Awˬ hkuiˉ puiˍ ve li‸ 31

Yaˍkoˆ Laˍbanˍ geh tawˆ kʼai ve

1Oˇ htaˇ Laˍbanˍ ve yaˇ teˇ hpaˍ lehˬ, Ngaˬ hui awˬ pa ve mawˇ jeˬ hkʼa peu-eˬ hta‸ Yaˍkoˆ yuˬ kʼai peuˬ. Yawˇ geh hkʼa cawˬ taˍ ve mawˇ teˇ hpaˍ lehˬ, ngaˬ hui awˬ pa ve mawˇ jeˬ deˇ deˇ hpeh‸ ve yoˬ, teh‸ kʼoˆ da‸ chehˇ ve awˬ hkawˇ hta‸ Yaˍkoˆ gʼa kaˇ ve yoˬ. 2Laˍbanˍ lehˬ, ponˬ laˬ htaˇ hkʼa shuˍ yawˇ hta‸ awˬ chawˇmaˇ te laˇ ve hta‸ htawˇ yawˇ gʼa mawˬ ve yoˬ. 3Oˇ htaˇ Gʼuiˬsha Yaˍkoˆ hta‸ kʼoˆ piˇ ve, Nawˬ viˉ nawˬ nyi leh nawˬ pa hui chehˇ taˍ ve mvuhˇmiˬ lo kʼaw‸ kʼo‸-e loˬ. Ngaˬ nawˬ geh chehˇ tuˬ yoˬ, teh‸ kʼoˆ piˇ ve yoˬ.

4Hkʼe te leh Yaˍkoˆ lehˬ, Raˍhkeˍlaˆ leh Leˇ-aˍ hta‸ yawˇ ceˇ hawˉ chehˇ taˍ kuiˬ heh puiˉ hkʼaw lo kuˬ yuˬ leh yawˇ huiˉ maˬ hta‸ kʼoˆ piˇ ve, 5Nawˬ huiˉ maˬ ve awˬ pa lehˬ ponˬ laˬ htaˇ hkʼe ngaˬ hta‸ awˬ chawˇ maˇ te laˇ-o law. Ya‸ hkʼaˇ, ngaˬ pa ve Gʼuiˬsha lehˬ ngaˬ geh chehˇ taˍ ve yoˬ. 6Ngaˬ lehˬ, nawˬ huiˉ maˬ ve awˬ pa hta‸ puiˉ ve hpeh‸ ve hkʼe kanˉ hkʼa deh‸ te piˇ taˍ ve hta‸ nawˬ huiˉ maˬ htawˇ shiˍ taˍ ve yoˬ. 7Ya‸ hkʼaˇ, yawˇ ngaˬ hta‸ teˇ chi pawˆ hkʼa gaˬ heˍ laˇ ve yoˬ. Yawˇ ngaˬ hta‸ te luˬ tuˬ Gʼuiˬsha a hkaw-anˬ maˇ piˇ. 8Laˍbanˍ lehˬ, Ga‸-ehˍ ve aˉ che‸ teˇ hpaˍ lehˬ nawˬ gʼa cawˇ ve ceˇ hpeh‸ ve yoˬ, teh‸ kʼoˆ ve teˇ yanˇ, ceˇ oˇ ve hkʼa peu-eˬ ga‸-ehˍ ve awˬ yehˇ ceh tiˉ paw la ve yoˬ. Yawˇ lehˬ, Awˬ hkʼaˇ cawˬ ve aˉ che‸ teˇ hpaˍ nawˬ gʼa cawˇ ve ceˇ hpeh‸ ve yoˬ, teh‸ kʼaw‸ kʼoˆ ve teˇ yanˇ, ceˇ oˇ ve teˇ hpaˍ lehˬ awˬ hkʼaˇ cawˬ ve awˬ yehˇ ceh tiˉ kʼaw‸ paw la ve yoˬ. 9Oˇ hkʼe te leh Gʼuiˬsha lehˬ, nawˬ huiˉ maˬ ve awˬ pa ve ceˇ teˇ hpaˍ hta‸ yuˬ leh ngaˬ hta‸ piˇ laˇ ve yoˬ.

