ṮAKWIIN 9

1Dhali Arumgimis ki ’bora Nuuh mii mo dhali iya/m piti mo dhali o uni gwo mo ki: Dhodhi maman mo dhali mari is mo dhali ’tu’di mony’cesh mo. 2Dhali um mina to/e ḵo/ mo dhali um mina to/e dee ki bir bir mmo’cuḵi ’kup̱ mo, aris to/e kun ’kon e mony’cesh mo dhali aris ’dii kun p̱en e momis mo dhali aris to kun parana ’cesh mo dhali aris to yi’de/ kun ’koni bwaŋ ḵumma/ yi’de/ mo. E me’d bum mo tani uni c̱ikunu um mo. 3Aris to kun joc̱kin kun ’kon ki e mo tani uni mini ta tonṯe/ gom um mo, dhali me’d jin c̱ika/ um ton dhii/i’d mmosi mo tani aha/ mina c̱i um aris to ’baar mo. 4Hili um mini mii dhalku/ ki ’ka to ka basi e mo, haala bas a’di ta mondiki/em piti mo. 5Goma bas bum jin ’kona um ki e mo tani aha/ ka jiŋ gana/ aha/ mina ’theḵ gwo mo mmokara kar mo. ’Pena ris tombwaasho mo aha/ mina ’theḵ gwo mo dhali ’peni ’kwani mo. Dhali ’peni aris ’kwani kun ta ikam mo tani aha/ mina ’theḵ gwo gom mondiki/e gi wathi/ mo. 6A’diyin jin midi ’kosh wathi/ jwa mo mmogac̱a bas piti a’cesh mo tani abas piti gara/ mina ’kwani gac̱a ’cesh mo, haali/ Arumgimis ki uḵ wathi/ ki jamas pitiŋ gana/ mo. 7Dhali um mini dho’th maman dhali mar is mo, ki um mini ḵala dho’th ka enthus mo dhali mara mar is kagahara i mony’cesh nycine/ mo.

8Dhali yan’ko’d Arumgimis ki owa Nuuh dhali iya/ kun nyaḵ ’ko ki a’di gwo mo ki: 9Hili mo mo ma, aha/ ṯelkina gwom pem jin gamka/ me’d nyaḵki um mo dhali emen bum kun mini baṯẖ um ’ko’d mo 10dhali aris to/e kun ’kon ki e kun uḵu mo kun nyaḵ ’ko ki um mo, ’dii dhali toŋkal, dhali tombwaasho kun nyaḵ ’ko ki um e mony’cesh me’d jin tana uni aris ka ris mmo/iiyu/ ’peni bwam ma ḵur mo. 11Aha/ ṯelkina gwom pem jin gamka/ me’d nyaḵki um mo ki aris buŋgwar is gi ’kwani minu ’ce’d sho’k ka gannu/ yi’de/ doḵ/e yisa ki sule/ dhali mony’cesh yisa minu ’ce’d sho’k ka gannu/ yi’de/ doḵ/e yisa ki sule/ mo. 12Dhali Arumgimis ki o gwo mo ki: A’di ta jamas mii gi gwom pem jin gamka/ me’d a’dihe/ mo, a’di jin miga/ gam me’d nyaḵki um mo dhali aris to/e kun uḵu mo kun nyaḵ ’ko ki um mo gom yilaŋkamu/ ma nyaḵum yil buni ’baar mo. 13Aha/ karkina bwaam pem e bwam ma raḵ mo, dhali a’di midi ta jamas mii gi gwo jin gamka/ me’d ibwaman aha/ dhali mony’cesh mo. 14Ki aha/ mina dhala raḵ mmo’ka ap̱o/ mony’cesh mo dhali ’kwani ki p̱ara bwaa e e bwam ma raḵ mo tani 15aha/ mina ka gwom pem jin gamka/ me’d e mo jin karka/ ibwaman aha/ mo dhali um mo dhali aris to/e kun ’kon ki e mo kun ta shuman isi ’baar mo, dhali yi’de/ midi doḵ/e war ka gannu/ mmo’ce’da ris buŋgwar is sho’k mo yisa ki sule/. 16Ka bwaa midi di e bwaman ma raḵ mo tani aha/ mina hil ap̱o/ a’di mo dhali ka gwo jin gamu me’d e jin di’d ki sule/ sule/ mo e bwaman ma Arumgimis mo dhali aris to/e kun ’kon ki e mo dhali aris buŋgwar is kun ’kon ap̱o/ mony’cesh mo. 17Arumgimis ki owa Nuuh gwo mo ki: A’di ta jamas mii gi gwo jin gamka/ me’d mo, a’di jin miga/ ṯel sho’k ibwaman aha/ mo dhali aris buŋgwar is kun ’kon e mony’cesh mo.

