MATTHEU 26

Jesu Toine Konmeng Tümpu

(Mk 14.1,2; Lk 22.1,2; Jn 11.45-53)

1 # Mt 7.28; 11.1; 13.53; 19.1. Aope Jesuwe tüolan khongkümpu ngaowe sho Iye yoi pinlan te i, 2#Mk 14.1-2; Lk 22.1-2; Jn 11.47-53.“Nyih ni ngohyange Yinyepu mo ngohlak numan-e shing, hüyange Kahta Üha tangpem me dakne phünne phalak.”

3Tüo hipak me ngengpa üjenglan hüyange ükhong mepu jeiyonglan Kaifas she nyikpu ütahpa ngengpa nokshao me jem; 4hüyange iman-e konlinge Jesu pholak hüyange I toilak taisho. 5Hüyangpoi iman-e i, “Ükhong yo me teelapu ngaiye ngohlak yang, mo hipak me tah linghah.”

Bethani Me Jesute Minnga Phopu

(Mk 14.3-9; Jn 12.1-8)

6 # Mk 14.3-9; Jn 12.1-8; Lk 7.36-38. Aope Jesu Bethani me ngonpa Simon nok me ngoh, 7shekoja yeonge pheei wanpu üpe meipu minnga longsheng tük üheng ja yah-e I tangte pei hüyange Jesu khao me shotte hah ngohwante I shang te yeiye photam. 8Hüpoi aope pinlan-e tüo nge iman mongshih hüyange i, “Hatüo hangne shai? 9Hatüowa nangjangpu nginte yaohah shepu hüyange toihalan te phahah shepu.” 10Iman-e hanghe ngao tüopa jingne Jesu mong a teih hüyange imante i, “Hangne numan-e shekonyu shangne tampu? Yhawe üjingne yeonge üshe meipu toi lingnang; 11#Hin 15.11.hangjingne toihalan numan phei jinte ngohlak, hüyangpoi Tao numan phei jinte yengohlak. 12#Jn 19.40.Aope yhawe ü-pümte minnga phoyapeih, tüowe Tao mangjong me mulak tümlak jingne yhawe jonnang. 13Ütingme Taowe numante inang, kahtoknyu üshei me üpüken me tüopa Pungao Ümei nyüolakei, hatüo shekowe hanghe jon, yha jeng teihtüowe ngaolak.”

Jesu Lowetamlak Jingne Judaswe Mong

(Mk 14.10,11; Lk 22.3-6)

14 # Mk 14.10-11; Lk 22.3-6. Hüwante penme ni yomepu Judas Iskariot she nyikpu ja ngengpa üjenglan tangte tai, 15#Woi 21.32; Zekh 11.12.hüyange i, “Taowe numante I phünne phaküma-a numan-e üte hang phalak?” Hüyange iman-e Ite nginkhüo delüm pha. 16Hüyange tüohipak me peiye Iye imante I phünne phalak yafün yam.

Jesuwe Yoi Pinlan Phei Yinyepu Mo Hah

(Mk 14.12-21; Lk 22.7-14,21-23; Jn 13.21-30)

17 # Mk 14.12-16; Lk 22.7-13. Sha-a do yenyütpu an mo ükongwangpu nyih me, pinlan-e Jesu tangte peiye i, “Nang jingne Yinyepu mo hahlak toman-e üpüken me tümme tamhu nangki?” 18#Mt 26.45; Jn 7.6; 12.23; 13.1; 17.1.Iye i, “Chingnyu yeme kahta ja tangte ongtüoh hüyange Ite itüoh, ‘Konnyüopawe hüke i, Ü-hipak owe peiteki. Tao hüyange ü-pinlan-e Yinyepu mo nenok me hahlak.’ ” 19#Mt 21.6; Hin 16.5-8.Jesuwe imante hangke ngaopha tüokih pinlan-e ling, hüyange iman-e Yinyepu mo tüm.

