Hpeu‸maˍ ve li‸ 5

Lo‸ taˍ ve li‸ teˇ kʼoˆ leh Yawˬ ehˉ awˬ lawn

1Kʼaw jaw hkʼoˆ lo mui taˍ ve teˇ gʼaˇ ve la‸ sha paˉ ve la‸ sheh awˬ hkʼaw lo lo‸ taˍ ve li‸ teˇ kʼoˆ hta‸ ngaˬ gʼa mawˬ ve yoˬ. Li‸ oˇ ve teˇ kʼoˆ hta‸ awˬ hkʼaw hpawˇ maˇ kʼoˆ, awˬ hta‸ hpawˇ maˇ kʼoˆ li‸ bvuh‸ taˍ leh yinˉ suhˍ maˬ tcuhˉ taˍ ve yoˬ. 2Oˇ htaˇ, awˬ gʼaˇ uiˍ ve mvuhˇ naw ma tcuh yaˇ teˇ gʼaˇ kʼoˆ ve, Li‸ oˇ ve hta‸ hpeu‸ leh yinˉ tcuhˉ taˍ ve teˇ hpaˍ hta‸ hpaˆ baˬ tuˬ, a shu te keunˍ ve le teh‸, awˬ hkawˇ bvuhˬ chaweh kuˬ chehˇ ve hta‸ ngaˬ gʼa mawˬ ve yoˬ. 3Li‸ oˇ ve hta‸ hpeu‸ leh awˬ hkʼaw lo nyi tuˬ, mvuhˇ naw ma hkʼoˆ chehˇ ve maˇ kʼoˆ, miˬguiˬ hkʼoˆ chehˇ ve maˇ kʼoˆ, miˬguiˬ awˬ hawˉ lo chehˇ ve maˇ kʼoˆ, teˇ gʼaˇ ka‸ te maˇ gʼa. 4Li‸ oˇ ve hta‸ hpeu‸ keunˍ nyi keunˍ ve teˇ gʼaˇ hta‸ ka‸ ca maˇ mawˬ ve pa taw, ngaˬ gʼaˇ hte‸ hawˬ ve yoˬ. 5Oˇ htaˇ, chaw mawˇ chaw kehˉ teˇ gʼaˇ ngaˬ hta‸ kʼoˆ laˇ ve, Taˇ hawˬ. Yuˇda‸ ve awˬ ceuˬ awˬ hkʼaˇ awˬ hkʼaw lo tawˆ la ve, laˇ caˬ shiˉ teh‸ kʼoˆ ve Daˍviˆ ve awˬ geu hpeh‸ ve teˇ gʼaˇ lehˬ, gʼaˇ peuˬ. Hkʼe te leh, li‸ oˇ ve hta‸ ka‸, yinˉ tcuhˉ taˍ ve suhˍ maˬ hta‸ ka‸ yawˇ hpeu‸ hpeh‸ ve yoˬ teh‸ kʼoˆ ve yoˬ.

6Oˇ htaˇ, kʼaw jaw leh a sha‸ te‸ chehˇ ve awˬ ceuˬ awˇ hkeh awˬ kʼaw ji lo maˇ kʼoˆ, chaw mawˇ chaw kehˉ teˇ hpaˍ awˬ kʼaw ji lo maˇ kʼoˆ, huˉ chehˇ ve Yawˬ ehˉ hta‸ ngaˬ gʼa mawˬ ve yoˬ. Yawˬ ehˉ oˇ ve lehˬ, tiˇ pehˍ ve hta‸ hkanˍ jaw peuˬ ve hta‸ shuˍ ve yoˬ. Yawˇ lehˬ, awˬ hkaw suhˍ maˬ cawˬ leh, mehˆ shiˍ suhˍ shiˍ cawˬ ve yoˬ. Mehˆ shiˍ oˇ ve suhˍ shiˍ lehˬ, miˬguiˬ hkʼoˆ teˇ kaˬ le le lo kʼai tcuh taˍ ve, Gʼuiˬsha ve awˬ ha suhˍ maˬ hpeh‸ ve yoˬ. 7Oˇ htaˇ, Yawˬ ehˉ laˬ leh kʼaw jaw hkʼoˆ lo mui shehˍ hpaˇ ve la‸ sha paˉ la‸ sheh awˬ hkʼaw lo vawˆ taˍ ve li‸ hta‸ yawˇ yuˬ ve yoˬ. 8Li‸ oˇ ve hta‸ yawˇ yuˬ ve teˇ yanˇ, a sha‸ te‸ chehˇ ve awˬ ceuˬ awˇ hkeh leh, chaw mawˇ chaw kehˉ nyiˇ chi awˇ gʼaˇ lehˬ, Yawˬ ehˉ mehˆ gʼuˇ suhˍ boˆ taˍ ve yoˬ. Yawˇ hui teˇ gʼaˇ le le tinˍ cawˬ leh, sha hawnˉ ve hkʼa biˇ cawˬ ve shi mu‸ hkʼu vawˆ taˍ ve yoˬ. Sha hawnˉ ve oˇ ve lehˬ, Hkri‸ yaˇ hui bon lawˬ ve hkawˇ hpeh‸ ve yoˬ. 9Yawˇ hui kʼa muiˬ hkawˇ awˬ suhˉ hta‸ kʼa leh kʼoˆ ve,

Li‸ oˇ ve hta‸ yuˬ leh yinˉ tcuhˉ taˍ ve teˇ hpaˍ hta‸ hpeu‸ tuˬ,

nawˬ te keunˍ ve yoˬ.

