MATTHEU 24

Jin Üküm Ngoilak Füo

(Mk 13.1-13; Lk 21.5-19)

1 # Mk 13.1-31; Lk 21.1-33. Jesu khümjing mepu ngaiye yoi lamme kemme ngohwante, khümjing wepu hüolak jingne I tangte yoi pinlan pei. 2#Mt 26.61; 27.39-40; Lk 19.44; Jn 2.19.Hüpoi Iye imante janne i, “Tüolan üshei numan-e ngenang no? Ütingme Taowe numante inang, hatüo me longja nehoi ülao japa tangme yelüpshüppe yetüohlak.”

3 # Lk 17.20; Mt 13.39,40,49; 28.20; 16.27. Hüke I Olive Kahtang me shotte ngohwante pinlan shaha I tangte pei hüyange i, “Tomante ipha, hatüo lili aope ngailak hüyange nang yulak füo hanghe ngohlak hüyange hatüopa jin üküm hangke ngohlak?”

4Hüwante Jesuwe imante janne i, “Aowe-o numan ünyong yete yewoilak jingne kentingyah. 5#Mt 24.11,23-24; 1 Jn 2.18.Hangjingne ü-min me kahta maawe ‘Tao Messiah,’ she iye peilak; hüyange iman-e kahta maawe ünyong yete woilak. 6#Ütah 6.3-8,12-17; Isa 19.2.Numan-e wehokpu hüyange we hoklak ngaowoong jailak. Numan mong ye-alak jingne kentingyah. Hatüo hei ngailak, hüyangpoi üküm üne-o manngoi. 7Hangjingne jatte jat phei tüi-e, hüyange ahngchinge ahngching phei tüi-e yonglak; seanyao yenglepu hüyange kenphe me minwe leipu ngohlak. 8Tüolan üshei shange pongpu ükong wangpu ne ngohlak.

9 # Mt 10.17-18,22; Jn 15.18; 16.2. “Hüwante iman-e numan shangponge tamlak jingne phünne phalak, hüyange numan toilak; hüyange ümin jingne jat üsheiye numante nulak. 10Hüwante maawe ütinglakpu mepu yanlak, hüyange jawe ja lowe tamlak; 11hüyange tahleih hipalan maawe ngailak hüyange maawe ünyong yete woilak; 12hüyange ngaokeng mengpu jamloi ngaipu kaiye sheyongpu jing yayeng wünge mahlak. 13#Mt 10.22; Ütah 2.7.Hüyangpoi aowe üküm ngoiye nün oklakei I yinlak; 14#Mt 28.19; Rom 10.18.hüyange hatüo wangdang ahngching pungao ümei kahtoknyu üshei me jat üsheite saki phalak jingne konnyüolak; hüyange hüwante üküm ngoilak.”

Nyam Nyam Shepu Hipak

(Mk 13.14-23; Lk 21.20-24)

15 # Dan 9.27; 11.31; 12.11. “Tüokhei Daniel hipawe iye angpu, nunupu mahlakpa aope üjaoken me yongyange ngelakei (aowe iyapeih Iye jaiyah), 16hüwante Judea me aoyin ngoh kahtang yete taitüoh. 17#Lk 17.31.Noktok me ngohpu kahta toinan yahlak jingne I nokmong te tah ye; 18hüyange kah me ngohpu kahta yoi nyemo yahlak jingne tah ye. 19#Lk 23.29.Hüyange tüopa ju hei hipak me püm yekengpe hüyange düamyeng yingne tampalan sheko jingne onyukei. 20Numan lüowe taipu eanyu yejema-a Sabbath me yeshulak jingne yopyah. 21#Dan 12.1; Joel 2.2.Hangjingne hüwante shange pongpu jamloi yonge ngohlak, kahdeiyengha mepu tenyih ngoiye hüke manngai, hüyange hatüo hüke aope-o yengailak. 22Hatüo hipak shoh ne tamshima-a. kahtanyuhalan aowe-o yeyin hah shepu; hüyangpoi leyangpulan jingne hatüo hipak shohlak.

23“Hüwante kahta ütam-e numante, ‘Leitüoh, Messiah tüome ngoh nang!’ yejema-a ‘Otüo me ngohnang’ she ima-a tüote üting tahlak. 24Hangjingne tahleih Messiahlan hüyange tahleih hipalan ngailak, okma-a leyangpulan nehoi ünyong yete woilak jingne füo üyong hüyange kahnyingwüngha hüolak. 25Jaihuyah, Taowe numante shaotan ngao inang. 26#Lk 17.22-24; Ütah 1.7.Tüokhei kahtalan-e numante ‘Leitüoh, I wanwüng jengme’ she ima-a, tahtai. ‘Leitüoh, I tüp ümongpa me’ she ima-a tüote üting tahlak. 27Hangjingne wanghe ongjing yemepu hangke wanglüppe ngai, hüyange wanghe nyipjing ngoiye ngenang, hatüokih kahta üha peipu ngohkülak. 28#Lk 17.37; Job 39.30.Ümeken me lipu mang ngohlakei, tüoken me pongkonlan jemlak.”

