MARKUS 6

Lepoʹ Nasarit nyekang Yesus

(Un te neng Matius 13.53-58; Lukas 4.16-30)

1Tai Yesus puke cen ina, tai ie uleʹ neng lepoʹ o tengen. Un pe ida telu diaʹ bayaʹ katuk ke tai serengan ia. 2Tegoʹ Tau Kelineʹ tai Yesus pekatuk dulu kedalem amin sebayang Yahudi. Kadoʹ kelunan kina diaʹ ngeringa dau ue. Muʹo tawai ne dau re mung. Un dau re: “Cen mpi ie alaʹ mung isiu dini tupe? Ngan aheʹ iaʹ naʹ penudi kimet ini mia? Ban kumpin ne senteng uyan puyan nyingan ini tupe? 3Moʹ abeʹ ini iaʹ tukeng kayu idai mo, ia iaʹ anak Mariam, ngan cenganak Yakup de telu Yusis, Yudas ngan Simun? Un pe diaʹ cenganak leto ho mudip kini pe.” Ngan pekina ne dau re leko ke alaʹ Yesus.

4Un dau Yesus mida: “Ukoʹ baʹan ca pegawa Allah, kempi kempi ketai ie, dulu ke nyelama ha. Bang kaʹ lepoʹ o tengen, ngan neng ahang diaʹ pengamin ne ngan cenganak ke, iaʹ abeʹ un selama dau neng ia.”

5Abeʹ Yesus ubaʹ ke uyan puyan nyingan kina. Bang kediʹut le diaʹ sakit ia napoʹ ujoʹ o ngan paget ida. 6Ketoʹ aleʹ ne tekaʹ Yesus moʹ kimet de are ubaʹ ke ngelan dau ue.

Yesus cuk puloʹ dua usa lawa katuk ke

(Un te neng Matius 10.5-15; Lukas 9.1-6)

Sulo tai Yesus naʹat singket lepoʹ iʹut pipa kina ke pekatuk ida. 7Kun Yesus mengin puloʹ dua usa diaʹ bayaʹ katuk ke nai pempun. Sulo ho cuk ida tai pelawa katuk ke, tahaʹ dua tahaʹ dua ketai re. Kena ketai re, kun Yesus naʹ nyingan mida iaʹ senteng pekarap bali. 8Un dau ue cuk ida: “Ayen ngkin inu ngan ncem pit sekut cem le. Ayen ngkin kanen, ngan pekina pe belanyat sahaʹ kem. Ngan ligit dalem bahan sapai hem pe, ayen ngkin ne. 9Sukat cem un sepatu he, di ie ayen ncem un sapai diaʹ suheʹ pe.” 10Laʹa dau Yesus neng ida: “Dalau tai hem tai nyabeʹ ca lepoʹ, ngan pejakaʹ neng ca amin iaʹ alaʹ ikem, ayen ncem tai paso laʹa pa ketai hem mecin lepoʹ ina. 11Buk kem tai nyabeʹ ca lepoʹ diaʹ are ubaʹ alaʹ ikem, ngan abeʹ de ubaʹ ngeringa dau isiu hem, tiga hem mecin lepoʹ ina, ngan nekaʹ abu cen taket cem, idi re ke tisen seʹ ban nte abeʹ un dapit neng ikem.”

12Sulo tai re penco katuk ke payo kimet kelunan, apan nte ke nyepuleʹ kimet de cen penyalaʹ de. 13Kun nte telu diaʹ penco katuk Tuhan dina pekarap kadoʹ bali jaʹat, nga mubeʹ kenyo neng kelunan sakit ngan paget ida.

Puyan patai Yaya Guru Batis

(Un te neng Matius 14.1-12; Lukas 9.7-9)

14Mung denga puyan ina tai abeʹ palaʹ Laja Herudis, uban denga ngadan Yesus lepa tai pa tipo. Un dau palai kelunan kuma ha: “Nai Yaya Guru Batis numpak mudip ne ini laʹa. Ina ukoʹ puyan nyingan ini senteng nuyan kuʹun ne.”

15Un palai diaʹ kuma ha: “Atek Ilia ini.”

Un pe palai laʹa kuma ha: “Atek ca pegawa Tuhan Allah ini, koʹ baʹan diaʹ pegawa cen naʹaʹ de.”

16Tegoʹ Herudis tisen denga ina, un dau ue: “Atek Yaya Guru Batis ini. Akeʹ iaʹ ngulep batuk ke re, bekaʹ pe ia numpak mudip pelaʹa.” 17Lan te Herudis tengen iaʹ cuk kelunan mapo Yaya, lemeka ia, ngan meput ia dalem amin sepin. Herudis uyan puyan pekina tuman Herudias leto cenganak ke Pilipus, ngan Herudis alaʹ ia leto ho pelaʹa. 18Ngan lemuto dau Yaya badaʹ me Herudis, kuma ha: “Abeʹ e adet teneng iaʹ puyan ncoʹ pepeto ngan leto cenganak laki hoʹ ne.”

