Maˍkuˆ li‸ 5

Neˇ geh ve Gaˍdaˍraˆ chaw hta‸ gu na-e piˇ ve

1Hkʼe te leh, gʼuiˬ po coˇ paˉ, Gaˍdaˍ raˆ mvuhˇmiˬ lo yawˇ hui gaˬ ve yoˬ. 2Yeˍsuˆ haw lo‸ kʼoˍ awˬ hkʼaw lo tawˆ la htaˇ, neˇ cha‸ chiˆ geh ve chaw teˇ gʼaˇ lehˬ, teˇ cawˬ haˉ chaw tuˍ hpfuh lo tawˆ la leh yawˇ hta‸ ca ha‸ la ve yoˬ. 3Chaw oˇ ve lehˬ, chaw tuˍ hpfuh teˇ hpaˍ cawˬ kuiˬ lo tiˉ chehˇ taˍ ve yoˬ. Chaw teˇ gʼaˇ ka‸ yawˇ hta‸ hpeh tiˍ taˍ maˇ gʼa. Sho caˆ yuˬ leh hpeh tiˍ taˍ ve ka‸ maˇ gʼa. 4Awˬ lawn kʼo, laiˉ pawˆ shu yawˇ hta‸ sho kawˬ sho caˆ yuˬ hpeh tiˍ taˍ htawˇ, yawˇ sho caˆ hta‸ gʼawˬ cheˆ leh, sho kawˬ hta‸ awˉ hteh ve yoˬ. Chaw teˇ gʼaˇ ka‸ yawˇ hta‸ meuˇ la tuˬ te maˇ gʼa. 5Tuˍ hpfuh teˇ hpaˍ lo maˇ kʼoˆ, hkʼaw pui hkʼoˆ lo maˇ kʼoˆ, mvuhˇ law‸ kʼaw mvuhˇ hpeu‸ hkʼaˬ htaˆ ka‸ yawˇ kuˬ chehˇ ve yoˬ. Yawˇ awˬ to hta‸ ka‸, haˉ pui shiˍ yuˬ leh gui htu-iˍ chehˇ ve yoˬ.

6Yeˍsuˆ vuiˇ kuiˬ lo laˬ chehˇ ve hta‸ chaw oˇ ve gʼa mawˬ htaˇ, yawˇ geh gʼuiˇ laˬ leh yawˇ hta‸ oˉ kʼoˍ pui ve yoˬ. 7Yawˇ awˬ hkawˇ bvuhˬ chaweh kuˬ leh kʼoˆ ve, Mvuh jaˇ ve Gʼuiˬsha ve Yaˇ hpu Yeˍsuˆ-oˬ, nawˬ ngaˬ hta‸ hkʼaˬ hkʼe caˉ da‸ le. Nawˬ ngaˬ hta‸ maˇ gʼa fawˉ mehˍ tuˬ, Gʼuiˬsha mehˆ gʼuˇ suhˍ ngaˬ nawˬ hta‸ lawˬ hkawˉ ve yoˬ teh‸ kʼoˆ piˇ ve yoˬ. 8Awˬ lawn kʼo, Neˇ cha‸ chiˆ-oˬ, yawˇ awˬ hkʼaw lo tawˆ kʼai-o teh‸, Yeˍsuˆ yawˇ hta‸ kʼoˆ piˇ ve hta‸ pa taw yoˬ.

9Nawˬ aˬ hto‸ ma meh le teh‸, Yeˍsuˆ yawˇ hta‸ na nyi htaˇ, Ngaˬ hui maˇ jaˇ ve pa taw, ngaˬ ve awˬ meh lehˬ Leˍjonˍ yoˬ teh‸, yawˇ Yeˍsuˆ hta‸ kʼaw‸ kʼoˆ piˇ ve yoˬ. 10Mvuhˇmiˬ oˇ ve awˬ hkʼaw lo yawˇ hui hta‸ maˇ gʼa gʼa‸ tawˆ tuˬ, yawˇ Yeˍsuˆ hta‸ gʼaˇ hte‸ lawˬ hkawˉ ve yoˬ.

