KAHTAMYENGHAN 15

Kahwangpawe Abram Phei Jiengjeppu

1Tüo lan phei me Youngwanpa ngao himang me Abramte pei. “Nyam tahteih, Abram, Taowa nang ree; nang khintak yeong yonge ngohlak.”

2Hüpoi Abram-e i, “O Youngwanpa Kahwang, nange üte hanghe phalak shi, hangjingne taowa ha-nao yenangpe ngoh-e peinang, hüyange ü-nok mothleilak ne Damascus mepu Eliezer ngoh nang.” 3hüyange Abram-e i, “Leitüoh, üte nange üli hango yepha; hüyange tenok me puhpu rhapaja ü-moth leine ngohnang.”

4 # Kaht 17.16,21; 18.10; 21.2. Hüyange leitüoh, Youngwanpa ngao I tangte pei, “Hatüo kahta nang mothleipa ne yemenglak, nang ha ütingpawe nang moth leilak.” 5#Rom 4.18; Heb 11.12.Hüyange Youngwanpawe I nokshao te woiye yüowe i, “Wang yete leitüoh, hüyange tüopa iye okma-a, shanhalan itüoh.” Tüophei me Iye Ite i, “Hükih-e nangmepu üli ngohlak.”

6 # Rom 4.3,9,22,23; Gal 3.6. Hüyange Iye Youngwanpate ütinglak, hüyange Iye Youngwanpa-a khakshupupa she monghah-e yah.

7Hüyange Youngwanpawe Ite i, “Tao Youngwanpa aowe nang te tüopa kahtok mothlei phalak jingne, nang Chaldealan chahwan Ur mepu woi pei.”

8Hüpoi Iye i, “O Youngwanpa Kahwang, hangke taowe hatüo mothlei yah oklak she shinglak?”

9Iye Ite i, “Üte wangpeng lüm ngoitephei mahu ja, wangpeng lüm younpi ja, wangpeng lüm nyeeha ja, awshu ja hüyange awyei ja she yahpeikei.” 10Abram-e tüolan üshei yahpei hüyange iman ni ni ne tang, tüolan tangkhüwlan jatang me ja ang; hüpoi Iye awhalanpa-a yetang. 11Hüyange aope meihahpu awhalan mangtang me peiyapeih, Abram-e iman jange tei.

12Aope wanghe nyipyapeih, Abram shin nyaiye shiye ta, hüyange nyam nyam shepu wangnyak üyong I tangte pei. 13#Lam 7.6,7.Tüophei me Youngwanpawe Abram te i, “Hatüo mei mei-e shingyah, nanghuhayimlan iman kahmük ne üjepu me yinpa ne ngohlak, hüyange iman-a tüoken me sha-angpalan ne ngohlak, hüyange iman-a wangpeng gho peli ngoi-e shaoshi ne tamlak. 14Hüpoi iman-e shaoshanpu jat tang me Taowe ngaophünpu peitamlak, hüyange tüophei me iman yeonge hakke lwngpu phei ngailak. 15Nangpa-a, nang puyimlan tangte chingmei me tailak; nanga lwngmei ne menge mangmulak. 16Hüyange iman-a tüokente jin peli shepupa me leih yelak; hangjingne Amoritelan nuweshakpu üne-o manküm.”

17Aope wanghe nyip hüyange wangnyak-e pei, leitüoh, mokhshe vünkhuh ngaiye loongpu vünloong ja hüyange loongpu vüntük ja yinmoklan tangyange khünglenge angpu nipa me linne tai. 18#Kaht 17.2,7,9-14,21.Tüopa nyih me Youngwanpawe Abram phei jiengjeppu ja yah-e i, “Nanghu nanghalan te Taowe tüopa kahmük phanang. Egypt Yengyin mepu yengyin üyong, Euphrates yengyin ngoiye, 19Kenlan, Kenizlan, Kadmonlan, 20Hitlan, Perizzlan, Rephaimlan, 21Amorlan, Kananlan, Girgashlan, hüyange Jebuslan, iman kahmük khongkümpu omme Taowe phateki.”

Currently Selected:

KAHTAMYENGHAN 15: KONYBSI

Highlight

Copy