Awˬ lawn kʼo, nawˬ suh ve hta‸ gʼa hkanˍ leh,

awˬ ceuˬ awˬ hkʼaˇ teˇ ceuˬ le le awˬ hkʼaw lo maˇ kʼoˆ, tawˇ hkawˇ teˇ ceuˬ le le awˬ hkʼaw lo maˇ kʼoˆ, chaw teˇ ceuˬ le le awˬ hkʼaw lo maˇ kʼoˆ, mvuhˇmiˬ teˇ peˆ le le awˬ hkʼaw lo maˇ kʼoˆ, nawˬ ve awˬ suhˍ hta‸ yehˇ leh, Gʼuiˬsha awˬ pon chaw yaˇ hui hta‸ nawˬ vuiˬ hkʼaw‸ peuˬ.

10Yawˇ hui lehˬ, ngaˬ hui ve Gʼuiˬsha awˬ pon mvuhˇmiˬ yaˇ leh paw hkuˇ teˇ hpaˍ hpeh‸ la tuˬ nawˬ te piˇ peuˬ leh,

yawˇ hui lehˬ miˬguiˬ hkʼoˆ lo gʼa uˉ peunˍ tuˬ yoˬ, teh‸ kʼa muiˬ ve yoˬ.

11Oˇ htaˇ ngaˬ nyi leh, kʼaw jaw hkʼa caw zuhˇ lo a sha‸ te‸ chehˇ ve awˬ ceuˬ awˇ hkeh, chaw mawˇ chaw kehˉ teˇ hpaˍ leh maˇ jaˇ ve mvuhˇ naw ma tcuh yaˇ teˇ hpaˍ ve awˬ hkawˇ hta‸ ngaˬ gʼa kaˇ ve yoˬ. Yawˇ hui lehˬ, awˬ meunˍ awˬ meunˍ pawˆ, awˬ hinˉ awˬ hinˉ pawˆ cawˬ ve yoˬ. 12Yawˇ hui awˬ hkawˇ bvuhˬ chaweh kuˬ leh kʼoˆ ve,

Tiˇ pehˍ ve hta‸ gʼa hkanˍ ve Yawˬ ehˉ lehˬ,

kanˇ paˆ teˇ ceuˬ, mawˇ jeˬ teˇ ceuˬ, cuˇ yiˍ maˍ yiˍ teˇ ceuˬ, awˬ gʼaˇ awˬ shaˉ teˇ ceuˬ,

yawˆ yan ve teˇ ceuˬ, awˬ me‸ awˬ hponˇ teˇ ceuˬ leh chiˇ mvuh ve teˇ ceuˬ hta‸ gʼa keunˍ ve yoˬ teh‸ kʼoˆ ve yoˬ.

13Mvuhˇ naw ma hkʼoˆ lo maˇ kʼoˆ, miˬguiˬ hkʼoˆ lo maˇ kʼoˆ, miˬguiˬ awˬ hawˉ lo maˇ kʼoˆ, laˇ tsuhˇ gʼuiˬ awˬ hkʼaw lo maˇ kʼoˆ, teˇ kaˬ le le lo cawˬ ve te‸ chehˇ ve awˬ ceuˬ hkʼa peu-eˬ chi hkʼe kʼoˆ chehˇ ve hta‸ ngaˬ gʼa kaˇ ve yoˬ.

Kʼaw jaw hkʼoˆ lo mui shehˍ hpaˇ leh Yawˬ ehˉ hta‸ co co taiˍ taiˍ chiˇ mvuh ve teˇ ceuˬ,

yawˆ yan ve teˇ ceuˬ, awˬ me‸ awˬ hponˇ teˇ ceuˬ leh uˉ peunˍ ve kanˇ paˆ teˇ ceuˬ

cawˬ piˇ-oˆ teh‸ yawˇ hui kʼoˆ chehˇ ve yoˬ.

14A sha‸ te‸ chehˇ ve awˬ ceuˬ awˇ hkeh lehˬ, A menˬ teh‸ kʼoˆ ve yoˬ. Chaw mawˇ chaw kehˉ teˇ hpaˍ lehˬ, boˆ taˍ leh oˉ kʼoˍ pui ve yoˬ.

Currently Selected:

Hpeu‸maˍ ve li‸ 5: LHBE

Highlight

Copy