KAHTAMYENGHAN 14

Abram-e Lot Yintam

1Ahngpalan peli, Shinar ahngpa Amraphel, Ellasar ahngpa Arioch, Elam ahngpa Chedorlaomer, hüyange Goiim ahngpa Tidal nyih hipak me, 2iman-e Sodom ahngpa Bera, Gomorrah ahngpa Birsha, Admah ahngpa Shinab, Zeboiim ahngpa Shemeber hüyange Bela ahng lan phei wehok ükong wang. 3Tüolan ahngpalan shüppe jemyange Siddim kahjee (hatüowa hüm yengching) me jem. 4Iman-e wangpeng pen me ni ngoiye Chedorlaomer shaoshan, hüyange wangpeng pen me lüm shepupa me iman-e I phei hokwe yong. 5Hüyange wangpeng pen me peli shepupa me Chedorlaomer, hüyange I phei ngohpu ahngpalan-e, Ashteroth Karnaim me Rephaimlan, hüyange Ham me Zuzimlan, hüyange Shaveh Kiriathaim me Emimlan, 6hüyange Horlan iman kahtang Seir me wüngwü-ükpu ü-o me ngohpu Elparan ngoiye chinghah-e naowe tai. 7Tüophei me iman-e leih-e ye, Enmishpat (Kadesh) te peiye Amaleklan kahtok hüyange Hazazon-tamar me ngohpu Amorlan kahtok khongkümpu chinghah.

8Tüophei me Sodom ahngpa, Gomorrah ahngpa, Admah ahngpa, Zeboiim ahngpa, hüyange Bela ahngpa iman üshei Siddim kahjee wehok shapju me iman yayong. 9Elam ahngpa Chedorlaomer, Goiim ahngpa Tidal, Shinar ahngpa Amraphel, hüyange Ellasar ahngpa Arioch phei ahngpa nga phei tüi-e peli yong. 10Sha-a Siddim kahjee me wüalüng kahsa maawe ngoh yangki; hüyange Sodom hei Gomorrah ahngni phette tai hüyange tüome yei; hüyange iman yo me topu lüm-a kahtang yete phette tai. 11Tüokhei wepalanne Sodom hei Gomorrah toinyu nanha üshei, hüyange iman hahying üshei nyieye yahyange taimah. 12Hüyange iman-e Abram ü-nao üha Lot, aohipa Sodom me ngoh, I hüyange I jing toinyu nanha nyieye yahyange yanne tai.

13Hüyange shaoyinne tai okpupa kahta ja peiye Hebrewlan Abram te tüopa jeng i. I-a Eshkol ü-nao, hüyange Aner ü-nao, Amorlan Mamre longkhampee shongme yome ngoh; tüolan-a Abram phei teishinpu ngoh yangki. 14Aope Abram-e Inao üha phowe teiteki she jai, lye yoinok me puhpu shapju jingne thrimlei yahyangpu kahta gho lüm phei me penmetet woiyange Dan ngoiye ahngpalan peli te jange tai. 15Hüyange lye yoi kahtalan ükhong ükhong tamyange wangnyak me wepalante shüm; hüyange iman-e okpu nge, hüyange Damascus apyekao me ngohpu Hobah ngoiye jange tei. 16Hüyange nyieyah taipu moth üshei tük-e ye; yoi nao üha Lot-o I jing toinan phei, shekolan hüyange phowe teiyangpu kahtalan leih-e woiye yah yeyangki.

Abramte Melchizedek-e Moiman

17 # Heb 7.1-10. Aope Abram, Chedorlaomer hüyange ülao ahngpalan naoyange okpu ngeye ye, Sodom Ahngpawe Shaveh-kahjee me I phei hüo (tüopate Ahngpa kahjee she-o nyiknang). 18Hüyange Salem ahngpa Melkhizedek ao ütahpa Kahwang ngengpa ne-o ngoh, I an hei wuwüngti yahyange I pongte yu. 19Hüyange Ite moiman phawe i,

“Wang hei chahwannyu lingpupa ütahpa Kahwang moiman

Abram tangme ngohtüoh!

20Hüyange aowe nang wepalan nang yak me pha,

I Ütahpa Kahwang min yongtüoh!”

Hüyange Abram-e lte penphong dopu pha. 21Hüyange Sodom ahngpawe Abram te i, “Üte ü-kahtalan pa-a yahkei, hüpoi nyieye yahpu toinanpa-a nange yayah.”

22Hüpoi Abram-e Sodom Ahngpa te jan-e i, “Chahwan hei Wangdang linge ngaipupa ütahpa Kahwang, Youngwanpa sheshao me taowe jienge inang, 23hüke nang jingne mengpu ülam ja nehoi, velah ja yejema-a, yashom wu nehoi taowe yeyahlak. Hümme nakshih, ‘Taowe Abram hakpa ne menge tam’, she nange aope-o yengaolak. 24Ü-phei taipu kahtalan meitam hüyange naoshelan-e hanghe hah, tüolan tokte kaiye taowe hango yeyahlak; Aner, Eshcol, hüyange Mamre imanpa-a iman meitam yahne tamtüoh.”

Currently Selected:

KAHTAMYENGHAN 14: KONYBSI

Highlight

Copy