doob, ag baelag ihona, ag ad logoppa hik aoglag. 5Laa ele, da ee nakok bappaidppi, ag lawona, ag beɗulag ɠagattag qeeb gokkulag. Aɗinu? Ag da, ahilag maɗi nid, ag da laulppa uɗieg, da enanag doottem amunu, da ehanadkkulnu ool naɗi daatte,” awa aum. Awa a amu, ag inam appig. “Amu ena. Na ame amu, na anam hekkut.”

6Ag anam appig amunu, Abraham nug paha peh lag ooppa noa, Sarah amegppa aum. “Na paha plaua enanag tappiɗ okkai ewam kabolina, bret mane!” awa aum. 7Anam ana amu, nug qaiqaɗ ukka, makau nag enanag epeɗia, maɗi nid nuhig, nug danab ewam dilag bappaidkkunu mette, nug paha qa he ewom. 8He ewa male amu, Abraham nug huh nakok ɠagattag ele, huh leppunab, amu makau teppu ele oh awa ukka, danab ewam matte, ag laegeg, Abraham nug ele ad logoppa gukkuatta hibaitta dayom. 9Lanana amu, ag Abraham oɗ medappig. “Na waat Sarah adeppa daatte?” oɗ medappig. Ag anam oɗ mettaeg amu, nug aum. “Nug peh lag ooppa, uppa uma daatte,” awa aum. 10Abraham anam a amu, ag oolagppan laa nug aum. “Maɗ imu uueb, maɗ laa amuppa, haen inamppa da geha eɗue uɗippi, amu haen gamag amuppa nahip ah Sarah nug nid danab aweb daakku,” awa aum. Nug anam aawo amu, Sarah nug danab amu dimugppa peh lag ooppa dayaya nai amu doyom.

11Amu Abraham, nug wau Sarah ele aa kaino meya malapiɗ, amu Sarah nug nid menukkunu elele iitta. 12Anam daapiɗ amunu, Sarah nug nai amunu ooppaib imaama dabmakppa aum. “Da amu ah kaino memi. Dahil naɗi, da gamul, nug ele danab kaino meum amunu, da nid awaknu oolppa gamag ahak, ena ele doyak dookkulte?” awa aum. 13Ime amu, Yawe Nug Abraham amegppa aum. “Aɗinu Sarah nug ima, dabmakppa, ‘Da kaino memi, attem da nid aokkul,’ aum? 14Da Yawe, da keeke oh hekkulnu elele iittate? Da matu ami, amubia, haen da memippa, haen amuppa da geha eɗue uɗippi, amu haen gamag amuppa Sarah nug nid danab aweb daakku,” awa aum. 15Awa a amu Sarah nug baɗom amunu, nug hambuppua aum. “Da ii imami,” awa aum. Nug anam aum, amge Yawe Nug aum. “Iitta. Na imaame,” awa aum.

Kayak Abraham ele Sodom Gomora elenu madipiɗ

16Dimppa danab ewam ag Sodom gokkulagnu ahan, Sodom dayomppa neegppig. Ag neekkona ukkaegeg, Abraham nug ele oh goppig. 17Amu Yawe Nug ⌊matu⌋ mattia aum. “Da keeke imu hekkulnu amu, da Abraham doomanu da ii lokkumpa. 18Abraham buɗuppud kuɗum, ɠagattag ele bekkulag. Wanppan wan ohppan danab ah ag nuhigppa itittak ena aoglag. 19Aɗinu? Da Abraham doottem, nug, nug bekkod, nug laugppanu ele, ag da, Yawe, ag dahil ib dim lamidkkulagnu ippunadkku. Ippuanatteb, ag kobol tutukku, amu nai doya mala hettoɗia epeɗia elele mettak kobol ele dim lamidkkulag amunu, da nuhigppa aɗi hekkulnu nai ain qakkami amu, da amu hekkul,” awa aum.

20Yawe Nug anam ana amu, Nug ⌊Abraham amegppa⌋ aum. “Da Sodom, Gomora danab ah ele ag hipunin naunab, huanak hetteb, da amu daulppa doomi 21amunu, da noin anidkkul. Da ag hipunin naunab huanak hetteb nai doomi ele amu, nai amuam genabte o iittate. Iitta amu, da dookkul,” awa aum.

22Yawe anam a amu, danab aɗit laa aa ahaya, Sodom gokkulahnu ukkaeheh, Yawe Nug Abraham ele daapiɗ. 23Daayya amu, Abraham nug Yawe gukkuitta wana, Nug amegppa aum. “Na genab tutukku hak danab, amu danab nau ele heppe mauhkkulagte? 24Amu genab tutukku hak danab 50 aab okkai amuppa daappeg amu, na ag ele genab heppe nauhkkulagte? Na genab tutukku hak danab 50 appa daatteb amu dabmena, aab amu uuppe iite daakku? 25Ge, anam daakku! Na genab tutukku hak danab, amu danab nau ele oh he ii mauhtteb. Na anam ii hettem. Na, na wan atu oh dilag epeɗiak danab daattem, na haen oh epeɗiak kobol tutukkuib iite hemana?” awa aum. 26Anam a amu, Yawe Nug Abraham oɗeppa awa aum. “Da genab tutukku hak danab 50 Sodom appa anattena amu, da ahilagnu aab ii heppi nauhma,” awa aum. 27Yawe anam a, amu Abraham nug aum. “Ehe, da doottem, da amu danabib, amge da nakok baɗeɗe, wagai nakok mein, Naɗi amegppa nai mattimi, amge da baula ele akkul. 28O Naɗi, genab tutukku hak danab 45ib aab okkai amuppa daappeg amu, na heppe, aab oh nauhkkute?” oɗ metta aum. Nug anam a amu, Yawe Nug aum. “Iitta. Genab tutukku hak danab 45ib daappeg amu, da ii heppi nauhma,” awa aum. 29Anam a amu, Abraham nug baula nai mattia aum. “Genab tutukku hak danab 40ib daappeg amu, na attem hekkut?” oɗ metta aum. A amu, Yawe Nug aum. “Genab tutukku hak danab 40 daappeg, amu ele da ii heppi nauhma,” awa aum. 30Awa a amu, Abraham nug aum. “O Naɗi, na da aiɗmananu oɗ medattem, amge na uuiɗppe, da nai baula akkul. Genab tutukku hak danab 30ib daappeg amu, na heppe, aab nauhkkute?” awa oɗ mettom. Oɗ mette amu, Yawe Nug Abraham oɗeppa awa aum. “Genab tutukku hak danab 30 daappeg amu, da ii heppi nauhma,” awa aum. 31Anam a amu, Abraham aum. “Ehe, da nakok baɗeɗe, wagai nakok mein, Naɗi amegppa nai mattimi, amge da baula ele akkul. Danab ena tutukku 20ib daappeg amu, na heppe nauhkkute?” awa oɗ mettom. Nug a amu, Yawe Nug aum. “Genab tutukku hak danab 20 daappeg, amu ele da ii heppi nauhma,” awa aum. 32A amu, Abraham nug aum. “O Naɗi, na da aiɗmananu oɗ medattem, amge da nai baula laippuib akkul. Aab amuppa genab tutukku hak danab 10ib daappeg amu, na heppe, aab nauhkkute?” awa oɗ mettom. Oɗ mette amu, Yawe Nug aum. “Iitta. Genab tutukku hak danab 10 daappeg amu, da ii heppi nauhma,” awa aum.

33Yawe anam ana mala amu, Nug ukkom. Abraham nug ele nug laugppa ukkom.

Currently Selected:

Genesis 18: NB

Highlight

Copy