10Ceˇ oˇ ve teˇ hpaˍ awˬ shawˍ chaw chehˇ ve teˇ yanˇ, zuh‸ maˆ ve awˬ hkʼaw lo ngaˬ chiˇ nyi hkʼa leh, awˬ paˍ teˇ hpaˍ lehˬ ga‸-ehˍ ve leh awˬ hkʼaˇ cawˬ ve hta‸ ngaˬ gʼa mawˬ ve yoˬ. 11Zuh‸ maˆ ve hkʼaw Gʼuiˬsha ve mvuhˇ naw tcuh yaˇ ngaˬ hta‸, Yaˍkoˆ-oˬ, teh‸ kuˬ laˇ leh, Ngaˬ chehˇ taˍ ve yoˬ, teh‸ kʼaw‸ kʼoˆ piˇ ve teˇ yanˇ yawˇ kʼoˆ ve, 12Chiˇ nyi sheˬ. Awˬ shawˍ chaw chehˇ ve awˬ paˍ oˇ ve hkʼa peu-eˬ lehˬ, ga‸-ehˍ ve leh awˬ hkʼaˇ cawˬ ve ceˇ teˇ hpaˍ hpeh‸ ve yoˬ. Nawˬ hta‸ Laˍbanˍ hkʼaˬ hkʼe te piˇ chehˇ ve hta‸ ngaˬ gʼa mawˬ peuˬ. 13Ngaˬ lehˬ, Beˍteˍlaˆ lo nawˬ haˉ pui shiˍ hta‸ naˍ manˇ pfuhˍ leh ka ti‸ te ve chehˇ kuiˬ lo nawˬ geh laˬ ve Gʼuiˬsha hpeh‸ ve yoˬ. Chi beu‸ nawˬ paw la kuiˬ mvuhˇmiˬ lo kʼaw‸ kʼo‸-e loˬ, teh‸ ngaˬ hta‸ kʼoˆ laˇ ve yoˬ, teh‸ yawˇ huiˉ maˬ hta‸ kʼoˆ piˇ ve yoˬ.

14Oˇ htaˇ Raˍhkeˍlaˆ leh Leˉ-aˍ yawˇ hta‸ kʼoˆ piˇ ve, Ngaˬ huiˉ maˬ awˬ pa geh gʼa tuˬ ve awˬ shinˉ te‸ chiˉ maˇ cawˬ. 15Yawˇ lehˬ, ngaˬ huiˉ maˬ hta‸ shu mvuhˇmiˬ chaw hkʼe shawˍ laˇ taˍ peuˬ. Yawˇ ngaˬ huiˉ maˬ hta‸ hawˇ baˬ leh gʼa ve hpu hta‸ htawˇ yehˇ baˬ peuˬ. 16Ngaˬ huiˉ maˬ ve awˬ pa geh Gʼuiˬsha yuˬ hkʼaw‸ taˍ ve mawˇ jeˬ teˇ hpaˍ lehˬ, ngaˬ hui leh ngaˬ hui ve yaˇ teˇ hpaˍ hpeh‸ ve yoˬ. Chi hta‸ pa taw, Gʼuiˬsha kʼoˆ ve hkʼe te-o, teh‸ kʼoˆ ve yoˬ.