11Hkʼaw oˇ ve awˬ ba‸ le lo, va‸ moˍ lonˉ kʼaˆ caˇ chehˇ ve yoˬ. 12Hkʼe te leh, neˇ teˇ hpaˍ yawˇ hta‸ lawˬ hkawˉ ve, Va‸ oˇ ve teˇ hpaˍ awˬ hkʼaw lo ngaˬ hui gʼa lo‸-e tuˬ, ngaˬ hui hta‸ kʼai tcuh laˇ-oˆ teh‸ kʼoˆ piˇ ve yoˬ. 13Oˇ htaˇ, Yeˍsuˆ yawˇ hui hta‸ kʼai tcuh ve yoˬ. Neˇ cha‸ chiˆ teˇ hpaˍ tawˆ kʼai leh va‸ oˇ ve teˇ hpaˍ awˬ hkʼaw lo lo‸-e ve yoˬ. Va‸ awˬ moˍ lonˉ lehˬ, miˬ haˍ kuiˬ lo gʼaˇ hte‸ gʼuiˇ ya‸-e leh, gʼuiˬ po hkʼaw lo lo‸-e leh kʼa suh peuˬ sheˬ ve yoˬ. Va‸ oˇ ve teˇ hpaˍ, aˬ laˬ hkʼe nyiˇ hinˉ hkeh cawˬ ve yoˬ.

14Va‸ hawˉ paˍ teˇ hpaˍ gʼuiˇ kʼo‸-e leh, awˬ lawn oˇ ve hta‸ venˇ hkʼaˆ teˇ hpaˍ awˬ hkʼaw lo ca hto piˇ ve yoˬ. Hkʼe te leh, hkʼaˬ hkʼe hpeh‸ la ve awˬ lawn hta‸ gʼa shiˍ tuˬ, chaw teˇ hpaˍ ca nyi la ve yoˬ. 15Yawˇ hui Yeˍsuˆ geh gaˬ la htaˇ, neˇ cha‸ chiˆ Leˍjonˍ geh ve chaw teˇ gʼaˇ veu‸ kʼaˇ veu‸ deh leh mui chehˇ ve hta‸ yawˇ hui gʼa mawˬ ve yoˬ. Yawˇ ve nyi ma awˉ lawˉ htaˇ hkʼa shuˍ shuˍ kʼaw‸ da‸ la ve hta‸ htawˇ yawˇ hui gʼa mawˬ leh kawˆ jaˇ ve yoˬ. 16Gʼa mawˬ taˍ ve chaw teˇ hpaˍ lehˬ, neˇ geh ve chaw awˬ lawn leh va‸ teˇ hpaˍ hkʼaˬ hkʼe hpeh‸ la ve awˬ lawn, ca nyi la ve chaw hui hta‸ kʼaoˍ maˍ piˇ ve yoˬ.

17Hkʼe te leh, yawˇ hui ve mvuhˇmiˬ teˇ tawn awˬ hkʼaw lo tawˆ kʼai tuˬ, yawˇ hui Yeˍsuˆ hta‸ lawˬ hkawˉ ve yoˬ.

18Yeˍsuˆ haw lo‸ kʼoˍ awˬ hkʼaw lo lo‸-e ve teˇ yanˇ, neˇ cha‸ chiˆ geh jaw ve chaw chi teˇ gʼaˇ lehˬ, yawˇ geh chehˇ tuˬ lawˬ hkawˉ ve yoˬ.

19Yeˍsuˆ yawˇ hta‸ maˇ chehˇ tcuh. Ya‸ hkʼaˇ yawˇ hta‸ kʼoˆ piˇ ve, Nawˬ aˉ hkʼaw kʼo‸-e leh, Jawˇmawˇ Gʼui sha nawˬ hta‸ hkʼaˬ ma ga laˇ leh ha kʼaˉ laˇ ve awˬ lawn, nawˬ ve awˬ ceuˬ awˬ hkʼaˇ teˇ hpaˍ hta‸ ca kʼaoˍ maˍ piˇ-oˆ teh‸ kʼoˆ piˇ ve yoˬ.

20Hkʼe te leh yawˇ tawˆ kʼai leh, Yeˍsuˆ yawˇ hta‸ hkʼaˬ ma ga laˇ peuˬ ve awˬ lawn, Deˍkaˍpawˇliˆ mvuhˇmiˬ awˬ hkʼaw lo yawˇ gʼaˇ hte‸ ca kʼaoˍ maˍ piˇ ve pa taw, chaw hkʼa peu-eˬ anˇ jaˇ ve yoˬ.