19Ina ukoʹ Herudias miʹa neng Yaya, ngan ubaʹ ke lematai ia. Naʹ pia pekina, abeʹ Herudis dayo. 20Ban ne Herudis tisen Yaya ca kelunan teneng ngan buheʹ, ina ukoʹ o takut neng ia, ngan petubo ia tiga tiga. Ubaʹ te Herudis ngeringa dau Yaya lete, naʹ pe kaseng laleʹ kaʹ kimet te singket te kenahan dau isiu ue.

21Un ca awang iaʹ marung neng kimet Herudias, tegoʹ tau bulan dulu nawai Herudis nai pempet. Dalau ina Herudis uyan ca pemung uman. Sulo ho mengin mung pengelataʹ perinta, ngan diaʹ pengelataʹ sedadu, ngan diaʹ pengelataʹ lepoʹ Galilia. 22Dalau ina nai dekiʹit leto anak Herudias kancet kata ida, pebangen tawai Herudis peging ngan sakai ie. Sulo dau laja me dekiʹit leto ina: “Inu pengubaʹ koʹ nyat ne neng akeʹ? Atek keʹ ke naʹ a mikoʹ lete.” 23Ngan kadoʹ naʹan dau pudoʹ isiu ue, un dau ue: “Akeʹ patek isiu heʹ mikoʹ. Mele inu iaʹ ikoʹ nyat neng akeʹ, pa abeʹ kuaʹ tulat iaʹ akeʹ ngaren ini pe, akeʹ ke naʹ lete mikoʹ ʹo.”

24Sulo tai dekiʹit leto ina kawang, ngan lemutu ueʹ e: “Inu iaʹ akeʹ ke nyat ueʹ?”

Un dau ueʹ e mipa ia: “Anak, tiga hoʹ nyat ulu Yaya Guru Batis.”

25Penco ketai dekiʹit leto ina uleʹ palaʹ laja, ngan pera seʹ ketai ie nyat neng laja ina: “Ikoʹ naʹ ne makeʹ naʹkini, ulu Yaya Guru Batis neng usun ca daya.”

26Dalau ina meba laleʹ ne tekaʹ kimet laja ina. Abeʹ e mencam kumpin laʹa, moʹ mahoʹ ia patek ne neng ahang sakai ie dina uʹo re. 27Ina ukoʹ Laja Herudis cuk ca usa sedadu ue tai alaʹ ulu Yaya. Penco tai sedadu ina kaʹ amin sepin, ngan ngulep batuk Yaya. 28Kun ne ngkin ulu ue neng usun ca dayaʹ, ngan naʹ a me dekiʹit leto ina are. Sulo dekiʹit leto ina naʹ a me ueʹ e. 29Dalau tai denga ina pabeʹ ida telu diaʹ bayaʹ katuk Yaya, penco tai re alaʹ patai ie, ngan tai masek ia kedalem liang.

Yesus lemakan lema ibu kelunan

(Un te neng Matius 14.13-21; Lukas 9.10-17; Yaya 6.1-14)

30Nai re telu diaʹ lawa Injil dina uleʹ palaʹ Yesus, sulo re badaʹ mia mung puyan iaʹ ida lepa uyan ngan pekatuk. 31Laʹa moʹ kadoʹ aleʹ kelunan kina, tai palai uleʹ, nai pe palai laʹa, pa abeʹ Yesus de telu pe abeʹ un biʹen ke uman. Ina ukoʹ Yesus pisiu ida telu, un dau ue: “Tiga ne ilu tai tengen le neng ca ukoʹ iaʹ lenga, idi le senteng ke ngelineʹ ngan penteng lelat cem telu.” 32Sulo tai re puke cen ina, tai ngalut neng ca ukoʹ iaʹ lenga.

33Naʹ pe ia pekina, kadoʹ dulu diaʹ taʹan seʹ ketai re, ngan kadoʹ dulu diaʹ malai neng ida. Tai dulu mecin lepoʹ ina, ngasa ketai re tahaʹ tena. Ading nte abeʹ neng iaʹ ukoʹ ketai Yesus de telu diaʹ bayaʹ katuk ke. 34Dalau Yesus tai pejakaʹ cen alut, kun ne taʹan seʹ mpun kelunan dina. Bioʹ tekaʹ penyaheʹ e neng ida, moʹ un diseʹ de koʹ baʹan mpun dumba iaʹ abeʹ un aheʹ iaʹ ke nubo ida are. Sulo Yesus nading pekatuk ida, man kadoʹ naʹan katuk. 35Tai tahup tau ina, nai re telu diaʹ bayaʹ katuk Yesus pisiu ia, un dau re: “Tai ie tahup ne ini, ngan lenga pe tanaʹ ini. 36Tiga hoʹ cuk ida tai uleʹ ne. Talan ne ida tai kaʹ lepoʹ ngan kaʹ uma diaʹ nyeng kini, apan nte senteng ke lemeli penguman mida tengen.”

