MATIUS 16

Diaʹ Perisi nyat puyan nyingan

(Un te neng Markus 8.11-13; Lukas 12.54-56)

1Nai kun palai kelunan Perisi ngan Seduki palaʹ Yesus. Moʹ kimet de ubaʹ ke ten Yesus, ida cuk ia uyan ca puyan nyingan mida apan nte ke tisen buk lan ne ke sihoʹ neng pengubaʹ Allah. 2Un dau Yesus mipa ida: “Dalau ketai lenca tau, un dau hem kuma ha: ‘Seʹ ke tagaʹ ne ini uban bala seʹ langit.’ 3Pekina pe mempam mempam ne un dau hem kuma ha: ‘Ujan ʹo moʹ tau lirem.’ Mencam kem nekena badaʹ seʹ puyan awang uban ncem naʹat kaʹ langit, un sepuʹo tedanaʹ bulen iaʹ ikem taʹan ngajan udip ini, abeʹ kem mencam badaʹ sen ne. 4Kelunan diaʹ mudip ngajan ini un jaʹat kimet de, ngan puyan nte petaro Tuhan Allah. Seʹ kem ke cuk akeʹ uyan puyan nyingan? Naʹun. Bang ca le tedanaʹ nyingan iaʹ akeʹ ke naʹ mikem, iaʹ ina tedanaʹ nyingan pegawa Yunus.”

Lepa ina sulo tai Yesus mecin ida.

Ala lamut diaʹ Perisi ngan ala lamut diaʹ Seduki

(Un te neng Markus 8.14-21)

5Dalau tai diaʹ bayaʹ katuk Yesus pelawat kaʹ dipa leteng te, abeʹ de ban petawai ngkin ruti re. 6Un dau Yesus neng ida: “Jagaʹ tiga le ikem neng ala lamut diaʹ Perisi ngan diaʹ Seduki.”

7Sulo dau re neng ida peselepeʹ: “Ia pisiu pekina dau uban le abeʹ un ngkin ruti.”

8Yesus tisen inu tiraʹ de, sulo un dau ue neng ida: “Inu adeʹ kem pisiu neng ata hem tengen uban ncem abeʹ un ngkin ruti tupe? Adeʹ tepa ban pengelan ncem. 9Kumpin, abeʹ kem tisen lepe, abeʹ ne ikem petawai kumpin seʹ puyan nceʹ pepeʹ lema re luʹung ruti paun ngan lemakan lema ibu usa kelunan? Kudaʹ ingen ban laʹa ruti iaʹ ikem nyangan dalau idai? 10Ngan kumpin puyan nceʹ lemakan pat ibu kelunan man tujoʹ de luʹung ruti, ngan kudaʹ ingen ban laʹa ruti iaʹ sangan kuʹun ncem? 11Moʹ inu tepa ban penisen ncem. Abeʹ keʹ pisiu ikem neng puyan ruti. Jagaʹ tiga le neng puyan ala lamut diaʹ Perisi ngan diaʹ Seduki.”

12Ina le diaʹ bayaʹ katuk Yesus tisen moʹ abeʹ Yesus cuk ida jagaʹ neng puyan lamut man nte uyan ruti, di lareʹ ia pekata neng puyan katuk diaʹ Perisi ngan diaʹ Seduki.

Peterus badaʹ kimet te neng Yesus

(Un te neng Markus 8.27-30; Lukas 9.18-21)

13Tai abeʹ Yesus kaʹ dale iaʹ nyeng kaʹ lepoʹ Kaisaria Pilipi. Kina ia lemutu ida diaʹ bayaʹ katuk ke: “Aheʹ iaʹ dulu kuma Anak Sio ini tupe?”

14Un dau re mipa: “Un diaʹ kuma ikoʹ Yaya Guru Batis. Un diaʹ kuma ikoʹ Ilia. Un pe dau dulu diaʹ ca kuma ikoʹ Yeremia, ngan un pe diaʹ kuma ikoʹ pegawa diaʹ ca.”

15Un dau Yesus: “Aheʹ sepe akeʹ baʹan ncem?”

16Un dau Simun Peterus mipa ia: “Ikoʹ lete Keristus iaʹ ngkang pungu udip, Anak Allah iaʹ mudip.”