20 # Mk 14.17-21; Lk 22.14,21-23; Jn 13.21-30. Aope ün ngoi pinlan penme ni phei hahlak jingne I khao me shot; 21hüyange iman hahwante Iye i, “Ütingme Taowe numante inang, numan yo me shejawe Tao phünne phalak.” 22Iman yeonge mongmeng hüyange japhei me ja she Ite i, “Youngwanpa, ütingme hatüowa tao a?” 23Iye janne i, “Aowe ü-phei shengja me yak hünge hahnang Iye Tao phünne phalak. 24#Tüo 41.9; Lk 24.25; 1 Kor 15.3; Lam 17.2-3; Mt 18.7.I jeng nyanne ngohpu kih-e Kahta Üha tainang, hüyangpoi ao kaiye kahta üha phünne phanang tüopa kahta jingne onyukei! Tüopa kahta jingne I yepuhpu shemei hah shepu.” 25Judas, aowe I phünne pha, Iye jan, “Konnyüopa, ütingme nange üte ikü a?” Iye Ite i, “Nange iyangki.”

Youngwanpa Mo

(Mk 14.22-26; Lk 22.14-20; 1 Kor 11.23-25)

26 # Mk 14.22-25; Lk 22.17-19; 1 Kor 10.16; 11.23-26; Mt 14.19; 15.36. Aope iman hahyapeih, Jesuwe an yah, moimanne tam, hatüo khoihpai hüyange pinlante phawe i, “Yahtüoh, hahtüoh, hatüo ü-püm.” 27Tüophei me Iye wan ja yah, moiman pha, hüyange hatüo imante phawe i, “Numan üsheiye hatüo mepu yingtüoh; 28#Heb 9.20; Mt 20.28; Mk 1.4; Woi 24.6-8.hangjingne hatüo jiengjeppu ü-iy, maapu ümenglan ünu win oklak jingne, shokke winnang. 29Taowe numante inang, numan phei Tao üpa ahngching me tüopa nyih me wuwüngti üla manying manying sha-a me peiye Taowe hatüo wuwüngti yeyinglak.”

30 # Mk 14.26-31; Lk 22.33-34,39; Jn 14.31; 18.1; 13.36-38. Aope iman-e hem ja lok, iman nokshao te yuwe Olive Kahtang te tai.

Peterwe Yejanlak Jesuwe Itpu

(Mk 14.27-31; Lk 22.31-34; Jn 13.36-38)

31 # Zekh 13.7; Jn 16.32. Hüwante Jesuwe imante i, “Teya numan üshei üte yashah hüolak; hangjingne hüke nyanne ngohnang; ‘Taowe nyeeyompa te shetlak, hüyange nyeekhong yanne tailak.’ 32#Mt 28.7,10,16.Hüyangpoi Tao yange yephei me numan taishaome Tao Galilee te tailak.” 33Peterwe Ite janne i, “Nang jingne üshei yashah hüowe taiye kümyapoi, tao aope-o yehaolak.” 34Jesuwe Ite i, “Ütingme Taowe nangte ipha ning, teya awha ko shaome nange üte lümme yejanlak.” 35Peterwe Ite i, “Tao nangphei lilak ne peiyapoi, taowe nang yejanpe yengohlak.” Pinlan üsheiye hüke muh i.

Jesuwe Gethsemane Me Yop

(Mk 14.32-42; Lk 22.39-46)

36 # Mk 14.32-42; Lk 22.40-46. Hüwante Jesu iman phei jamme Gethsemane she nyikpu nyoijing ja te pei, hüyange Iye yoi pinlante i, “Tao otüo me taiye yopwante numan tüome shotte ngohkei.” 37Iye yoi phei Peter hüyange Zebedee üha ni woi, hüyange mongshange hüyange meiyange shangne ükong wang. 38#Jn 12.27; Heb 5.7-8.Hüwante Iye imante i, “Ü-yaha lilakne meiyange mongmeng nangki; numan tüome ngohkei hüyange ü-phei yange ngohkei.” 39#Jn 18.11; Mt 20.22.I sheshaoyete shejai she wen, sheta khuhta, hüyange yop, “O Opa, hatüo oklakne mengma-a, tüopa wan ü-mepu yahtepha; tüoyangpoi Taowe mongpu kih yeje, hüyangpoi nang mongpu kih lingpha.”