17Oˇ htaˇ, Yaˍkoˆ lehˬ yawˇ ve yaˇ teˇ hpaˍ leh yawˇ ve awˬ miˇ ma teˇ hpaˍ hta‸ kaˍlaˍoˆ hkʼoˆ ciˇ tcuh ve yoˬ. 18Meˍsoˆpoˇtaˍmiˆ mvuhˇmiˬ hkʼaw yawˇ hkʼa ca gʼa taˍ ve ceˇ hkʼa peu-eˬ hta‸ gʼa‸ veu leh, yawˇ awˬ pa geh Hkaˍnanˍ mvuhˇmiˬ lo kʼo‸-e ve yoˬ. 19Laˍbanˍ lehˬ, yawˬ mvuh nuˆ tuˬ aˉ hkʼaw lo tawˆ kʼai ve teˇ yanˇ, Raˍhkeˍlaˆ lehˬ yawˇ awˬ pa ve shaˉ ho‸ teˇ hpaˍ hta‸ hkʼawˇ yuˬ ve yoˬ. 20Yaˍkoˆ lehˬ, Laˍbanˍ hta‸ maˇ hto piˇ leh ta‸ iˉ gawˬ lehˍ tawˆ kʼai ve yoˬ. 21Yawˇ lehˬ Uˉhpaˍraˆ iˉ kaˆ lawˬ hta‸ hkanˍ leh Giˇlaˆ mvuhˇmiˬ hpawˇ lo kʼai ve yoˬ.

Laˍbanˍ Yaˍkoˆ hta‸ gʼa‸ yuˬ ve

22Shehˆ nyi ponˬ peuˬ hkʼaw‸ nawˉ, Yaˍkoˆ hpaw kʼai peuˬ ve awˬ hkawˇ hta‸ Laˍbanˍ gʼa kaˇ ve yoˬ. 23Oˇ htaˇ, yawˇ lehˬ yawˇ ve chaw teˇ hpaˍ hta‸ shiˍ leh Yaˍkoˆ hkʼaˇ suh gʼa‸ yuˬ kʼai ve yoˬ. Suhˍ nyi gaˬ htaˇ, yawˇ Yaˍkoˆ hta‸ Giˇlaˆ hkʼaw hkʼoˆ lo gʼa‸ mi ve yoˬ. 24Ya‸ hkʼaˇ, oˇ ve teˇ haˉ zuh‸ maˆ ve hkʼaw Gʼuiˬsha Laˍbanˍ geh laˬ leh, Nawˬ Yaˍkoˆ hta‸ maˇ gʼa ho piˇ tuˬ shaˍ ti‸ taˍ-o‸, teh‸ yawˇ hta‸ kʼoˆ piˇ ve yoˬ. 25Yaˍkoˆ lehˬ, Giˇlaˆ hkʼaw hkʼoˆ lo chehˇ taˍ ve yoˬ. Laˍbanˍ htawˇ, yawˇ ve chaw teˇ hpaˍ geh Giˇlaˆ hkʼaw hkʼoˆ lo deh chehˇ taˍ ve yoˬ.

26Oˇ htaˇ, Laˍbanˍ Yaˍkoˆ hta‸ kʼoˆ piˇ ve, Nawˬ hkʼaˬ hkʼe te ve le. Aˬ hto‸ ma pa taw, ngaˬ yaˇ miˇ teˇ hpaˍ hta‸ ma‸ bawˆ kuiˬ lo hpeh gʼa ve canˇ paˍ teˇ hpaˍ hkʼa shuˍ shiˍ kʼai ve le. 27Aˬ hto‸ ma pa taw, ngaˬ hta‸ maˇ hto taˉ laˇ leh ta‸ iˉ gawˬ lehˍ hkʼawˇ hpaw-e ve le. Nawˬ hpaw-e tuˬ ngaˬ hta‸ hto laˇ ve hkʼe kʼo, nawˬ awˬ pon pawehˇ te laˇ leh ha lehˬ ha kʼa kʼo‸-e peu laˇ tuˬ yoˬ. 28Ngaˬ ve yaˇ miˇ teˇ hpaˍ leh ngaˬ ve awˬ hawehˍ teˇ hpaˍ hta‸ boˆ nu piˇ tuˬ ka‸ nawˬ a hkaw-anˬ maˇ piˇ laˇ. Chi lehˬ nawˬ te ya‸ jaˇ ve yoˬ. 29Ngaˬ nawˬ hta‸ naˬ tuˬ te laˇ gaˇ ve kʼo te laˇ gʼa ve yoˬ. Ya‸ hkʼaˇ, aˉ nyi haˉ htaˇ nawˬ pa ve Gʼuiˬsha ngaˬ hta‸ tawˇ yaw laˇ leh, nawˬ hta‸ maˇ gʼa ho piˇ tuˬ shaˍ ti‸ piˇ laˇ ve yoˬ. 30Nawˬ lehˬ, chi beu‸ nawˬ pa hta‸ nyi ma haˍ jaˇ leh hpaw kʼo‸-e chehˇ ve hta‸ ngaˬ shiˍ ve yoˬ. Ya‸ hkʼaˇ, aˬ hto‸ ma pa taw ngaˬ ve shaˉ ho‸ teˇ hpaˍ hta‸ hkʼawˇ kʼai ve le, teh‸ kʼoˆ piˇ ve yoˬ.

