KAHTAMYENGHAN 47
47
1Tüokhei Joseph Pharaoh tangte onge i, “Üpa hüyange ü-jeihei naolan Kanan kahtok mepu imanjing mantoop, imanjing yinmok ükhong, hüyange imanme nangpu khongkümpu phei tawe ngoiteki. Sha-a iman Goshen kahhoi me ngohnang.” 2Tüophei me lye yoi jeihei naolan yo mepu kahta nga le ngai hüyange ahngpa phei hüone tam. 3Ahngpawe imante tong, “Numan-a hanghe lingpalan shi?”
Hüyange iman-e ahngpa te jan, “Üyongpa, toman-a toman jing pajeiyonglan hangke ngoh, hüke toman-o nyee yompalanne ngoh nangki.” 4“Toman tüopa kahtok me nyoi ne peiteki, hangjingne ima-a, Kanan kahtok me seanyao yenglepuwa loishe yemeipe ngohnang, tüokaiye toman jing yinmoklan jingne hahnyoi yenang. Tüokhei chingmei lamlinge Goshen kahtok me toman nyoilak jingne ahngpawe o-ngao yahkei.” 5Tüophei me ahngpawe Joseph te i, “Sha-a nangpa hei nangjei naolan ta ngoiteki. 6Egypt kahtok-a iman jing ngohnang. Kahmük üshei yo me shemeipu nyoi Goshen kahmük me nangpa hei nangjei naolan-a ngohne tamtüoh. Hüyange iman yo me wang ngoipu ütam ngohma-a, iman üjing tampu yinmoklan yo me nokpu ne menge tamtüoh.”
7Tüophei me Joseph-e Ipa Jacob woi peiye ahngpa phei hüone tam hüyange Jacob-e ahngpa te yoi moiman pha. 8Hüyange ahngpawe Jacob te tong, “Nang nyupuh wangpeng hangshin shi?”
9Jacob-e ahngpate i, “Tao waakempu mongme wangpeng gho ja phei me delüm. Tao jin shohpu hüyange shaoshipu nyih üjingha hei hüyange toman üshong wantepu pajeiyonglan yalokke kempu nyih-a taowe yeyüo ok.” 10Tüophei me Jacob-e ahngpate moiman phatam, hüyange ahngpa sheshao mepu yan. 11Tüophei me Joseph-e Ipa hüyange I jei naolan te ngohlak nyoi pha, ahngpawe ipu kih-e Egypt me Rameses kahtok, üshei phei shemeipupa kahtok nyoi pha. 12Hüyange Joseph-e Ipa, jeinaolan, hüyange Ipa noksalan khongkümpu iman noksa phei shuwe hahying phawe pao.
Egypt Me Seanyaopu
13Sha-a kahtoknyu nopu me hahying yenang; hangjingne seanyaopuwa jamloi she ngoh, tüokaiye Egypt hüyange Kanan kahtok seanyaopuwe wong yenangpe ngai. 14Hüyange Egypt hei Kananlan mepu tah shakwante jempu ngin khongkümpu, Joseph-e yoyange ahngnok te yah pei. 15Hüyange aope Egypt hüyange Kanan kahtok me ngin winne kümya peih, Egyptlan moilanne Joseph te peiye i, “Tomante hahlak yahkei; hangjingne nang sheshao me toman hangne lilak shi? Hangjingne toman ngin kümteki.”
16Hüyange Joseph-e jan, “Numan me ngohpu ngin kümpu ne mengma-a, tüolan nanleiye taowe nük yahphaning, numan jing yinmoklan peikei.” 17Tüokhei iman-e yoi yoi me ngohpu yinmok yah-e peiye Joseph te pha, hüyange iman jing koipong, nyee, youn, mahu, hüyange gadolan nanleiye lye imante nük pha. Hüke tüopa wangpenga iman jing yinmok khongkümpu nanleiye lye iman te hahlak pha.
