MATTHEU 25

Naoyha Pen Me Ngaolep

1 # Lk 12.35-38; Mk 13.34. “Hüwante wangdang ahngchinga nyemnya ei naoyha pen, aoyinne yoi vüntük jon hüyange nyemthe nok pongte yu hatüo kih ngohlak. 2#Mt 7.24-27.Iman yo me naoyha nga ü-nganyulan, hüyange ülao naoyha nga kentamong tingpalan; 3hangjingne ünga-nyulan-e iman vüntük yah hüyangpoi iman phei minnga yeyah; 4hüyangpoi kentamongting palan-e yoi vüntük phei yoi shengtak maawe minnga yah. 5Nyemthe nok yeonge shonne yepeipe ngoh, hüyange naoyhalan üshei mükngoih shong hüyange iman shimah.

6“Hüyangpoi phawo me üngwünpu ja ngai, ‘Naoyha poipate leitüoh! Numan I phei hüone pongte yutüoh.’ 7Hüwante nyemnya ei moilan shinlüo hüyange yoi yoi vüntük tüm. 8Hüyange ünga-nyulan-e kentamong tingpalante i, ‘Tomante-o numan mepu minnga tamkhu, hangjingne toman vüntük mahküki.’ 9Hüyangpoi kentamong tingpalan-e i, ‘Yeje, aoshing, toman hei numan jingne minnga wange yengohlak. Hüleima-a yüopalan tangte numan taitüoh, hüyange numan-e yoi jingne shakyah.’ 10#Ütah 19.9.Iman shakne taiteiye ngohwante, nyemthepa pei, hüyange aoyin tümyange ngoh iman I phei naoyha poipu mo te ong, hüyange taküp küp.

11 # Lk 13.25; Mt 7.21-23. “Phei me nyemnya ei ülaolan-o pei ngoiye i, ‘Nokpupa, nokpupa, tomante eppha.’ 12Hüyangpoi Iye janne i, ‘Ütingme taowe numante inangki, taowe numan yeshing.’ 13#Mt 24.42; Mk 13.35; Lk 12.40.Tüokhei, kentingmongta puphei ngohyah, hangjingne numan-e nyih jeyah hipak jeyah yeshing.”

Shaoshanpalan Me Ngaolep

(Lk 19.11-27)

14 # Lk 19.12-28. “Hangjingne hatüowa kahta jawe yoi shaoshanpalan nyik-e peiye, yoi toi iman yak me phünne phayange, yin taipu ja lenangki. 15Ja te Iye nginshop nga pha, ülao ja te ni pha, hüyange ülao ja te ja pha, hüke yoi yoite shange pha, hüyange I maolaote tai. 16Aowe nginshop nga tüo, hüwante muh tüolan phei pheeileih ne tai hüyange nga paowe tüowe ye. 17Hatüo kih muh aowe nginshop ni tüo, ni paowe tüowe ye. 18Hüyangpoi aowe ja hei tüo, taiye kahtok shaoyange yoi nokpupa ngin jaowe ang.

19 # Mt 18.23. “Hipak nangjange ngohyange shaoshanpalan nokpu peingoi hüyange iman phei ngin jeng tüm. 20Aowe nginshop nga yah üne-o ülao nga phei I tangte peiye i, ‘Nokpupa, nange üte nginshop nga yakjongne tam. Leihu, taowe nginshop nga paowe küw tüoyangki.’ 21#Lk 16.10; Mt 24.45.I nokpuwe Ite i, ‘Meiteki, ümei hüyange monghümpu shaoshanpa. Üjinghapu toi me nang mong hümpu hüoyangki; taowe nang sheyongpu tangme anglak. Peiye ongkei hüyange nang nokpu mongmei me omyah.’ 22Aowe nginshop ni yah, I peingoiye i, ‘Nokpupa, nange üte nginshop ni phei yakjongne tam. Leihu, taowe ni paowe küw tüoyangki.’ 23I nokpupawe Ite i, ‘Meiteki, ümei hüyange monghümpu shaoshanpa. Üjinghapu toi me nang monghümpu hüoyangki; taowe nang sheyongpu tangme anglak. Peiye ongkei hüyange nang nokpu mongmei me omyah.’ 24Hüyangpoi aowe nginshop ja yah, I peingoiye i, ‘Nokpupa, taowe nang shingnang: nanga yeonge wanpu kahta, nange ümeken me yedei tüoken me nange wetnang, hüyange nange ümeken me yeshai tüoken me nange yo nang. 25Tüokhei tao nyamme ngoh, hüyange taiye nang nginshop kahtok ümongme jüowe angki. Leihuyah, nangjing nange tüonang.’ 26Hüpoi I nokpupawe Ite janne i, ‘Ümeng hüyange jokpa shaoshanpa, taowe hanghe me yedei tüome wetnang, hüyange hanghe me yeshai tüome yonang she nange shing a? 27Hüma-a nange ü-nginna nginang nokte pha anghah shepu; hüyange aope tao ye, üjing hanghe ngoh tüome ngin puh-e tüohah shepu! 28Sha-a, I mepu nginshop yahtüoh hüyange ao me nginshop pen ngoh, Ite phatüoh; 29#Mt 13.12; Mk 4.25; Lk 8.18.hangjingne aoyinme ngoh, iman lilite paowe phalak, hüyange Iye wangman-e ngohlak; hüyangpoi aome üjingha nehoi yenang, hüyange Iye hanghe üjingha ngoh, tüo-o yahteilak. 30#Mt 8.12; 13.42,50; 22.13; Lk 13.28.Hüyange yahlak yenangpu shaoshanpa nokshao ye wangnyak me toonne shüptüoh; hatüome ukkeyoongpu hei fa ngaopu ngohlak.’