40Tüophei me I pinlan tangte ye hüyange iman shi-ngoh; hüyange Iye Peter te i, “Tüokhei, numan ü-phei ghonda ja nehoi yange yengoh okpu a? 41#Mt 6.13; Lk 11.4.Tokpu me numan yeyeilak jingne, menghapu phei hüyange yopyah. Yahawe monghah shihpu, hüyangpoi meime wong yenang.” 42#Jn 4.34; 5.30; 6.38.Üne-o, nishe I yonge tai hüyange yop, “O Opa, Taowe hatüo yeyingpe, hatüo yahteipu ye-ok ma-a, nang mongngei yao.” 43I üne-o leihye hüyange iman shi-ngohpu nge, hangjingne iman mük shihupuwe mengteiye ngoh. 44Iye iman tüoh, hüyange I üne-o tai hüyange lüm she yop; tüopa ngao jamuh iye yop. 45#Mt 26.18; Jn 12.23; 13.1; 17.1.Hüwante pinlan tangte I ye hüyange imante i, “Sha-ate ngoiye numan shiye hüyange toloimeinang kü a? Leiyah, hipak-a yakme tükke peiteki, hüyange Kahta Üha ünulan yak me phünne phalak. 46Yayongtüoh, teman taihah. Leiyah, Tao lowe tampupa ü-o me ngohnang.”

Lotamyange Jesu Phopu

(Mk 14.43-50; Lk 22.47-53; Jn 18.3-12)

47 # Mk 14.43-50; Lk 22.47-53; Jn 18.2-11. Aope I yelakpe ngaowe ngoh, Judas, penme ni yomepu ja ngengpa üjenglan hüyange payonglan mepu ükhong üyong yanglow hei peshüm jonyange I phei woipei. 48Sha-a I lowe tampawe ükhong te füojai ja hüowe i; “Taowe ao te omhüp lakei, hatüowa I; I photüoh.” 49I Jesu tangte tingkhakke wen hüyange i, “Konnyüopa, meiye ngohyah.” Hüyange Ite omhüp. 50#Mt 20.13; 22.12.Jesuwe Ite i, “Shümpa, hanghe jingne tüome pei nange lingtüoh.” Hüwante iman peiye Jesute yak jon hüyange I pho. 51Jesu phei ngohpu yo mepu naoshe jawe I yak nowe yanglow teakke yah; Iye ütahpa ngengpa shaoshanpa te met, hüyange I na lange win. 52#Kaht 9.6; Ütah 13.10.Hüwante Jesuwe Ite i, “Nang yanglow yoi ngohjing me nishe angtüoh, hangjingne aoyinne yanglow jonlakei, iman üshei yanglow-e mahlak. 53Yejema-a üpawe sha-a ü-tangte wangdang shongmokpalan hajakhong pen me ni phei nyeiye shonlakne, Taowe Ite yune ye-oklak she nange teihnang kü a? 54Hüyangpoi hüke yenangma-a hatüo nangkülak she ngaolai me iyangpu ütahte hangke ngailak?”

55 # Lk 19.47; Jn 18.19-21. Tüohipak me Jesuwe ükhongte i, “Numan-e leihpalan pho ne peipu kih, yanglow hei peshüm jonyange Tao pho ne peipu a? Tao khümjing me nyihjeih konnyüowe shot, hüyangpoi numan-e Tao yepho. 56Hüyangpoi tüolan üshei hipalan-e ngaolai me nyanpu ütahte ngailak jingne ngainang.”

Hüwante pinlan üsheiye I tüohyange yantai mah.