Kahta Üha Yupu

(Mk 13.24-27; Lk 21.25-28)

29 # Ütah 8.12; Isa 13.10; Eze 32.7; Joel 2.10-11; Zeph 1.15. “Tüopa shangpongpu nyih hei hipak linpu phei jamshe wanghe nyakke mahlak, hüyange linnyuwe yoi wangngai yephakülak, wang mepu shanhalan yeilak, hüyange wangmepu wonglan potamlak.”

30 # Mt 16.27; Dan 7.13; Ütah 1.7. Hüwante wangme Kahta Üha füo ngelak, hüyange hüwante kahtoknyu jat hei lilan üsheiye mongjang te tüppe shaplak hüyange iman-e Kahta Üha wangphom me üngan hei müktishiwa üyong pume yupu ngelak. 31#1 Kor 15.52; 1 Thes 4.16; Isa 27.13; Zekh 9.14.Hüyange nyawong wüng üyong phei Iye yoi shongmokpalan teilak, hüyange iman-e wangjeng jaye mepu jaye ngoiye, kahtoknyu üshok peli mepu yoiye lepulan woijemlak.

Phukpee Me Konnyüopu

(Mk 13.28-31; Lk 21.29-33)

32“Phukpee kaiye numan-e jaiyahlak shingyah! Aope peequi üla ne meng hüyange üyak ngai, numan-e jüo ngoiküki she shingnang. 33Tüokih-e numane-o aope tüolan lili ngelakei, numan-e I ü-o me, tafün shongme ngoh nang she shingyah. 34#Mt 16.28.Ütingpa me Taowe numante inang, tüolan lili manngai manngai, tüopa jin linne yetailak. 35#Mt 5.18; Lk 16.17.Wangdang hei kahtok linne kümlak, hüyangpoi ü-ngao linne yetailak.”

Nyih Hipak Aowe-o Yeshing

(Mk 13.32-37; Lk 17.26-30,34-36)

36 # Lam 1.6-7. “Hüyangpoi tüopa nyih hei hipak Üpa tokte kaiye wangdang shongmokpa lanne-o, yejema-a Üha nehoi, yejema-a aowe-o yeshing. 37#Lk 17.26-27; Kaht 6.5-8; 7.6-24.Hangjingne Noah hipak hangke ngoh, hüke Kahta Üha yupu ngohkülak. 38Hangjingne yengyong muleam manngoipu nyih hei hipak me, hüyange Noah yenglinte ongpu nyih manngoi manngoi she iman-e hah hüyange ying, hüyange mata-tong ningpu ngoh; 39hüyange muleampu peiye iman khongkümpu phwnge mantei mantei iman-e hango yeshing. Kahta Üha yupu-o hüke ngohlak. 40#Lk 17.34-35.Hüwante pa ni kahme ngohlak, pa ja teilak hüyange pa ja tüohlak. 41Sheko ni shamme shamshuwe ngohlak, ja teilak hüyange ja tüohlak. 42#Mk 13.35; Lk 12.40; Mt 25.13.Tüokhei kenting mongtapu phei ngohyah, hangjingne hanghe nyih me numan Youngwanpa peilak numan-e yeshing. 43#Lk 12.39-46. #1 Thes 5.2; Ütah 3.3; 16.15; 2 Pet 3.10.Numan-e tüo shingyah, nok nokpuwe wangnyak hanghe hipak me kuhpa peilak tüopa shingshih ma-a, Iye yomme ngoh hah shepu, hüyange Iye yoinok mengne yetam hah shepu. 44Tüokhei numan-o tümme ngohyah, hangjingne numan-e yeteihpu hipak ja me Kahta Üha peikülak.”

Shaoshanpa Ümei Yejema-a Ümeng

(Lk 12.41-48)

45 # Mt 25.21,23. “Üte ipha, hümma-a nok nokpupawe yoi shaoshanpa lante hipak khakshuwe hahying phalak jingne iman tokte yakjongpa ne menglak, monghümme teihpu hüyange kentamongtingpu shaoshanpa ao shi? 46Yoi nokpupa peiwante shaoshanpa aowe hüke toilinge ngohlakei, I hangshin mongmeilak. 47Taowe numante ütingpa inang, Iye yoi toinyu nanha üshei tangme yakjongpa ne I angkülak. 48Hüyangpoi shaoshanpa ümenge ‘Ü-nokpupa peilak hipak nangjange ngoh nang she,’ yoi nying nyingke iyange, 49#Lk 21.34.hüyange yoi phei jampu shaoshanpa lante shetne wang, hüyange hahyinge jokke yingma-a, 50shaoshanpa Iye yeteihpu nyih ja me nokpupa peilak hüyange hatüo hipak Iye yeshing. 51#Mt 8.12; 13.42,50; 22.13; 25.30; Lk 13.28.Nokpupawe I khoih tanglak hüyange Ipheipu ümenglan phei meitam tamlak. Tüome ukkeyoongpu hei fa ngaopu ngohlak.

Currently Selected:

MATTHEU 24: KONYBSI

Highlight

Copy