ṮAKWIIN 8

1Hili Arumgimis kaki’da Nuuh e mo dhala ris tombwaasho mo dhala ris to/e mo kun nyaḵ ’ko ki a’di e bwam ma ḵur mo. Dhali Arumgimis ki uḵ dhan ’tham mmoposha p̱o/ mony’cesh mo dhali yi’de/ a’di guki’da wuuy mo. 2Yi’de/ kun kasha e ’peni mo kun ’kula’kul mo dhala campur gi momis mo tani uni mu’thkunu mo dhala sho’k ’peni momis a’di guki ’twa/ mo, 3dhali yi’de/ cunycumki’d ka ’cesh mo ’pena ’cesh ki sule/ sule/ mo. Dhali ka cim iss ’kwanimpa ipesu/ i’ce’dka ’kume’d thimin mo tani yi’de/ a’di mara’d ma ap̱o/ mo. 4Dhali ka appe ’kup̱i pesu/ mo dhali ka cim ’kume’d i’ce’dka pesu/ jin ta jama/ appe mo tani aḵur a’di p̱u’dki’da p̱o/ ’kuwosha turga/ kun yuḵu gway ka Ararath dhali rep̱ mo. 5Dhali yi’de/ di’di mmoṯikir mmomara’d is mo ntaga ppe ’koni ’kup̱i ’kume’d mo, dhali ka appe ’koni ’kup̱i ’kume’d mo tani a’di jin ta’da tee jin ṯwa/a/ ka appe mo tani ’kup̱an dhan wosha turga/ uni p̱arkunu e mo.

6Dhali ’ko’da cim iss ’kwanimpa su/ ’baarki’d mo tani Nuuh ’ce’dki’da shubbaak ma ḵur mo a’di jin uḵkina a’di mo. 7Dhali a’di ki hasha waraŋgwaḵ mo, dhali a’di wukurki’d ntagi yi’de/ ḵu’thki’d ’peni mony’cesh mo. 8Dhali yan’ko’d a’di ki hasha gurko/ ’peni a’di mo mmop̱ar mo e mo waḵki/ yi’de/ midi gu ka wuuy ’peni bwam/e ga ’cesh mo. 9Hili gurko/ diki gam moŋkamu/ jin mina a’di kar sho’k piti icine/ mo, dhala yim doḵki’d ka nyaŋ’ko’d e a’di e bwam ma ḵur mo haali/ yi’de/ di’d naskina/ e bwam/e gi mony’ceshi ’baar mo. Wakan a’di ki kar me’d piti mo dhali budha yim mo dhali susa yim bway bwam ma ḵur nyaḵki a’di mo. 10A’di c̱orki’da cim pesuŋ kamu/ doḵ/e mo dhali a’di ki hash gurko/ ka pije/ ’peni bwam ma ḵur doḵ/e mo. 11Dhali gurko/ p̱u’dki’d ka nyaŋ’ko’d i a’di mom’pimpili/ mo dhali hili mo mo ma, ayim ḵalki’d e ’twam piti ’cemen jip̱i/ cwa seṯuun jin ta’da go’d go’d mo jin daḵa ’ciṯẖkunu ki she/ mo. Wakana Nuuh a’di mishki mo mo ki yi’de/ a’di guki’da wuuy ’peni mony’cesh mo. 12Dhali yan’ko’d a’di c̱orki’da cim pesuŋ kamu/ mo, dhali a’di hash gurko/ mo, dhala yim yaki’d mo dhali diki doḵu/ ka nyaŋ’ko’d i a’di mo.

13Ka yil iss ’kwanimpa i/iss ’de/ i’ce’dki iss ’kwanimpa i’kume’d i’ce’dka ’de/ mo, dhali ka appe jin ṯwa/a/ dhali ka cim ’de/ ka appe mo, yi’de/ a’di ḵu’thki’d ’peni mony’cesh mo dhala Nuuh a’di ’ceeki’da ḵur ’kup̱ mo dhali a’di ki p̱ar mo e mo dhali hili mo mo ma, bwam/e ga ’cesh a’di pupura/ pupur mo. 14Dhali ka appe kun ’kon ma p̱o/i su/ mo ka cim iss ’de/ i’ce’dka pesu/ ka appe mo tani mony’cesh a’di pupuri’di ’baar mo. 15Dhali yan’ko’d Arumgimis ki owa Nuuh gwo mo ki: 16Yaku/ ka pije/ ’peni bwam ma ḵur mo, /e dhali ashin mo dhali iya/m pini mo dhali up̱ gi iya/m pini nyaḵki /e mo. 17’Doyi aris to kun ’kon ki e nyaḵki /e mo uni gun ta to ki shuman isi ’baar mo, aris ’dii dhali to/e dhali aris to kun paran mo kun paran e mony’cesh mo ki uni mini c̱is ka enthus ap̱o/ mony’cesh mo ki uni mini dho’th maman dhali mar is ap̱o/ mony’cesh mo. 18Wakana Nuuh yaki’d ka pije/ mo dhali iya/m piti mo dhali ash mo dhali up̱ gi iya/ nyaḵki a’di mo. 19Dhali aris tombwaasho mo dhali aris to kun parana ’cesh mo dhali aris ’dii mo dhali aris to kun ḵalki ya ap̱o/ mony’cesh mo, iikin ka pije/ ka waḵ buni ki she/ ki she/ ’peni bwam ma ḵur mo.

20Dhali yan’ko’da Nuuh ki nyaŋa gwaṯa/ mmomiiya bas gom Tap̱a mo dhali a’di ki bu’th to/e kun dheleladhelel mo ’pena ris tiya mo dhali ’dii kun dheleladhelel mo ’pena ris tiya mo dhali a’di ki c̱i to kun ’ciṯẖu/ ’kus mmomiiya bas eya gwaṯa/ mo. 21Dhali ki Tap̱a cic̱ki’da shim jin c̱iiyi mo ki c̱ii jin ’bor a’di bwa mo tani Tap̱a o gwo eya dum piti mo ki: Aha/ mina diki doḵ/e jee a’cesh mo gom ’kwani ki sule/ mo haali/ gwalal buni kun kulumkina uni gwo ibwa ta thus ki thus ’peni dhuru’c buni mo. Aha/ si’dayi mina diki ’ce’da ris to sho’k doḵ/e ki sule/ mo kun ’kon ki e kun uḵu mo me’d jin miikika/ mo. 22Ki mony’cesh diki’d mo tani mo jin sinu aḵa’bany to dhali mo jin ’ciṯẖu/ to uni ’kokin mo, dhali mon’thup̱u’d dhali mom’batha’d, dhali moyurantee dhali mondiṯ mo, dhali montee dhali mon’thiny uni mol daḵ ki sule/ sule/ mo.

Currently Selected:

ṮAKWIIN 8: Udk

Highlight

Copy