WOITEI 2

Mosa Puhpu

1Sha-a kahta ja Levi nokphong mepu ngai hüyange iman Levi jat sheko ja muh yah. 2#Lam 7.20; Heb 11.23.Shekonyu püm yekengpe ngai hüyange netan moija pai; hüyange yhawe I-a wangngoiye naoshe ümei ja she nge, yhawe I lekeng lüm ngoiye lowe ang. 3Aope yhawe shaaji I lowe angpu ye-okpe ngai, ngeihyan phei apu küm ja yahpeiye, hüyange yeng ye-onglak jingne nyeiti hei wüalüng phei shit, hüyange yhawe naha-a tüome nowe peiye yengnah beewem yo me ang. 4Hüyange I hangke nangkülakei she leiye I nya-a üjai me yonge ngoh.

5 # Lam 7.21. Hüwante ahngnok naoyha yengyinte yeng yüone lai, hüwante yha jing shaoshan nyulan yengyin nahme kemme ngoh; mokhshe yhawe phümha yo me küm ja nge, tüopa yahlak jingne rhanyu shon. 6Hüyange ahngnok naoyhawe tüopa ep, hüyange netan naha nge; hüyange leihuyah, naha-a shap; hüyange yhawe Ite shüpshe, hüyange i, “Hatüowa Hebrew hayimlan yo me ja ngohnang.”

7Hüwante Inyawe ahngnok naoyhate i, “Nang jingne Hebrew sheko yo mepu naote paone ja, hüke yhawe naha-a nang jingne paolak, tao taiye nyik pha ning yao?”

8Ahngnok naoyhawe yha te i, “Taitüoh.” Tüokhei naoyha taiye nahapa ünyu muh nyik-e pei. 9Hüyange ahngnok naoyhawe yha te i, “Tüopa naha yah teitüoh, hüyange üjingne paokei: hüyange taowe nangte nang nanmee yahpha peih.” Tüokhei nyuyongnyuwe naha yah hüyange pao. 10Hüyange naha-a jong, hüyange yhawe I ahngnok naoyha tangte woipei, hüyange I yha üha ne meng. Hüyange yhawe I min Mosa she nyik, hüyange yhawe i, “Hangjingne taowe I yeng mepu shuwe ngai.”

Midiante Mosa Phette Tai

11 # Lam 7.23; Heb 11.24. Aope Mosa jongyapeih, nyih ja I yoi Hebrew kahtalan phei hüolak jingne ngaiye tai, hüyange imante hangke kange toi lingne tam tüopa lye nge, tüo shaha ne yeje, Egypt lan-e I pheipu Hebrew kahta ja te shet pu-o nge. 12#Lam 7.24.Mosa-e jaye jayete lüpshüp-e lei, hüyange aope kahta ao-o yenang she lye nge, lye Egypt kahta-a toi hüyange I mang pheih yo me jüowe tüoh.

13Üne nyih aope I ngai tai, hüwante Hebrew kahta ni jamme tee-e ngoh yangki. Hüyange püohpupate lye i, “Hangne nange nang pheipu Hebrew pate shütte tampu?”

14 # Lam 7.27,28. Iye jan, “Aowe nang toman tangme üshangpa hüyange kahpa ne menge tam ei? Egyptlan toipu kih-e nange tao toihuwe teih nangkü a?” Hüwante Mosa nyam hüyange I nying nyingte i, “Taowe hanghe ling, kahta lanne shinge okteki.” 15#Lam 7.29.Aope ahngpawe hanghe ngai tüopa jaiyapeih, lye Mosa toilak jingne yam. Hüpoi Mosa ahngpa sheshao mepu phette tai, hüyange Midian kahtok me ngoh.

Nyihjapu hipak me aope yengnung ja ü-o me Mosa shotte ngoh; 16Midian ngengpa, nok naoyhalan nyit yeng-shaolak jingne hüyange Ipa jing nyee hei youn ükhong jingne aksheng me yenge maawe tamlak jingne pei. 17Hüpoi nyee yompalan ütam-e Jethro nok yhalalan jange tei. Hüwante imante jamlak jingne Mosa wen hüyange imanjing yinmoklan jingne imante yeng shaowe tam. 18Aope iman yoipa tangte leih ye, lye imante tong, “Numan tenyih-a hangne hüke teshinne shonge yepu?”

19Hüyange iman-e jan-e i, “Nyeeyom-palan yak mepu Egypt kahta jawe toman yintam,” hüyange “Üne-o lye toman jingne yeng shaowe tam, hüyange nyee ükhongte yeng shaitam.”

20Hüyange lye yoi yhalalan te i, “Hüma-a I ümeken me ngoh nangki? Hangne numan-e kahta-a tüohpu? Taitüoh hüyange teman phei jamme nükhahlak jingne Ite nyik tüoh.”

21Tüokhei tüoken me nyoilak jingne Mosawe mong, hüyange Jethrowe Ite yoiha Zipporah nokne menge tam; 22aowe Ite netan naha ja puh tam. Mosawe yoi nying nyingte i, “Tüopa kahtok me taowa chingtaipa ja nehei ngoh nang, tüokhei taowe Ite Gershom she nyiklak.”

23Hipak nang jange ngoh yang phei me, Egypt ahngpa li; hüyangpoi Israel hayim rha yatuhshao me ngohne wong, hüyange iman-e üngwün, hüyange rha yatuh shao me iman-e üngwünpu Kahwang tangte ngoi. 24#Lam 7.34.Hüyange Kahwange iman-e üngwünpu jai, hüyange Abraham phei, Isaac phei, hüyange Jacob phei Kahwange yoi jiengjeppu teih tüo. 25Hüyange Kahwange Israel hayimlan rha me ngohpu nge hüyange iman yatuhshao jingne teih tüo.

Currently Selected:

WOITEI 2: KONYBSI

Highlight

Copy