Madiu 9

Yesu tokweno 'ebweu 'igie bobo'anena

(Maki 2:1-12; Luke 5:17-26)

1'Enega Yesu wagaya 'igelu ga siabala limana 'ina 'asaya. 2#Lu 7:48-49'Enega 'ebweu tokweno boda si'aalina 'ina 'ebe'eno 'enega ga sime'ena Yesu 'enaya. Boda nidi 'idi emisa Yesu 'imwalatonina ga tokweno nina 'ieonena, 'igwae, “Natugu, 'uda gwausowala, 'imu bubuna to'umalidi 'adi nuwatau ni'atu 'ulobedi.”

3Ta 'aina loina 'ana toe'itao Yesu 'ina ona sinonona ga taudimo 'ediya sieonaona, sigwae, “Yesu gete 'ionaona oopa'ala Yaubada 'enaya.”

4'Idi nuwanuwa Yesu ni'atu 'imwalatonina ga 'ieonedi, 'igwae, “To'ase manuna 'atemiyega wanuwanuwa to'umalina? 5Ta to'ase wanuwena yada onae tai gete 'enaya be 'aene yada gwae, ‘'Imu bubuna to'umalina ni'atu yanuwataudi’, nai yada gwae, ‘'Utoolo be 'utatauya’? 6#Yo 17:2, 5:8Ta wada mwalatoni 'aene 'abo'agu Tomota Natuna ma igu loina bale'uya be tomota 'idi bubuna to'umalina yanuwataudi.” 'Enega tokweno nina 'ieonena, 'igwae, “'Utoolo be 'imu 'ebe'eno 'u'aala be 'utatauya 'imu 'asaya.”

7'Enega tokweno nina 'itoolo ga 'itauya 'ina 'asaya.

8Ta boda nidi guinuwa gete si'itena ga ma idi 'amayaba Yaubada situpuna, manuna sana tauna Yesu 'ana Togiewaiwai.

Yesu Madiu 'ibwauyena

(Maki 2:13-17; Luke 5:27-32)

9'Enega Yesu sena gete 'ipilisinena ga 'itauya, ga tai 'ebweuna 'i'itena, 'ana esana Madiu, takisi 'ana anuwa 'ebe paisewa solanaya 'imiyami, 'enega 'ieonena, 'igwae, “Madiu, 'umuliyegu.” 'Enega Madiu 'itoolo ga Yesu 'imuliyena.

10Muliyega anuwa 'ebweu 'ena Yesu 'ilugu sabi 'e'ai, ga takisi 'ana to'ewao be wate 'aidi toto'umalidi simai, ga Yesu ma ina tononoyao ma'ediyao simiyatowa.

11 # Lu 15:2, 19:7 'Enega 'aidi Palisiyao si'itena ga Yesu 'ina tononoyao 'ediya sienaida, sigwae, “To'ase manuna 'imi toe'ita takisi 'ana to'ewao ta wate toto'umalidi 'aina ma'enao si'e'ai egogona?”

12Ta Yesu ona gete 'inonona ga 'ieonedi, “Taudi bobo'adi geya nuwadi togile'oasa, ta tole'oasao esiya nuwanuwadi togile'oasa. 13#Md 12:7; 1 Ti 1:15'Enega 'ilobwenemi be Yaubada 'ina ona wanuwa sabwaleni Buki Tabu 'ena 'igwae:

‘Nuwanuwagu 'atenuwa'ole'ole, ta geya nuwagu taliya.’

Gete yamaiya nigeya topalupaludi manudi, ta esi toto'umalidi sabi lemedi.”

Yesu 'ina ona 'ebotana manuna

(Maki 2:18-22; Luke 5:17-26)

14 # Lu 18:11-12 'Enega Yoni 'ina tononoyao simai ga Yesu sieonena, sigwae, “'Abo'ama ta Palisiyao 'ima tapwalolo manudi 'e'ai 'enega 'aedidigula, ta mwa'adega ga 'enega 'oyo 'imu tononoyao nigeya siediedidigula?”

15 # Yo 3:29 'Enega Yesu onasemalimali 'i'ebwa'edi, 'igwae, “Mwa'adega, kapekapeyana be ai 'ana toyo'oyao sinuwamwau 'abo toai me'olotona ma'ediya sigwaugwausowala? Nai nigeya aga? Ta wanuwa'i'isi 'aene tuta 'imeemai be toai nina 'ipilisinedi 'enega esi sinuwamwau be siedidigula, ta si'ebotana.”

16 # 1 Ko 10:21; 2 Ko 6:16 Ta 'ebweu wate onasemalimali 'ieonedi, 'igwae, “Nigeya sawesawenaya be kaleko auwauna senasenaminega 'oama kadekadelina tabwabwada, 'abona nai esabu nina 'iesabu toili. 17Ta nigeya wate sawesawenaya be bwasi auwauna ta waiwaina tasiwa bwala 'ebesiwa kadekadelina 'enaya. 'Abo gete nadigega taguinuwa'esei, bwasi 'ina seseya 'enega bwala nina 'iesabu be bwasi 'itasiwa, ta 'enega 'ebesiwa nina 'ito'umali. Ta 'ilobwenena be bwasi auwauna ta waiwaina tasiwa 'ebesiwa auwauna solanaya, be 'enega maibo'ana bobo'ana.”