31Oˇ htaˇ Yaˍkoˆ kʼaw‸ kʼoˆ ve, Nawˬ lehˬ nawˬ ve yaˇ miˇ teˇ hpaˍ hta‸ kʼaw‸ yuˬ hkʼaw‸ taˉ laˇ puiˉ-aˆ teh‸ kawˆ ve pa taw, chi hkʼe gʼa te hpaw la ve yoˬ. 32Ya‸ hkʼaˇ, nawˬ ve shaˉ ho‸ teˇ hpaˍ hta‸ hkʼawˇ yuˬ taˍ ve chaw hta‸ mawˬ ve kʼo, chaw oˇ ve gʼa suh tuˬ yoˬ. Chaw chi ma ve mehˆ gʼuˇ suhˍ lo hpfuhˆ nyi-o. Nawˬ ve mawˇ teˇ ceuˬ ceuˬ ngaˬ yuˬ taˍ ve cawˬ kʼo, nawˬ kʼaw‸ yuˬ hkʼaw‸ loˬ, teh‸ kʼoˆ piˇ ve yoˬ. Awˬ lawn kʼo, Raˍhkeˍlaˆ lehˬ shaˉ ho‸ oˇ ve teˇ hpaˍ hta‸ hkʼawˇ yuˬ taˍ ve hta‸ Yaˍkoˆ maˇ shiˍ.

33Hkʼe te leh, Laˍbanˍ lehˬ Yaˍkoˆ, Leˉaˍ leh yawˇ hui ve awˬ ceˬ ma nyiˇ gʼaˇ ve aˉ po kʼoˍ hkʼaw ca lo‸ nyi ve yoˬ. Ya‸ hkʼaˇ, yawˇ te‸ chiˉ ca hpfuhˆ maˇ mawˬ. Oˇ ve hkʼaw‸ nawˉ, yawˇ Raˍhkeˍlaˆ ve aˉ po kʼo hkʼaw kʼaw‸ lo‸-e ve yoˬ. 34Raˍhkeˍlaˆ lehˬ, shaˉ ho‸ oˇ ve teˇ hpaˍ hta‸ yuˬ leh kaˍlaˍoˆ awˬ lanˉ hkʼaw ca‸ keu peuˬ hkʼaw‸ nawˉ, oˇ ve awˬ hkʼoˆ lo taˆ mui taˍ ve yoˬ. Laˍbanˍ lehˬ yawˇ ve aˉ po kʼo hkʼaw ca hpfuhˆ nyi ve htawˇ te‸ chiˉ maˇ mawˬ. 35Oˇ htaˇ, Raˍhkeˍlaˆ yawˇ ve awˬ pa hta‸ kʼoˆ piˇ ve, Ngaˬ pa-oˬ, ngaˬ nawˬ mehˆ gʼuˇ suhˍ lo tu huˉ taˍ maˇ hpeh‸ ve hta‸ te‸ chiˉ taˇ dawˇ ya‸ laˇ. Ngaˬ lehˬ, chi beu‸ yaˇ miˇ awˬ liˇ laˬ chehˇ ve yoˬ, teh‸ kʼoˆ piˇ ve yoˬ. Laˍbanˍ lehˬ, yawˇ ve shaˉ ho‸ teˇ hpaˍ hta‸ teˇ kaˬ ka‸ ca hpfuhˆ maˇ mawˬ.

