Suhˉ jehˬ ve li‸ 13

Saˍsonˍ paw la ve

1Iˉsaˍreˍlaˆ chaw hui Gʼuiˬsha hta‸ teˇ pawˆ kʼaw‸ te ya‸ leh, Gʼuiˬsha lehˬ yawˇ hui hta‸ Hpiˇliˇtiˆ chaw hui ve awˬ ceˬ 40 hkʼaw‸ te tcuh ve yoˬ.

2Oˇ htaˇ Danˍ awˬ ceuˬ awˬ hkʼaˇ Maˍnawˍ teh‸ kʼoˆ ve chaw teˇ gʼaˇ lehˬ, Zawˇraˍ venˇ hkʼaw chehˇ taˍ ve yoˬ. Yawˇ ve awˬ miˇ ma lehˬ chaw meh ma hpeh‸ ve yoˬ. 3Teˇ nyi htaˇ Gʼuiˬsha ve mvuhˇ naw ma tcuh yaˇ teˇ gʼaˇ yawˇ geh laˬ leh kʼoˆ ve, Nawˬ lehˬ chaw meh ma hpeh‸ ve yoˬ. Ya‸ hkʼaˇ, maˇ maw maw nawˬ yaˇ hu la leh yaˇ paˍ teˇ gʼaˇ paw la tuˬ yoˬ. 4Chi hta‸ pa taw shaˍ ti‸ taˍ-o‸. A pehˉ meuˇ gʼuiˬ leh tzuhˬ taˇ dawˬ. Cha‸ chiˆ ve caˇ tuˬ teˇ hpaˍ hta‸ ka‸ taˇ caˇ. 5Yaˇ paˍ oˇ ve paw la ve kʼo, yawˇ ve uˉ hkeh mvuh hta‸ nawˬ teˇ pawˆ ka‸ maˇ gʼa nuˆ baˬ piˇ. Awˬ lawn kʼo, yawˇ paw la ve teˇ nyi hta‸ te leh, Gʼuiˬsha hta‸ chiˇ a‸ piˇ taˍ ve Naˍzaˍriˆ chaw teˇ gʼaˇ hpeh‸ tuˬ yoˬ. Yawˇ lehˬ, Iˉsaˍreˍlaˆ chaw hui hta‸ Hpiˇliˇtiˆ chaw hui ve la‸ sheh hkʼaw lo htaiˍ hkʼaw‸ piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

6Oˇ htaˇ yaˇ miˇ oˇ ve yawˇ ve awˬ hpawˇ geh kʼai leh kʼoˆ ve, Gʼuiˬsha ve chaw teˇ gʼaˇ ngaˬ geh laˬ ve yoˬ. Yawˇ lehˬ, kawˆ law‸ law‸ ve Gʼuiˬsha ve mvuhˇ naw tcuh yaˇ hpeh‸ ve yoˬ. Yawˇ hkʼaˬ lo laˬ ve hta‸ ngaˬ maˇ na nyi. Yawˇ ve awˬ meh ka‸ ngaˬ hta‸ maˇ hto laˇ. 7Ya‸ hkʼaˇ, ngaˬ yaˇ hu la leh yaˇ paˍ teˇ gʼaˇ paw la tuˬ yoˬ, teh‸ ngaˬ hta‸ kʼoˆ laˇ ve yoˬ. Peuˬ leh a pehˉ meuˇ gʼuiˬ leh tzuhˬ taˇ dawˬ. Cha‸ chiˆ ve caˇ tuˬ hta‸ ka‸ taˇ caˇ. Awˬ lawn kʼo, yaˇ paˍ oˇ ve lehˬ yawˇ a sha‸ te‸ chehˇ ve teˇ co-e, Gʼuiˬsha hta‸ chiˇ a‸ taˍ ve Naˍzaˍriˆ chaw hpeh‸ tuˬ yoˬ, teh‸ ngaˬ hta‸ kʼoˆ laˇ ve yoˬ, teh‸ yawˇ ve awˬ hpawˇ hta‸ kʼoˆ piˇ ve yoˬ.

8Oˇ htaˇ, Maˍnawˍ Gʼuiˬsha geh bon lawˬ leh kʼoˆ ve, Gʼuiˬsha-oˬ, nawˬ peu laˇ jaw ve mvuhˇ naw tcuh yaˇ oˇ ve ngaˬ hui geh teˇ pawˆ kʼaw‸ peu laˇ leh, yaˇ paˍ oˇ ve paw la ve teˇ yanˇ, ngaˬ hui yawˇ hta‸ hkʼaˬ hkʼe gʼa te piˇ cawˇ ve awˬ lawn a ciˉ kʼaw‸ kʼoˆ maˍ laˇ tcuh sheˍ, teh‸ Gʼuiˬsha hta‸ kʼoˆ piˇ ve yoˬ.