Jatlan Ngaophünpu

31 # Mt 16.27; 19.28. “Aope Kahta Üha yoi müktishiwa puphei hüyange I phei wangdang shongmokpalan üshei woiyange yulakei, hüwante I yoi müktishiwa shotjing me shotlak; 32#Eze 34.17.hüyange jatlan üshei I sheshao me jemlak. Tüophei me nyeeyompawe nyee hei youn tampu kih-e, Iye iman ükhong ni ne tamlak. 33Iye nyeelan-a yoi yakjah ye me hüyange younlan-a yaknya ye me anglak. 34#Lk 12.32; Mt 5.3; Ütah 13.8; 17.8.Hüyange Ahngpawe yakjah yeme ngohpu nyeelante ilak, ‘Wenkei, üpawe moimanpalan, numan jingne kahtamyenghan memuh tümme angpu ahngching moth leiyah. 35#Isa 58.7; Jas 1.27; 2.15-16; Heb 13.2; 2 Tim 1.16.Hangjingne Tao seanyaowe ngoh, hüyange numan-e üte hahlak pha; Tao yengleye ngoh, hüyange numan-e yinge tam; Tao yinpa ne ngoh hüyange numan-e woi in; 36Tao tangko me ngoh hüyange numan-e üte inne tam; Tao dak-e ngoh hüyange numan-e ü-phei pongne pei; Tao küpnok me ngoh hüyange numan ü-tangte pei.’ 37Hüwante khakshupu lan-e Ite janne ilak, ‘Youngwanpa, toman-e nang seanyaowe aope nge hüyange nangte uhtam, yejema-a yengleye ngoh hüyange nangte yinglak pha ei? 38Toman-e nang yinpa ne aope nge hüyange nang woi in, yejema-a tangko me ngoh hüyange inkhek inne tam ei? 39Toman-e nang dak-e aope nge, yejema-a küpnok me, hüyange nang tangte pei ei?’ 40#Mt 10.42; Mk 9.41; Heb 6.10; Det 19.17.Ahngpawe imante janne ilak, ‘Ütingme Taowe numante inang, tüolan ü-jeiheinao üshoipa yo me ja te nehoi, numan-e hanghe ling, hatüo numan-e üte lingyangki!’

41 # Mk 9.48; Lk 16.23; Ütah 20.10. “Tüophei me Iye yaknya ye me ngohpalan te-o ilak; ‘Numan phoiwümpu shahpalan, ü-mepu yantüoh; kahshih hüyange I shongmokpalan jingne hanghe pa üküm yenangpu vün tümme ngoh nang tüote yutüoh; 42hangjingne Tao seanyaowe ngoh hüyange numan-e hahlak yepha; Tao yengleye ngoh hüyange nange yinglak hango yepha; 43Tao yinpa ne ngoh hüyange numan-e Tao woiye ye-in; tao tangko me ngoh hüyange numan-e üte inkhek inne yetam, dak hüyange küpnok me ngoh hüyange numan ü-tangte yengoi.’ 44Hüwante imane-o janlak, ‘Youngwanpa, aope toman-e nang seanyaowe, yejema-a yengleye, yejema-a yinpa ja ne, yejema-a tangko yejema-a dak-e yejema-a küpnok me ngeyang pheite hüyange toman-e nang wongpong te yejampe ngoh ei?’ 45Hüwante Iye imante janlak ‘Ütingme taowe numante inang, tüolan üshoipa yo me ja te numan-e hanghe yeling, hatüo numan-e üte yeling.’ 46#Dan 12.2; Jn 5.29.Hüyange tüolan üküm yenangpe shangjing te yulak, hüyangpoi khakshupulan-a jinte pu üyin chingte tailak.”

Currently Selected:

MATTHEU 25: KONYBSI

Highlight

Copy