MATIUS 15

Katuk adet tepun cen naʹaʹ

(Un te neng Markus 7.1-13)

1Dalau ina un palai kelunan Perisi ngan guru Katuk Adet nai palaʹ Yesus cen Yerusalim ngan lemutu ia. 2Un dau re: “Moʹ adeʹ diaʹ bayaʹ katuk koʹ ngesa adet diaʹ lataʹ cen naʹaʹ? Kena re uman abeʹ de muheʹ ujoʹ de bayaʹ ban adet le.”

3Un dau Yesus mipa ida: “Ngan inu iaʹ adeʹ kem ngesa katuk ukum Tuhan Allah, ngan bayaʹ katuk kem tengen? 4Moʹ un dau Tuhan Allah: ‘Nyelama ne amai ngan ueʹ kem. Ngan aheʹ iaʹ ke pisiu iaʹ jaʹat neng amai ngan ueʹ de, kelunan ina ke sihoʹ ukum patai.’ 5Un sepuʹo dau katuk kem kuma ha, buk ke un ca kelunan iaʹ un inu iaʹ tekep ke mepo amai ngan ueʹ, tiga buk ke un dau kelunan ina kuma ha: ‘Ini ca inu iaʹ akeʹ ke mencai palaʹ Allah.’ 6Sukat dau ina ke nuyan ca ukan apan ne abeʹ un titin ke nyelama amai ngan ueʹ e, baʹan dau hem. Pekina ne puyan ncem lemasa tiraʹ Allah man katuk adet cem tengen. 7E kelunan ngaloʹ. Atek lan dau pegawa Yesaya badaʹ tebadaʹ Allah neng puyan ncem, pekini dau ue:

8‘Un dau Allah: Kelunan dini bang man dau paʹ de tuaʹ le ida nyelama akeʹ,

un sepuʹo coʹ laleʹ le kimet de neng akeʹ.

9Abeʹ un tuman nte lemameʹ akeʹ, moʹ de pekatuk bayaʹ dau adet kelunan,

ngan uyan ne koʹ baʹan katuk ukum cen Tuhan Allah are.’ ”

Puyan inu iaʹ ngano kelunan

(Un te neng Markus 7.14-23)

10Sulo Yesus mengin kelunan kadoʹ dina ngenyeng ia, ngan un dau ue neng ida: “Tiga hem ngeringa ngan ngetisen dau heʹ. 11Inu iaʹ tai kaʹ dalem paʹ kelunan, abeʹ e ke ngano berua ha. Di lareʹ inu iaʹ ke nai kawang cen paʹ a, ina iaʹ ke ngano ia lan.”

12Penco diaʹ bayaʹ katuk ke nai pisiu ngan ne, un dau re: “Un ncoʹ tisen kelunan Perisi dina sakit kimet neng ikoʹ tuman ban isiu hoʹ are?”

13Un dau Yesus mipa ida: “Singket pula diaʹ Amai heʹ kaʹ surga abeʹ un mula, ke pubit ʹo. 14Ayen janga neng kelunan dina. Ida diaʹ ajak kelunan butaʹ dina, ida tengen pe butaʹ te. Buk ca usa iaʹ butaʹ ke ajak ca usa iaʹ butaʹ, atek de dua ke tai laboʹ lete kaʹ lubang alo.”

15Un dau Peterus: “Badaʹ ne mameʹ sen kata katuk ina are.”

16Un dau Yesus mida: “Abeʹ lepe ikem dini mencam neng ʹo kelunan diaʹ ca. 17Tisen te ikem kidi tupe? Inu iaʹ tai kaʹ dalem paʹ ca kelunan, penco tai kaʹ dalem batek ke, penco pelapa uʹo ina. 18Un sepuʹo inu iaʹ nai kawang cen paʹ kelunan ina, idi lete iaʹ nai cen penawai ie, ngan puyan ini ne iaʹ ke ngano berua kelunan ina. 19Ban ne cen penawai ie lete kenai kimet iaʹ jaʹat, iaʹ ina lematai, pemung nyelem, ngan puyan selabu diaʹ ca, ngelau, lemalo, ngan pejaʹat dulu. 20Puyan diaʹ pekini ne diaʹ ngano berua kelunan. Di lareʹ puyan uman petem abeʹ un muheʹ ujoʹ bayaʹ dau adet de ina, abeʹ e ke ngkin ano me berua ca kelunan.”

