Hpeu‸maˍ ve li‸ 6

Yinˉ tcuhˉ taˍ ve teˇ hpaˍ

1Yawˬ ehˉ lehˬ, yinˉ tcuhˉ taˍ ve suhˍ maˬ awˬ hkʼaw lo teˇ maˬ hpaw ve hta‸ ngaˬ gʼa mawˬ ve yoˬ. A sha‸ te‸ chehˇ ve awˬ ceuˬ awˇ hkeh awˬ hkʼaw lo teˇ hkeh lehˬ, mvuhˇ tawˍ ve awˬ hkawˇ hkʼa shuˍ shuˍ, Laˬ-o‸ teh‸ kʼoˆ ve hta‸ ngaˬ gʼa kaˇ ve yoˬ. 2Oˇ htaˇ ngaˬ nyi leh, hpuˉ-ehˍ ve iˉ mvuhˇ teˇ hkeh hta‸ gʼa mawˬ ve yoˬ. Iˉ mvuhˇ ciˇ shehˍ hpaˇ lehˬ, hkaˆ teˇ maˬ shi taˍ leh, yawˇ shi uˉ tcuhˍ gʼa ve yoˬ. Yawˇ gʼaˇ shehˍ hpaˇ hpeh‸ leh, gʼaˇ tuˬ awˬ pon yawˇ tawˆ kʼai ve yoˬ.

3Yinˉ tcuhˉ taˍ ve nyiˇ maˬ teˇ maˬ hta‸ Yawˬ ehˉ hpaw ve teˇ yanˇ, a sha‸ te‸ chehˇ ve awˬ ceuˬ nyiˇ hkeh teˇ hkeh lehˬ, Laˬ-o‸ teh‸ kʼoˆ ve hta‸ ngaˬ gʼa kaˇ ve yoˬ. 4Oˇ htaˇ nyiˉ-ehˍ ve iˉ mvuhˇ teˇ hkeh tawˆ la ve yoˬ. Ciˇ shehˍ hpaˇ lehˬ, miˬguiˬ hkʼoˆ lo chaw yaˇ hui cawˇ da‸ hui da‸ ve teˇ ceuˬ hta‸ yuˬ tawˆ leh yawˇ hui teˇ gʼaˇ leh teˇ gʼaˇ tiˇ pehˍ da‸ piˇ lawˬ tuˬ a hkaw-anˬ gʼa ve yoˬ. Yawˇ hta‸ aˉ htaw lonˉ teˇ maˬ piˇ taˍ ve yoˬ.

5Yinˉ tcuhˉ taˍ ve sheh lehˇ teˇ maˬ hta‸ Yawˬ ehˉ hpaw ve teˇ yanˇ, a sha‸ te‸ chehˇ ve awˬ ceuˬ shehˆ hkeh teˇ hkeh lehˬ, Laˬ-o‸ teh‸ kʼoˆ ve hta‸ ngaˬ gʼa kaˇ ve yoˬ. Oˇ htaˇ ngaˬ nyi leh, naˆ tawˉ ve iˉ mvuhˇ teˇ hkeh hta‸ gʼa mawˬ ve yoˬ. Ciˇ shehˍ hpaˇ lehˬ, la‸ sheh awˬ hkʼaw lo yaˍ cuˍ teˇ maˬ hta‸ vawˆ taˍ ve yoˬ. 6A sha‸ te‸ chehˇ ve awˬ ceuˬ awˇ hkeh awˬ kʼaw ji lo tawˇ yaw ve hta‸ shuˍ ve awˬ hkawˇ hta‸ ngaˬ gʼa kaˇ ve yoˬ. Awˬ hkawˇ oˇ ve chi hkʼe kʼoˆ ve, Caˬ shiˍ teˇ panˇ ve teˇ hteh‸ leh, cho‸ shiˍ shehˆ panˇ ve teˇ hteh‸ yoˬ. Naˍ manˇ leh a pehˉ meuˇ gʼuiˬ hta‸ taˇ te luˬ piˇ teh‸ kʼoˆ ve yoˬ.

7Yinˉ tcuhˉ taˍ ve awˍ lehˇ teˇ maˬ hta‸ Yawˬ ehˉ hpaw ve teˇ yanˇ, a sha‸ te‸ chehˇ ve awˬ ceuˬ awˇ hkeh teˇ hkeh lehˬ, Laˬ-o‸ teh‸ kʼoˆ ve hta‸ ngaˬ gʼa kaˇ ve yoˬ. 8Oˇ htaˇ ngaˬ nyi leh, hpuiˇ tuˇ ve iˉ mvuhˇ teˇ hkeh hta‸ gʼa mawˬ ve yoˬ. Ciˇ shehˍ hpaˇ ve awˬ meh lehˬ, Suh jawˇmawˇ meh ve yoˬ. Suh mvuhˇmiˬ yawˇ awˬ hkʼaˇ suh kʼai chehˇ ve yoˬ. Yawˇ huiˉ maˬ lehˬ, miˬguiˬ awˇ pun teˇ pun hta‸ uˉ peunˍ tuˬ a hkaw-anˬ gʼa ve yoˬ. Aˉ htaw, meu‸ ve kaˆ ve, naˬ beuˬ naˬ ve leh, miˬguiˬ ve haiˬ ve to nuˇ to shaˆ teˇ hpaˍ, chi teˇ hpaˍ hta‸ yehˇ leh shu hta‸ tiˇ pehˍ tuˬ yawˇ huiˉ maˬ a hkaw-anˬ gʼa ve yoˬ.