36Oˇ htaˇ, Yaˍkoˆ nyi ma zuhˆ leh kʼoˆ ve, Ngaˬ aˬ hto‸ ma teˇ ceuˬ te ya‸ ve le. Nawˬ ngaˬ hkʼaˇ suh gʼa‸ laˬ leh ngaˬ ve mawˇ teˇ hpaˍ hta‸ ca gʼa‸ hpfuhˆ nyi la ve ngaˬ aˬ hto‸ ma venˇbaˆ cawˬ le. 37Ngaˬ geh lo nawˬ ve mawˇ hkʼaˬ hkʼe ve teˇ ceuˬ gʼa mawˬ le. Ngaˬ ve chaw leh nawˬ ve chaw chi ma ve mehˆ gʼuˇ suhˍ mawˇ oˇ ve hta‸ yuˬ tawˆ la-o. Ngaˬ huiˉ maˬ a shu teˇ gʼaˇ cawˇ ve hta‸ yawˇ hui suhˉ jehˬ laˇ piˇ. 38Nyiˇ chi hkʼaw‸ hkʼa gaˬ ngaˬ nawˬ geh chehˇ taˍ ve yoˬ. Nawˬ ve yawˬ leh aˉ che‸ awˬ ma teˇ hkeh ka‸ awˬ yehˇ shawˆ-e ve maˇ cawˬ. Nawˬ ve yawˬ awˬ paˍ, aˉ che‸ awˬ paˍ teˇ hkeh hta‸ ka‸ ngaˬ maˇ tiˇ caˇ jaw. 39Haiˬ ve to nuˇ to shaˆ che‸ pehˍ taˍ ve ceˇ teˇ hkeh hta‸ ka‸, ngaˬ nawˬ geh maˇ gʼa yuˬ veu laˇ jaw. Hkʼa peu-eˬ hta‸ ngaˬ tiˉ hkanˍ shaiˍ taˍ ve yoˬ. Mvuhˇ law‸ kʼaw htaˇ maˇ kʼoˆ, mvuhˇ hpeu‸ htaˇ maˇ kʼoˆ, shu hkʼawˇ kʼai ve ceˇ awˬ pon ngaˬ ceh tiˉ gʼa kʼaw‸ shaiˍ chehˇ ve yoˬ. 40Mvuhˇ law‸ kʼaw htaˇ mvuhˇ cha chiˆ ve hta‸ maˇ kʼoˆ, mvuhˇ hpeu‸ htaˇ ciˍ gʼuiˬ nehˆ ve hta‸ maˇ kʼoˆ, ngaˬ gʼa hkanˍ taˉ peuˬ. Maˇ gʼa zuh‸ ve htawˇ laiˉ pawˆ cawˬ ve yoˬ.

