KAHTAMYENGHAN 13

Abram Hüyange Lot Yan

1Tüokhei Abram Egypt mepu, I hei I sheko, hüyange I me nangpu üshei; hüyange I phei Lot yahyange Negeb te tai.

2Sha-a Abram, tampu yinmok me, hon hei khüm me yeonge hakpa ne ngoh. 3Hüyange I yin kem-e Negeb mepu taiye I nyenok üwangne wepu nyoi Bethel ngoi, hatüowa Bethel hei Ai nipa me ngoh. 4Iye üwangne wümjong lingpu nyoi, hüyange tüo me Abram-e Youngwanpa min me nyik.

5Hüyange Lot, ao Abram phei jamme tai, I me-o nyee hei youn, hüyange mahu ükhong hüyange yoi noksalan hüyange rhapalan ngoh yangki. 6Tüokaiye iman jam-e ngohlak ne hahnyoi kahmük wange yenang, hangjingne iman me nangpu moth hei yinmoklan üngang ngohpu jingne iman jamme nyoilak ye-ok. 7Tüokaiye Abram yinmok paopalan hei Lot yinmok paopalan nipa me teepu ngai; hüwante Kananlan hei Perizzlan tüopa kahtok memuh nyoiteiye ngohyangki.

8Tüokhei Abram-e Lot te i, “Tümnipa me, hüyange tenok yinmok paopalan hei nenok yinmok paopalan nipa me teelapu hango angne tahtam; hangjingne teman-a jeiheinao ngoh nang. 9Kahtok khongkümpuwa nang sheshao me yenang a? Nang nying nyingke ü-mepu yantüoh. Nange yaknya ye yahma-a, taowa yakjah yete tailak, yejema-a nange yakjah ye yahma-a, taowa yaknya yete tailak.”

10Lotte yoi mük weamme Jordan kahjee üshei te lei, hüyange Youngwanpa pesha kih-e tüopa üshei yeme, yeng üngang Zoar yekao mepu Egypt kahtok kih-e nge. (Tüopa-a üne-o Youngwanpawe Sodom hei Gomorrah manmah tamwante). 11Tüokhei Lotte yoi jingne Jordan kahjee üshei le; hüyange Lot heong yekao te yayong; hüke iman jawe japhei teiyan. 12Abram Kanan kahtok me nyoi, hüpoi Lot-a kahjee me ngohpu chingnyulan phei nyoi hüyange I nyenok Sodom ngoiye linge tai. 13Sha-a Sodomlan-a ünu hüyange Youngwanpa kaiye yeonge ümeng jonpu kahtalan ne ngoh yangki.

Abram Hebron Yete Yayong

14I mepu Lot yanne tai phei me, Youngwanpawe Abram te i, “Nang mük nganne nang ngohpu nyoi mepu apye hei heye, hüyange heong hei henyip yete leitüoh; 15#Lam 7.5; Gal 3.16.hangjingne hanghe kahmük nange ngenang, tüolan khongküm taowe nangte, hüyange nang huhayimlante jinte pu jingne Taowe phalak. 16Taowe nang huhayim chahwannyu kahmak shinne ngaitamlak; tüokhei ütam jawe chahwannyu kahmak ipu okma-a, nang huhayimlan-o ipu oklak. 17Yayong tüoh, kahmük üjük üpeam kaiye kemtüoh; hangjingne Taowe nang te tüolan khongkümpu phalak.” 18Tüokhei Abram-e yoi nyenok khokke taiye, Hebron me ngohpu Mamre longkhampee yome ngoh, hüyange lye tüoken me Youngwanpa jingne wümjong ja ling.

Currently Selected:

KAHTAMYENGHAN 13: KONYBSI

Highlight

Copy