9Yinˉ tcuhˉ taˍ ve ngaˇ maˬ teˇ maˬ hta‸ Yawˬ ehˉ hpaw ve teˇ yanˇ, co ha teˇ hpaˍ tanˇ kuiˬ awˬ hawˉ lo chehˇ taˍ ve hta‸ ngaˬ gʼa mawˬ ve yoˬ. Co ha oˇ ve teˇ hpaˍ lehˬ, Gʼuiˬsha ve tawˇ hkawˇ hta‸ pa taw leh yawˇ hui shaˉ hkiˆ hkanˍ ve hta‸ pa taw, tiˇ pehˍ ve hta‸ gʼa hkanˍ ve chaw hui ve co ha teˇ hpaˍ hpeh‸ ve yoˬ. 10Yawˇ hui awˬ hkawˇ bvuhˬ chaweh kuˬ leh kʼoˆ ve, Hkʼa peu-eˬ awˬ hkʼoˆ uiˍ ve Jawˇ mawˇ-oˬ, nawˬ lehˬ da‸ kehˬ ve leh hteˇ ve cawˇ ve yoˬ. Ngaˬ hui awˬ suhˍ gʼa sheˆ ve awˬ pon, miˬguiˬ hkʼoˆ chehˇ ve chaw hui hta‸ nawˬ suhˉ taˆ leh ciˍ yanˍ piˇ tuˬ, hkʼaˬ maw maw cawˬ tuˬ sheˍ le teh‸ kʼoˆ ve yoˬ. 11Oˇ htaˇ, yawˇ hui teˇ gʼaˇ le le hta‸ hpuˉ-ehˍ ve aˉ po‸ zuhˬ ma teˇ gʼaˇ teˇ hkʼoˆ piˇ ve yoˬ. Yawˇ hui hkʼa shuˍ shuˍ tiˇ pehˍ ve hta‸ gʼa hkanˍ tuˬ ve, yawˇ hui geh teˇ geh awˬ ceˬ te leh yawˇ hui ve awˬ viˉ awˬ nyi hpeh‸ ve chaw teˇ hpaˍ ve awˬ moˍ biˇ la htaˇ hkʼa gaˬ teˇ hkui jehˇ taˍ tuˬ yawˇ hui hta‸ kʼoˆ piˇ ve yoˬ.

12Yinˉ tcuhˉ taˍ ve hkaw‸ maˬ teˇ maˬ hta‸ Yawˬ ehˉ hpaw ve teˇ yanˇ, ngaˬ nyi leh, miˬ hiˆ jaˇ ve hta‸ gʼa mawˬ ve yoˬ. Mvuhˇ nyi lehˬ, meh htuˉ pui hpa naˆ tawˉ ve hkʼa shuˍ shuˍ hpeh‸ leh, ha pa tawˬ ve lehˬ, awˬ suhˍ hkʼe hpeh‸ la ve yoˬ. 13Maˉ nawˆ cehˬ hta‸ mvuhˇ haw lonˉ meuˆ leh maˇ meh sheˍ ve iˉ shiˍ teˇ hpaˍ ce ve hkʼe, mvuhˇ naw ma ve meu‸ keu shiˍ teˇ hpaˍ miˬguiˬ hkʼoˆ lo ce la ve yoˬ. 14Li‸ hta‸ lo‸ ve hkʼa shuˍ shuˍ, mvuhˇ naw ma mehˉ kʼai ve yoˬ. Hkʼaw pui hkʼa peu-eˬ leh conˇ hkʼa peu-eˬ jiˆ tawˆ-e ve yoˬ. 15Oˇ htaˇ, miˬguiˬ hkʼoˆ chehˇ ve hkunˉ hawˉ hkanˇ teˇ hpaˍ, jawˇmawˇ teˇ hpaˍ, ma‸ poˍ lonˉ teˇ hpaˍ, chaw paw chaw sha teˇ hpaˍ, kanˇ paˆ uiˍ ve chaw teˇ hpaˍ, awˬ ceˬ hpeh‸ ve chaw leh ponˬ ve chaw hkʼa peu-eˬ lehˬ, haˉ kʼoˍ teˇ hpaˍ awˬ hkʼaw lo leh, hkʼaw pui hkʼoˆ lo cawˬ ve haˉ pui teˇ hpaˍ awˬ kaˍ lo ca va‸ taˍ ve yoˬ. 16Yawˇ hui lehˬ, hkʼaw pui teˇ hpaˍ leh haˉ pui teˇ hpaˍ hta‸ kuˬ leh kʼoˆ ve, Ngaˬ hui awˬ hkʼoˆ ce teˍ laˇ-oˆ. Kʼaw jaw hkʼoˆ lo mui shehˍ hpaˇ ngaˬ hui hta‸ maˇ gʼa mawˬ tuˬ maˇ kʼoˆ, Yawˬ ehˉ ve nyi ma zuhˆ ve hta‸ ngaˬ hui gʼa ponˬ tuˬ maˇ kʼoˆ, ngaˬ hui hta‸ faˉ taˍ laˇ-oˆ. 17Awˬ lawn kʼo, yawˇ huiˉ maˬ nyi ma zuhˆ jaˇ ve awˬ nyi uiˍ ve teˇ nyi gaˬ la peuˬ. A shu teˇ gʼaˇ hkanˍ hpeh‸ tuˬ le teh‸ kʼoˆ ve yoˬ.

Currently Selected:

Hpeu‸maˍ ve li‸ 6: LHBE

Highlight

Copy