Hpeu‸maˍ ve li‸ 3

1Saˍdiˆ venˇ awˬ hkʼaw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hkʼe bvuh‸ piˇ-oˆ.

Gʼuiˬsha ve awˬ ha suhˍ maˬ cawˬ leh meu‸ keu shiˍ suhˍ shiˍ cawˬ ve teˇ gʼaˇ chi hkʼe kʼoˆ ve yoˬ. Nawˬ te chehˇ ve kanˉ teˇ hpaˍ hta‸ ngaˬ shiˍ ve yoˬ. Nawˬ a sha‸ te‸ chehˇ ve yoˬ teh‸ shu kʼoˆ ve htawˇ, nawˬ suh taˍ peuˬ ve yoˬ. 2Shaw chehˇ-oˆ. Cawˬ taˍ sheˍ ve, suh paˇ neˇ ve awˬ ceuˬ teˇ hpaˍ hta‸ awˬ gʼaˇ hkʼa deh‸ piˇ-oˆ. Awˬ lawn kʼo, ngaˬ ve Gʼuiˬsha mehˆ gʼuˇ suhˍ nawˬ ve kanˉ biˇ la peuˬ ve hta‸ ngaˬ maˇ mawˬ. 3Hkʼe te leh, nawˬ hkʼaˬ hkʼe gʼa ha‸ yuˬ taˍ leh gʼa kaˇ taˍ ve teˇ hpaˍ hta‸ dawˇ nawˇ-oˆ. Oˇ ve hta‸ na yuˬ leh venˇbaˆ dawˇ hpfuhˆ-oˆ. Nawˬ maˇ shaw chehˇ taˍ ve kʼo, chaw hkʼawˇ hkʼa shuˍ shuˍ ngaˬ laˬ tuˬ yoˬ. Hkʼaˬ ve teˇ yanˇ ngaˬ nawˬ geh gaˬ la tuˬ ve hta‸ nawˬ maˇ shiˍ. 4Ya‸ hkʼaˇ, Saˍdiˆ venˇ awˬ hkaw lo a shu yawˇ ve veu‸ kʼaˇ hta‸ cha‸ chiˆ tuˬ maˇ te ve chaw teˇ hpaˍ hpaˍ cawˬ sheˍ ve yoˬ. Yawˇ hui keunˍ ve pa taw, hpu ve veu‸ kʼaˇ hta‸ gʼa veu‸ deh leh, ngaˬ geh gʼa te toˇ tuˬ yoˬ. 5Gʼaˇ ve chaw teˇ gʼaˇ lehˬ, chi hkʼe ve hpu ve veu‸ kʼaˇ hta‸ gʼa veu‸ deh tuˬ yoˬ. Co ti‸ ha ti‸ li‸ awˬ hkʼaw lo yawˇ ve awˬ meh hta‸ ngaˬ shiˆ baˬ tuˬ maˇ heˆ. Ngaˬ Awˬ pa mehˆ gʼuˇ suhˍ maˇ kʼoˆ, Awˬ pa ve mvuhˇ naw ma tcuh yaˇ teˇ hpaˍ mehˆ gʼuˇ suhˍ maˇ kʼoˆ, Yawˇ lehˬ ngaˬ ve chaw hpeh‸ ve yoˬ teh‸, ngaˬ shaˉ hkiˆ hkanˍ tuˬ yoˬ.

6Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ kʼoˆ piˇ ve tawˇ hkawˇ hta‸ hkʼa deh‸ na-o.

7Hpiˇlaˍdeˍhpiˆ venˇ awˬ hkʼaw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hkʼe bvuh‸ piˇ-oˆ.

