MATTHEU 3

Baptipa Johnne Konnyüopu

(Mk 1.1-8; Lk 3.1-18; Jn 1.19-28)

1 # Mk 1.3-8; Lk 3.2-17; Jn 1.6-8,19-28. Tüopa nyih hei hipak me Judea wanwüng jeng me baptipa John üngwünne pei, 2#Mt 4.17; Dan 2.44; 4.17; Mt 10.7.“Monglüptüoh, hangjingne wangdang ahngching owe peiteki.” 3#Isa 40.3.Aohi jeng Isaia hipa kaiye i hatüowa I, aowe i:

“Wanwüng jengme üngwünne jaipu ja,

Youngwanpa lam tümyah.

I lamnyu tingkhakke lingtüoh.”

4 # 2 Ahng 1.8; Zekh 13.4; Lev 11.22. John-e udhmin inkhek in hüyange I shiengme meisho hit, hüyange I nük ne dukh hei zahtai jelo hah. 5Hüwante Jerusalem kahtalan, Judea khongkümpu hüyange Jordan neikonne ngohpu üshei I tangte pei; 6hüyange iman ünu janne Jordan yengyin me Iye iman baptitam.

7 # Mt 12.34; 23.33; 1 Thes 1.10. Hüyangpoi aope Phariseelan hei Sadduceelan baptine peipu Iye nge, John ne imante i, “Numan pu hayim, ngoikülak ütuh mepu yinlak numante aowe ngaopha ei? 8Numan ütingme monglüp teki she numan nyoingoh kaiye hüotüoh; 9#Jn 8.33; Rom 4.16.hüyange numanpa me ‘Abraham toman üpa she,’ ngaolak tahteih; hangjingne Taowe numante inang tüolan long mepu Abraham hayim Kahwange ngaitamlak. 10#Mt 7.19.Sha-a nehoi pee yalah ngoiye shaaji wa phei aklak. Ülick ümei yelickpu pee lili aklak hüyange vünte jaklak.

11“Numan monglüppu jingne taowe numan yengme bapti nang. Hüpoi ao ü-pheite peilakeih Iye numante Yaha Üjao hüyange vünne baptilak. I-a ü-phei loishe sheyong pupa hüyange I yashom kilakne nehoi tao wangpu ne yeje. 12#Mt 13.30.Iye yoi yakme oun jonne ngohnang. Iye yoi tahnoijing yeonge meiye jaolak hüyange yoi tah bung me jemlak, hüyangpoi tahphan jinte yemeipu vün me Iye jaklak.”

Jesu Baptipu

(Mk 1.9-11; Lk 3.21-22)

13 # Mk 1.9-11; Lk 3.21-22; Jn 1.31-34. Tüophei me John-e baptitamlak jingne Galilee mepu Jesu Jordan te pei. 14Hüyangpoi John-e hüke ngaowe pangne ngang, “Üte hei nange baptilak ngohnang. Nang ü-tangte peipu a?” 15Hüpoi Jesuwe Ite jan, “Üte sha-apu jingne hüke jaling tamtüoh, hangjingne Kahwange mongpu khongkümpu ütahte ngailak teman jingne hüke shunang.” Tüophei me John ne mong. 16Hüyange Jesu, aope I bapti, yeng mepu mamshe ngai; Ite wangdang eptam, hüyange awshu kih Kahwang yaha yupu Iye nge hüyange I tangme ngoi; 17#Mt 12.18; 17.5; Mk 9.7; Lk 9.35; Tüo 2.7; Isa 42.1.hüyange leihuyah, wangmepu ngaoja hüke i, “Hatüowa ü-mongkenpu Ha, aote Taowe yeonge mong hah nang.”

Currently Selected:

MATTHEU 3: KONYBSI

Highlight

Copy