MATTHEU 27

Pilate Tangte Jesu Teipu

(Mk 15.1; Lk 23.1,2; Jn 18.28-32)

1 # Mk 15.1; Lk 23.1; Jn 18.28. Aope napning ngoi, ngengpa üjenglan hüyange jeiyonglan üshei jemme Jesu li ne tamlak jingne I phei tüi-e ngao ngai; 2hüyange iman-e I shayange Governor Pilate tangte woipeiye phünne pha.

Judas Lipu

(Lam 1.18,19)

3 # Lam 1.16-20. #Mt 26.15; Woi 21.32.Hüwante aope Judas, I lowe phapupawe Ite ümeng phapu shing, I monglüp, hüyange ngengpa üjenglan hei jeiyonglan tangte ngin delüm phei leihye, 4hüyange i, “Ümeng yenangpu iy phünne phapu kaiye taowe ünu lingyangki.” Hüyangpoi iman-e i, “Tomante hatüo hanghene? Hatüote nang nying nyingke leiyah.” 5Iye ngin-a khümjing me shüppe tüohyange tai, hüyange I taiye yoi nying nyingke jhotte li. 6#Hin 23.18.Hüpoi ngengpa üjenglan-e ngin toonne yah hüyange i, “Hatüowa iy shakpu ngin, hüyange khümjing ngin angpu nyoi me anglak teman wanglam me yeshu.” 7Iman-e taisho, hüyange kümp kahtok ja shaklak, hüyange yinpalan mangjong ne menglak she tüm. 8Tüokhei tüopa kahtokte tenyih ngoiye iy kahtok she nyiknang. 9#Zekh 11.12-13; Jer 32.6-15; 18.2-3.Hüwante Jeremia hipa kaiye hanghe ngao, ütahte ngai. “Israel halan yome ütam ao kahta jeng phongyeng, hatüo phongyengpu kahta ümee ngin delüm iman-e yah, 10hüyange Youngwanpawe üte ipukih, hatüo kümp kahtok jingne pha.”

Pilate-e Jesute Tongpu

(Mk 15.2-5; Lk 23.3-5; Jn 18.33-38)

11 # Mk 15.2-15; Lk 23.3,18-25; Jn 18.29—19.16. Sha-a Jesu Governor sheshao me yongne tam, hüyange Governorwe Ite tong, “Nanga Jehudilan Ahngpa a?” Jesuwe i, “Nange hüke iyangki.” 12Hüyangpoi aope ngengpa üjenglan hei jeiyonglan-e Ite ümeng phawe ngaoyapeih Iye hango yejan. 13Hüwante Pilate Ite i, “Iman-e nang phei tüi-e saki hangshin pha nange yejai a?” 14#Lk 23.9; Mt 26.62; Mk 14.60; 1 Tim 6.13.Hüyangpoi Iye Ite ngaopha ja nehoi yejan, tüokhei Governorpa meiyange yashan.

Barabbas Heiya Jesu

(Mk 15.6-15; Lk 23.13-25; Jn 18.39—19.16)

15Sha-a mo hipak me ükhong te küpnok me ngohpu iman-e mongpu ja lan ne tamlak Governor wanglam ne ngoh. 16Hüwante Barabbas she nyikpu moilanne shingpu langpho ja küpnok me ngoh. 17Tüokhei aope iman shüppe jem, Pilate imante i, “Numan jingne taowe ao lantam phahu nangki, Barabbas heiya yejema-a, Khrista she nyikpu Jesu?” 18Hangjingne Ite aohüngpu jingne iman-e I phünne pha she Iye mei meishing.

19 # Lk 23.4. Aope Pilate ngaophünpu shotjing me shotte ngoh, I shekowe Ite shonne i, “Hatüo khakshupu kahta jingne nange hango tahling, hangjingne tenyih tao I jingne mangme meiyange shangyangki.”

20Hüyangpoi ngengpa üjenglan hüyange jeiyonglan-e Jesu toiyange Barabbas lanpha she yutüoh she ükhongte yoh. 21#Lam 3.13-14.Governorwe imante üne-o i, “Imni yo me taowe numante aohipa lanlak numan-e mongnangki?” Iman-e i, “Barabbas.” 22Pilate imante i, “Hüma-a Khrista she nyikpu Jesute taowe hang linglak shi?” Iman üsheiye i, “I tangpem me taktüoh!” 23Iye i, “Hangne, Iye hanghe ümeng lingpu shi?” Hüyangpoi iman-e sheyong she üngwünne i, “I tangpem me taktüoh!”