Yaˍiˉruˆ ve yaˇ miˇ leh, Yeˍsuˆ ve aˉ po‸ hta‸ htawˇ ve yaˇ miˇ

21Yeˍsuˆ haw lo‸ kʼoˍ ciˇ leh gʼuiˬ po coˇ paˉ lo kʼaw‸ hkanˍ kʼai ve yoˬ. Yawˇ gʼuiˬ po paˇ chehˇ taˍ htaˇ, chaw awˬ moˍ lonˉ yawˇ geh hpawnˬ la ve yoˬ. 22Oˇ htaˇ, Yaˍiˉruˆ meh ve bon yehˬ awˬ hoˉ te ve teˇ gʼaˇ laˬ leh Yeˍsuˆ hta‸ mawˬ htaˇ, yawˇ ve hkui paˇ lo boˆ sheˬ ve yoˬ. 23Yawˇ Yeˍsuˆ hta‸ kʼoˆ piˇ ve, Ngaˬ ve yaˇ miˇ ehˉ suh la paˇ neˇ ve yoˬ. Yawˇ na-e la leh a sha‸ gʼa te‸ tuˬ, nawˬ laˬ leh yawˇ awˬ hkʼoˆ hta‸ la‸ sheh a ciˉ ca taˍ piˇ la-o teh‸, gʼaˇ hte‸ lawˬ hkawˉ ve yoˬ.

24Hkʼe te leh, yawˇ Yaˍiˉruˆ geh kʼai ve yoˬ. Chaw awˬ moˍ lonˉ yawˇ hkʼaˇ suh kʼai leh, yawˇ hta‸ buiˆ heuˆ ca‸ heuˆ chehˇ ve yoˬ.

25Teˇ chi nyiˇ hkʼaw‸ hkʼa gaˬ awˬ suhˍ ya‸ la chehˇ ve yaˇ miˇ teˇ gʼaˇ cawˬ ve yoˬ. 26Naˆ tsuhˇ shehˍ hpaˇ laiˉ gʼaˇ ve la‸ sheh awˬ hkʼaw lo yawˇ laiˉ ceuˬ gʼa hkanˍ jaˇ peuˬ. Yawˇ hkʼa cawˬ ve hkʼa peu-eˬ hta‸ yehˇ peuˬ htawˇ, yawˇ a ciˉ ka‸ maˇ na-e la ve awˬ hkʼoˆ, a naˍ oˇ ve shaˬ te shaˬ kʼaw‸ jaˇ la ve yoˬ. 27Yawˇ Yeˍsuˆ awˬ lawn gʼa kaˇ jaw ve yoˬ. Hkʼe te leh, chaw awˬ moˍ lonˉ awˬ hkʼaw lo yawˇ Yeˍsuˆ awˬ hkʼaw‸ nawˉ hpawˇ lo laˬ leh, yawˇ ve veu‸ kʼaˇ hta‸ ca htawˇ ve yoˬ. 28Awˬ lawn kʼo, Yawˇ ve veu‸ kʼaˇ hta‸ ceh ngaˬ gʼa htawˇ ve kʼo, ngaˬ na-e la tuˬ yoˬ teh‸ yawˇ kʼoˆ ve yoˬ.

29Oˇ htaˇ, yawˇ awˬ suhˍ ya‸ la ve teˇ cawˬ haˉ cheh sheˬ leh, yawˇ na-e la peuˬ ve hta‸ yawˇ awˬ to shiˍ ve yoˬ. 30Yeˍsuˆ yawˇ ve awˬ to awˬ hkʼaw lo kanˇ paˆ tawˆ kʼai ve hta‸ teˇ cawˬ haˉ gʼa shiˍ ve pa taw, chaw awˬ moˍ lonˉ hta‸ yawˇ hpfuhˆ nyi leh, Ngaˬ ve veu‸ kʼaˇ hta‸ a shu htawˇ ve le teh‸ na nyi ve yoˬ.

31Yawˇ ve awˬ la‸ gʼawˇ teˇ hpaˍ lehˬ, Chaw awˬ moˍ lonˉ nawˬ hta‸ buiˆ heuˆ ca‸ heuˆ chehˇ ve hta‸ nawˬ mawˬ chehˇ ve ka‸, Ngaˬ hta‸ a shu htawˇ ve le teh‸ na nyi ve laˇ teh‸, Yeˍsuˆ hta‸ kʼaw‸ kʼoˆ piˇ ve yoˬ.

32Yawˇ hta‸ htawˇ laˇ ve chaw hta‸ gʼa mawˬ tuˬ Yeˍsuˆ hkʼa caw zuhˇ nyi chehˇ ve yoˬ. 33Yaˇ miˇ oˇ ve lehˬ, yawˇ awˬ hkʼaw lo hkʼaˬ hkʼe hpeh‸ la ve awˬ lawn hta‸ shiˍ ve pa taw, yawˇ kawˆ cheˇ chehˇ ve yoˬ. Yawˇ Yeˍsuˆ geh laˬ leh yawˇ mehˆ gʼuˇ suhˍ boˆ sheˬ leh, awˬ lawn hkʼa peu-eˬ yawˇ hta‸ hteˇ lehˍ hto piˇ ve yoˬ. 34Yeˍsuˆ yawˇ hta‸ kʼoˆ piˇ ve, Yaˇ miˇ-oˬ, nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ. Dawˇ sha ve awˬ hkʼaw lo kʼo‸-e loˬ. Nawˬ hta‸ chehˇ sha la piˇ peuˬ teh‸ kʼoˆ piˇ ve yoˬ.

