WOITEI 1
1
Israel lante Yemeipe Kon
1 #
Kaht 46.8-27; Lung 26.4-50. Tüolan-a yoi yoi noksalan woiyange Jacob phei Egypt te peipu Israel hayimlan min ngohnang. 2Reuben, Simeon, Levi hei Judah, 3Issakhar, Zebulun hei Benjamin, 4Dan hei Naphtali, Gad hei Asher, 5#Lam 7.14-18.Jacob mepu jalunpu kahtalan khongküm denyit ngoh yangki. Iha Josephpa-a Egypt me nyoiteiye ngoh yangki. 6Tüophei me Joseph li, I jeiheinaolan khongküm li, hüyange tüome jalunpu jin khongkümpu liküm. 7Hüpoi Israel hayimlanpa-a ülick lick-e jalun, iman üngang ngaiye wongnangpu phei ngoh, tüokaiye iman-e kahtok-a maa-e ngai.
8Sha-a Egypt kahtok me Joseph yeshingpu ahngpa üla ja ngai. 9Iye I kahtalante i, “Leihuyah, Israel kahtalan-a ünyei jalun-e hüyange teman phei wongshe nang she. 10#Lam 7.19.Kei, teman-e imante kentinge jonhah, hüke ye-ima-a iman jalunkülak hüyange wehok hipak me iman-a wepalan phei pahi jemyange temanphei hokkülak hüyange teman kahtok mepu taimahkülak.” 11Tüokhei Egyptlan-e iman dangme shom-aipalan ang, hüyange kange toilingne tam-e shaoshine tam-e ükongwang. Hüyange Pharaoh jingne tah anglak chingnyulan, Pithom hei Rameses she lingne tam. 12Hüpoi iman-e hangshin shaoshi ne tam teshinne iman jalun hüyange üjai te yan. Hüyange Egyptlan Israel lante pahi nyampu ngai. 13Egyptlan-e Israel lante shaoshi ne tam-e toishao hangkiyih pha-e ükongwang, 14hüyange kahtok shaowe nyütlak hei jaklong lingpu toi hei kahshaolak toi ülam maapuwe iman üyin ükhah ne mengtam, hüyange toishao khongkümpume imante kange lingne tam.
15Egypt ahngpawe Hebrew yin naopainyulan Shiphrah hei Puah, nite i, 16“Hebrew yin shekolante iman naopai wante nangni-e namnowante, netan ne mengma-a toiwintüoh; hüpoi sheko ne mengma-a yha üyin me angtüoh.” 17Hüpoi naopainyu ni-e Kahwang te nyam; imni-e Egypt ahngpawe ngao tampu kih-e yeling, hüpoi netan halan-o üyin me ange tüoh. 18Tüokhei Egypt ahngpawe naopainyu ni nyik-e hüke i, “Nangni-e hüke hangne lingpu, hüyange netanhalan hangne üyin me angtampu?”
19Naopainyu ni-e Pharaoh te i, “Hangne she ima-a Hebrew shekolan-a Egypt shekolan kihpu yeje; hangjingne iman-a naopainyulan-e jamne peishao me nao puh ok tei-e shaha ngohnang.” 20Tüokhei Kahwange naopainyu nite monghah-e jon, hüyange kahtalan jalun hüyange yeonge wongnange ngai. 21Hüyange naopainyu ni-e Kahwangte nyampu jingne lye imante noksa kahtalan ngaiye tam. 22Üküm ne ahngpawe kahta khongkümpu te ngaokeng pha, “Hebrewlan-e puhpu netan nahalan lili numan-e Nile te hüngtam tüoh, hüpoi numan-e sheko lan-a üyin me angtüoh.”
Currently Selected:
WOITEI 1: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