Jesu Tangpem Me Taklak Jingne Pilate-e Pha

24 # Hin 21.6-9; Tüo 26.6. Tüokhei Pilate I ngao hangne-o yemeng, hüyangpoi ükhong moppu pahi yemeine wangpu ngeye, Iye yeng yahpuwe ükhong shaome yak tuhwe i, “Hatüo khakshupu kahta iy jingne üme ümeng yenang; numan-e hangke mong hüke lingyah.” 25#Lam 5.28; Jos 2.19.Hüyange kahta üsheiye janne i, “I iy tomante hüyange toman hayimte shahpha!” 26Hüwante Iye imante Barabbas lanne tei hüyangpoi Iye Jesute shetwuwe shetne tam, hüyange tangpem me eplak jingne phünne pha.

Kengphetlan-e Jesu Nyitoine Lingpu

(Mk 15.16-20; Jn 19.2,3)

27 # Mk 15.16-20; Lk 23.11; Jn 19.2-3. Hüwante Governor kengphet lan-e Jesu ahngnok te woitei, hüyange kengphet ükhong üshei I tangte jem. 28Hüyange iman-e Ijing inkhek khokyah, hüyange Ite nye-ümon inne tam; 29iman-e huh phei ahngpa shaoshaoh ja ling hüyange I shangme shaohne tam, hüyange I yakjah yeme shengshaoh ja shümtam; hüyange I sheshao me khuhtayange yaowe i, “Jehudilan Ahngpa mei ngoh yah!” 30Iman-e Ite iyphao phao, hüyange shengshaoh yah hüyange I shangte shet. 31Aope iman-e Ite yaolepu sho iman-e I mepu nye-ümon yah hüyange Ite yoi inkhek inne tam, hüyange I tangpem me takne woitei.

Jesu Tangpem Me Takpu

(Mk 15.21-32; Lk 23.26-43; Jn 19.17-27)

32 # Mk 15.21; Lk 23.26; Jn 19.17; Heb 13.12. Hüyange iman ngaitai wante, Simon she minpu Sairin kahta ja, iman-e nge; hüyange Jesu tangpem pailak jingne iman phei kange tei. 33#Mk 15.22-32; Lk 23.33-39; Jn 19.17-24.Hüyange aope iman-e Golgotha, she nyikpu nyoi (leppu “Shangwaan nyoi”) ngoi; 34tüome iman-e ükha phei nyütyangpu wuwüngti yinglak jingne Jesute pha; hüyangpoi aope Iye hatüo jüppe nyao Iye yinglak mepu lan. 35#Tüo 22.18.Iman-e I tangpem me tak, hüyange phongyeng yange I nyemo iman yo me tamme yah; 36hüyange iman tüome shotyange I yomme lei ngoh. 37Hüyange I shangtang me iman-e I phei tüi-e nyanpu ja hüke ang, “Hatüowa Jehudilan Ahngpa Jesu.”

38Tüohipak me I phei jamme kuhlang ni tak, ja yakjah ye me hüyange ja yaknya yeme. 39#Tüo 22.7-8; 109.25.Hüyange aoyin linne tai, iman ngüm ngokke Ite yao; 40#Mt 26.61; Lam 6.14; Jn 2.19.hüyange hüke i, “Khümjing mengyange hatüo nyihlüm mongme welakpa nang, nang nying nyingke yintüoh, nang Kahwang üha ne mengma-a, tangpem mepu yukei.” 41Hükemuh ngengpa üjenglan-e, ngaokeng nyüopalan hei jeiyong lan phei, Ite yaowe i, 42“Iye eiha yin ok; yoi nying nyingke Ipa-a yeyin ok! I Israel Ahngpa; I sha-a tangpem mepu yu ne tamtüoh hüyange teman-e Ite üting laklak. 43Iye Kahwang te monghüm; Kahwange Ite mongmei küma-a, sha-a Iye yintüoh; hangjingne Iye i, Tao Kahwang üha.” 44Hüyange I phei jamme takpu kuhlang lanne-o hatüo kih yao.