35Yawˇ oˇ hkʼe kʼoˆ chehˇ htaˇ, bon yehˬ awˬ hoˉ teˇ gʼaˇ ve yehˬ lo laˬ ve chaw teˇ hpaˍ kʼoˆ ve, Nawˬ ve yaˇ miˇ suh peuˬ. Aˬ hto‸ ma te Saˍ la‸ hta‸ kʼaw‸ sho‸ sha‸ piˇ ve le.

36Tawˇ hkawˇ oˇ ve hta‸ Yeˍsuˆ maˇ na leh, bon yehˬ awˬ hoˉ teˇ gʼaˇ hta‸, Taˇ dawˇ haˍ. Yonˍ ve tiˇ te-o teh‸ kʼoˆ piˇ ve yoˬ. 37Peˍtruˆ, Yaˍkoˆ leh Yaˍkoˆ ve awˬ nyi paˍ Yoˇhanˬ, yawˇ hui shehˆ gʼaˇ maˇ heˆ kʼo, awˬ kaˍ awˬ nu chaw teˇ gʼaˇ hta‸ ka‸ yawˇ awˬ hkʼaˇ suh maˇ laˬ tcuh. 38Yawˇ bon yehˬ awˬ hoˉ teˇ gʼaˇ ve yehˬ lo gaˬ la htaˇ, shu duiˆ-ehˍ shaˇ-ehˍ te leh, gʼaˇ hte‸ hawˬ leh paˆ hawˬ chehˇ ve hta‸ yawˇ gʼa mawˬ ve yoˬ. 39Yeˍsuˆ aˉ hkʼaw lo‸-e leh, Nawˬ hui aˬ hto‸ ma te duiˆ-ehˍ shaˇ-ehˍ te leh hawˬ chehˇ ve le. Yaˇ ehˉ chi suh ve maˇ heˆ. Yawˇ zuh‸ muiˉ kʼa chehˇ ve yoˬ teh‸ yawˇ hui hta‸ kʼoˆ piˇ ve yoˬ.

40Oˇ htaˇ, yawˇ hui Yeˍsuˆ hta‸ hpawnˬ gʼuiˬ ve yoˬ. Yeˍsuˆ yawˇ hui hkʼa peu-eˬ hta‸ gʼa‸ tawˆ sheˬ leh, yaˇ ehˉ ve awˬ pa awˬ e leh yawˇ geh laˬ ve chaw teˇ hpaˍ hta‸ shiˍ veu leh, yaˇ ehˉ teh taˍ kuiˬ lo lo‸-e ve yoˬ. 41Oˇ htaˇ, Yeˍsuˆ yaˇ miˇ ehˉ ve la‸ sheh hta‸ vawˆ leh kʼoˆ ve, Taˍliˇtaˍkuˇmiˆ. Tawˇ oˇ ve tcuhˉ kui lehˬ, Yaˇ miˇ-oˬ, ngaˬ nawˬ hta‸ kʼoˆ laˇ ve, tu la-o teh‸ kʼoˆ ve yoˬ.

42Oˇ htaˇ, yaˇ miˇ ehˉ oˇ ve teˇ cawˬ haˉ tu la leh, ya‸ kʼaw toˇ kʼai ve yoˬ. Awˬ lawn kʼo, yawˇ a sha‸ teˇ chi nyiˇ hkʼaw‸ gaˬ peuˬ. Chaw oˇ ve teˇ hpaˍ dawˇ maˇ tawˆ leh anˇ jaˇ ve yoˬ. 43Awˬ lawn oˇ ve hta‸ shu teˇ gʼaˇ ka‸ maˇ gʼa shiˍ tuˬ, Yeˍsuˆ yawˇ hui hta‸ gʼaˇ hte‸ tawˇ piˇ peuˬ leh, Yaˇ miˇ ehˉ hta‸ caˇ tuˬ caˍ piˇ-oˆ teh‸, yawˇ hui hta‸ kʼoˆ piˇ ve yoˬ.

Currently Selected:

Maˍkuˆ li‸ 5: LHBE

Highlight

Copy