Pengelan ca leto

(Un te neng Markus 7.24-30)

21Tai Yesus mecin cen ina, penco tai kaʹ ca dale nyeng kata lepoʹ Tirus ngan lepoʹ Sidun. 22Un ca leto lepoʹ Kanaan iaʹ mudip kinaʹ nai palaʹ Yesus mentung nge ngelengap: “Amai heʹ, Anak Daut, kudaʹ koʹ lesau akeʹ ading. Moʹ un bali nelasek anak leto heʹ, ngan ke nyarem laleʹ le seʹe.”

23Ca isiu pe Yesus abeʹ un mipa leto ina. Mung diaʹ bayaʹ katuk ke dina nai palaʹ ia, ngan nyat neng ia: “Cuk ne leto ina tai uleʹ. Naʹat ne, lengap lengap ke dau kenai ie bayaʹ ilu.”

24Sulo dau Yesus mipa leto ina: “Amai heʹ iaʹ cuk akeʹ nai bang palaʹ dumba diaʹ lepa lingu dalem lepoʹ Israil.”

25Kuʹun isiu ue ini, penco leto ina sutlep neng taket Yesus, un dau ue: “Amai, lesau ne akeʹ ading.”

26Un dau Yesus mipa ia: “Abeʹ un tekep le alaʹ penguman anak ngan pet te me asu.”

27“Lan lete ina Amai,” kun dau leto ina, “un sepuʹo asu uman bute kanen, diaʹ nai laboʹ cen bijaʹ laki iaʹ un ia.”

28Sulo dau Yesus neng ia: “Ikoʹ ca leto iaʹ un bioʹ pengelan. Atek nuyan ne palaʹ ikoʹ kuaʹ puyan pengubaʹ koʹ.” Tegoʹ ina lete nai anak leto ina maget.

Kadoʹ dulu Yesus paget

29Yesus mecin cen ukoʹ o kina, tai ie masat kaʹ sada bahi leteng Galilia. Tai ie pukat ca mudung, sulo ho madung kidi. 30Kadoʹ dulu nai ngkin palaʹ ia kelunan diaʹ kejaʹ, ngan diaʹ butaʹ, pekina pe diaʹ apet, ngan diaʹ ameng, ngan kadoʹ pe diaʹ ca diaʹ sakit laʹa. Sulo re mahung kelunan sakit dina kata taket Yesus, ngan penco ho paget ida mung. 31Muʹo tawai ne dulu taʹan diaʹ ameng senteng pisiu, ngan diaʹ apet nai numpak tiga, diaʹ kejaʹ muat masat, ngan pekina pe diaʹ butaʹ nai taʹan. Sulo re pempau Tuhan Allah lepoʹ Israil.

Yesus lemakan pat ibu usa kelunan

(Un te neng Markus 8.1-10)

32Kun Yesus mengin diaʹ bayaʹ katuk ke, penco dau ue mida: “Lesau kaʹ keʹ neng kelunan kadoʹ dini, ban ne telu tau ne majan nte ngelineʹ pemung ngan nceʹ, ngan naʹkini muʹo ne penguman nte. Abeʹ keʹ ubaʹ ida ketai uleʹ buk keʹ abeʹ un lemakan ida ading, malap ida ketai lemaʹ kahang janan ʹo.”

33Un dau diaʹ bayaʹ katuk ke lemutu ia: “Kempi le ke alaʹ penguman kaʹ tanaʹ lenga ini, iaʹ sukat ke pebeso kelunan kadoʹ dini tupe?”

34Un dau Yesus neng ida: “Kudaʹ luʹung ruti paun iaʹ un neng ikem tupe?”

Un dau re mipa ia: “Bang tujoʹ luʹung le, ngan un kediʹut de atuk dumit.

35Kun ne cuk kelunan kadoʹ dina madung kaʹ lasan tanaʹ. 36Sulo ho alaʹ tujoʹ luʹung ruti paun dina, pemung ngan atuk dina. Kun ne nyuaʹ tiga saheʹ e palaʹ Tuhan Allah, sulo ho mepeʹ ruti paun ngan atuk dina, penco naʹ a me diaʹ bayaʹ katuk ke. Kun diaʹ bayaʹ katuk ke patu atuk ngan ruti paun dina are me kelunan kadoʹ dina. 37Mung kelunan kadoʹ dina uman pa beso tekaʹ de. Lepa ina, sulo tai diaʹ bayaʹ katuk Yesus nemo laʹa ruti paun ngan atuk dina. Un tujoʹ ingen iaʹ sangan kuʹun laʹa ha. 38Toʹ ban kadoʹ laki diaʹ uman dina, un pat ibu usa, ngan tengen pe cap anak ngan leto.

39Lepa ina Yesus cuk kelunan kadoʹ dina tai uleʹ. Sulo tai ie ngalut, tai kaʹ dale Magadan.

Currently Selected:

MATIUS 15: KNT

Highlight

Copy