Daˍviˆ ve shawˇ hta‸ vawˆ taˍ ve, da‸ ve kehˬ ve, hteˇ ve cawˇ ve teˇ gʼaˇ lehˬ, yawˇ hpaw taˍ kʼo, shu hoˆ maˇ gʼa, yawˇ hoˆ taˍ kʼo, shu hpaw maˇ gʼa ve yoˬ. 8Yawˇ kʼoˆ ve, Nawˬ te chehˇ ve kanˉ teˇ hpaˍ hta‸ ngaˬ shiˍ ve yoˬ. Nyi loˬ, chaw teˇ gʼaˇ ka‸ hoˆ maˇ gʼa ve yehˬ miˉ teˇ maˬ hta‸ nawˬ mehˆ gʼuˇ suhˍ lo ngaˬ hpaw taˍ peuˬ. Nawˬ awˬ gʼaˇ a ciˉ ceh tiˉ cawˬ ve ka‸, ngaˬ ve tawˇ hkawˇ hta‸ nawˬ na yuˬ peuˬ leh, ngaˬ ve awˬ meh hta‸ nawˬ maˇ baˬ taˉ. 9Saˍtanˍ ve awˬ moˍ awˬ hkʼaw lo chehˇ ve chaw teˇ hpaˍ hta‸ nawˬ ve la‸ hkʼaw lo ngaˬ chiˇ a‸ laˇ tuˬ yoˬ. Yawˇ hui lehˬ, Yuˇda‸ chaw hpeh‸ ve yoˬ teh‸ kʼoˆ ve htawˇ, Yuˇda‸ chaw hpeh‸ ve maˇ heˆ, yawˇ hui heˍ ve yoˬ. Ngaˬ yawˇ hui hta‸ nawˬ ve hkui sheh awˬ paˇ lo oˉ kʼoˍ pui tcuh leh, ngaˬ nawˬ hta‸ ha‸ ve yoˬ teh‸ yawˇ hui gʼa shiˍ tuˬ yoˬ. 10Yeunˇ hkanˍ-o‸ teh‸, ngaˬ nawˬ hta‸ kʼoˆ laˇ ve tawˇ hkawˇ hta‸ nawˬ na yuˬ leh te ve pa taw, miˬguiˬ yaˇ teˇ hpaˍ hta‸ lawˇ nyi tuˬ miˬguiˬ hkʼoˆ teˇ kaˬ le le lo lawˇ nyi ve awˬ yanˇ gaˬ la htaˇ, ngaˬ nawˬ hta‸ ponˬ laˇ tuˬ yoˬ. 11Ngaˬ haˆ haˆ laˬ tuˬ yoˬ. Nawˬ ve shi uˉ tcuhˍ hta‸ chaw teˇ gʼaˇ ka‸ maˇ gʼa lu yuˬ tuˬ, nawˬ geh hkʼa cawˬ taˍ ve teˇ hpaˍ hta‸ hkʼa deh‸ vawˆ taˍ-o‸. 12Gʼaˇ ve chaw teˇ gʼaˇ lehˬ, ngaˬ ve Gʼuiˬsha ve bon yehˬ lonˉ awˬ hkʼaw lo awˬ hkuiˉ daw hpeh‸ la tuˬ ngaˬ te tuˬ yoˬ. Yawˇ lehˬ, hkʼaˬ htaˆ ka‸ oˇ kaˬ lo maˇ tawˆ kʼai. Yawˇ awˬ hkʼoˆ hta‸ ngaˬ ve Gʼuiˬsha ve awˬ meh, ngaˬ ve Gʼuiˬsha ve venˇ awˬ meh leh, ngaˬ ve awˬ meh awˬ suhˉ ngaˬ bvuh‸ taˍ tuˬ yoˬ. Gʼuiˬsha ve venˇ oˇ ve lehˬ, ngaˬ ve Gʼuiˬsha geh mvuhˇ naw ma lo ya‸ la ve, Yeˍruˆsaˍlehnˍ venˇ awˬ suhˉ hpeh‸ ve yoˬ.

13Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ kʼoˆ piˇ ve tawˇ hkawˇ hta‸ hkʼa deh‸ na-o.

14Lawˍdiˍkiˆ venˇ awˬ hkʼaw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hkʼe bvuh‸ piˇ-oˆ.