9Gʼuiˬsha lehˬ Maˍnawˍ kʼoˆ ve hkʼe te leh, yawˇ ve mvuhˇ naw tcuh yaˇ hta‸ yaˇ miˇ oˇ ve geh teˇ pawˆ kʼaw‸ kʼai tcuh ve yoˬ. Yaˇ miˇ oˇ ve lehˬ, ti mi hkʼaw mui chehˇ taˍ ve yoˬ. Yawˇ ve awˬ hpawˇ Maˍnawˍ lehˬ, yawˇ geh maˇ chehˇ taˍ. 10Hkʼe te leh yawˇ ve awˬ hpawˇ geh gʼuiˇ kʼai leh kʼoˆ ve, Nyi loˬ. Aˉ nyi htaˇ ngaˬ geh laˬ jaw ve chaw oˇ ve ngaˬ geh kʼaw‸ gaˬ la peuˬ, teh‸ yawˇ hta‸ kʼoˆ piˇ ve yoˬ.

11Maˍnawˍ tu leh yawˇ miˇ ma hkʼaˇ suh gʼa‸ kʼai ve yoˬ. Yawˇ chaw oˇ ve geh kʼai leh, Aˉ nyi htaˇ ngaˬ miˇ ma hta‸ tawˇ ca yaw piˇ la ve nawˬ yoˬ laˇ, teh‸ yawˇ hta‸ na nyi ve yoˬ.

Chaw oˇ ve lehˬ, Ngaˬ yoˬ, teh‸ kʼaw‸ yaw hkʼaw‸ piˇ ve yoˬ.

12Oˇ htaˇ Maˍnawˍ kʼoˆ ve, Nawˬ kʼoˆ ve hkʼe awˬ tehˬ awˬ na hpeh‸ la ve kʼo, yaˇ paˍ oˇ ve hkʼaˬ hkʼe hpeh‸ la tuˬ le. Yawˇ aˬ hto‸ ma kanˉ gʼa te tuˬ ve le, teh‸ yawˇ hta‸ na nyi ve yoˬ.

13Gʼuiˬsha ve mvuhˇ naw tcuh yaˇ yawˇ hta‸ kʼaw‸ yaw hkʼaw‸ leh kʼoˆ ve, Nawˬ miˇ ma lehˬ, ngaˬ kʼoˆ laˇ taˬ peuˬ ve teˇ hpaˍ hta‸ hkʼa deh‸ na yuˬ leh gʼa te tuˬ yoˬ. 14A pehˉ meuˇ te awˬ hkʼaw lo tawˆ la ve awˬ ceuˬ teˇ hpaˍ hta‸ yawˇ maˇ gʼa caˇ. A pehˉ meuˇ gʼuiˬ leh tzuhˬ hta‸ ka‸ maˇ gʼa dawˬ. Cha‸ chiˆ ve awˬ ceuˬ hta‸ htawˇ maˇ gʼa caˇ. Ngaˬ yawˇ hta‸ kʼoˆ piˇ taˍ peuˬ ve awˬ ceuˬ hkʼa peu-eˬ hta‸ yawˇ na yuˬ leh gʼa te ve yoˬ, teh‸ yawˇ hta‸ kʼoˆ piˇ ve yoˬ.

15Chaw oˇ ve lehˬ Gʼuiˬsha ve mvuhˇ naw tcuh yaˇ hpeh‸ ve hta‸ Maˍnawˍ maˇ shiˍ. Hkʼe te leh, yawˇ chaw oˇ ve hta‸ kʼoˆ piˇ ve, Awˬ bon te leh a ciˉ taˇ tawˆ kʼai laˇ sheˍ. Ngaˬ hui nawˬ awˬ pon aˉ che‸ ehˉ teˇ hkeh tiˇ leh awˍ chiˇ te laˇ shaˍ, teh‸ yawˇ hta‸ kʼoˆ piˇ ve yoˬ.