37Un dau Yesus mipa ida: “Tiga ne ikem naʹ penguman mida.”

Sulo dau re lemutu ia: “Seʹ koʹ cuk ameʹ ketai lemeli penguman me ida man dua ato ligit mo?”

38Kun Yesus lemutu ida telu: “Kudaʹ luʹung ruti paun iaʹ ikem mampin tupe? Tai ne naʹat te ading.”

Lepa re tisen ne, kun nte badaʹ a mia, un dau re: “Bang lema luʹung le, ngan dua re usa sihai atuk.”

39Sulo Yesus cuk diaʹ bayaʹ katuk ke dina tai peteneng ladung dulu, ngan cuk ida pekerepeng madung neng usun udu metun dina. 40Sulo re pajat madung pekerepeng tahaʹ ca ato usa, ngan un pe palai un lema puloʹ usa. 41Sulo Yesus alaʹ lema luʹung ruti paun dina, peging ngan sihai atuk dua dina are, sulo ho nekadaʹ kaʹ langit, ngan nyuaʹ tiga saheʹ e me Tuhan Allah. Kun ne mepeʹ luʹung ruti dina are, ngan naʹ a me diaʹ bayaʹ katuk ke, cuk ida patu ue me kelunan dina. Pekina pe Yesus petulat sihai atuk dua dina are me dulu mung. 42Mung nte uman pa beso. 43Sulo tai diaʹ bayaʹ katuk Yesus nemo laʹa ruti ngan atuk dina are. Puloʹ dua ingen ban laʹa ha. 44Ngan toʹ kadoʹ laki diaʹ uman ruti dina, lema ibu usa.

Yesus masat kempau sungai

(Un te neng Matius 14.22-33; Yaya 6.16-21)

45Dalau ina lete Yesus cuk diaʹ bayaʹ katuk ke tai kaʹ alut, ngan tai pelawat kaʹ lepoʹ Bit-saida, kaʹ dipa leteng ina. Ngan mentung Yesus pawang dulu diaʹ kadoʹ dina tai uleʹ. 46Kun ne nyat nyaheʹ neng ida, sulo tai ie kusun ca mudung, moʹ o ubaʹ ke lemameʹ. 47Dalau ketai tahup tau ina, abeʹ ne alut ina kaʹ beluaʹ sungai te. Dalau ina bang Yesus tengen le kusun tanaʹ. 48Kun Yesus taʹan seʹ de telu, seʹ de lemesai, moʹ bahiu nai nyelalang ida. Dalau tekuʹuk iap, nai Yesus palaʹ ida, masat kempau sungai, ukoʹ baʹan seʹ e ketai lapa ida are. 49Kun nte taʹan seʹ kenai ie masat kempau sungai, sulo re lemikaʹ kuma ha ca bali. 50Bisau tekaʹ de mung taʹan Yesus.

Un dau Yesus neng ida: “Denaʹ ne tawai hem. Akeʹ lete ini. Ayen ncem takut.” 51Sulo tai Yesus ngan nte kedalem alut. Belekaʹ pekenaʹ ne bahiu ina are. Muʹo tawai ne tekaʹ de telu diaʹ bayaʹ katuk Yesus dina. 52Moʹ abeʹ lepe ida tisen sen puyan nyingan iaʹ nuyan neng ruti paun didai are. Ina ban tuman tepa kimet de neng puyan ina.

Yesus paget diaʹ sakit kaʹ lepoʹ Genesarit

(Un te neng Matius 14.34-36)

53Tai abeʹ de telu kaʹ dipa leteng ina, sulo tai re pejakaʹ kaʹ tuhun lepoʹ Genesarit. Kina re nelu alut de. 54Dalau nai re telu mecin alut ina, tisen ne dulu Yesus. 55Sulo tai re ngasa pa tipo lepoʹ ina, ngan kun nte nekalang ngkin diaʹ sakit nai palaʹ Yesus, kempi kempi re kenahan dau ue un. 56Ngan kempi kempi ketai ie kaʹ lepoʹ iʹut ke, ngan pekina pe kaʹ lepoʹ bioʹ, pekina pe kaʹ lumpung, pekina pe kaʹ pasen, dulu nai ngkin lete diaʹ sakit palaʹ ia. Kun nte nyat lesau neng Yesus, apan diaʹ sakit dina ngkang sada sapai ie. Mung kelunan diaʹ ban ngkang ia pekina, mung nte pe nai maget.

Currently Selected:

MARKUS 6: KNT

Highlight

Copy