41Chi hkʼe nyiˇ chi awˇ hkʼaw‸ hkʼa biˇ nawˬ geh chehˇ leh, nawˬ ve yaˇ miˇ nyiˇ gʼaˇ awˬ pon teˇ chi awˇ hkʼaw‸ leh nawˬ ve ceˇ teˇ hpaˍ awˬ pon hkaw‸ hkʼaw‸ awˬ ceˬ gʼa te taˉ peuˬ. Hkʼe ka‸, nawˬ ngaˬ hta‸ teˇ chi pawˆ hkʼa gaˬ heˍ laˇ ve yoˬ. 42Chi teˇ pawˆ htawˇ, Aˍbraˍhanˍ leh Iˉcaˆ ve Gʼuiˬsha ngaˬ geh maˇ chehˇ taˍ ve hkʼe kʼo, nawˬ ngaˬ hta‸ awˬ to kʼawˇ lehˍ kʼo‸-e tcuh laˇ tuˬ yoˬ. Ya‸ hkʼaˇ, Gʼuiˬsha lehˬ ngaˬ te taˍ ve kanˉ leh ngaˬ ve kawˆ tuˬ dawˇ haˍ tuˬ hta‸ gʼa mawˬ ve pa taw, aˉ nyi haˉ nawˬ geh laˬ leh nawˬ hta‸ tawˍ taˍ laˇ ve yoˬ, teh‸ kʼoˆ piˇ ve yoˬ.

Yaˍkoˆ leh Laˍbanˍ ka ti‸ te da‸ ve

43Oˇ htaˇ, Laˍbanˍ Yaˍkoˆ hta‸ kʼaw‸ kʼoˆ piˇ ve, Yaˇ miˇ chi teˇ hpaˍ lehˬ ngaˬ ve yaˇ miˇ hpeh‸ leh, yaˇ ehˉ chi teˇ hpaˍ htawˇ ngaˬ ve yaˇ ehˉ hpeh‸ ve yoˬ. Ceˇ chi teˇ hpaˍ htawˇ, ngaˬ ve deˇ deˇ hpeh‸ ve yoˬ. Nawˬ hkʼa gʼa mawˬ ve awˬ ceuˬ chi hkʼa peu-eˬ lehˬ ngaˬ ve mawˇ hpeh‸ ve yoˬ. Ngaˬ ve yaˇ miˇ chi teˇ hpaˍ leh, yawˇ hui ve yaˇ ehˉ chi teˇ hpaˍ hta‸ ngaˬ te‸ chiˉ te maˇ hpeh‸. 44Chi hta‸ pa taw, ngaˬ huiˉ maˬ awˬ kaˍ lo shaˉ hkiˆ hpeh‸ tuˬ, haˉ pui shiˍ gʼawˆ hpoˆ leh ka ti‸ te-a veuˬ, teh‸ kʼoˆ ve yoˬ.

