KAHTAMYENGHAN 44

Wan Yenangpu

1Tüophei me Joseph-e yakjongpa te ngao phawe i, “Kahtalan te okpu shinne kiye onglak ne iman nyekhok me hahying tümtamtüoh, hüyange iman kahta lili ngin-o nyekhok üjupong me angtam tüoh. 2Üne-o ükümpa nao nyekhok üju pongma-a ü-khümwan I tah ngohpu ngin phei hinne tamtüoh.” Tüokhei Joseph-e hangke ngaowe tam hüke lye ling. 3Wangngai puphei jam she jeihei naolan-a iman gado phei yayong ne tam. 4Hüyange aope iman chingnyu mepu meiyange mantaipe ngoh, Joseph-e I yakjongpa te i, “Yayong tüoh, kahtalan tokphei te jange woitüoh. Hüyange iman kem yüowante itüoh, ‘Numan-e ümei nanleiye hangne ümeng shüm yepu? 5Hangne numan-e ü-nokpupa jing khümwan kuhpu? Ü-nokpupawe tüopa me yingnang, hüyange phongyeng phonglai itte shempu tüopa me jonnang. Numan-e yeonge yemeipe pienne jonteki!’ ”

6Aope shaoshanpawe iman kem yüo, lye iman phei tüopa ngao ngao. 7Iman-e Ite janne i, “Üyongpa, nange hüke ngaopuwa hanghete leppu ne? Toman-e hükihpu toi yeling she toman-e jiengpu yah-e inang. 8Leihuyah nange shingnang, toman-e toman jing nyekhok üju pongme tüopu ngin tüowa toman-e Kanan kahtok mepu nang tangte yah ye ne tampu! Hüma-a nang nokpupa nok mepu honne jeyah, khüm ne jeyah, toman-e hangne kuhlak shi? 9Üyongpa, toman yo me hatüo toi ngohma-a, I-a li ne tamlak, hüyange topu toman-a nang rha ne menglak.”

10Hüyange lye i, “Numan-e ngaopute taowe mong nangki; hüpoi aohipawe wanna yah, tüopa hei ü-rha ne menglak. Hüyange topu numanpa-a taipu oklak.” 11Tüophei me iman-e mam mamshe yoi nyekhok ngeh-e ang, hüyange moilanne yoi nyekhok lan. 12Hüyange Joseph shaoshanpawe jeiyongpa mepu wange nao ükümpa te ngoiye meimei-e yam pomwante, Benjamin nyekhok me wanna tüo. 13Hüwante iman-e iman inkhek hit, hüyange yoi yoi gado me hangki ki ne tamyange chingnyu te leih ye.

14Aope Judah hüyange I jeihei naolan Joseph nokte ngoi, I tüome muh ngoh yangki hüyange iman I sheshao me kahtokte khuh tawe khüm. 15Joseph-e imante i, “Numan-e hanghe toi jonpu? Ü-shin shinpu kahtawe ütingme phongyeng phanglai hitte numan jeng ngaitam phalak she numan-e yeshing a?”

16Hüwante Judah janne i, “Üyongpa, toman-e nangte hangke ilak?” “Toman-e hanghe ngao tokteilak? Toman-e hangke toman nying nyingke jüowe oklak? Toman ünu ümeng Kahwange ütahte ngai tamnang. Aohipa yak me wanna tüo, I shaha yeje, I phei toman khongkümpu nang rha ne menglak.”

17Hüyangpoi Joseph-e i, “Hüke taowe aope-o yejonlak; ao yak me ü-wan tüoyapeih tüopa kahta hei-rha ne menglak, hüyangpoi numan ülaolan jingne-a, yoipa tangte chingmei me yetüoh.”

Benjamin Jingne Judahwe Yoppetong

18Hüwante Judah Joseph shongte wen hüyange i, “O Üyongpa, nang na-e jaiye, nang shaoshanpawe ngao ja ilak jingne taowe yoppe tong nang, hüyange nang mong tahshih kei; hangjingne nanga ahngpa I kih-e ngohnang. 19Üyongpawe yoi shaoshanpalan tomante hüke tong, ‘Hüke nangpa, hüyange nao ja-o ngoh nang a?’ 20Tüokhei toman-e nokpute i, ‘Toman üpa ngoh nang, I wupa, hüyange I wupa ne mengteiye ngepu ükümpa nao ja ngohnang. I jei-a liteki; tüopa shekowe puhpu mepu I ja shing towe ngohnang, tüone menge Ipawe Ite yeonge kennang.’ 21Hüwante nange nang shaoshanpalante i, ‘Numan-e I ü-tangte woiye taikei, taowe Ite leihu ning.’ 22Hüwante toman-e toman nokpute i, ‘Naha-a Ipa mepu yanne ye-ok külak, I taima-a Ipa likülak.’ 23Hüwante nange nang shaoshanpalante i, ‘Numan nao ükümpa numan phei woi yetaima-a, numan-e ü-sheta aope-o ye-ngelak.’

24“Aope toman-e toman üpa tangte leihye, toman nokpupawe ngaopu ngao longlai-e Ite i. 25Hüwante, ‘Üne-o leih yetüoh hüyange hahying üjingha shakke ongkei,’ she lye tomante i. 26Toman-e jan, ‘Toman phei toman nao ükümpa woiyange peiye kahtapa sheshao me üyongne ima-a, toman-a yeta oklak. Toman nao ükümpa taküme nakshih toman-o tapu oklak.’ 27Hüwante toman üpawe tomante hüke i, ‘Numan-e shingnang ü-sheko üte naoshe ni hei puhtam; 28Sheja-a ü-mepu yanne taiteki. I-a phao yinmok-e ü-oun ü-oun me phünne winnang peih, hangjing ne I yanne taiphei me peiye taowe I ye-nge. 29Numan-e tüopa-o ü-mepu yah taiküma-a, hüyange lye wengtuh ja hüoma-a, hüma-a numan-e peine tampu mongmeng phei ü-shang shaone tamme yimching te shonlak.’

30“Üyongpa, sha-a tüojing üne, aope toman nang shaoshanpa üpa tangte peilakeih, hüyange naha-a toman phei yengelakei, hüwante I üyinna nahapa üyin me nyengyang ngohtepuwe, 31aope lye naha-a toman phei yenangpe ngelakei, I likülak; hüke nang shaoshanpa lanne mongmeng phei toman üpa shangshao yange yimchingte shonne ngailak yang. 32Hangjingne tao nang shaoshanpawe naha jingne saki ne menge, hüke üpate i, ‘I nang tangte woi yepeima-a, tao jinte üpa sheshao me ümengne menglak.’ 33Sha-a tüokhei üyongpa, naha nanlei nang rha ne tüome tao ngohlakei, Ipa-a yoi jeilan phei leih yene tamtüoh. 34Hangjingne naha ü-phei yenangma-a, tao hangke üpa tangte leih yelak shi? Üpa tangte peipu ütuh ümeng ngeye tao nünne ye-ngoh oklak.”

Currently Selected:

KAHTAMYENGHAN 44: KONYBSI

Highlight

Copy