KAHTAMYENGHAN 43

Benjamin Woiyange Ijeilan Egypt Te Üne-o Yenang

1Sha-a Kanan kahtok me seanyaopu yeonge yemeipe ngai. 2Hüyange aope Egypt kahtok mepu iman-e peipu tah kümyapeih iman üpawe imante i, “Üne-o tatüoh, hüyange teman jingne hahying üjingha shakke peikei.”

3Hüpoi Judahwe Ite i, “Kahtapawe tomante mei mei-e iyangki, ‘Numan-e numan ünao numan phei woi yepeima-a, numan-e ü-sheta ye-ngelak.’ 4Nange toman ünao toman phei shonma-a, toman talak hüyange nangjingne hahying shaklak. 5Hüpoi nange I yeshon tamma-a toman minta ngoh; hangjingne kahtawe tomante i, ‘Numan ünao numan phei ye-om ma-a, ü-shetapa-a ye-ngelak.’”

6Israel-e i, “Numan-e hangne kahtapa te numan ünao üne-o ngoh nangja she iye üte teshinne shangne tampushi?”

7Iman-e jan, “Kahtapawe toman jeng, hüyange temnok jeng, yeonge shangnyakke tonge i, ‘Numan üpa sha-ate ngoiye üyin me ngoh nang kü a? Hüyange numan ünao ja ngoh nangkü a?’ Tüokhei toman-e I ngao kih-e jan. Iye, numan ünaowa tüome yah-e taikei she ikülak she, toman-e hangke shing?”

8Hüyange Judah-e Ipa Israel te i, “Naosheha-a ü-phei taine tampha, hüyange toman yayonge tashih ning; hümme nakshih toman, nang hüyange tenok hayimlan-o yelipe üyin me ngohlak. 9I jingne tao sakine menglak; ü-yak mepu nange I yutüoh. Taowe nang tangte I woi yepeima-a, hüyange nang sheshao me yetüohma-a, hüma-a jinte nang sheshao me tao ümengne menglak; 10Hükih hipak winne toman yeshon shihma-a, hakih tingma-a ni me shinne ong tei nehoi ngoh hah shepu!”

11Hüwante iman üpa Israel-e imante i, “Hüke nanglak ne mengma-a hüke lingtüoh: kahta tüopate hünghao üne teman kahtok me ngaipu pelick ümei, ütipheipu muli üjingha, zahtai jelo üjingha, üpe meipu hoi pelak, pistachio hüyange almond lick, tüolan üjingha yah-e hangki ne tümyah. 12Tüokhei numan-e yoi yakme ngin üphong ni yahtüoh; hüyange numan nyekhok üju me leih-e phapu ngin-o yayah, aoweshing, ülamja phei teipinpu ngohne ok. 13Numan ünao woiyah hüyange mamshe leih yekei. 14Ütahpa Kahwange I sheshao me numante shüpshe ngene tamtüoh, hüke kahtapawe numan ünao-o lantamlak, hüyange Benjamin numan phei leih yene tamlak. Üjingne-a, tao hayim yenangpe linge tam küma-a, tao ütingme hayim yenangpe ngohlak.”

15Tüokhei jeihei naolanne phalak hünghaolan, hüyange yak me ngin üphong ni nyeiye yahyange, hüyange Benjamin yahyange Egypt kahtok te tawe Joseph sheshao me iman yong. 16Aope Joseph-e iman phei Benjamin nge, Iye yoinok shaoshanpa yakjongpa te i, “Tüolan kahta noksate woi intüoh; heeitam hahju me iman ü-phei hahyingpu ngohlak, tüokhei yinmok toitüoh hüyange tüolan tümtüoh.” 17Joseph-e ipu kih-e kahtapawe ling, hüyange kahtalan Joseph nokte woi in.

18Hüyange Joseph nokte woi inwante kahtalan nyam, hüyange hüke i, “Üwangpe teman nyekhok me leih-e phapu ngin jingne teman tüome woi in nang; hüyange Iye temante ümeng phawe teman phowe hüyange gadolan yahyange teman-a I jing rha ne anglak yang.” 19Tüokhei iman Joseph yakjongpa tangte ong, hüyange tafün shongme I phei ngao, 20hüyange i, “Oh Üyongpa, toman üwangpa nük shaklak jingne ta; 21hüyange aope toman yayonge onge toman pümjing toman-e ngoiye nyekhok lan, hüwante toman kahta lili nyekhok üjupong me ngin khakshuwe ngoh; tüokhei hatüo toman yak me nishe yah-e peinangki. 22Hüyange nük shaklak jingne ngin yoi yoi ne toman-e yah-e tai nangki. Ngin-a aowe toman nyekhok me hinne tam toman-e yeshing.”

23Yakjongpawe janne i, “Numan mongshange tahteih, tahnyam; numan Kahwang hüyange numan üpa Kahwange, numan nyekhok me ngin angtampu ne ok; taowe numan ngin tüoyangki.” Tüophei me Iye Simeon iman sheshao me woipei.

24Hüyange kahtalanna Joseph nokte lye woiye inne, ya poilak jingne imante yeng pha, hüyange iman-e iman ya poi; hüyange iman jing gadolante-o lye uhyinge tam. 25Hüyange heeitam hahju me Joseph üne-o nokte manpeipe, iman-e hünghao tüm; hangjingne iman-e tüome hahlak she jai.

26Aope Joseph nokte ye, iman-e iman phei yah taipu hünghaolan I nokte yah ong, hüyange kahtok ngoiye khuh tawe Ite khüm. 27Hüyange lye iman hangke ngoh-e pei tonge i, “Numan üpa wupa ja jeng numan-e ngaopuwa meiye ngohya? I üne-o üyin me ngoh nang a?”

28Hüwante iman-e janne i, “Nang shaoshanpa toman üpa meiye ngohnang hüyange üne-o üyin me ngoh nang.” Hüyange iman-e yatuh shünge khuh tawe khüm.

29Tüophei me Iye mükwemme lei, hüyange yoinyu üha yoinao Benjamin ngeye i, “Numan-e ükümpa nao jeng üte ipuwa tüone jeya? Shemei, Kahwange nang moiman tüoh.” 30Tüophei me Joseph mamshe yonge tai, hangjingne yoi naote kenne teihpu mongken juteih Iye yetük okpe pei. I ütahte ngaiye pa shap she lak, tüokhei I yoi tüpte ong, hüyange shap. 31Tüophei me Iye yoi sheta la, hüyange yu; hüyange yoi nying nyingke mong toloimei yang phei me hüke i, “Shaaji hahlak phatüoh.” 32Tüophei me iman-e Ite, hüyange I jeiheinao lante, hüyange I phei hahlak Egypt lante, yoi yoi ne hahying ngaitam; hangjingne Hebrew phei jamme Egyptlanne hahlak shupu ne yeje; hangjing ne tüopa-a Egyptlan jingne nulakpa ne ngoh. 33Aope I jeihei naolanna Joseph phei janhüowe khao me jeiyongpa mepu wange ükümpa te ngoiye khüng linge jeiyong naoli ityange shotne tam, iman hüke shotte okpu nge, iman teilei yange yashan. 34Imante hahyinga Joseph khao mepu pheih-e tam; hüyange Benjamin meitam-a eiha meitam phei üphong nga nyeiye ngoh. Tüokhei iman-e hahying yange I phei mongmei.

Currently Selected:

KAHTAMYENGHAN 43: KONYBSI

Highlight

Copy