KAHTAMYENGHAN 48

Jacob-e Ephraim Hei Manasseh Moiman

1Hipak ütenja linyang phei me Ipa dak nangki she Joseph te ngaolan pei. Tüokhei lye yoiha Manasseh hei Ephraim ni yahyange Jacob phei hüolak jingne tai. 2Aope Jacob te I phei hüolak jingne yoiha Joseph peinangki she ngaowe tam, lye yoi wong khongkümpu yahyange lüo hüyange leng me shot. 3Hüyange Jacob-e Joseph te i, “Kanan kahtok Luz nyoi me Ütahpa Kahwang ü-tangte ngai, hüyange üte moiman tam, 4lye üte i, ‘Leihuyah, Taowe nang te hayimlan maawe phalak, tüokaiye nang huyimlan mepu jatlan maawe ngailak. Taowe tüopa kahmük-a nang mepu huhayimlan te jintepu jingne iman jing moth ne menglak jingne phalak.’”

5Jacob-e yelakpe ngao, “Joseph, nangha ni, tao tüome tashao me aoyin Egypt me nangte puhtam, imni-a üjing. Ephraim hei Manasseh ni-a ü-ha Reuben hei Simeon ni shinne ngoh nang. 6Nang me ülao hayimlan üne-o ngohma-a, iman üjing she i ne ye-ok lak, iman jalunpu huhayimlan-a Ephraim hei Manasseh ni kaiye hei tüolak. 7Taowe hatüo lingpuwa nangnyu Rachel jing üne lingnang. Tao Mesopotamia mepu leih yewante, Ephrath mepu meiyange yejaipe tao mongmengpu üyong pu phei Kanan kahtok me yha li. Taowe yha-a tüoken Ephrath lamnyu nah me muwe tam.” (Tenyih, Ephrath te-a Bethlehem she nyiknang.)

8Aope Israel-e Joseph hayim nge, lye tong, “Tüolan nahalan-a aoshi?”

9Joseph-e Ipa te janne i, “Tüolan-a Kahwange üte Egypt kahtok tüome phapu ü-halan üja.”

Hüwante Jacob-e i, “Chingmei lam linge iman ü-tangte yah wenkhu, taowe iman moiman tamlakei.” 10I wupa ne mengpu jingne Jacob mük pomteiye ngoh; hüyange lye hango meimei-e ye-nge ok. Tüokhei Joseph-e imni I shongte woipei hüyange lye imni te kenyange omhüp. 11Jacob-e Joseph te i, “Taowe nang sheta nishe ngelak she aope-o yeteih; hüpoi leihu, Kahwange shaapa-a nangha nehoi üte ngene tamnang.” 12Hüwante Joseph-e Jacob yungtang mepu yoi ha ni yah, hüyange I sheshao me kahtokte sheta khuhta shotne tam.

13Joseph-e Jacob yaknya ye me Ephraim hüyange I jing yakjah ye me Manasseh ange tam. 14Hüpoi Jacob-e yoi yak jiengpei, hüyange I naolipa ne mengyapoi Ephraim shang me lye yoi yakjah ye shüng, hüyange jeiyongpa ne mengpu Manasseh shangme yoi yaknya ye-e shüng. 15Tüophei me Iye Joseph te moi man phawe tam:

“Kahwang ao te üpayim Abraham hei Isaac lanne shaoshan, tüopa Kahwange tüolan naoshe lante moiman shih!

Tüopa nyih hipak ngoiye aowe üte lam woipei, tüopa Kahwange imante moiman shih!

16Wangdang shongmokpa aowe ümeng üshei mepu tao yinne tam, moiman tamshih!

Ü-min hüyange üpayim Abraham hei Isaaclan min tüolan nahalan kaiye üyin me angshih!

Iman me hayimlan üngang hüyange huhayimlan üngang ngohtam shih!”

17Aope Joseph-e Ipa yak yakjah ye-e Ephraim shangtang me shünge nge, I mong yehah ok; hüyange Ephraim shangtang mepu Manasseh shang me shüngne tamlak jingne Ipa yak yah. 18Hüyange Joseph-e Ipate i, “Opa, hüke yeje; hatüowa üwangne puhpu ha; I shangtang me nang yakjah ye-e shüng tüoh.”

19Hüpoi Ipawe yemong hüyange i, “Taowe shing nang, üha, taowe shinge ngoh nang. Manasseh huhayim lan-o kahta üyonglan ne menglak; hüyange yonge lüowe ngailak. Tüoyangpoi Inao I phei sheyongpupa ne menglak, hüyange I huhayim lanna jatnyu üyongne menglak.”

20Tüokhei tüopa nyih me lye imante moiman phawe i,

“Aope iman-e moiman yuwe ngaolakei, hüwante Israel lanne numan min jonlak. Iman-e ilak,

‘Kahwange nanga Ephraim hei Manasseh kih-e linge tamshih.’ ”

Hükih-e linge Jacob-e Manasseh shaoma-a Ephraim angne tam.

21Tüophei me Jacob-e Joseph te i, “Nange ngepu kih-e, taowa shaaji li ne o-nang; hüpoi Kahwang nang phei ngohlak, hüyange lye nang numan jing pajeiyonglan kahtok te woi leih yene tamlak. 22Tüo tokte taowe nangjei yimante yeje, nangte Shekhem, üyao pheipu kahmük phanang; tüopa-a taowe ü-yanglow hüyange wenglah phei Amorlan yak mepu nyieye omme yahpu ngoh nang.”

Currently Selected:

KAHTAMYENGHAN 48: KONYBSI

Highlight

Copy