45Hkʼe te leh, Yaˍkoˆ lehˬ haˉ pui shiˍ lonˉ teˇ shiˍ hta‸ yuˬ leh duˇ ti ve yoˬ. 46Oˇ hkʼe te peuˬ hkʼaw‸ nawˉ, yawˇ ve chaw teˇ hpaˍ hta‸ htawˇ haˉ pui shiˍ gʼawˆ hpoˆ tcuh leh haˉ pui hpoˆ oˇ ve awˬ paˇ lo yawˇ hui teˇ geh hti caˇ hti dawˬ ve yoˬ. 47Laˍbanˍ lehˬ, chehˇ kuiˬ oˇ ve hta‸ Yeˍgaˍtaˍhaˍduˍtaˆ #31:47 Chiˬlehˬ Aˍraˍmiˆ hkawˇ hpeh‸ leh haˉ pui hpoˆ shaˉ hkiˆ teh‸ kʼoˆ gaˇ ve yoˬ teh‸ meh piˇ leh, Yaˍkoˆ lehˬ Giˇlaˆ #31:47 Chi lehˬ Heˍbrehˇ hkawˇ hpeh‸ leh haˉ pui hpoˆ shaˉ hkiˆ teh‸ kʼoˆ gaˇ ve yoˬ teh‸ meh piˇ ve yoˬ. 48Oˇ htaˇ Laˍbanˍ lehˬ, Haˉ pui hpoˆ chi ve ngaˬ huiˉ maˬ awˬ kaˍ lo shaˉ hkiˆ hpeh‸ ve yoˬ, teh‸ kʼoˆ ve yoˬ. Chi hta‸ pa taw, chehˇ kuiˬ oˇ ve hta‸ Giˇlaˆ teh‸ meh ve yoˬ. 49Teˇ pawˆ pawˆ chehˇ kuiˬ oˇ ve hta‸ Miˆsaˍpaˍ #31:49 Chi lehˬ, nyi ha‸ shaˉ kuiˬ teh‸ kʼoˆ gaˇ ve yoˬ teh‸ ka‸ kʼoˆ ve yoˬ. Awˬ lawn kʼo Laˍbanˍ kʼoˆ ve, Ngaˬ huiˉ maˬ hpaˆ da‸ peuˬ hkʼaw‸ nawˉ, Gʼuiˬsha ngaˬ huiˉ maˬ hta‸ nyi ha‸ shaˉ laˇ piˇ-oˆ. 50Nawˬ lehˬ ngaˬ yaˇ miˇ teˇ hpaˍ hta‸ fawˉ mehˍ piˇ ve maˇ kʼoˆ, awˬ nu ve yaˇ miˇ hta‸ nawˬ kʼaw‸ heuˆ ve maˇ kʼoˆ, Gʼuiˬsha lehˬ ngaˬ huiˉ maˬ hta‸ ha‸ shaˉ laˇ chehˇ ve hta‸ dawˇ nawˇ-oˆ. 51Nawˬ leh ngaˬ huiˉ maˬ awˬ kaˍ lo te taˍ ve haˉ pui hpoˆ chi ve leh duˇ ti taˍ ve haˉ pui shiˍ chi ve hta‸ nyi-o. 52Ngaˬ lehˬ, nawˬ hta‸ te luˬ tuˬ haˉ pui hpoˆ chi ve oˇ hpawˇ lo kʼai tuˬ ve maˇ heˆ. Nawˬ htawˇ, ngaˬ hta‸ te luˬ tuˬ haˉ pui hpoˆ chi ve choˬ paˉ hpawˇ lo taˇ laˬ. Haˉ pui hpoˆ chi ve leh, haˉ pui shiˍ chi ve lehˬ shaˉ hkiˆ hpeh‸ ve yoˬ. 53Aˍbraˍhanˍ ve Gʼuiˬsha leh Naˍhkawˍ ve Gʼuiˬsha lehˬ, ngaˬ huiˉ maˬ awˬ kaˍ lo suhˉ jehˬ laˇ piˇ-oˆ, teh‸ kʼoˆ ve yoˬ. Yaˍkoˆ htawˇ, yawˇ awˬ pa oˉ kʼoˍ pui chehˇ ve Gʼuiˬsha ve awˬ meh hta‸ cuˇ leh oˇ hkʼe kʼoˆ hkanˍ ve yoˬ. 54Oˇ ve hkʼaw‸ nawˉ, yawˇ lehˬ Gʼuiˬsha hta‸ tuˉ tanˇ tuˬ yawˬ ehˉ hta‸ tiˇ pehˍ leh, hkʼaw oˇ ve hkʼoˆ yawˇ ve chaw teˇ hpaˍ geh teˇ geh hti caˇ hti dawˬ ve yoˬ. Hkʼe te leh, oˇ ve teˇ haˉ yawˇ hui teˇ geh haˉ ve yoˬ. 55Laˍbanˍ mvuhˇ shawˉ teˇ na‸ tu leh, yawˇ ve yaˇ miˇ leh yawˇ ve awˬ hawehˍ teˇ hpaˍ hta‸ boˆ nu taˉ peuˬ hkʼaw‸ nawˉ, yawˇ ve chehˇ kuiˬ lo kʼaw‸ kʼo‸-e ve yoˬ.

Currently Selected:

Awˬ hkuiˉ puiˍ ve li‸ 31: LHBE

Highlight

Copy