17Sulo dau Yesus mipa: “Luhaʹ ban un peniga Tuhan neng ikoʹ Simun anak Yaya, moʹ abeʹ e uban puyan kelunan iaʹ pungkaʹ a mikoʹ, di lareʹ Amai heʹ kaʹ surga iaʹ naʹ a mikoʹ. 18Tuman ina un dau heʹ mikoʹ, ban ne ikoʹ lete Peterus, ca utun batu, ngan neng usun puʹun batu ini lete akeʹ ke medeng mpun sidang ngkeʹ. Ngan naʹ pe puyan patai pe, abeʹ un puyan inu iaʹ senteng ke nyupeʹ e. 19Akeʹ ke naʹ alet pamen pengaren surga mikoʹ ʹo. Inu iaʹ ikoʹ ke mulen kusun tanaʹ ini ʹo, ina lete iaʹ Tuhan lepa ban mulen kaʹ surga ne. Ngan inu iaʹ ikoʹ ke pedayo kusun tanaʹ ini ʹo, ina lete iaʹ Tuhan lepa ban pedayo kaʹ surga te.”

20Penco Yesus cuk diaʹ bayaʹ katuk ke, ayen peletoʹ tai badaʹ ban ia iaʹ Keristus me dulu.

Yesus badaʹ neng puyan penuyen ne ngan puyan patai ie

(Un te neng Markus 8.31–9.1; Lukas 9.22-27)

21Ina ne tading Yesus peluhaʹ ca isiu iaʹ mading palaʹ diaʹ bayaʹ katuk ke. Un dau ue: “Tekep lete akeʹ tai kaʹ Yerusalim, ngan ke sihoʹ kadoʹ tuyen kuʹun diaʹ lataʹ lepoʹ, ngan diaʹ detaʹu lataʹ, ngan diaʹ guru Katuk Adet Musa. Dulu ke lematai heʹ ʹo. Un sepuʹo neng iaʹ ketelu tau ue, akeʹ kenai ngeliwet mudip laʹa.”

22Ina ukoʹ Peterus tai ngkin Yesus tengen le kaʹ sada mpun, sulo ho ngenca ia, un dau ue: “Bioʹ lesau Allah neng ikoʹ Amai, nyahut ini ketai nuyan ne neng ikoʹ.”

23Sulo Yesus pupa ngan un dau ue neng Peterus: “Tai ne ikoʹ kelap akeʹ, e Sitan. Ikoʹ ini iaʹ uyan ca pempeng neng asat ceʹ. Moʹ kimet coʹ ini bang kimet kelunan le, abeʹ e anun Tuhan Allah.”

24Uʹo ina kun Yesus pisiu diaʹ bayaʹ katuk ke: “Buk aheʹ iaʹ ubaʹ kenai tugung akeʹ, tiga ha lepo pengubaʹ usa ha tengen, ngan nyuʹun tecek ke, iaʹ ukoʹ o ke matai, ngan nai bayaʹ akeʹ, ina le iaʹ senteng kenai tugung akeʹ. 25Aheʹ iaʹ malaʹ ke pedemun udip pe palaʹ usa ha tengen, atek ke pesau lete udip pe ʹo. Un sepuʹo aheʹ iaʹ ke pesau udip pe tuman akeʹ, ia iaʹ ke alaʹ udip pe lete. 26Kumpin buk ketoʹ usun tanaʹ ini ke nalan kuʹun ca usa kelunan, inu le ke bang nge buk udip pe pesau tupe? Nyahut ca bang nge ke un ne. Abeʹ un ca inu iaʹ kelunan ke mencai man ne ke alaʹ berua ha ngeliwet. 27Ban ne nyeng le laʹa Anak Sio ini kenai luhaʹ ngan serema peniga Amai ie, peging ngan melikat te. Dalau ina ha ke nyuaʹ a singket usa kelunan bayaʹ ban pemuyan nte. 28Nawai tiga le. Un palai me kelunan dini ʹo diaʹ abeʹ un ke matai pa re taʹan kenai Anak Sio ini, koʹ baʹan puyan kenai ie ngan pengaren ne.”

Currently Selected:

MATIUS 16: KNT

Highlight

Copy