18Ünepupa wangpeng me-o iman I tangte pei hüyange i, “Toman nokpupa sheshao me toman-e ütingpa ilak jingne minlo, hüke toman jing nginna khongküm teki hüyange toman jingne ngoh shihpu yinmoklan-a nang jing. Toman püm hüyange kahtok tokte kaiye nangte phalak ne hango towe yenang. 19Toman li ne tahtam. Ülam ja lingpha! Toman jing kahlan kah üko ne linge tahtam. Nük nanleiye toman hüyange toman jing kahtok shakpha. Toman-a ahngpa jing rha ne mengpha ning, hüyange toman jing kahtok-a I jingne menglak. Toman yelipe ngohlak jingne tahhei yahkei, hüyange toman kahme deilak jingne üli yahkei.”
20Hüke Egypt kahtok khongkümpu Joseph-e ahngpa jingne shakke tam. Hangjingne seanyaopu jamloipu nanjingne Egyptlanne yenün ok, tüokhei iman kahta liliye yoi kah yüolak ne ngai, hüyange kahmük nopuwa ahngpa jingne menge mah. 21Hüyange Egypt jaye mepu jaye üshuk ngoipu mepu kahtalan khongkümpu Joseph-e rha ne linge tam. 22lye yeshakpe angpu ne-a ngengpalan kahtok shaha tüoh. Hangjingne ngengpa lanne ahngpa mepu yoi meitam tüo, hüyange ngengpa lanne tüopa hahpu nanjingne, iman-e yoi kahtok yeyüo. 23Hüwante Joseph-e kahtalan te i, “Leihuyah, tenyih taowe numan, hüyange numan kah, ahngpa jingne shak yangki: leihuyah, numan jingne tahli hatüo me, tüopa yah taiye kahme deitüoh. 24Hüyange tah yahwan te numan-e tah-a üphong nga ne tamyange ahngpa te meitam ja phatüoh; hüyange üphong peli-a numan jing; tüophei numan kah jingne tahli, hüyange numan hahying, hüyange numan noksalan, nahalan hahying ne menglak.”
25Hüyange iman-e i, “Nange toman üyin yinyangki; toman nokpupawe toman ngeyange shüpshe üyong hüo, toman ahngpa rha ne menglak.” 26Tüokhei Egypt kahtok jingne Joseph-e ngaokhüm ling; hüke üphong nga shepupa meitam ja-a ahngpa jing. Tüopa ngaokhüm tenyih ngoiye jonnang. Ngengpalan jing kahtok shaha ahngpa moth ne yemengtampe tüoh.
Jacob-e Ükümpa Tongpu
27Hüke Israel Egypt kahtok me, Goshen kahjee me nyoi; tüome iman hakpa ne meng hüyange ülick lick-e yeonge jalun. 28Hüyange Jacob Egypt kahtok me wangpeng pen me nyit ngoh hüyange khongküm sheiyange Jacob nyupuh wangpeng gho ja phei me deli me nyit ngoh.
29Hüyange aope Israel lilak shongte hipak owe pei, lye yoi ha Joseph nyik-e peiye Ite i, “Ü-yungkeng nipa me nang yak-e tüktüoh, hüyange nange taowa Egypt kahtok me mang muwe yetamlak she lahnyik mongkopu jiengpu ja yahtüoh. 30Ümeken me üpayimlan ngoh tüoken me tao shi hunangki; tüokhei nange taowa Egypt kahtok mepu yah teitüoh hüyange iman ümeken me mu tüoken me tao mutam tüoh.”
Joseph-e jan, “Nange hangke i hüke taowe linglak.”
31Hüyange Iye i, “Nange linglakei she jiengpu ja yah tüoh.” Hüwante Joseph-e jiengpu ja yah, hüyange Jacob-e yoi shinleng me muh minyongpu pha.
Currently Selected:
KAHTAMYENGHAN 47: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