Jesu Lipu

(Mk 15.33-41; Lk 23.44-49; Jn 19.28-30)

45 # Mk 15.33-41; Lk 23.44-54; Jn 19.28-30. Sha-a penme ni paji#Hipak mepu lüm paji ngoiye kahtoknyu üshei me wangnyak. 46#Tüo 22.1.Hüyange lümpaji hipak me Jesuwe ngao üyong phei üngwünne i, “Eli, Eli#Lai ütamme Eloi Eloi she ngelak, Lama Sabachthani!” leppu, “Ü-Kahwang, Ü-Kahwang, hangne nange Tao winpu shi?” 47Aope tüome yonge ngohpu ütamme tüopa jai, iman-e i, “Iye Elijah te nyiknang.” 48#Tüo 69.21.Iman yo me she ja mamshe phet, shekwan yah, wuwüngti üshi maawe shok, lenglaow ja me sha hüyange yinglak jingne Ite pha. 49Ülaolan-e i, “Tantüoh I yinlak jingne Elijah yuya she ne leihah!” 50Jesuwe üne-o ngao üyong ngaiye üngwün hüyange yoi yaha tei. 51#Heb 9.8; 10.19; Woi 26.31-35; Mt 28.2.Hüyange leihu, khümjing me shongpu jhotnye ütang mepu yashong ngoiye ni ne hit; hüyange minwe lei, hüyange longnyulan khüw; 52mangkoksalan ep, hüyange üjao kahtalan aoyin shi ngohyangki iman pümme yange yetam; 53iman-e mangjong nyoilan tüoh, hüyange lipu mepu Jesu yange yephei me, iman üjao chingnyu te ong, ümeken me maapuwe iman nge. 54#Mt 3.17; 17.5.Aope Roman woipa hüyange I pheipu Jesu yomme ngohpalan-e, minweleipu nge, hüyange hangheyin ngai tüo lili ngewante yeonge nyam. Iman-e i, “Ütingme tüopa kahta Kahwang üha ne ngohpuyang.” 55Tüome shekolan maawe üjai me leiye ngoh. Iman Galilee mepu Jesu wongpong üsheite jamme peiyangki. 56#Lk 24.10.Iman yo me Mary Magdalene, Jeams hei Joseph ünyu Mary, hüyange Zebedee ühalan ünyu omme ngoh.

Jesu Mupu

(Mk 15.42-47; Lk 23.50-56; Jn 19.38-42)

57 # Mk 15.42-47; Lk 23.50-56; Jn 19.38-42; Lam 13.29. Aope ün ngoi, Arimathia mepu hakpa kahta ja pei, I-o yoi nying nyingke Jesu pinne menge ngoh. Ite Joseph she min. 58I Pilate tangte pei hüyange Jesu mang yu. Hüwante Pilate Ite phatüoh she ngaopha. 59Hüwante Josephwe mang yah, hüyange jaoshepu nyekhai me yout, 60hüyange Iye longnyu shaowe linge ngaipu, yoi mangkoksa üla me mu, hüyange mangkoksa taküp ne longkhao lapa küppe angyange tai. 61Mary Magdalene hüyange ülaopa Mary mangjong phei janhüowe shotte ngoh.

Mangjong Me Yompalan

62Üne nyih, Tümpu Nyih phei me, ngengpa üjenglan hüyange Phariseelan Pilate tangte jamme pei 63#Mt 16.21; 17.23; 20.19.hüyange i, “Üyongpa, hatüo tahleih ipawe I üyin me ngohwante, nyih lüm ngohyange ‘Tao yange yelak’ she ipu ngao toman-e teihpei nangki. 64Tüokhei nyih lüm ngoiye mangjong yomne ngaokeng phatüoh; aoshing I pinlan peiye I kuhteiyange, ‘I lipu mepu yange yeteki,’ she kahtalante ikülak, hüyange üwangpa ümeng phei ükümpa ümeng shemengpu ne ngohkülak.” 65Pilate imante i, “Yomlaklan yayah, taitüoh hüyange numan-e meipu shinne mangjong yomtüoh.” 66#Mt 27.60; 28.11-15.Tüokhei iman taiye, iman phei yompalan-o omme, longme füosang tüpyange mangjong yom ne tam.

Currently Selected:

MATTHEU 27: KONYBSI

Highlight

Copy