18Iya/ ma Nuuh kun iikin ka pije/ ’peni bwaman ma ḵur mo tani jan ’de/ yuḵu gway ka Saam mo, dhali jaŋ kamu/ yuḵu gway ka Haam mo dhali jaŋ kamu/ yuḵu gway ka Yap̱aṯẖ mo. Haam a’di ta’da baba ma Kanaan mo. 19Uniŋ kwaraŋ gwansan mo tani ita iya/ ma Nuuh mo, dhali ’peni uni gwansan mo tani mony’cesh taki’d gi ’kwani mo.

20Nuuh a’di ta wathin ṯal ’de/ jin ṯwa/a/ jin ḵorki’da ’cesh mo. A’di siki’da mura’th mo. 21Dhali a’di ki p̱i yimana mura’th jin ḵa/u ki ŋah ŋah mo, dhali a’di ’koshkunu ki a’di me’da su mo, dhali a’di ishki e gu’b burrinyem piti ki dar gi toŋ kamu/ mmokum is mo. 22Dhala Haam jin ta’da ababa ma Kanaan mishki com mmodi is ’te/ mo dhali a’di ki ṯor ikam piti isu/ gwo mo uni kun ’kona pije/ mo. 23Dhali yan’ko’d Saam dhala Yap̱aṯẖ uni ki bu’th burrinye/ mo, uni ki hi’th a’di ’kup̱a bim buni mmonṯal ’de/ mo dhali ii ka c̱iŋ’ko’d mo dhali kumki ababam buni is piti jin dina a’di is ’te/ mo, dhali bwam/em buni ṯu’kkina uni mo dhali uni ’koki p̱ar com e mmodina a’di is ’te/ mo. 24Ka Nuuh merki e mo ’peni mom piti jin ’kosha yimana mura’th a’di mo dhali mish to jin miina a’di ya/ jin gwa’da’d a’di wakan mo tani 25a’di o gwo mo ki:

Monyjee midi di goma Kanaan mo.

C̱iŋkina/ jin tanu mmota c̱iŋkina/ mo tani a’di imidi wakan gom ikam piti mo.

26A’di si’da/ o gwo mo ki:

Mom’bor mii gi Tap̱a Arumgimis pem midi di goma Saam mo,

dhali dhalka Kanaan ta c̱iŋkinam piti mo.

27Arumgimis dwaḵa Yap̱aṯẖ mo ma

dhali dhalki a’di c̱a’ba’d e gu’b burrinye/ ma Saam mo,

dhali dhalka Kanaan ta c̱iŋkinam piti mo.

28Dhali ’ko’da gannu/ yi’de/ ’baarki’d mo tani Nuuh c̱a’bki’d ki e mo ki yili iss ’kwanimpa ḵarpa’c i’ce’dki iss ’kwanimpa su/ i’ce’dka ’kume’d ap̱o/ mo. 29Dhali arisa tee ma Nuuh kun c̱a’bkina a’di ki e mo tani uni ’koni iss ’kwanimpa i/iss su/ i’ce’dki iss ’kwanimpa ipesu/ i’ce’dka ’kume’d ap̱o/ mo, dhali a’di wuki’d mo.

Currently Selected:

ṮAKWIIN 9: Udk

Highlight

Copy