Ngengtüp Sheshaome Jesu

(Mk 14.53-65; Lk 22.54,55,63-71; Jn 18.13,14,19-24)

57 # Mk 14.53-72; Lk 22.54-71; Jn 18.12-27. Tüophei me aoyinne Jesu pho yapeih, iman-e ütahpa ngengpa Kaifas nok me Ngaokeng nyüopalan hei jeiyonglan jemme ngohjing te I woitei. 58Hüyangpoi Peter üjai me I phei te ütahpa ngengpa nokshao ngoiye woi; hüyange I-o nokshao me shotpalan phei hüyange üküm ngoipu shinglak jingne, jemme ngohpalan phei shot.

59Sha-a ngengpa üjenglan hüyange Ngengtüp khongkümpuwe Jesu phei la-e I li ne tamlak jingne tahleih saki yam: 60hüyangpoi iman-e tahleih saki maawe yahpeiyapoi ja nehoi yetüo. Phei me, pa ni ngai, 61#Mt 24.2; 27.40; Lam 6.14; Jn 2.19.hüyange i, “Taowe Kahwang khümjing mengpu oklak, hüyange nyih lüm mongme hatüo wepu oklak she, tüo kahtawe ipu üja.”

62Ütahpa Ngengpa yong hüyange i, “Nange hango yejan lak a? Nang phei tüi-e tüolan-e hanghe saki phapu shi?” 63#Mt 27.11; Jn 18.33.Hüyangpoi Jesuwe kekshe yengao. Ütahpa ngengpawe Ite i, “Üyin Kahwang min me taowe nangte jienge inang; nang Kahwang üha Messiah ne jeküma-a tomante ipha.” 64#Mt 16.28; Dan 7.13; Tüo 110.1.Jesuwe Ite i, “Nange hüke iyangki; hüyangpoi Taowe numante inang, shaame peiye numan-e Kahta Üha ünganwong yakjah yeme shotyange, hüyange wang mepu wang phom phei yupu numan-e ngelak.” 65#Lung 14.6; Lam 14.14; Lev 24.16.Hüwante ütahpa ngengpawe yoi inkhek hitte i, “Iye Kahwangte phoiwüm-e ngaoyangki. Hangne teman-e ülao saki yamlak wongpong shi? Sha-a numan-e Iye yaolepu jaiyangki. 66Numan-e hangke teihnangki?” Iman-e jan, “Iye püohnang, I li ne tamlak.”

67Hüwante iman-e I shetate iyphao phao hüyange shet, hüyange ütam-e yakphawe leiye i, 68“Messiah, nangte shetpuwa ao shi tomante hi-ngao itehu?”

Peterwe Jesu Yejan

(Mk 14.66-72; Lk 22.56-62; Jn 18.15-18,25-27)

69Sha-a Peter nokshao me shotte ngoh, hüwante ütahpa ngengpa nok shaoshannyu ja I shongte peiye i, “Nango Galileelan Jesu phei jamme ngohpu.” 70Hüyangpoi Iye iman üshei sheshao me I yejan, hüyange i, “Nange hanghe iyapeih taowe yeshing.” 71Aope I peten shong yete yu, ülao sheko jawe I nge, hüyange shotte ngohpalan te i, “Hatüo kahta Nazareth mepu Jesu phei ngohpu üja.” 72Iye üne-o yejanpe jienge i, “Kahta-a taowe yeshing.” 73Kenja ngohyang phei me ü-o me yonge ngohpalan wen hüyange Peter te i, “Nango ütingme iman yo me ja üja, hangjingne nang ngao kaiye nang aoshi hüonangki.” 74Hüwante Iye phoiye hüyange jienge hüke i, “Kahta-a taowe yeshing.” Hüwante nünge awka. 75#Mt 26.34.Hüyange Jesuwe, “Awha koshao me nange Tao lümme yejanlak,” she ipu ngao Peterwe teihpei. Hüyange I nokshao te yu hüyange yeonge khah-e shap.

Currently Selected:

MATTHEU 26: KONYBSI

Highlight

Copy