Ka ti‸ yeˬ leh hteˇ lehˍ cawˇ lehˍ shaˉ hkiˆ hkanˍ shehˍ hpaˇ, Gʼuiˬsha hpanˍ taˍ ve awˬ hkuiˉ puiˍ hpeh‸ ve, A menˬ teh‸ kʼoˆ ve teˇ gʼaˇ chi hkʼe kʼoˆ ve yoˬ. 15Nawˬ te chehˇ ve kanˉ teˇ hpaˍ hta‸ ngaˬ shiˍ ve yoˬ. Nawˬ lehˬ, gawˬ ve ka‸ maˇ heˆ, chiˆ ve ka‸ maˇ heˆ. Nawˬ lehˬ, gawˬ ve teˇ ceuˬ, maˇ heˆ kʼo chiˆ ve teˇ ceuˬ hpeh‸ tuˬ ve hta‸ ngaˬ heuˆ gaˇ ve yoˬ. 16Ya‸ hkʼaˇ, nawˬ lehˬ chiˆ ve ka‸ maˇ heˆ, gawˬ ve ka‸ maˇ heˆ, lehˬ ve tiˉ hpeh‸ chehˇ ve pa taw, ngaˬ ve maw‸ kʼaw awˬ hkʼaw lo ngaˬ nawˬ hta‸ hpe‸ baˬ tuˬ yoˬ. 17Awˬ lawn kʼo, nawˬ kʼoˆ ve, Ngaˬ lehˬ paw sha ve yoˬ. Mawˇ jeˬ maˇ maˇ shaw hpoˆ taˍ peuˬ. Ngaˬ te‸ chiˉ ka‸ maˇ loˍ teh‸ nawˬ kʼoˆ ve htawˇ, nawˬ lehˬ hkʼaˬ ma hpeh‸ bawˬ tuˬ cawˬ ve, hkʼaˬ ma ha kʼaˉ tuˬ cawˬ ve leh, hkʼaˬ ma haˍ gʼawˇ chehˇ ve hta‸ nawˬ maˇ shiˍ, Nawˬ mehˆ cuˉ leh awˬ kʼu nyi hpeh‸ chehˇ ve hta‸ ka‸ nawˬ maˇ shiˍ law leˇ. 18Hkʼe te leh, ngaˬ nawˬ hta‸ awˬ hkʼaˇ chi hkʼe maˍ laˇ ve yoˬ. Nawˬ paw sha la tuˬ, aˬ miˍ awˬ hkʼaw lo lawˍ taˍ ve shi hta‸ maˇ kʼoˆ, nawˬ awˬ kʼu nyi hpeh‸ ve hta‸ shu maˇ gʼa mawˬ leh nawˬ maˇ gʼa ya‸ taw tuˬ, hpu ve veu‸ kʼaˇ hta‸ maˇ kʼoˆ, nawˬ mehˆ mawˬ la tuˬ, mehˆ shiˍ hkʼaw keu tuˬ ve naˆ tsuhˇ hta‸ maˇ kʼoˆ, ngaˬ geh laˬ vuiˬ la-o. 19Ngaˬ ha‸ ve chaw teˇ hpaˍ hta‸ ngaˬ deˇ maˍ piˇ leh, hkʼa deh‸ maˍ piˇ ve yoˬ. Hkʼe te leh, hkʼa deh‸ kʼaw‸ nawˇ la leh venˇbaˆ hta‸ dawˇ hpfuhˆ-oˆ. 20Nyi loˬ, ngaˬ yehˬ miˉ paˇ lo huˉ leh htawˆ chehˇ ve yoˬ. Ngaˬ ve tawˇ hkawˇ hta‸ kaˇ leh yehˬ miˉ hpaw laˇ ve chaw hkʼaˬ ve teˇ gʼaˇ maˇ kʼoˆ, ngaˬ yawˇ geh lo lo‸-e leh, yawˇ geh caˇ tuˬ yoˬ. Yawˇ htawˇ ngaˬ geh caˇ tuˬ yoˬ. 21Ngaˬ lehˬ, gʼaˇ shehˍ hpaˇ hpeh‸ leh, ngaˬ Awˬ pa ve kʼaw jaw hkʼoˆ lo ngaˬ Awˬ pa geh mui taˍ ve hkʼe, gʼaˇ ve chaw teˇ gʼaˇ hta‸ ngaˬ ve kʼaw jaw hkʼoˆ lo ngaˬ geh mui tuˬ ngaˬ a hkaw-anˬ piˇ tuˬ yoˬ.

22Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ kʼoˆ piˇ ve tawˇ hkawˇ hta‸ hkʼa deh‸ na-o teh‸ kʼoˆ ve yoˬ.

Currently Selected:

Hpeu‸maˍ ve li‸ 3: LHBE

Highlight

Copy