16Ya‸ hkʼaˇ, mvuhˇ naw tcuh yaˇ kʼaw‸ yaw hkʼaw‸ leh kʼoˆ ve, Ngaˬ chehˇ taˍ ve htawˇ, nawˬ ve caˇ tuˬ hta‸ caˇ tuˬ ve maˇ heˆ. Ya‸ hkʼaˇ, nawˬ caˇ tuˬ gu gaˇ ve kʼo, hkʼa deh‸ gu leh Gʼuiˬsha hta‸ tuˉ tanˇ piˇ-oˆ, teh‸ yawˇ hta‸ kʼoˆ piˇ ve yoˬ. 17Oˇ htaˇ Maˍnawˬ lehˬ, Nawˬ kʼoˆ laˇ taˍ ve awˬ ceuˬ oˇ ve teˇ hpaˍ awˬ tehˬ awˬ na biˇ la ve teˇ yanˇ, ngaˬ hui nawˬ hta‸ taˍ uiˍ taˍ mvuh hpeh‸ tuˬ, nawˬ ve awˬ meh ngaˬ hui hta‸ a ciˉ hto laˇ-oˆ, teh‸ mvuhˇ naw tcuh yaˇ hta‸ kʼoˆ piˇ ve yoˬ.

18Oˇ htaˇ mvuhˇ naw ma tcuh yaˇ lehˬ, Aˬ hto‸ ma pa taw nawˬ ngaˬ ve awˬ meh hta‸ shiˍ gaˇ ve le. Oˇ ve lehˬ, anˇ tuˬ uiˍ ve awˬ meh hpeh‸ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

19Hkʼe te leh Maˍnawˍ lehˬ, aˉ che‸ ehˉ leh caˬ hkʼa hta‸ yuˬ leh tuˉ tanˇ kuiˬ hkʼoˆ Gʼuiˬsha hta‸ tuˉ tanˇ piˇ ve yoˬ. 20Tuˉ tanˇ kuiˬ hkʼoˆ ve mvuhˇ hkʼawˇ teˇ hpaˍ mvuhˇ naw ma hkʼoˆ lo taˆ-e chehˇ ve teˇ yanˇ, mvuhˇ naw tcuh yaˇ oˇ ve htawˇ, mvuhˇ hkʼawˇ geh taˆ-e chehˇ ve hta‸ yawˇ huiˉ maˬ gʼa mawˬ ve yoˬ. Oˇ htaˇ, Yawˇ huiˉ maˬ miˬ chaˇ hkʼoˆ boˆ taˍ ve yoˬ. 21Oˇ ve teˇ nyi hta‸ te leh, Maˍnawˍ leh yawˇ ve awˬ miˇ ma lehˬ, mvuhˇ naw tcuh yaˇ hta‸ teˇpawˆ ka‸ maˇ gʼa kʼaw‸ mawˬ ve yoˬ. Chaw oˇ ve lehˬ, Gʼuiˬsha ve mvuhˇnaw tcuh yaˇ hpeh‸ ve hta‸ Maˍnawˍ shiˍ la ve yoˬ.

22Oˇ htaˇ Maˍnawˍ lehˬ, Ngaˬ huiˉ maˬ Gʼuiˬsha hta‸ gʼa mawˬ peuˬ ve pa taw gʼa suh tuˬ yoˬ, teh‸ yawˇ ve awˬ miˇ ma hta‸ kʼoˆ piˇ ve yoˬ.

23Ya‸ hkʼaˇ yawˇ ve awˬ miˇ ma kʼoˆ ve, Gʼuiˬsha lehˬ ngaˬ huiˉ maˬ hta‸ tiˇ pehˍ gaˇ ve nyi ma cawˬ ve hkʼe kʼo, ngaˬ huiˉ maˬ ve tuˉ tanˇ tuˬ hta‸ ha‸ yuˬ laˇ tuˬ ve maˇ heˆ. Awˬ ceuˬ chi ve teˇ hpaˍ htawˇ, ngaˬ huiˉ maˬ hta‸ hpeu‸ maˍ laˇ tuˬ ve maˇ heˆ, teh‸ yawˇ ve awˬ hpawˇ hta‸ kʼoˆ piˇ ve yoˬ.

24Yaˇ miˇ oˇ ve yaˇ paˍ teˇ gʼaˇ paw la leh, yawˇ hta‸ Sanˍsonˍ teh‸ meh piˇ ve yoˬ. Yaˇ paˍ oˇ ve uiˍ la leh, Gʼuiˬsha yawˇ hta‸ awˬ bon na‸ piˇ ve yoˬ. 25Yawˇ lehˬ, Zawˇraˆ leh Eˇshaˍtawˇlaˆ venˇ awˬ kaˍ lo cawˬ ve Danˍ ve aˉ po kʼo hkʼaw chehˇ taˍ htaˇ, Gʼuiˬsha ve kanˇ paˆ yawˇ hta‸ awˬ gʼaˇ uiˍ la piˇ ve yoˬ.

Currently Selected:

Suhˉ jehˬ ve li‸ 13: LHBE

Highlight

Copy