Yesu iine 'eluwa 'igie bobo'anedi

(Maki 5:21-43; Luke 8:40-56)

18'Etamo Yesu 'ionaona ta 'ebweu toloina 'imai ga Yesu matanaya 'i'aetulasa, ta 'igwae, “'Inapwana, natugu mewainena ni'a 'imwawasa, ta nuwanuwagu 'umama be oona 'uda gitoo be 'ida toolo limana.”

19Ta Yesu 'itoolo ga ma ina tononoyao toloina nina simuliyena, 20#Md 14:36ta sitautauya, ga waine 'ebweu lalana 'idaudau yakwala tuwelo 'ediya mulidiyega 'imai ga Yesu 'ana 'oama tupitupina 'igitoona, 21manuna 'ina nuwanuwa 'atenaya 'igwae, “'Eguma tuga Yesu 'ana 'oama namo yagitoo yada bobo'ana.”

22 # Mk 10:52; Lu 17:19 Ta Yesu 'isanaila ga waine nina 'i'itena, ta 'igwae, “Kagutoki natugu, 'imu emisa 'enega ni'atu 'ubobo'ana.” Ta tuta gote 'enaya waine nina 'ibobo'ana.

23'Enega Yesu 'itauya ga toloina nina 'ina anuwaya 'iapwesa ga 'i'itena todedoi sidedoi ta lololi 'ana tomu'eyao lololi simu'emu'e, ga 'enadi 'isinabwa wawasae. 24#Yo 11:11'Enega Yesu 'ieonedi, 'igwae, “Waapwesa! Gwama gete nigeya 'imwawamwawasa ta 'i'eno mwataya tuga.” Ta siedagiyena.

25'Enega boda nidi siapwesa ga Yesu 'ilugu ga gwama nina nimanaya 'igiyaina ga mayawasina 'itoolo. 26Muliyega ale gete 'i'elelewana sena maibo'ana 'ediya.

Yesu tomata kebokebo 'eluwa 'igie bobo'anedi.

27 # Md 1:1 Sena gote 'enega Yesu 'itautauya ta tomata kebokebo 'eluwa simulimuliyei ta sibwaubwau 'enadi sinabwana 'enega sigwaegwae, “Debida tubuna ye, 'uda 'atenuwa 'ole'oleyema!” 28'Enega anuwaya 'ilugu ga tomata kebokebo nidi simai 'enaya ga Yesu 'ieonedi, “Mwa'adega waemisegu 'aene sawesaweguya matami yagie'esasedi?”

Ga taudi sigwae, “'Inapwana, sawesawemuya.”

29 # Md 8:13, 15:28 'Enega matadi 'igitoodi ta 'ieonedi, “'Imi emisa 'ediyega matami sida 'esasa”, 30ga matadi si'esasena. Ta Yesu loina pa'alina 'i'ebwa'edi, 'igwae, “Geya'abo yaita 'ena wasimasimanegu.”

31'Enega sitauya ga Yesu 'ina loina sile'oena ta 'ina guinuwa 'ediya sisimana dadanena sena yauyauna 'ediya.

Yesu kabaleya 'ebweu 'igie bobo'anena

32 # Md 12:22 Ta Yesu ma ina tononoyao ni'atu sitautauya ta, 'ebweu tai yaluyaluwa bi'iyao meyana sigibuninaya si'au'ewenama Yesu 'ena. 33Ta 'enega Yesu yaluyaluwa bi'i 'iula apwesena, ga tai nina 'ibobo'ana ga 'ionaona. Ta pwalu ma idi gwausowala Yesu si'awa bobo'anena, ta sigwae, “Nigeya 'ebweu yaita 'ina guinuwa gete nadigega tada 'itena Isileli solanaya.”

34 # Md 12:24; Mk 3:22 Ta sa'i Palisiyao silolagata ga sigwae, “Yaluyaluwa bi'i 'idi 'inapwana 'ina waiwaiyega Yesu yaluyaluwa bi'i 'iulaula apwesedi, ta nigeya Yaubada 'ina waiwaiyega.”

Yesu tomota 'i'atenuwa 'ole'oleyedi

35'Enega Yesu 'asa sinabwadi be gidalidi 'ediya 'isakowasi, ta 'idi anuwa tapwaloloyao 'ediya 'ie'ita ta 'iloguguya Yaubada 'ina loina tetelina manuna, ta wate le'oasa yaudi 'ediyega tomota 'igiebobo'anedi.

36 # Md 14:14; Mk 6:34 Ta pwalu 'i'itedi ga 'i'atenuwa 'ole'oleyedi, manuna 'adi mwauyao 'ediyega nigeya 'adi tolemamo, 'atuwa sipi kwanikwanidi nigeya 'adi to'ita'i'itamo. 37#Lu 10:2; Yo 4:35Ga 'ina tononoyao 'ieonedi, “Sesoi bobo'ana ta tosesoi 'omi pu'epu'emimo, 38'enega Tonibagula 'enaya wasisida be topaisewao 'ida etunedi 'ina bagulaya sabi sesoi.”

Currently Selected:

Madiu 9: dob

Highlight

Copy